འཇམ་དབྱངས་དཀར་པོའི་བསྟོད་པ་སྤྲོས་བྲལ་ནམ་མཁའ་ཞེས་བྱ་བ་བཞུགས་སོ།།
ན་མོ་མཉྫུ་གྷོ་ཥ་ཡ།
སྟོང་ཉིད་སྤྲོས་བྲལ་ནམ་མཁའི་དཀྱིལ་ཡངས་བར།།
བཾ་ཡིག་ལས་བྱུང་དཀར་དྭངས་འོ་མའི་མཚོ།།
གཏིང་ཟབ་ཡངས་ཤིང་བསིལ་ངད་ལྡན་པའི་ནང་།།
པད་སྡོང་ཡལ་ག་ལོ་འབྲས་གསེར་ལས་བྱས།།
མཉེན་ལྕུག་འཁྲིལ་ལྡན་དཔག་ཚད་བརྒྱ་བའི་དབུས།།
མཚན་མོའི་མགོན་པོ་ཆ་ཤས་རྫོགས་པའི་སྟེང་།།
ཨ་ཡིག་ཡོངས་གྱུར་འཇམ་དབྱངས་དཔའ་བོའི་སྐུ།།
བརྒྱད་ཟུང་བཅུ་དྲུག་ལོན་པ་གཞོན་ནུའི་ཚུལ།།
པཉྩ་ལི་ཀའི་ཤམ་ཐབས་ཀྱིས་བཀླུབས་ཤིང་།།
ཕྱག་གཡས་མཆོག་སྦྱིན་གཡོན་པ་ཨུཏྤལ་བསྣམས།།
ཁྱོད་སྐུ་རང་བཞིན་མཚན་དང་དཔེ་བྱད་ཀྱིས།།
བརྒྱན་པའི་སྐུ་མཆོག་ལྟ་བས་མི་ངོམས་ལ།།
རིགས་ལྔའི་དབུ་རྒྱན་སྙན་ཤལ་ནོར་བུ་འཕྱང་།།
ཕྱག་ཞབས་གདུ་བུ་རིན་ཆེན་སྐ་རགས་དང་།།
འོག་པག་ལ་སོགས་མཛེས་བྱེད་རྒྱན་གྱིས་སྤྲས།།
རྡོ་རྗེ་སྐྱིལ་ཀྲུང་གིས་བཞུགས་ཁྱོད་ལ་བསྟོད།།
མགོན་ཁྱོད་ཡིད་ལ་དྲན་པའི་མོད་ཉིད་དུ།།
བློ་ངན་མུན་ནག་གིས་ལྡོངས་འགྲོ་བ་རྣམས།།
ཤེས་རབ་སྣང་བ་རྒྱས་མཛད་འཇམ་དཔལ་དབྱངས།།
ཁྱོད་སྐུ་མཐོང་ཞིང་གསུང་གིས་གནང་བ་ཐོབ།།
བློ་གྲོས་རབ་རྒྱས་རྒྱལ་བའི་ཆོས་ཚུལ་འཛིན།།
མཐོང་བའི་མོད་ལ་ལམ་བཟང་རྒྱུད་ལ་སྐྱེ།།
ཚུལ་ཁྲིམས་ལེགས་གཙང་རྒྱལ་བ་གཉིས་པ་ཡི།།
བསྟན་ལ་ལེགས་ཞུགས་རིམ་གཉིས་མཐར་ཕྱིན་ཤོག།
ལེགས་བྱས་འདིས་མཚོན་དགེ་བས་ཚེ་རབས་ཀུན།།
མགོན་པོ་ཁྱོད་ཀྱིས་དགེ་བའི་བཤེས་མཛད་ནས།།
སྐྱེས་བུ་གསུམ་གྱི་ལམ་གྱི་རིམ་པ་རྣམས།།
མཐར་ཕྱིན་སྐུ་གསུམ་གོ་འཕང་མྱུར་ཐོབ་ཤོག།
ཅེས་རང་གི་ལྷག་པའི་ལྷ་འཇམ་དབྱངས་དཀར་པོ་ལ་བསྟོད་པ་སྤྲོས་བྲལ་ནམ་མཁའ་ཞེས་བྱ་བ་འདི་ནི་རང་གཞན་ཀུན་ལ་ཕན་པ་རྒྱ་ཆེན་འབྱུང་བའི་ཕྱིར་དུ་དང་བ་ཆེན་པོས་སུག་བྲིས་སུ་བགྱིས་པའོ།། །།
རྩོམ་སྒྲིག་པ། ཤེས་རབ་རལ་གྲི།
གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
དྲ་བའི་སྦྲེལ་ཐགhttp://www.tb1025.cn