དུས་གསུམ་རྒྱལ་བ་ཀུན་གྱི་མཁྱེན་བརྩེ་ནི། །གཅིག་བསྡུས་ལྷ་མིའི་སྟོན་པ་འོད་དཔག་མེད། །བཤེས་གཉེན་ཚུལ་བཟུང་ལྔ་བརྒྱའི་གཙུག་གི་རྒྱན། །དཔལ་ལྡན་ཨ་ཏི་ཤ་ལ་གསོལ་བ་འདེབས། །བདེ་ཆེན་ཆོས་སྐུའི་ངང་ལས་མ་གཡོས་ཀྱང་། །གང་ལ་གང་འདུལ་སྤྲུལ་པ་སྣ་ཚོགས་ཀྱིས། །འགྲོ་བའི་དོན་མཛད་མགོན་པོ་སྤྱན་རས་གཟིགས། །རྒྱལ་བའི་འབྱུང་གནས་ཞབས་ལ་གསོལ་བ་འདེབས། །རབ་འབྱམས་རྒྱལ་བའི་གདུང་འཚོབ་བློ་བཟང་ཞེས། །གྲགས་པའི་བ་དན་སྲིད་པ་གསུམ་ན་གཡོ། །བསླུ་མེད་གཏན་གྱི་སྐྱབས་མཆོག་བཙོང་ཁ་(༥༢བ)པ། །བློ་བཟང་གྲགས་པའི་དཔལ་ལ་གསོལ་བ་འདེབས། །བསླབ་གསུམ་རྣམ་དག་དགེ་འདུན་ཀུན་གྱི་གཙོ། །གྲུབ་པ་མཆོག་བརྙེས་ཐུབ་བསྟན་རྒྱ་མཚོའི་དཔལ། །འཕྲིན་ལས་བཟང་པོ་ས་གསུམ་གདུལ་བྱའི་གཉེན། །སྤྲུལ་སྐུ་ཐམས་ཅད་མཁྱེན་ལ་གསོལ་བ་འདེབས། །ཡབ་སྲས་བླ་མ་རྣམས་ཀྱི་ཐུགས་རྗེ་དང་། །བདག་གི་དུས་གསུམ་བསགས་པའི་དགེ་ཚོགས་ཀྱིས། །འདི་ནས་བདག་ནི་འཆི་བའི་དུས་ཀྱི་ཚེ། །སྐྱོབ་པ་འོད་དཔག་མེད་པ་སྲས་དང་བཅས། །མངོན་སུམ་མཐོང་ཞིང་མི་ཕྱེད་དད་པ་ཐོབ། །དག་པའི་སྣང་བ་རྒྱ་ཆེན་སྙིང་ལ་ཤར། གཟུངས་དང་མངོན་ཤེས་རྫུ་འཕྲུལ་ཆེར་ཐོབ་ནས། །བདེ་བ་ཅན་དུ་རིངས་པ་ཚུར་ཤོག་ཅེས། །འདྲེན་པ་མཆོག་གི་གསུང་གིས་དབུགས་ཕྱུང་ནས། །བདེ་བ་ཅན་དུ་རིན་ཅེན་པདྨོ་ལས། །ཐེག་ཆེན་རིགས་ཀྱི་དབང་པོ་ཆེས་རྣོ་བར། །སྐྱེས་མ་ཐག་ཏུ་རྒྱལ་བ་འོད་དཔག་མེད། །མངོན་སུམ་མཐོང་ཞིང་ཐེག་མཆོག་བདུད་རྩི་ལ། །འདོད་དགུར་སྤྱོད་པ་ཉིད་དུ་བདག་གྱུར་ཅིག །རྩ་བརྒྱུད་བླ་མ་རྣམས་ཀྱི་བྱིན་རླབས་དང་། །བསླུ་མེད་དཀོན་ཅོག་གསུམ་གྱི་མཐུ་སྟོབས་དང་། །བདག་གི་རྣམ་དཀར་དགེ་བའི་མཐུ་ཉིད་ལས། །ཇི་ལྟར་སྨོན་པ་ཡིད་བཞིན་འགྲུབ་པར་ཤོག །ཅེས་པ་འདི་ནི་ཚ་བ་གྲུ་པའི་ཆོས་མཛད་མས་བསྐུལ་ནས་དགེ་འདུན་རྒྱ་མཚོའི་དཔལ་གྱིས་སྨྲས་པའོ།། །།

