སྭསྟི་སིདྡྷཾ།ཐུབ་རྣམས་སྤངས་རྟོགས་ཡོན་ཏན་རབ་མ་ཉམ་ཡང།།གདུལ་དཀའ་འགྲོ་ལ་ཉེར་བརྩེའི་སྙིང་སྟོབས་ལ།།ཕྱོགས་བཅུའི་རྒྱལ་ཀུན་མགྲིན་གཅིག་བསྔགས་པའི་ཡུལ།།བཅོམ་ལྡན་ཤཱཀྱ་སེང་གེར་མགོས་ཕྱག་འཚལ།།བདེ་གཤེགས་ཀྱིས་བསྐུལ་ཅོད་པན་མ་ཕམ་དབུར།།བཅིངས་ཏེ་གཟིགས་པ་ལྔ་ཡིས་འཇམ་གླིང་འགྲ།ཡང་དག་ལམ་ལ་བཀྲི་ཕྱིར་དགའ་ལྡན་ནས།།འཕོ་མཛད་དམ་པ་ཏོག་དཀར་ཕྱག་འཚལ་ལོ།།ས་ག་ཟླ་བའི་ཡར་ཚེས་བཅོ་ལྔའི་མཚན།།སྒྱུ་འཕྲུལ་ལྷ་མོ་གསོ་སྦྱོང་ལ་གནས་དུས།།གླང་ཆེན་ཐལ་ཀར་མཆེ་བ་དྲུག་ལྡན་གྱི།།རྣམ་པས་ལྷུམས་སུ་ཞུགས་ལ་ཕྱག་འཚལ་ལོ།།དཔོ་ཟླའི་ཚེས་བཅུར་གློ་གཡས་ནས་བལྟམས་ཚེ།།ངོ་མཚར་ལྟས་བཟང་ལྷ་ཀླུས་སྲི་ཞུ་མཛད།།སྐྱེ་མཐར་ཞལ་འཆེས་ལུས་ཅན་བདེ་སྐྱིད་མཐུས།།དོན་ཀུན་གྲུབ་མཚན་གསོལ་ལ་ཕྱག་འཚལ་ལོ།།ཡེ་གེ་རྒྱལ་དང་གླང་ཆེན་འདུལ་ལ་སོགས།།དྲུག་ཅུ་རྩ་བཞི་ལས་བརྒལ་ཀུ་རྩལ་གྱིས།།གཞོན་ནུའི་དུས་ནས་སྟོབས་ཅན་དྲགས་ལྡན་ཚོགས།།ཁེངས་པ་འཕྲོག་པར་མཛད་ལ་ཕྱག་འཚལ་ལོ།།རང་ལོ་ཉེར་དགུའི་བར་དུ་རྒྱལ་བོའི་སྲིད།།བསྐྱངས་ཚེ་འཇིག་རྟེན་མཐུན་དང་ལོག་རྟོག་རྣམས།།སེལ་ཕྱིར་ས་འཚོ་གྲགས་འཛིན་གྱིས་མཚོན་པའི།།བཙུན་མོ་ཁབ་ཏུ་བཞེས་ལ་ཕྱག་འཚལ་ལོ།།རྒྱལ་གསུང་སིལ་སྙན་སྒྲར་དྲངས་ཉེར་བསྐུལ་ཞིང།།རྒ་ན་འཆི་དང་དགེ་སློང་གཟིགས་རྐྱེན་གྱིས།།མཆོད་རྟེན་རྣམ་དག་དྲུང་དུ་རབ་བྱུང་བར།།བརྒྱ་བྱིན་ངུར་སྨྲིག་ཕུལ་ལ་ཕྱག་འཚལ་ལོ།།ནི་རྙཛ་ནར་མཁའ་ཁྱབ་ཏིང་འཛིན་ལ།།ལོ་དྲུག་དཀའ་བ་སྤྱད་ཚེ་ཟས་གཙང་སོགས།།དབུགས་དབྱུང་ལེགས་སྐྱེས་འོ་མས་བསྙེན་བཀུར་མཐུས།།གསེར་མདོག་ལང་ཚོ་དར་ལ་ཕྱག་འཚལ་ལོ།།སྐྱིལ་ཀྲུང་གཅིག་ལ་བྱང་ཆུབ་མཆོག་བརྙེས་ཕྱིར།།རྡོ་རྗེའི་གདན་ལ་རྩྭ་ཚོང་བཀྲ་ཤིས་ལས།།ཉེར་བསླངས་ཟོང་བའི་ཆུན་བོ་བཏིང་པའི་སྟེང།།མི་གཡོའི་དམ་བཅའ་བརྟན་ལ་ཕྱག་འཚལ་ལོ།།བདུད་སྡེའི་མཚོན་ཆར་མཛེས་མའི་སླུ་བྲིད་ཀྱིས།།མ་ཚུགས་གྲངས་མེད་མཆོད་སྦྱིན་དབང་བོ་རུ།།ས་ལྷས་ཐལ་མོ་སྦྱར་ཚེ་འདོད་ལྷ་ཡིས།།དང་བས་ཆེད་དུ་བསྔགས་ལ་ཕྱག་འཚལ་ལོ།།་སུམ་ཅུ་རྩ་ལྔའི་དགུང་ལོར་ཉེར་བབས་དུས།།ས་ག་ཟླ་བའི་བཅོ་ལྔའི་ཐུན་དྲུག་གི།ཐ་མར་བླ་མེད་བྱང་ཆུབ་བདུད་རྩིའི་བཅུད།།ཐུགས་ཀྱི་དཔལ་བེར་གཏམས་ལ་ཕྱག་འཚལ་ལོ།།བདུན་ཕྲག་བདུན་མཐར་བཀྲ་ཤིས་ཚིགས་བཅད་གསུངས།།ཚངས་དབང་གིས་བསྐུལ་ཝ་ར་ཎཱ་སི་རུ།།ཆུ་སྟོད་ཟླ་བའི་ཆོས་བཞིར་བདེན་པ་བཞིའི།།ཆོས་ཀྱི་འཁོར་ལོ་བསྐོར་ལ་ཕྱག་འཚལ་ལོ།།བརྒྱད་ཅུའི་ལོ་ལ་སླེབས་པའི་དཔྱིད་ཐ་ཡི།་བཅོ་ལྔའི་ཚེས་ཀྱི་ནང་པར་དེ་བཞིན་གཤེགས།།འཇིག་རྟེན་ཁམས་སུ་མི་སྣང་ལྟར་གྱུར་ནས།།མྱ་ང་འདའ་བར་མཛད་ལ་ཕྱག་འཚལ་ལོ།།ཐུན་མོང་གདུལ་བྱར་བསྟན་ཀྱང་ངེས་པའི་དོན།།སྐྱེ་འཆི་སྤངས་པའི་སྐུ་ལ་ཕྱག་འཚལ་ཞིང།།ནམ་མཁའ་མཛོད་ཀྱི་སྒོ་འཕར་ཡོངས་ཕྱེ་བའི།།འཛད་མེད་དངོས་བཤམས་ཡིད་སྦྲུལ་མཆོད་པ་འབུལ།།ཐོག་མེད་བསགས་པའི་སྡིག་ལྷུང་མ་ལུས་པ།།གཉན་བོ་སྟོབས་བཞིའི་སྒོ་ནས་བཤགས་པར་བགྱི།།རང་གཞན་ཀུན་གྱིས་བསྒྲུབས་པའི་དགེ་བ་ལ།།དང་བའི་སེམས་ཀྱིས་རྟག་ཏུ་ཡི་རང་ངོ།།རྒྱལ་སྲས་སློབ་མར་བཅས་པ་འཁོར་བའི་མཐའ།།སྟོངས་མིན་ཆོས་ཀྱི་འཁོར་ལོ་བསྐོར་བར་བསྐུལ།།འགྲོ་ཀུན་ཐར་པའི་ལམ་དུ་མ་བཞག་པར།།གཟུགས་སྐུ་མྱ་ངན་མི་འདའ་བརྟན་པར་བཞུགས།།ཉེར་བསགས་བསོད་ནམས་ཕུང་བོ་སྐྱེ་དགུ་རྣམས།།རྣམ་མཁྱེན་ཡེ་ཤེས་ཐོབ་པའི་རྒྱུ་རུ་བསྔོ།།དགེ་བའི་འབྲས་བུ་འཇིག་རྟེན་ཁམས་རྣམས་སུ།།བཀྲ་ཤིས་བདེ་ལེགས་ཆེན་བོས་ཁྱབ་པར་ཤོག།འོ་སྐོལ་གྱི་སྟོན་པ་ལྷ་དང་བཅས་པའི་མ་འདྲིས་པའི་མཛའ་བཤེས་ཆེན་བོ་ཉི་མའི་གཉེན་གྱི་མཛད་པ་བཅུ་གཉིས་ལས་བརྩམས་པའི་བསྟོད་པ་མཆོག་དམན་ཀུན་གྱིས་གོ་བདེ་ཕྱིར་སྙན་ངག་གི་ལམ་ནས་མ་དྲངས་ཤིང་བརྡ་དང་མངོན་བརྗོད་ཀྱིས་མ་བཅིངས་པ་ཞིག་དགོས་ཞེས་གྲོང་སྨད་པ་སངས་རྒྱས་རྒྱ་མཆོས་བསྐུལ་བ་ལ་བརྟན་ནས་ཀླུ་སྒྲུབ་ཀྱི་གསུང་དུ་གྲགས་པའི་བསྟོད་རྙིང་དོན་ལ་གནས་ཚེ་དགོངས་བ་འགྲེལ་རྒྱུ་ཁྱད་པར་ཅན་ཡོད་པ་ལས་འོས་མ་མཆིས་མོད།གལ་ཏེ་འབྲི་གུང་སྐྱོབ་པས་མཛད་པ་ལྟ་བུ་མིང་བཏགས་ཀྱིས་འདྲེས་ན་དོན་གྱི་ཆར་སོམ་ཉི་འགའ་ཞིག་སྣང་ཞིང།ཐམས་ཅད་མཁྱེན་པ་དགེ་འདུན་རྒྱ་མཚོའི་ཐུགས་རྩོམ་དེ་ཚིག་སྦྱོར་ལེགས་ཀྱང་གོ་དཀའ་ལ་མཛད་པ་གཅིག་ལ་ཚིགས་བཅད་གཉིས་ཙམ་ཡོད་པའི་ཅུང་མི་གསལ་བ་ནས་འདུལ་བའི་རྣམ་བཤད་འཁྲུལ་བ་དང་བྲལ་བ་ལུང་རིགས་གཏེར་མཛོད་ཀྱི་དགོངས་དོན་སོར་བཞག་པའི་བསྟོད་པ་ལེགས་བྱས་ཡོངས་འདུའི་སྙེ་མ་ཞེས་བྱ་བ་འདི་ནི་ཟ་ཧོར་གྱི་བེནྡ་ངག་དབང་བློ་བཟང་རྒྱ་མཚོས་མ་སྦྲུལ་ཧོར་ཟླ་ལྔ་པའི་ཡར་ངོའི་དགའ་བ་གཉིས་པར་ཕོ་བྲང་བོ་ཏཱ་ལར་སྦྱང་བའི་ཡི་གེ་པ་ཡང་བསྐུལ་བ་བོ་ཉིད་ཀྱིས་བགྱིས་པ་ཛ་ཡནྟུ།།།།

                                                     རྩོམ་སྒྲིག་པ།  ཤེས་རབ་རལ་གྲི། 
གསལ་འདེབས། 
                  རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
                    དྲ་བའི་སྦྲེལ་ཐགhttp://www.tb1025.cn