རྗེ་བཙུན་འཇམ་དཔལ་དབྱངས་ལ་བྱ་དཀའ་བའི་བསྟོད་པ།
ཨ་ངེས་ནི།
ཨོཾ་སྭ་སྟི།
རབ་ཡངས་ནམ་མཁའ་རབ་གང་བ།།
འཕགས་པ་གཞན་ལས་འཕགས་པ་རབ།།
ཡང་དག་མཐའ་ལ་ཡང་དག་གནས།།
མཛད་པ་མཐའ་ཡས་མཛད་པ་ཅན།།
ས་ལམ་མཐའ་དག་ས་ལ་དབང་།།
བག་ཆགས་མཐའ་དག་གཏན་ཟད་པ།།
འཇམ་དཔལ་ཨ་ར་པ་ཙ་ན།།
བསམ་ལས་འདས་ལ་བདག་ཅག་དད།།
གང་ལས་དད་པ་རབ་བཤད་ན།།
བདག་ཅག་དད་པ་ཡང་ཡང་དར།།
གཞན་ཡང་དད་པ་ལ་ཕན་པས།།
གང་ལས་དད་པ་འཆད་པ་ལ།།
འཕགས་པ་དམ་པ་འཇམ་དཔལ་ལ།།
བསམ་པ་ཐག་པས་དང་པ་བདག།
ཡལ་བར་བཏང་བ་ཆ་ཙམ་ཡང་།།
མ་མཛད་བདག་ལ་གསན་པར་འཚལ།།
མཚན་བཟང་གང་དང་གང་ལགས་པ།།
རབ་གསལ་རབ་བཟང་མདངས་བཟང་བ།།
མཚན་བཟང་མཐའ་དག་ཚང་བས་ན།།
རབ་གསལ་ཞལ་རས་བཞད་པ་ལ།།
ཞབས་མཉམ་པ་དང་ཤངས་བཟང་དང་།།
གཙང་དང་འཇམ་དང་དག་པ་དང་།།
དཀར་དང་ཚད་མཉམ་ཐགས་བཟང་དང་།།
མཚན་མ་གཞན་ཡང་ཚང་བ་ལགས།།
འཕགས་པ་འཇམ་དཔལ་ངག་གང་ལའང་།།
ཡན་ལག་ཆ་ཙམ་མ་ཉམས་པར།།
ཡན་ལག་མཐའ་དག་ཚང་བས་ན།།
ངག་ལ་དབང་བ་ཡང་དག་རབ།།
འཕགས་པ་འཇམ་དཔལ་ཡང་དག་པ།།
གང་ལ་ཟག་པ་མཐའ་དག་པ།།
བག་ཆགས་བཅས་པ་དག་པས་ན།།
རབ་གཙང་གཙང་མ་ཡང་དག་ལ།།
གནས་དང་གནས་ལ་ལགས་པ་ཡང་།།
མཐའ་དག་པ་ལ་ཚད་མ་ཅན།།
འཇམ་དཔལ་ལས་གཞན་དག་ན་གང་།།
མཁས་པ་མཁས་པ་ཡང་རབ་ལ།།
ཡང་དག་མཐའ་ལ་བར་མ་ཆད།།
མཉམ་བཞག་ངང་ལས་མ་ལངས་པར།།
མཐའ་དག་ཁམས་ཡང་རབ་གསལ་ལ།།
གཞན་ལ་ཕན་པ་མཐའ་དག་པ།།
བར་མ་འཆད་པར་མཛད་པ་མཛད།།
ཡང་དག་མཐའ་ལ་གནས་ན་ཡང་།།
དག་པ་ས་ལ་གནས་པའང་མཛད།།
མཛད་པ་འགལ་བ་མཛད་པ་མཛད།།
འཕགས་པ་འཇམ་དཔལ་མཛད་པ་གང་།།
མཐའ་ལས་འདས་དང་བསམ་ལས་འདས།།
ཚད་ལས་འདས་དང་གཞལ་ལས་འདས།།
དཔག་ལས་འདས་དང་མཉམ་ལས་འདས།།
མཛད་པ་ཡང་ཡང་མཛད་པ་ལས།།
ཆ་ཙམ་ཡང་ཡང་བཤད་པ་ལས།།
དད་པ་ཡང་ཡང་བསགས་པ་ལས།།
