བླ་མ་དང་རྗེ་བཙུན་འཇམ་པའི་དབྱངས་ལ་ཕྱག་འཚལ་ལོ། །ལྔ་བརྒྱའི་གཙུག་རྒྱན་མཉམ་མེད་ཤཱཀྱའི་གཙོ། །རྒྱལ་བ་ཀུན་གྱི་ཡབ་གཅིག་འཇམ་པའི་དབྱངས། །རྒྱལ་བ་གཉིས་པ་འཕགས་མཆོག་ཀླུ་སྒྲུབ་ཞབས། །གསོལ་བ་འདེབས་སོ་ཐུགས་རྗེའི་ལྕགས་ཀྱུས་ཟུངས། །འཇམ་དབྱངས་རྣམ་སྤྲུལ་ཟླ་བ་གྲགས་པའི་ཞབས། །ལྔ་བརྒྱའི་གཙུག་རྒྱན་དཔལ་ལྡན་ཨ་ཏི་ཤ །བསྟན་པའི་མངའ་བདག་འབྲོམ་སྟོན་སྤྱན་རས་གཟིགས། །གསོལ་བ་འདེབས་སོ་ཐུགས་རྗེའི་ལྕགས་ཀྱུས་ཟུངས། ཁམས་གསུམ་ཆོས་ཀྱི་རྒྱལ་པོ་བཙོང་ཁ་པ། །མཁས་ཤིང་གྲུབ་པའི་དབང་ཕྱུག་ནོར་བུ་བཟང་། །བཀའ་དྲིན་མཉམ་མེད་རྩ་བའི་བླ་མ་ལ། །གསོལ་བ་འདེབས་སོ་ཐུགས་རྗེའི་ལྕགས་ཀྱུས་ཟུངས། །ཟླ་མེད་སྐྱབས་ཀྱི་དམ་པ་ཁྱེད་རྣམས་ལ། །གདུང་ཤུགས་དྲག་པོས་གསོལ་བ་བཏབ་པའི་མཐུས། །ཚེ་རབས་ཀུན་ཏུ་སྐད་ཅིག་མི་འབྲལ་བར། །དགྱེས་བཞིན་རྗེས་སུ་(༣༩ན)འཛིན་པར་མཛད་དུ་གསོལ། །སྲིད་ལས་ངེས་འབྱུང་ཤུགས་དྲག་སྐྱོ་ཤས་དང་། །འགྲོ་ཀུན་ཕ་མར་མཐོང་བའི་སྙིང་རྗེ་ཡིས། །ལེགས་དྲངས་བདག་པས་གཞན་གཅེས་བྱང་ཆུབ་སེམས། །མྱུར་དུ་རྒྱུད་ལ་སྐྱེ་བར་མཛད་དུ་གསོལ། །ངའོ་སྙམ་དུ་འཛིན་པའི་བློ་འདི་ལ། །ང་དེ་རྟོག་པས་ཕར་བཞག་མ་ཡིན་པར། །ཡུལ་གྱི་སྟེང་ནས་གྲུབ་པ་ལྟར་སྣང་བའི། །འཆར་ཚུལ་རྗེན་གྱིས་རྟོགས་པར་བྱིན་གྱིས་རློབས། ཁམས་དྲུག་དེ་འདྲའི་ང་དེ་མ་ཡིན་ཞིང་། །དེ་ལས་གཞན་དུའང་གྲུབ་པ་མ་མཆིས་པས། །ང་ཞེས་བྱ་བ་ཡུལ་གྱི་སྟེང་ཉིད་ནས། །མེད་པར་ལྷང་གིས་རྟོགས་པར་བྱིན་གྱིས་རློབས། །དེ་བཞིན་ཕུང་ཁམས་སྐྱེ་མཆེད་ཆོས་རྣམས་ཀུན། །རང་རང་འདོགས་བྱེད་རྣམ་རྟོག་ཁོ་ན་ཡིས། །བཏགས་པ་ཙམ་ཕྱིར་གདགས་གཞིའི་ཡུལ་སྟེང་ནས། །མེད་པར་ངེས་ཤེས་འདྲོངས་པར་བྱིན་གྱིས་རློབས། །མིང་ཙམ་རྟོག་པའི་རི་མོ་ཙམ་ཉིད་ལས། །འཁོར་འདས་ཆོས་ཀུན་འཇོག་ཅིང་ལས་འབྲས་ཀྱི། །རྟེན་འབྲེལ་བསླུ་བ་མེད་པར་ཡིད་ཆེས་ནས། །མཐའ་བྲལ་ལྟ་བ་རྟོགས་པར་བྱིན་གྱིས་རློབས། །སྲིད་པའི་རྩ་བ་དྲུངས་འབྱིན་ཡང་དག་ལྷ། །ཉམས་སུ་ལེན་ཚེ་དེ་ཡི་འགལ་རྐྱེན་ཀུན། །སེལ་ཞིང་མཐུན་རྐྱེན་མ་ལུས་ཀླུ་སྒྲུབ་ཀྱི། །བཀའ་སྲུང་གདོང་བཞི་མགོན་པོས་གཡེལ་མེད་སྒྲུབས། །གཞན་ཡང་དཔལ་ལྡན་མགོན་པོ་ཡབ་ཡུམ་གྱིས། །ཕ་ལྟར་བྱམས་ཤིང་མ་ལྟར་སྙིང་ཉེ་བས། །ཞི་རྒྱས་དབང་དྲག་འཕྲིན་ལས་གང་བཅོལ་ཡང་། །སྐད་ཅིག་ཉིད་ལ་(༣༩བ)འགྲུབ་པར་མཛད་དུ་གསོལ། །ཞེས་པ་འདི་ནི་ནང་སོ་ཆོས་རྒྱལ་ཆེན་པོ་ཨ་མོ་གྷ་རྡོ་རྗེ་རྣམ་རྒྱལ་དཔལ་བཟང་པོའི་ཐུགས་དམ་དུ་དགེ་འདུན་རྒྱ་མཚོའི་དཔལ་གྱིས་ཕོ་བྲང་འོལ་ཁ་སྟག་རྩེར་བྲིས་པའོ།། །།

                               རྩོམ་སྒྲིག་པ། ཀླུ་ཚང་འཇམ་དབྱངས་ཤེས་རབ། 
           གསལ་འདེབས།
   རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
          དྲ་བའི་སྦྲེལ་ཐགhttp://www.tb1025.cn