ཆོས་དབྱིངས་ཟག་མེད་ལང་ཚོས་རབ་དྲེགས་པས། །

དུས་དང་མི་འཚམ་གསང་གསུམ་འཁོར་ལོའི་ཕུལ། །

རྒྱན་གྱི་རྣམ་པར་འཆར་བའི་དཔལ་མངའ་བ། །

དུས་ཀྱི་འཇམ་མགོན་གཉིས་པ་རྒྱལ་གྱུར་ཅིག །

ཞབས་སྐྱེས་སྲིད་ཞིའི་ཟུར་ཕུད་མངོན་མཐོ་བས། །

མཆོད་འོས་བླ་ན་འདོད་འཇོའི་དཔག་བསམ་ཤིང༌། །

དགེ་ལེགས་འོད་རིས་མཁའ་ལས་རྣམ་འགོངས་པ། །

རབ་གསལ་གདེངས་ཀ་བསྒྲིགས་པའི་འབབ་སྟེགས་སུ། །

རིང་ནས་རིང་བར་སྤྱན་རས་བཙའ་བའི་འདབ། །

ལྷུང་བས་སྙིང་ལ་དད་པའི་ཁོལ་བཟུང་སྟེ། །

བགྱི་འོས་གཅིག་ཏུ་གང་ལ་མཆོད་སྤྲིན་དུ། །

དཀྲིགས་ པ་དེ་ཡིས་འདིར་ཡང་ཡོན་དུ་སྦྲེང༌། །

མཐོ་རིས་ཡུལ་གྱི་ཡོན་ཏན་ཀུན་བླངས་ནས། །

དག་པའི་ཞིང་ལ་འཕྱ་བའི་ངལ་བ་ཅན། །

གདོང་དམར་ཡུལ་ཞེས་འབྱུང་བོ་འཛིན་མའི་གཞི། །

བསོད་ནམས་དོ་ཤལ་བསྐྱོད་པའི་ཕང་བ་ལ། །

ཐུགས་རྗེ་མགྲིན་སྔོན་རལ་བའི་ཐེམ་སྐས་ལས། །

ཟུར་ཕུད་ལྔ་བ་དུས་ཀྱི་སྟོན་པ་པོར། །

མངོན་སུམ་གཤེགས་པའི་གྲགས་དཀར་གེ་སར་གྱི། །

ཐིག་ལེ་འཐུལ་བའི་སྐལབཟང་འདི་རེ་རྨད། །

གང་ཞིག་མེས་པོས་གྲོང་གི་ཡེ་ཤེས་སོགས། །

སྦྱང་འདོད་ཕོ་ཉ་དཀར་པོའི་ཞགས་པ་ཡིས། །

ཐུགས་ལ་ལྕགས་ཀྱུ་གཉིས་པའི་ལས་བྱས་པ། །

ཆོས་འཚོལ་མཁས་པའི་ལམ་དེར་ངང་གིས་ཞུགས། །

རྒྱ་བོད་སྲོལ་གར་དར་བའི་མེ་ཏོག་གི །

ཕྲེང་བ་རྒྱུ་སྐར་འོད་ཟེར་རྩེ་མོའི་ཚོགས། །

དད་པའི་རྔ་ཡབ་གཡོ་ལྡན་རྣམ་དཔྱོད་ཀྱི། །

ཟླ་བའི་ངོས་ལ་རི་མོའི་སྤུན་དུ་གྱུར། །

འདབ་གཤོག་མ་རྫོགས་མཁའ་ལྡིང་སྲས་པོ་ཞིག །

མཐོངས་ཡངས་དཔུང་བར་བགྲོད་པའི་སྟོབས་བརྙེས་པས། །

ཤེས་བྱའི་ཁུང་བུ་སྐྲག་པས་ལུས་སྐྱེས་ཀྱི། །

རྩི་ཤིང་འདར་ལྡན་སོ་གའི་རྣམ་འཕྲུལ་བཞིན། །

ཁྱོད་ཀྱི་མཁྱེན་དཔྱོད་སྒྲོ་ལྡན་སྟོང་ཕྲག་གིས། །

ཕྲ་ཞིབ་ཤེས་བྱའི་འབེན་དག་ཕིགས་པ་ན། །

སྨྲ་བའི་སེང་གེ་ཤིང་རྟ་མཆེད་གཉིས་ཀྱང༌། །

ཉི་མའི་དྲུང་ན་སྲིན་མེའི་གོ་འཕང་འཛིན། །

ལྗགས་རྩེ་པདྨ་རྒྱས་པའི་ཆ་རེར་ཡང༌། །

