ན་མོ་ལོ་ཀེ་ཤྭ་ར་ཡེ། མཚན་དཔེའི་ཆ་ཤས་ཡོངས་སུ་རྫོགས་པའི་སྐུ། །ཡན་ལག་དྲུག་ཅུའི་བསིལ་ཟེར་འགྱེད་པའི་གསུང་། །ཤེས་བྱའི་མཁའ་ལ་ཐོགས་པ་མེད་པའི་ཐུགས། །འཕགས་མཆོག་སྤྱན་རས་གཟིགས་ལ་གསོལ་བ་འདེབས། །སྐུ་གསུམ་གོ་འཕང་མཐོན་པོའི་རྩེར་སོན་ཀྱང་། །བགྲང་ཡས་སྤྲུལ་པའི་རྣམ་རོལ་སྣ་ཚོགས་ཀྱིས། །ངོ་མཚར་མཛད་པའི་གར་གྱིས་རྣམ་རོལ་བ། །གྲུབ་ཆེན་མི་ཏྲའི་ཞབས་ལ་གསོལ་བ་འདེབས། །བྱམས་པའི་རྣམ་འཕྲུལ་སྒྲ་སྒྱུར་བྱམས་པའི་དཔལ། །ཚོགས་གཉིས་མཐར་ཕྱིན་བསོད་ནམས་དབང་ཕྱུག་དང་། །རྒྱལ་སྲས་དབང་པོ་བསོད་ནམས་སེང་གེའི་ཞབས། །ས་བཅུའི་དབང་ཕྱུག་གསུམ་ལ་གསོལ་བ་འདེབས། །ལུང་རིགས་མངའ་བདག་རིན་ཅེན་སེང་གེ་དང་། །རྒྱལ་བ་གཉིས་པ་ཀུན་མཁྱེན་རིན་ཅེན་གྲུབ། །སྔགས་འཆང་དབང་པོ་གཞོན་ནུ་བསོད་ནམས་ཏེ། །བསྟན་པའི་མངའ་བདག་གསུམ་ལ་གསོལ་བ་འདེབས། །དབང་ཕྱུག་བརྒྱད་ལྡན་བློ་བཟང་གྲགས་པའི་དཔལ། །འཛམ་གླིང་སྨྲ་བའི་ཁྱུ་མཆོག་དགེ་ལེགས་དཔལ། །ལུང་རྟོགས་མངའ་བདག་ཆོས་ཀྱི་(༤༢ན)རྒྱལ་མཚན་ཞབས། །སྐུ་གསུམ་མངོན་གྱུར་ཞབས་ལ་གསོལ་བ་འདེབས། །རྒྱལ་བའི་ཡབ་གཅིག་འཇམ་དབྱངས་གཞོན་ནུ་ནི། །འགྲོ་ལ་ལེགས་བཤད་དགའ་སྟོན་སྩལ་བའི་སླད། །བློ་གྲོས་མཁའ་ལྟར་ཡངས་པའི་བཤེས་གཉེན་གྱི། །ཚུལ་བཟུང་བླ་མ་མཆོག་ལ་གསོལ་བ་འདེབས། །ཇི་སྙེད་གདུལ་བྱའི་ཁམས་དང་བསམ་པ་བཞིན། །རྒྱལ་བས་བཀའ་སྩལ་རབ་འབྱམས་གསུང་རབ་ཀུན། །འདི་ཕྱི་བར་དོའི་ཉམས་ལེན་སྙིང་པོ་རུ། །དྲིལ་ནས་ནམས་སུ་ལེན་པར་བྱིན་གྱིས་རློབས། །སྤྱི་བོར་བླ་མ་སྙིང་གར་ལྷག་པའི་ལྷ། །ལེགས་བསྒོམས་དཔག་མེད་འོད་ཟེར་སྤྲོ་བསྡུ་ཡིས། །སྣོད་བཅུད་ཞིང་སྦྱོང་ཆོས་ཀུན་རང་བཞིན་གྱིས། །སྟོང་པ་གནས་ལུགས་རྟོགས་པར་བྱིན་གྱིས་རློབས། །རང་ལུགས་འཁོར་གསུམ་དག་པའི་མཆོད་སྦྱིན་དང་། །ཚེ་འདིའི་ཕུན་ཚོགས་ཀུན་ལ་ཞེན་པ་ནི། །དོར་ནས་རང་སེམས་འོད་ཀྱི་སྦུ་གུ་ནས། །ཐོགས་མེད་དགའ་ལྡན་འཇུག་པར་བྱིན་གྱིས་རློབས། །བརྟན་གཡོའི་དངོས་ཀུན་སྒྱུ་མ་རྨི་ལམ་ལྟར། །མཐོང་ནས་ཕྱི་ནང་གསང་བ་བསྒྱུར་བྱས་ཏེ། །སྟོང་ཉིད་སྙིང་རྗེ་དབྱེར་མེད་བྱང་ཆུབ་སེམས། །མྱུར་དུ་མངོན་དུ་འགྱུར་བར་བྱིན་གྱིས་རློབས། །དེ་ལྟར་ཟབ་མོའི་ལམ་གྱི་ཉམས་ལེན་གྱིས། །ཆོས་ཀུན་མཁྱེན་པའི་དབང་པོ་མྱུར་ཐོབ་ནས། །ཕྱག་ན་པདྨོའི་རྣམ་ཐར་ཇི་བཞིན་དུ། །རྟག་ཏུ་ལུས་ཅན་ཀུན་གྱི་དོན་བགྱིད་ཤོག །འདི་ནི་བློ་བཟང་བསྟན་པའི་རྗེས་(༤༢བ)ཞུགས་ནས། །མདོ་སྔགས་རབ་འབྱམས་སྨྲ་བའི་བཤེས་གཉེན་གྱིས། །ནན་གྱིས་བསྐུལ་ཚེེ་རྣམ་གཡེང་དྲ་བ་ཡི། །གཟེབ་ཏུ་ཚུད་ཀྱང་ཐོགས་མེད་ཡི་གེར་བཀོད། །  རྒྱལ་བ་ཀུན་གྱི་མཁྱེན་བརྩེ་མ་ལུས་པ། །ལྔ་བརྒྱའི་གཙུག་རྒྱན་མར་མེ་མཛད་དཔལ་ཞེས། །གནས་ལྔའི་རིགས་པའི་པཎ་ཆེན་ཚུལ་འཛིན་པ། །དཔལ་ལྡན་ཨ་ཏི་ཤ་ལ་གསོལ་བ་འདེབས། །དམིགས་མེད་ཆོས་སྐུའི་ངང་ལས་མ་གཡོས་ཀྱང་། །ནམ་མཁའི་མཐས་ཁྱབ་ཞིང་ཁམས་ཐམས་ཅད་དུ། །སྣ་ཚོགས་སྤྲུལ་པས་འགྲོ་བའི་དོན་མཛད་པ། །འབྲོམ་སྟོན་སྤྱན་རས་གཟིགས་ལ་གསོལ་བ་འདེབས། །གང་གི་མཚན་ཙམ་རྣ་བར་ལྷུང་བས་ཀྱང་། །ཕྱི་ནང་འཇིགས་བརྒྱད་ཉེར་འཚེ་ཀུན་ལས་སྐྱོབ། །འཆི་མེད་ཚེ་དང་ཡེ་ཤེས་མཆོག་སྩོལ་བའི། །འཕགས་མ་ཡིད་བཞིན་འཁོར་ལོར་གསོལ་བ་འདེབས། །ཀཻ་ལ་ཤ་ལྟར་མཆོག་ཏུ་མཛེས་པའི་སྐུ། །ཚངས་པའི་དབྱངས་ཀྱིས་འགྲན་དུ་མེད་པའི་གསུང་། །ཤེས་བྱ་མ་ལུས་ཅིག་ཅར་གཟིགས་པའི་ཐུགས། །བཀྲ་ཤིས་དཔལ་འབར་མ་ལ་གསོལ་བ་འདེབས། །སྐྱོན་གྱིས་མ་གོས་པད་དཀར་ཟླ་བའི་སྟེང་། །ཞབས་གཉིས་མི་ཕྱེད་རྡོ་རྗེ་སྐྱིལ་ཀྲུང་བཞུགས། །སྒེག་ཅིང་ཡིད་འོང་བཅུ་དྲུག་ལོན་པའི་ཉམས། །རྗེ་བཙུན་ཨུཏྤལ་བསྣམས་ལ་གསོལ་བ་འདེབས། །མདོ་རྒྱུད་གསུང་རབ་མ་ལུས་ཐུགས་ཆུད་ནས