བླ་མ་རྗེ་བཙུན་འཇམ་པའི་དབྱངས་ལ་ཕྱག་འཚལ་ལོ། །སྒྲིབ་བྲལ་ལྷན་ཅིག་སྐྱེས་པ་ཆོས་ཀྱི་སྐུ། །དབང་པོའི་གཞུ་ལྟར་དང་བ་ལོངས་སྤྱོད་རྫོགས། །གང་འདུལ་ཅིར་ཡང་འཆར་བ་སྤྲུལ་པའི་སྐུ། ཁྱབ་བདག་རྡོ་རྗེ་འཆང་ལ་གསོལ་བ་འདེབས། །རིང་ནས་གོ་འཕང་མཐོན་པོའི་རྩེར་གཤེགས་ཀྱང་། །སྣ་ཚོགས་སྤྲུལ་པའི་ཟློས་གར་བགྲང་ཡས་ཀྱིས། །སྐལ་ལྡན་འགྲོ་བ་ཀུན་གྱི་དོན་མཛད་པ། །གྲུབ་མཆོག་ཏི་ལི་པ་ལ་གསོལ་བ་འདེབས། །མཁས་པའི་གྲགས་པས་ས་སྟེང་ཀུན་དུ་ཁྱབ། །དྲི་མེད་རིགས་པས་རྒོལ་བ་ཚར་བཅད་དེ། །ངལ་བརྒྱས་བླ་མ་ཉེར་བསྟེན་གྲུབ་པ་བརྙེས། །པཎ་ཆེན་ནཱ་རོའི་ཞབས་ལ་གསོལ་བ་འདེབས། །གྲུབ་མཆོག་རི་ཁྲོད་ཞབས་ཀྱིས་རྗེས་སུ་བཟུང་། །གནས་ལྔ་མཐར་སོན་མཁས་པའི་གཙུག་གི་རྒྱན། །རང་བྱུང་ཕྱག་རྒྱ་ཆེན་པོའི་ཡེ་ཤེས་ཀྱི། །འབྱུང་གནས་མཻ་ཏྲི་པ་ལ་གསོལ་བ་འདེབས། །རིགས་ཀུན་ཁྱབ་བདག་དཔལ་ལྡན་ཧེ་རུ་ཀ །མི་ཡི་གཟུགས་ཀྱིས་རྣམ་རོལ་མར་པ་ཞེས། །སྒྱུབ་རྒྱུད་བསྟན་པའི་འབྱུང་གནས་གྲགས་པའི་གཏེར། །སྒྲ་སྒྱུར་ཆེན་པོའི་ཞབས་ལ་གསོལ་བ་འདེབས། །མགོན་དེའི་གདམས་པས་སྙིགས་དུས་ཚེ་གཅིག་ལ། །མངོན་པར་སངས་རྒྱས་མི་ལ་རས་པ་ཞེས། །གྲགས་པས་(༤༠ན)ཚངས་པའི་འཇིག་རྟེན་རེག་པ་ཅན། །རྗེ་བཙུན་བཞད་པ་རྡོ་རྗེར་གསོལ་བ་འདེབས། །དཔལ་ལྡན་ནཱ་རོ་པ་དང་ཨ་ཏི་ཤའི། །བཀའ་ཕྱག་ཆུ་བོ་གཉིས་འདྲེས་གདམས་པའི་སྲོལ། །གང་གི་དྲིན་གྱི་ཕྱོགས་འདིར་གསལ་མཛད་པ། །ཟླ་འོད་གཞོན་ནུའི་ཞབས་ལ་གསོལ་བ་འདེབས། །དུས་གསུམ་སངས་རྒྱས་བདེ་ཆེན་ཆོས་ཀྱི་སྐུ། །དངོས་པོ་གཅིག་གྱུར་དགེ་སློང་གཟུགས་ཀྱིས་ནི། །གར་མཛད་སྲིད་པ་གསུམ་གྱི་འགྲོ་བའི་མགོན། །དཔལ་ལྡན་མཐའ་རྩ་བ་ལ་གསོལ་འདེབས། །རྒྱལ་བས་ལུང་བསྟན་ཀླུ་སྒྲུབ་སྙིང་པོ་ནི། །སླར་ཡང་གངས་རིའི་ཁྲོད་འདིར་གཤེགས་གྱུར་ཅེས། །དམ་པ་རྣམས་ཀྱིས་ལུང་བསྟན་བསྔགས་པའི་གནས། །འཇིག་རྟེན་གསུམ་མགོན་ཞབས་ལ་གསོལ་བ་འདེབས། །དཔལ་ལྡན་ལྷ་གཟིགས་རིགས་ཀྱི་ཐིག་ལེ་ནི། །ལྔ་བརྒྱའི་གཙུག་གི་རྒྱན་གྱུར་ཐམས་ཅད་མཁྱེན། །ཆོས་ཀྱི་རྒྱལ་པོ་སྤྱན་སྔ་རིན་པོ་ཆེ། །གྲགས་པ་འབྱུང་གནས་ཞབས་ལ་གསོལ་བ་འདེབས། །བླ་མས་བྱིན་བརླབས་གནས་ལུགས་མངོན་སུམ་མཛད། །མི་བཟད་གནམ་ལྕགས་འབར་བའང་ཁྱོད་སྐུ་ལ། །པདྨོ་གཞོན་ནུ་རེག་པ་བཞིན་གྱུར་པ། །རྒྱལ་བ་རིན་པོ་ཆེ་ལ་གསོལ་འདེབས། །བརྩོན་འགྲུས་ཆེན་པོས་རོ་གཅིག་རྟོགས་པ་བརྙེས། །མཁྱེན་པའི་སྤྱན་ཡངས་དུས་གསུམ་ཆགས་ཐོགས་བྲལ། །མཐུ་སྟོབས་ཐུགས་རྗེས་གཞན་གྱི་དོན་མཛད་པ། །བཅུ་གཉིས་རིན་པོ་ཆེ་ལ་གསོལ་བ་འདེབས། །གྲགས་པའི་འོད་ཟེར་སྟོང་གི་དྲ་བ་ཅན། །(༤༠བ) རྨད་བྱུང་ཡེ་ཤེས་དཀྱིལ་འཁོར་རབ་རྒྱས་ལས། །ཤེས་བྱའི་ཁྱོན་ཀུན་ཆེས་ཆེར་གསལ་མཛད་པ། །འགྲོ་བའི་འདྲེན་མཆོག་དེ་ལ་གསོལ་བ་འདེབས། །ཆོགས་གཉིས་བདུད་རྩིའི་ཆུ་གཏེར་བསྲུབས་པ་ལས། །གྲགས་པ་བདུད་རྩིའི་གཏེར་གྱུར་རིན་ཅེན་གྱིས། །ཡོན་ཏན་ཆ་ཤས་ཡོངས་སུ་གང་བ་ཅན། །ཐུབ་བསྟན་ཀུ་མུད་གཉེན་ལ་གསོལ་བ་འདེབས། །བསླབ་གསུམ་རིན་ཅེན་གསེར་གྱི་གཞལ་མེད་ཁང་། །རྣམ་དཀར་གྲགས་པའི་རྒྱལ་མཚན་མཐོན་པོ་ཅན། །སྐུ་གསུམ་ནོར་བུའི་ཏོག་གིས་རབ་མཛེས་པ། །ཚེས་བཞི་རྙིང་མ་བ་ལ་གསོལ་བ་འདེབས། །སྙན་གྲགས་བ་དན་དཀར་པོའི་འཕུར་ལྡིང་ཅན། །མཁས་པའི་མདུན་ས་མཛེས་པའི་རྒྱན་གཅིག་པུ། །ཤེས་རབ་སྤྱན་གྱིས་གནས་ལུགས་ཇི་བཞིན་གཟིགས། །སྤྱན་སྔ་གྲགས་ཤེ་བ་ལ་གསོལ་བ་འདེབས། །རྒྱལ་བ་ཀུན་གྱི་ཡབ་གཅིག་པད་དཀར་ཅན། །དུས་མཐར་ངུར་སྨྲིག་འཛིན་པའི་ཚུལ་བཟུང་ནས། །འགྲོ་ཀུན་ཕན་བདེའི་ལམ་ལ་སྦྱོར་མཛད་པ། །གྲགས་པ་བྱང་ཆུབ་ཞབས་ལ་གསོལ་བ་འདེབས། །བསོད་ནམས་ཆ་ཤས་ཡོངས་སུ་རྫོགས་གྱུར་ཅིང་། །གྲགས་པའི་རི་བོང་མཚན་མས་རྣམ་པར་མཛེས། །རྨད་བྱུང་མཛད་པའི་འོད་དཀར་སྣང་བ་ཅན། །གྲུབ་མཆོག་མཚན་མོའི་མགོན་ལ་གསོལ་བ་འདེབས། །དཔལ་ལྡན་གདན་ས་རིན་ཅེན་སེང་གེའི་ཁྲིར། །ཞབས་སེན་མུ་ཏིག་ཚོམ་བུ་རབ་བཀོད་དེ། །འཕྲིན་ལས་བཟང་པོས་འགྲོ་བའི་དོན་མཛད་པ། །སྤྱན་སྔ་རིན་པོ་ཆེ་ལ་གསོལ་བ་འདེབས། །རྨད་བྱུང་(༤༡ན)བསོད་ནམས་འཆི་མེད་སྐྱེད་ཚལ་དུ། །བསླབ་པ་གསུམ་གྱི་འདབ་སྟོང་རབ་རྒྱས་ཤིང་། །འཕྲིན་ལས་བཟང་པོའི་དྲི་བསུང་གཡོ་བ་ཅན། །འགྲོ་བའི་འདྲེན་པ་མཆོག་ལ་གསོལ་བ་འདེབས། །བསོད་ནམས་ཡེ་ཤེས་ཚོགས་གཉིས་གཞལ་མེད་ཁང་། །མཁྱེན་གཉིས་གསེར་གྱི་རྒྱལ་མཚན་མཐོན་པོ་ཅན། །སྐལ་བཟང་འགྲོ་ལ་དོན་གཉིས་འདོད་དགུའི་ཆར། །ལེགས་པར་འབེབས་མཛད་དེ་ལ་གསོལ་བ་འདེབས། །ངག་གི་དབང་ཕྱུག་རྒྱལ་སྲས་གྲགས་པའི་གཏེར། །ལུགས་གཉིས་གསེར་གྱི་འཁོར་ལོས་བོད་ཁམས་ཀྱི། །ནོར་འཛིན་སྐྱོང་མཛད་ཆོས་ཀྱི་རྒྱལ་པོ་མཆོག །ཚེས་གཉིས་རིན་པོ་ཆེ་ལ་གསོལ་བ་འདེབས། །དུས་མཐའ་འདིར་ཡང་གར་དབང་རྡོ་རྗེ་འཆང་། །ངུར་སྨྲིག་འཛིན་པའི་ཟློས་གར་ལྷུར་མཛད་ནས། །ས་སྟེང་འགྲོ་བ་ཀུན་གྱི་སྐྱབས་གྱུར་པ། །ཞྭ་དམར་ཅོད་པན་འཛིན་ལ་གསོལ་བ་འདེབས། །འཛམ་གླིང་སྒྲུབ་རྒྱུད་བསྟན་པའི་གཙུག་གི་རྒྱན། །བཀའ་བརྒྱུད་གོང་མ་རྣམས་དང་ཕག་མོ་གྲུའི། །གདན་ས་ཆེན་པོར་བྱོན་དང་འབྱོན་འགྱུར་བའི། །སྤྱན་སྔ་རྣམས་ལ་གུས་པས་གསོལ་བ་འདེབས། །དེ་ལྟར་བསྟོད་པའི་རྣམ་དཀར་ཕུང་པོ་ཡིས། །འགྲོ་ཀུན་ཐེག་མཆོག་བཤེས་དང་མི་འབྲལ་ཞིང་། །ཐེག་མཆོག་ཟབ་མོའི་ལམ་གྱིས་ཚེ་གཅིག་ཏུ། །སྐུ་གསུམ་གོ་འཕང་མངོན་དུ་བྱེད་པར་ཤོག །གནས་སྐབས་སུ་ཡང་འཛིན་མའི་ཁྱོན་ཀུན་(༤༡བ)དུ། །ཆོས་དང་སྲིད་ཀྱི་དཔལ་འབྱོར་དར་ཞིང་རྒྱས། །མི་དགེ་བཅུ་སྤངས་དགེ་བའི་ལས་ལམ་ཀུན། །རྫོགས་ལྡན་དུས་བཞིན་འཕེལ་བའི་བཀྲ་ཤིས་ཤོག །ཅེས་པ་འདི་ནི་ནང་སོ་མགོན་པོ་ཚེ་འཕེལ་གྱི་གསུང་གིས་བསྐུལ་ནས་དགེ་འདུན་རྒྱ་མཚོའི་དཔལ་གྱིས་འཕྱོས་ངོ་མཚར་བཀོད་པར་སྦྱར་བའོ།། །།

                                            རྩོམ་སྒྲིག་པ། ཀླུ་ཚང་འཇམ་དབྱངས་ཤེས་རབ།
      གསལ་འདེབས། 
   རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
           དྲ་བའི་སྦྲེལ་ཐགhttp://www.tb1025.cn