མཐའ་དག་རིག་བྱེད་འགྱུ་བའི་རོལ་རྩེད་ལ། །

མ་འགྲན་ཚངས་སྲས་སྐྱེངས་པས་རྒྱུད་མངས་མར། །

ཕྱག་སོར་ལན་བརྒྱར་བསྣུན་ཀྱང་ངལ་བའི་རྟེན། །

གུར་ཀུམ་དོག་པ་རྒྱུ་བའི་དགའ་བྱེད་ཀྱིས། །

མང་ཐོས་ས་གསུམ་བརྙེས་པའི་ཁེངས་པ་ཡང༌། །

ཐུང་ངུར་བཏང་བའི་སྙན་པ་བླ་ན་མེད། །

གང་གི་གསང་གསུམ་ཡོན་ཏན་གཟུགས་ཅན་དུ། །

རྣམ་པར་འཕོས་པ་ས་འཛིན་ལྷུན་པོ་སྟེ། །

གསེར་ལྡན་རལ་བས་འདེགས་པའི་སྐལ་བཟང་ལ། །

རྒྱལ་བ་རྣམས་ཀྱང་སྲེད་པས་གདུང་བ་འཛིན། །

དེ་ཡི་གྲོགས་མོ་ནམ་མཁའི་ནུ་ལྡན་མ། །

ཕྲག་དོག་རོ་བརྒྱ་འབར་བ་ལ་ཟོས་པས། །

རྒྱ་ཆེན་འཁྲུགས་པའི་མིག་ཆུ་ཟེགས་པའི་མཚོར། །

ས་འདིར་རྒྱ་མཚོའི་ཐ་སྙད་སྒྲ་ཡིས་འབོད། །

མདོ་ཁམས་འཛིན་མ་དར་བའི་གདེངས་ཀ་ན། །

མཚན་དཔེའི་གབ་པའི་གཞོན་ནུ་སངས་རྒྱས་ཞེས། །

མཐོན་མཐིང་མཁའ་ཡིས་ཆུ་འཛིན་དྲ་བ་ལ། །

ལྟད་མོར་ལྷགས་འདིས་དགུང་ཡང་རལ་བས་དོགས། །

བློ་བཟང་རིང་ལུགས་ནོར་བུའི་ལྷུན་པོ་གང༌། །

ཉུངས་དཀར་ཚད་དུ་འཕོ་བ་ལ་བརྩོན་ཚེ། །

རྩོད་པའི་དུས་ཀྱི་དགེ་ལེགས་དཔལ་བ་ཁྱོད། །

རྒྱལ་རྣམས་ཐུགས་ཀྱི་ཐིག་ལེ་བོ་བར་ངེས། །

ཁྱོད་ཞལ་དབུགས་ཀྱི་རྩེ་མོ་གཡོ་བ་ཡང༌། །

གསེར་ཞུན་བསྟན་པའི་སྲོག་གི་ཀ་བ་ལ། །

འགྱུར་བ་ཉིད་ཕྱིར་མཐར་བྱེད་གཏུམ་པོ་ཡང༌། །

འགྱིང་བ་བཏང་ནས་བྲན་གྱི་ལས་ལ་ཆས། །

ཕྱུགས་ཀྱི་ར་བར་རྒྱལ་བའི་འཁྲི་ཤིང་མཆོག །

མི་སྐྱེའི་གཏམ་གྱི་ཁུག་པ་རྫུན་རིས་ཙམ། །

མད་ན་གཙུག་ཏོར་བྱི་བའི་བདེ་བར་གཤེགས། །

ས་འདིར་རྒྱུ་བའི་དགེ་མཚན་འདི་ཅི་ཞིག །

དེ་ཕྱིར་འདི་ཡི་ཞབས་སྐྱེས་རེག་པ་ཡི། །

རྡུལ་ཡང་ཐུབ་པས་མཆོད་ འོས་མཆོད་རྟེན་བས། །

རང་རང་ཐོད་དུ་བཀུར་བའི་རིན་ཆེན་དུ། །

ལེན་རྣམས་སྐལ་བཟང་བསྐལ་པའི་ཡུན་ལ་བསྒྲུབས། །

ཐུན་མོང་ཐུན་མོང་མིན་པའི་གཙུག་ཏོར་གྱི། །

མཁའ་ལ་དེང་ཡང་སྐྱིལ་མོ་ཀྲུང་བཅས་ནས། །

བློ་བཟང་ལེགས་གསུང་གྲགས་པའི་ སྙན་སྒྲ་ཅན། །

ཁོར་ཡུག་འཁྲོལ་བའི་ལེགས་མཛད་ཡི་གར་འོང༌། །

ཚུལ་དེས་རང་བསྟན་ཁ་ཡི་དབུགས་བྲལ་བ། །

སོས་ལས་ཕན་བདེ་གསེར་གྱི་མྱུ་གུ་མང༌། །

འཛུམ་པའི་གནའ་བོའི་སྲོལ་བཟང་རབ་དར་བས། །

འཇམ་མགོན་མཉེས་པའི་ཕ་མཐའ་སུ་ཡིས་དཔོག །

ལེགས་བྱས་བསོད་ནམས་བཀྲ་ཤིས་རྫས་མངས་ཀྱི། །

སྤྲིན་ཕུང་རྒྱུ་མཚོའི་བཀོད་པ་འབུམ་དཀྲིགས་པས། །

རབ་འབྱམས་ཞིང་ན་རྒྱལ་བ་སྲས་བོར་བཅས། །

ཅི་ཡང་མྱོས་པའི་རྩེ་དགའ་གཞལ་ཡོད་མིན། །

འདོད་པའི་ཡོན་ཏན་གློག་གི་ཕྲེང་བ་ཡིས། །

དབང་མེད་བཟུང་ནས་ཉེས་བཤད་སྤྲིན་གྱི་སྒྲས། །

ཐོས་འཛིན་ཁང་བ་འགེངས་པས་ནོར་ལྡན་མར། །

ལེགས་བཤད་རྒྱུ་བའི་གོ་སྐབས་ག་ལས་རྙེད། །

འོན་ཀྱང་ཁྱོད་ཀྱི་ཐུགས་བསྐྱེད་རླུང་པོའི་དཔུང༌། །

བཙན་པོས་ཆེར་སྙིགས་འཇིག་རྟེན་རྣམ་གཞིག་ནས། །

རྫོགས་ལྡན་མགྲོན་དུ་བསུས་པར་ཆོས་ཀྱི་དབྱངས། །

མ་ལུས་རང་སྒྲར་དགོད་པའི་ཡ་མཚན་འབར། །

ད་ནི་ཆོས་ཀྱི་རྔ་ཆེན་རྒྱ་མཚོ་བཞིའི།།

མཐའ་ལ་ཐུག་པར་བརྡུངས་པས་ས་ཆེན་འདིར། །

རྨད་བྱུང་བཀོད་པའི་ཞིང་ཁམས་ཡོངས་འཕོས་པའི། །

ཡ་མཚན་རི་མོ་གཞར་ཡང་འདོར་མི་འཚལ། །

རིན་ཆེན་རྡུལ་བརྩེགས་ལྷ་ཡི་རྐང་སྟེགས་དེ། །

ནམ་ཞིག་བི་ཤྭ་ན་རའི་སྲས་པོ་ལ། །

མ་འཁྱུད་དེ་སྲིད་བཤད་སྒྲུབ་རོལ་རྩེད་ཀྱིས། །

མཚན་ཡང་ཉིན་བཞིན་བགྱིད་པ་ཁྱོད་ལ་འོས། །

འདི་ན་ཨཽ་ཌི་ཡ་ན་ཡི། །

བྲག་དཀར་དུས་ཀྱིས་སོན་པ་ལ། །

ཁོར་ཡུག་བསྐོར་བའི་ས་འཛིན་ཚོགས། །

འདུད་པའི་རྣམ་འགྱུར་རི་མོ་བཞིན། །

རྐང་འཐུང་དགོད་པའི་སྤུ་ལོང་གིས། །

དྲེགས་པ་རབ་ལྡན་ནོར་འཛིན་གྱིས། །

འཆི་མེད་གྲོང་གི་ཁྱད་པར་ལ།།

འཕྱ་བ་ཟླ་བའི་འཛུམ་དུ་གསལ།།

དྲི་ཟ་དགའ་བའི་རོལ་མོ་ལས། །

འདབ་ཆགས་གྱ་གྱུའི་རྒྱུད་མངས་དབྱངས། །

ཕྱོགས་ཀྱི་བུ་མོའི་རྣ་བ་ལ། །

སྔོན་མེད་རྒྱན་གྱི་དོ་ཤལ་རྒོད། །

མཐིང་སྔོན་བཻཌཱུར་ལང་ཚོ་ཡིས། །

སྒེག་པ་འགྲོ་ལྡན་དཔལ་མོའི་འཕྲུལ། །

ཆོས་བཟང་ཅ་ཅོའི་མཆེད་པོ་སྟེ། །

བདེ་ཆེན་དགའ་བ་དར་ལ་བརྩོན། །

