རྗེ་བཙུན་འཇམ་པའི་དབྱངས་ལ་དུས་ཐམས་ཅད་དུ་ཕྱག་འཚལ་ལོ། །རྗེ་བཙུན་ཆོས་ཀྱི་རྒྱལ་པོ་བཙོང་ཁ་པའི། །བཤད་སྒྲུབ་བསྟན་པའི་རྒྱལ་མཚན་འཛིན་པ་ལ། །དཔལ་ལྡན་འཕྲིན་ལས་བཟང་པོའི་དཔལ་མངའ་བ། །བཤེས་གཉེན་དམ་པའི་ཞབས་ལ་གསོལ་བ་འདེབས། །ངེས་འབྱུང་རྣམ་དག་འཆི་མེད་སྐྱེད་ཚལ་དུ། །འདུལ་བ་འབུམ་སྡེའི་འདབ་སྟོང་རབ་རྒྱས་ཤིང་། །རྣམ་དག་ཚུལ་ཁྲིམས་སྦྲང་རྩིས་ཉེར་གཏམས་པ། །ཐར་འདོད་བུང་བའི་གཉེན་ལ་གསོལ་བ་འདེབས། །མདོ་སྔགས་གཞུང་བརྒྱའི་ནམ་མཁའ་ཡངས་པ་ལ། །མཁྱེན་པའི་དཀྱིལ་འཁོར་ཆ་ཤས་ཡོངས་རྫོགས་ཤིང་། །སྔོན་མེད་ལེགས་བཤད་འོད་དཀར་དྲ་བ་ཅན། །མཁས་མཆོག་མཚན་མོའི་མགོན་ལ་གསོལ་བ་འདེབས། །འཆད་པས་ལེགས་བཤད་བདུད་རྩིའི་ཆར་འབེབས་ཤིང་། །རྩོད་པའི་གནམ་ལྕགས་རྒོལ་ངན་བྲག་རི་འཇོམས། །སྡེབ་ལེགས་རྩོམ་པའི་འབྲུག་གི་གད་རྒྱངས་ཅན། །ཕྱོགས་ལས་རྣམ་(༦༢ན)རྒྱལ་ཁྱོད་ལ་གསོལ་བ་འདེབས། །རྒྱུ་སྐར་དབུས་ན་མཚན་མོའི་མགོན་པོ་དང་། །རི་དྭགས་ཁྲོད་ན་གདོང་ལྔའི་དབང་པོ་བཞིན། །མཁས་མང་དབུས་ན་འགྲན་པའི་ཟླ་བྲལ་བ། །བསྟན་པའི་དཔལ་གྱུར་ཁྱོད་ལ་གསོལ་བ་འདེབས། །རྒྱ་ཆེན་མང་ཐོས་རྒྱ་མཚོའི་འཇིང་ན་གནས། །ཚུལ་བཞིན་སེམས་པའི་རིན་ཅེན་ཁམས་ལས་གྲུབ། །བསྒོམས་བྱུང་རྟོགས་པའི་བང་རིམ་མངོན་པར་མཐོ། །བསྔགས་འོས་དམ་པའི་མགོན་ལ་གསོལ་བ་འདེབས། །དེ་ལྟར་བསྟོད་པས་འགྲོ་བ་མ་ལུས་པ། །ཐེག་མཆོག་དགེ་བའི་བཤེས་ཀྱི་མགོན་དང་བཅས། །ཐུབ་པའི་དགོངས་ཟབ་རྒྱ་མཚོར་ལེགས་ཞུགས་ནས། །རྣམ་གྲོལ་ནོར་བུའི་དཔལ་ལ་སྤྱོད་གྱུར་ཅིག །ཚུལ་འདི་རིགས་རུས་ཕུན་ཚོགས་རྣམ་དཔྱོད་ཅན། །མཛོ་མཁར་དབོན་པོ་བསོད་ནམས་མཚན་ཅན་གྱིས། །ནན་གྱིས་བསྐུལ་ཕྱིར་དཔལ་ལྡན་འབྲས་སྤུངས་སུ། །དགེ་འདུན་རྒྱ་མཚོའི་འཇུག་ངོགས་ལས་འོངས་སོ། །

                                                                          རྩོམ་སྒྲིག་པ། ཀླུ་ཚང་འཇམ་དབྱངས་ཤེས་རབ།
     གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་      པོར་དགོད་པར་ཞུ།
             དྲ་བའི་སྦྲེལ་ཐགhttp://www.tb1025.cn
ངེད་དགེ་ལུགས་པའི་དྲ་བ། རྗེ་དགེ་འདུན་རྒྱ་མཚོ།