སྟོན་པ་མཉམ་མེད་ཀུན་མཁྱེན་ཤཱཀྱའི་གཙོ། །དྲན་པས་ཚེ་ཡི་མཆོག་སྩོལ་ཚེ་དཔག་མེད། །དུག་གསུམ་ནད་སེལ་སྨན་པའི་རྒྱལ་པོ་སྟེ། །སྐུ་གསུམ་ལྷུན་གྲུབ་རྣམས་ཕྱག་འཚལ་ལོ། །རྒྱལ་བའི་(༥༣ན)ཡབ་གཅིག་རྗེ་བཙུན་མི་ཕམ་མགོན། །མི་ཤེས་མུན་པ་ཀུན་སེལ་འཇམ་པའི་དབྱངས། །ཐུགས་རྗེའི་མངའ་བདག་འཕགས་མཆོག་སྤྱན་རས་གཟིགས། །ས་བཅུའི་དབང་ཕྱུག་རྣམས་ལ་ཕྱག་འཚལ་ལོ། །འཇིགས་པ་བརྒྱད་སྐྱོབ་རྗེ་བཙུན་སྒྲོལ་མ་དང་། །ཤེས་རབ་སྣང་བ་མཆོག་སྩོལ་དབྱངས་ཅན་མ། །རྒྱལ་བའི་བསྟན་སྲུང་དམག་ཟོར་རྒྱལ་མོ་སོགས། །ཞི་ཁྲོ་ལྷ་མོའི་ཚོགས་ལ་ཕྱག་འཚལ་ལོ། །ལྔ་བརྒྱའི་གཙུག་རྒྱན་དཔལ་ལྡན་ཨ་ཏི་ཤ །གངས་ཅན་འགྲོ་བའི་མགོན་པོ་རྒྱལ་བ་འབྲོམ། །རིགས་གསུམ་མགོན་པོའི་རྣམ་སྤྲུལ་སྐུ་མཆེད་གསུམ། །བཀའ་གདམས་བརྒྱུད་པ་རྣམས་ལ་ཕྱག་འཚལ་ལོ། །རིག་གྲོལ་གཉིས་ལྡན་དགེ་འདུན་ཀུན་གྱི་གཙོ། །གྲུབ་པ་མཆོག་བརྙེས་ཐུབ་བསྟན་རྒྱ་མཚོའི་དཔལ། །འཕྲིན་ལས་བཟང་པོས་འགྲོ་ཀུན་བདེ་ལ་འགོད། །ཐམས་ཅད་མཁྱེན་པའི་ཞབས་ལ་ཕྱག་འཚལ་ལོ། །སྐྱབས་གནས་དམ་པ་རྣམས་ཀྱི་ཐུགས་རྗེ་ཡིས། །ཚེ་རིང་ནད་མེད་བསམ་པའི་དོན་ཀུན་འགྲུབ། །ཕྱི་མ་དགའ་ལྡན་གནས་སུ་ལེགས་སྐྱེས་ནས། །མི་ཕམ་ཞབས་དྲུང་ཆོས་ལ་སྤྱོད་པར་ཤོག །ཅེས་པ་ཡང་རྗེ་ཉིད་ཀྱིས་མཛད་པའོ།། །།

                              རྩོམ་སྒྲིག་པ། ཀླུ་ཚང་འཇམ་དབྱངས་ཤེས་རབ།

        གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

           དྲ་བའི་སྦྲེལ་ཐགhttp://www.tb1025.cn