མཁའ་ལ་མངོན་སྤྱོད་དཔལ་མོའི་ཁྱུ། །

བདེ་སྟོང་དགའ་མགུ་ལ་རོལ་ནས། །

སར་བ་སར་བའི་བཀྲ་ཤིས་ཀྱི། །

རྒྱལ་མཚན་འཛུགས་པའི་མཐའ་མ་རྙེད། །

དེ་ལྟའི་ལྟེ་བས་འོད་མིན་གྱི། །

བ་གམ་ནོར་བུའི་འོད་ཚོགས་ཅན། །

བྱེད་པོས་བཀོད་ལ་དཔག་ཡས་པའི། །

བྱིན་རྟེན་ཟླ་ཤེལ་ཅི་ཡང་བསྟར། །

ཐུགས་རྗེ་སྤྱན་རས་ཟུམ་མ་གྱུར། །

གསང་གསུམ་ཆུ་སྐྱེས་མངོན་གཡོ་བ། །

དེ་ཕྱིར་ས་ཡི་འཇིག་རྟེན་དབང༌། །

གྲགས་པ་དོན་དང་ལྡན་པ་བྱུང༌། །

གང་དེར་ལེགས་བཤད་རྩེ་དགའི་འོད་ཚོགས་ཀྱིས། །

ཀུན་ཏུ་བཟང་པོའི་དཔལ་ཡང་འཕྲོག་པ་ལ། །

ཞུགས་པས་འཚོ་བ་དོན་དང་ལྡན་པ་སྟེ། །

འཚེ་བ་ཐན་སྤྲིན་གཞོན་ནུའི་སྲོག་ལ་ལྟ། །

ལས་ཀྱི་རི་དྭགས་བས་མཐའི་དགའ་ཚལ་ན། །

ལས་ཀྱིས་རྩེན་པའི་ཆོ་ག་མ་རྫོགས་ཀྱང༌། །

ཡིད་ཀྱི་ཆུ་བོ་དད་པའི་ཡུར་བ་ན། །

ཉིན་བཞིན་ཁྱོད་དྲུང་རྒྱུ་ལ་རྒྱུན་ཆད་གང༌། །

དགོངས་ཤིག་བྱེས་སུ་འཕྱན་པ་མ་མའི་ངག །

ཕྱིར་མིག་ཨོམ་ཚུགས་བརྟན་པའི་སྟངས་ཀ་ན། །

གདུང་བ་སེམས་ལ་བརྣགས་ཏེ་དབུགས་དང་བཅས། །

གྲེ་བ་འགེངས་ལ་བརྩོན་པའི་ཚུལ་དེ་འོ། །

བློ་བཟང་རིང་ལུགས་དྲི་མེད་མཁའ་ལ་ལེགས་བཤད་འོད་བརྒྱའི་དྲ་བ་ནི། །

ཉིན་རེ་ཞིང་ཡང་རྣམ་པར་འགོད་པའི་དཔལ་སྟུག་ལང་ཚོ་ལ་སྲེད་ནས། །

མི་ཕྱེད་དད་པའི་འདབ་བརྒྱ་བ་དེ་ལྷག་ལྷག་རྒོད་པའི་གེ་སར་ལས། །

ངོ་མཚར་སྤྲིང་བའི་ཡི་གེའི་ཟོལ་གྱིས་མཁའ་ལ་གར་གྱི་རི་མོ་འབྲི། །

ཟླ་བ་ནོར་བུ་དཀར་པོའི་དཔལ་ལ་རྒོད་ཅིང་འཕྱ་བ་ལྷུར་བྱས་ནས། །

དྲི་མས་དྲི་མ་ཡོངས་སུ་བཏང་ལས་མཛེས་སྡུག་འབར་བའི་དྲེགས་པ་འཛིན། །

མི་འགྱུར་རེ་ཁཱ་གསལ་བ་གསལ་བས་སྲིད་ཞིའི་བཀྲ་ཤིས་ཀུན་གཡབ་སྟེ། །

སྣེ་ཚར་ལན་བུའི་འདབ་མ་རིང་བསྐྱོད་སྒྲིབ་མེད་གཟིགས་པའི་རྟེན་དུ་ཆས། །པཱུ་ཛ་མསྟུཿ །། །།

རྩོམ་སྒྲིག་པ།ཤེས་རབ་རལ་གྲི།

གསལ་འདེབས།རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།དྲ་བའི་སྦྲེལ་ཐགhttp://www.tb1025.cn