གདམས་པ་ཡང་ཡང་ཉན་པར་འཚལ།།
བསམ་པ་དམན་པ་ལ་ལ་དག།
མཐའ་ཡས་ཕན་བཏགས་ཕ་དང་མ།།
ཡལ་བར་བཏང་ནས་བདག་ཐར་པ།།
མ་རབ་ངན་པར་རབ་བསམས་ནས།།
ཆ་ཤས་ཙམ་ཡང་མ་དལ་བར།།
གཞན་ལ་ཕན་པ་མཛད་པས་ན།།
གཞན་ལ་ཕན་པ་མ་ལགས་པ།།
མཛད་པ་ཆ་ཙམ་མ་འཚལ་ལ།།
ནམ་མཁའ་དང་མཉམ་ཕ་མ་དང་།།
ལས་ངན་མཐའ་ཡས་བསགས་པ་ལས།།
ར་བ་ངན་པ་ཐར་དཀའ་གནས།།
གཡང་སར་ཡང་ཡང་ཉམ་ཐག་པ།།
མཐའ་ལས་འདས་པ་མཐའ་དག་པ།།
ཐར་བར་མཛད་པར་དམ་བཅས་ནས།།
ནམ་མཁའ་གནས་པ་དང་མཉམ་པར།།
གནས་པར་མཛད་པ་དམ་ཡང་བཅས།།
ནམ་མཁའ་མཉམ་པ་མཐའ་དག་ལ།།
མཐའ་དག་དཔལ་ལ་གནས་པ་དང་།།
མཐའ་དག་བར་ཆད་ལས་འདས་པ།།
མཐའ་དག་ཕན་མཛད་བསམ་པས་གནས།།
གཞན་ཕན་བསམ་པ་མཐའ་ཡས་དར།།
ཐབས་ལ་མཁས་པ་མཐའ་ཡས་པ།།
བར་མ་ཆད་པར་མཛད་པས་ན།།
མཐའ་ལས་འདས་པ་ཐར་བར་མཛད།།
ཐར་པ་རབ་དང་དམ་པ་ལ།།
གནས་པ་གང་དང་གང་འཚལ་བ།།
མཐའ་དག་འཕགས་པ་འཇམ་དཔལ་ལ།།
གདམས་ངག་ཉན་པས་ཐར་པ་ལགས།།
ཐར་ལམ་ཡང་དག་འཆད་པ་ལ།།
མཁས་པ་རབ་དང་དམ་པ་གང་།།
འབད་པས་ཡང་ཡང་བཙལ་ན་ཡང་།།
གང་ནའང་འཕགས་པ་འཇམ་དཔལ་དང་།།
མཉམ་པ་འགའ་ཡང་མ་འཚལ་ན།།
མཉམ་ལས་འདས་པ་གང་ལ་མངའ།།
མཐའ་དག་གནས་ལ་མཁས་པ་དང་།།
གཞན་ལ་ཡང་དག་མཐའ་འཆད་དང་།།
གཞན་ཕན་མཛད་བཟང་མཐའ་ཡས་དང་།།
དཔལ་ལ་གནས་དང་ངག་ལ་དབང་།།
མཐའ་དག་འཕགས་པ་གཞན་དག་ལས།།
རབ་འཕགས་གསལ་བར་འཕགས་པ་ལགས།།
འཕགས་པ་འཇམ་དཔལ་མཚན་ཙམ་ཡང་།།
གཞན་ཕན་མཛད་པ་མཐའ་ཡས་ན།།
མཛད་པ་དཔག་ཡས་གཞན་དག་ལ།།
གཞན་ཕན་བཤད་པ་ག་ལ་འཚལ།།
འཇམ་དཔལ་མཛད་པ་མཐའ་དང་ཚད།།
འཇལ་བ་གང་དང་གང་ལགས་པ།།
ནམ་མཁའ་ལ་ཡང་མཐའ་དང་ཚད།།
འཇལ་བ་དང་ཡང་མཉམ་པ་ལགས།།
འཕགས་པ་འཇམ་དཔལ་ཨ་ལ་ལ།།
མཛད་བཟང་མཐའ་ཡས་ཨ་ལ་ལ།།
འཕགས་པ་འཇམ་དཔལ་ཡ་མཚན་ཅན།།
མཛད་པ་མཐའ་ཡས་ཡ་མཚན་ཅན།།
བསམ་པ་ཐག་པས་དད་པ་བདག།