། །ཚེ་འདི་བློས་བཏང་སྒྲུབ་པ་སྙིང་པོར་མཛད། །མཁས་ཤིང་གྲུབ་པའི་དབང་ཕྱུག་ཐམས་ཅད་མཁྱེན། །ནོར་(༤༣ན)བཟང་རྒྱ་མཚོའི་ཞབས་ལ་གསོལ་བ་འདེབས། །འདི་ཕྱིའི་ལེགས་ཚོགས་ཀུན་གྱི་འབྱུང་གནས་ཏེ། །དངོས་གྲུབ་གཉིས་ཀྱི་ཆར་འབེབས་ཡིད་བཞིན་ནོར། །རྒྱལ་བས་སྐྱབས་གསུམ་ངོ་བོར་རབ་བསྔགས་པའི། །རྩ་བའི་བླ་མའི་ཞབས་ལ་གསོལ་བ་འདེབས། དུས་གསུམ་རྒྱལ་བ་མ་ལུས་མཆོད་པ་ལས། །གང་གི་བ་སྤུའི་ཁུང་བུ་གཅིག་མཆོད་པའང་། །བསོད་ནམས་གཞལ་དུ་མེད་པར་རྒྱལ་བས་གསུངས། །དྲིན་ཅན་བླ་མ་མཆོག་ལ་གསོལ་བ་འདེབས། །བླང་དོར་གནས་ཀུན་གསལ་མཛད་སྒྲོན་མེ་སྟེ། །ཐར་པའི་ལམ་དུ་འཁྲིད་པའི་དེད་དཔོན་མཆོག །འགྲོ་ལ་ལམ་བཟང་སྩོལ་བའི་མིག་གཅིག་པུ། །བསྔགས་འོས་བཤེས་གཉེན་མཆོག་ལ་གསོལ་བ་འདེབས། །སྐྱབས་གནས་དམ་པ་རྣམས་ཀྱི་བཀའ་དྲིན་ལས། །འགལ་རྐྱེན་བདུད་སྡེའི་བར་ཆད་ཀུན་ལས་རྒྱལ། །ཚེ་དང་བསོད་ནམས་དཔལ་འབྱོར་ལོངས་སྤྱོད་རྒྱས། །བསམས་དོན་ཡིད་བཞིན་འགྲུབ་པར་བྱིན་གྱིས་རློབས། །རང་ལུས་འཕགས་མར་གསལ་བའི་ཏིང་འཛིན་དང་། །ཡི་གེ་བཅུ་པའི་རིགས་སྔགས་བཟླས་རྗོད་ཀྱིས། །འཆི་བདག་གཤིན་རྗེའི་འཇིགས་པ་ལས་གྲོལ་ནས། །འཆི་མེད་རིག་འཛིན་ཐོབ་པར་བྱིན་གྱིས་རློབས། །ཡུན་རིང་གནས་པའི་ཚེ་ལ་དབང་ཐོབ་ནས། །མདོ་སྔགས་ལམ་གྱི་གནད་དོན་ཀུན་རྫོགས་པའི། །འཁྲུལ་མེད་ཏིང་འཛིན་དཔའ་ལ་རྣམ་རོལ་ཞིང་། །སྐུ་གསུམ་མྱུར་དུ་ཐོབ་པར་བྱིན་གྱིས་རློབས། །ཞེས་པ་འདི་ནི་(༤༣བ)དབོན་པོ་འཕགས་པ་རྒྱལ་མཚན་གྱིས་བསྐུལ་བའི་ངོར་དགེ་འདུན་རྒྱ་མཚོའི་དཔལ་གྱིས་སྨྲས་པའོ།། །།

                                                རྩོམ་སྒྲིག་པ། ཀླུ་ཚང་འཇམ་དབྱངས་ཤེས་རབ།
    གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
      དྲ་བའི་སྦྲེལ་ཐགhttp://www.tb1025.cn