ངག་དབང་ལྷ་མོ་དབྱངས་ཅན་མ་ལ་ཕྱག་འཚལ་ལོ། །འགྲོ་ཀུན་སྐལ་ལྡན་ཤིང་རྟའི་དུ་གུ་(༥༦བ)ལ། །ཞབས་སེན་བནྟུ་ཛི་བའི་ཕུན་ཚོགས་དང་། །རབ་འགྲོགས་སྲིད་འདིར་འཆི་མེད་ཕྱོགས་ཀུན་ལས། །རྣམ་པར་རྒྱལ་བའི་རྒྱལ་མཚན་འདི་མཛེས་སོ། །དཔལ་སྟུག་དབྱར་སྐྱེས་མངལ་ལས་ལེགས་ཐོན་པའི། །ཇི་སྙེད་ཉལ་འགྲོ་བསགས་པ་ཆུ་གླང་བདག །མ་ལུས་མགྲིན་པའི་ཕུག་ན་ངལ་གསོ་བ། །འདི་ཡིས་སྦྱིན་མའི་བུ་དག་འདར་སྙམ་སེམས། །དྲི་ཟ་ཅན་གང་རོ་འཛིན་རྡུལ་ཕྲ་བ། །རེ་རེའང་དབྱངས་ཅན་ངང་མོའི་ཕང་ཕུང་ལ། །སྙན་དངགས་ཕང་འགྲོ་ལེན་ནོ་མན་ནེ་ཀ །འདི་ལས་གཞན་ན་གཉིས་པ་གཞན་སུ་ཞིག །ཕན་བདེའི་འོད་སྟོང་དང་པོར་གང་འགྲོགས་པ། །བདེ་སོགས་རྩེ་དགའི་གནས་དེ་འདི་ཉིད་དེ། །རིག་གནས་རྣམ་བཀྲའི་གཞའ་བཀྲ་གང་ཆགས་པ། །མཐའ་དབུས་ཀུན་བྲལ་རོལ་གནས་ཨེ་མའོ་མཚན། །རྣམ་བཅས་རི་སྲས་ལང་ཚོ་ལ་ཞུགས་པ། །འཕོ་མེད་བདེ་བས་ལས་ཀྱི་མགྱོགས་འགྲོ་ཀུན། །རྒྱུན་བཅད་རྣམ་མེད་དབྱིངས་ལ་རྟག་རོལ་བ། །བྱང་ཆུབ་སེམས་ཀྱི་ཟླ་ཤེལ་སྤྱི་བོར་མཛེས། །ཐུབ་གཞུང་བཤོལ་མེད་མཛེས་པ་ལ་ཆགས་པས། །ཉེར་བསྐྲུན་མཁྱེན་ཡངས་འདྲེན་བྱེད་སྟོང་མངའ་བ། །འཆི་མེད་ཆོས་ཀྱི་རྒྱལ་སྲིད་དཔལ་ལྡན་པ། །ཐུབ་བསྟན་སྐབས་གསུམ་བདག་པོ་ཁྱོད་ཕྱག་འཚལ། །ཚོགས་གཉིས་བདུད་རྩིའི་འབྱུང་གནས་ཡོན་ཏན་གྱི། །མུ་ཏིག་ཚོགས་རྣམས་སྡེབ་ལེགས་སྙན་དངགས་ཀྱི། །སྲད་བུ་ཆ་ཤས་ཙམ་ཞིག་བཀོད་པས་ཀྱང་། །འགྲོ་ཀུན་ཐེག་མཆོག་མགོན་དང་མི་འབྲལ་ཤོག །ཅེས་བོ་དོང་ཕྱོགས་ལས་རྣམ་རྒྱལ་ལ་(༥༧ན)བསྟོད་པ་འདི་ནི་བོ་དོང་གི་མཁས་པ་དགེ་འདུན་དོན་གྲུབ་གྱིས་བསྐུལ་བའི་ངོར་སྙན་དངགས་མཁན་ཐམས་ཅད་ཀྱི་གཙུག་གི་ནོར་བུས་སྨྲས་པའི་ཡི་གེ་པ་ནི་ཆོས་ཀྱི་དཔལ་འབྱོར་ལེགས་སོ།། །།

                                                                                  རྩོམ་སྒྲིག་པ། ཀླུ་ཚང་འཇམ་དབྱངས་ཤེས་རབ།
 གསལ་འདེབས།
         རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                དྲ་བའི་སྦྲེལ་ཐགhttp://www.tb1025.cn
ངེད་དགེ་ལུགས་པའི་དྲ་བ། རྗེ་དགེ་འདུན་རྒྱ་མཚོ།