འཕགས་པ་འཇམ་དཔལ་རབ་བསམས་ནས།།
ངག་ལ་ཨ་ར་པ་ཙ་ན།།
གསལ་བར་ཡང་ཡང་རབ་བསགས་པས།།
གཞན་ཕན་བསམ་པ་མཐའ་ཡས་དང་།།
ཡང་དག་མཐའ་ལ་མཁས་པ་དང་།།
དཔལ་ལ་གནས་དང་ངག་ལ་དབང་།།
མཐའ་དག་གནང་བར་མཛད་པར་འཚལ།།
གཡང་སར་ཡང་ཡང་གནས་པ་ལས།།
དལ་བ་བཟང་དང་ད་ལན་མཇལ།།
ད་ལན་ཡལ་བར་མ་བཏང་བར།།
ཐར་ལམ་ཡང་དག་གནང་བར་འཚལ།།
ཨི་ངེས་ནི།
འདི་ཡི་ཏིང་འཛིན་འདི་ཡིས་ནི།།
ཡིན་མིན་ཉིད་ནི་ཇི་བཞིན་གཟིགས།།
མི་དམིགས་ཏིང་འཛིན་ཇི་བཞིན་གཟིགས།།
མི་འཇིགས་བཞི་ནི་ཇི་བཞིན་གཟིགས།།
ཨུ་ངས་ནི།
དུས་གསུམ་དུས་ཀུན་ཐུགས་སུ་ཆུད།།
དུག་གསུམ་ཀུན་བཏུལ་བདུད་ཀུན་བཏུལ།།
དུས་གསུམ་ཀུན་ཏུ་གསུང་ཀུན་དུལ།།
ལུས་དུལ་ཐུགས་དུལ་ཀུན་ཏུ་དུལ།།
ཨེ་ངེས་ནི།
ཐེག་ཆེན་བཤེས་གཉེན་དཔེ་མེད་ཆེ།།
དགེ་ལེགས་གཏེར་ཆེན་དེ་མཉེས་ཏེ།།
བདེ་ཆེན་ཡེ་ཤེས་དཔེ་མེད་དེས།།
ཉེས་ཆེན་སེལ་ཏེ་བདེ་ཆེན་འཕེལ།།
ཨོ་ངེས་ནི།
མཆོད་འོས་མཆོད་དོ་མགོན་པོ་མཆོག།
ཆོས་འདོད་འདོད་དོན་དོན་ཡོད་མཛོད།།
ཆོས་ཚོལ་མགོན་པོས་ཆོས་ཤོད་མཛོད།།
མགོན་པོ་ཁོ་བོ་མཆོག་ཐོབ་མཛོད།།
སྔོན་ཆད་གཞན་གྱིས་མ་མྱངས་པའི།།
སྔོན་མེད་སྙན་ངག་བསྟན་བཅོས་འདི།།
སྔོན་སྦྱངས་དག་པའི་ལས་འཕྲོ་ཅན།།
སྔོན་གྱི་དཔའ་བོ་ལྟ་བུས་བཀོད།།
ཅེས་རྗེ་བཙུན་འཇམ་དབྱངས་ལ་བརྟེན་པའི་བསྟོད་པ་བྱ་དཀའི་རྒྱན་གྱིས་སྤྲས་པ་འདི་ཡང་གཞན་ལ་ཕན་དུ་རེ་ཞིང་ཐོལ་བྱུང་དུ་རྩོམ་འདུན་བྱུང་བའི་དོན་ལྟར་ཤཱཀྱའི་དགེ་སློང་བློ་བཟང་ཡེ་ཤེས་བསྟན་པ་རབ་རྒྱས་ཀྱིས་བཞི་སྡེ་དགའ་ལྡན་བསམ་གཏན་གླིང་དུ་ཐུན་བར་ཞིག་ཏུ་ཤར་མང་བྲིས་པ་ཛ་ཡནྟུ།།
རྩོམ་སྒྲིག་པ། ཤེས་རབ་རལ་གྲི།
གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
དྲ་བའི་སྦྲེལ་ཐགhttp://www.tb1025.cn