ལྷན་སྐྱེས་བདེ་བའི་རང་བཞིན་ཆོས་ཀྱི་སྐུ། །དབང་པོའི་གཞུ་ལྟར་དྭངས་པའི་ལོངས་སྤྱོད་རྫོགས། །གང་འདུལ་ཅིར་ཡང་འཆར་(༤༧ན)བ་སྤྲུལ་པའི་སྐུ། ཁྱབ་བདག་རྡོ་རྗེ་འཆང་ལ་གསོལ་བ་འདེབས། །ངེས་དོན་ཡིད་བཞིན་རྒྱ་མཚོར་དབང་སྒྱུར་ཞིང་། །གཉིས་མེད་རྟོགས་པའི་ཡེ་ཤེས་མདའ་བོ་ཆེས། །སྲིད་གསུམ་རྨོངས་པའི་དགྲ་སྡེ་ལས་རྒྱལ་བ། །འཕགས་མཆོག་ཀླུ་སྒྲུབ་ཞབས་ལ་གསོལ་བ་འདེབས། །རང་བྱུང་ལྷན་ཅིག་སྐྱེས་པའི་ཉི་འོད་ཀྱིས། །སྟོང་ཉིད་མཁའ་དབྱིངས་མཛེས་མར་རྟག་རོལ་ཡང་། །མི་འདྲའི་རྣམ་འཕྲུལ་དུ་མའི་ཟློས་གར་མཁན། །གྲུབ་མཆོག་རི་ཁྲོད་ཞབས་ལ་གསོལ་བ་འདེབས། །དཔལ་ལྡན་བྱང་ཆུབ་སེམས་ཀྱི་ལུས་སྟོབས་རྒྱས། །རྟེན་འབྲེལ་རིགས་པའི་གང་རྒྱངས་མི་བཟད་པས། །དངོས་འཛིན་རི་དྭགས་ཚོགས་ཀྱི་སྲོག་འཕྲོག་པ། །སྨྲ་བའི་སེང་གེ་མཆོག་ལ་གསོལ་བ་འདེབས། །དམ་པ་དུ་མའི་ཐུགས་ཀྱི་ཆུ་གཏེར་ལས། །དད་བརྩོན་དེད་དཔོན་མཆོག་གིས་ལེགས་བསྒྲུབས་པའི། །བློ་གྲོས་བང་མཛོད་མན་ངག་རིན་ཅེན་གཏེར། །འགྲོ་བའི་རེ་འདོད་སྐོང་ལ་གསོལ་བ་འདེབས། །ཕན་བདེའི་ལོ་ཐོག་སྐྱེད་པའི་འཛིན་མ་སྟེ། །དངོས་གྲུབ་འདོད་དགུའི་འབྱུང་གནས་ཡིད་བཞིན་ནོར། །ལེགས་བཤད་བདུད་རྩིའི་ཆར་འབེབས་ཆོས་ཀྱི་སྤྲིན། །རྩ་བའི་བླ་མ་མཆོག་ལ་གསོལ་བ་འདེབས། །དམིགས་མེད་སྙིང་རྗེ་བདག་ཉིད་ཆོས་ཀྱི་སྐུ། །བསྟན་པ་བསྲུང་ཕྱིར་འཇིགས་རུང་དྲག་པོའི་གཟུགས། །བར་ཆད་ཀུན་སེལ་དངོས་གྲུབ་མ་ལུས་པ། །སྩོལ་མཛད་ནག་པོ་(༤༧བ)ཆེ་ལ་གསོལ་བ་འདེབས། །རྩ་བརྒྱུད་བླ་མ་ཀུན་དང་ངང་གཅིག་པ། །དཔལ་ལྡན་སྟོབས་འཕྲོག་ནག་པོ་ཡབ་ཡུམ་གྱི། །བྱིན་རླབས་བདུད་རྩིའི་ཆུ་བོས་དུས་ཀུན་དུ། །སྙིང་གི་བུམ་བཟང་གང་བ་ཐོབ་གྱུར་ཅིག །ཅེས་དཔལ་ལྡན་ཞལ་བཞི་པའི་ཉེ་བརྒྱུད་ཀྱི་བླ་མ་རྣམས་ལ་གསོལ་བ་འདེབས་པ་བྱིན་རླབས་ཀྱི་བང་མཛོད་ཅེས་བྱ་བ་འདི་ནི་ནང་སོ་སྐྱ་རྒྱལ་དབང་པོའི་གསུང་གིས་བསྐུལ་ནས་དགེ་འདུན་རྒྱ་མཚོའི་དཔལ་གྱིས་སྨྲས་པའི་ཡི་གེ་པ་ནི་བློ་གྲོས་ཀྱི་ནོར་དང་ལྡན་པ་གཞོན་ནུ་མགོན་པོས་བགྱིས་སོ།། །། 

                                                                                      རྩོམ་སྒྲིག་པ། ཀླུ་ཚང་འཇམ་དབྱངས་ཤེས་རབ།
   གསལ་འདེབས།
       རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                  དྲ་བའི་སྦྲེལ་ཐགhttp://www.tb1025.cn