བླ་མ་དང་རྗེ་བཙུན་མ་ལ་གསོལ་བ་འདེབས་ཤིང་བསམ་པ་ལྷུན་འགྲུབ་མ་བཞུགས་སོ།།
༄༅།།ན་མོ་གུ་རུ་ཨཱརྱ་ཏཱ་རེ་ཡ།
སྐྱབས་ཀུན་ངོ་བོ་རྩ་བའི་བླ་མ་དང།།
དབྱེར་མེད་བཅོམ་ལྡན་འཕགས་མ་སྒྲོལ་མ་ལ།།
རྣམ་པ་ཀུན་ཏུ་གུས་པས་ཕྱག་འཚལ་ལོ།།
བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།
འཇིགས་པ་མེད་པའི་ལུང་རྟོགས་ཡོན་ཏན་གྱིས།།
ཡོངས་རྫོགས་བསྟན་པའི་དབང་ཕྱུག་གཅིག་གྱུར་བ།།
འཇིགས་བྲལ་སྲིད་ཞིའི་བླ་ན་འཕགས་པའི་མགོན།།
ཕྱོགས་ལས་རྣམ་པར་རྒྱལ་ལ་གསོལ་བ་འདེབས།།
བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།
རྒྱལ་བ་ཀུན་གྱི་འཕྲིན་ལས་གཅིག་བསྡུས་ནས།།
མཚར་སྡུག་ལྷ་མོའི་གར་གྱིས་ཉམ་ཐག་འགྲོ།།
ཉམ་ངའི་སྲིད་མཚོ་ཆེ་ལས་སྒྲོལ་མཛད་མ།།
བཅོམ་ལྡན་འཕགས་མ་ཡུམ་ལ་གསོལ་བ་འདེབས།།
བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།
ཚེ་འདིར་ཆོས་ཀྱི་ཆ་རྐྱེན་འབྱོར་བའི་ཕྱུག།
ཕྱུག་ཀྱང་འདོད་ཡོན་རྨི་ལམ་བཞིན་དུ་མཐོང་།།
མཐོང་བའི་མོད་ལ་སྡོམ་ཁྲིམས་རྣམ་པར་དག།
དག་པའི་ཞིང་དུ་ནམ་ཞིག་སྐྱེ་བ་སོགས།།
བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།
སྐྱེས་ནས་ཐེག་པ་ཆེན་པོའི་རིགས་སད་དེ།།
དགྲ་གཉེན་མེད་པར་བདག་གཞན་མཉམ་བརྗེས་ཀྱིས།།
ཉེ་རིང་མེད་པའི་འགྲོ་བ་མ་ལུས་པ།།
བྱང་ཆུབ་མཆོག་ལ་འགོད་འདོད་སེམས་བསྐྱེད་སོགས།
བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།
གདོད་ནས་རང་བཞིན་ངོས་ནས་མ་གྲུབ་ཅིང་།།
ཐ་སྙད་སྒྱུ་མ་ཙམ་དུ་སྣང་བ་ཡི།།
འཁྲུལ་མེད་ལྟ་བ་མཆོག་གི་མཚོན་རྣོན་གྱིས།།
བདག་འཛིན་སྡེ་བཅས་འཇོམས་པར་བྱེད་པ་སོགས།།
བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།
བསམ་གྱིས་མི་ཁྱབ་ཏིང་འཛིན་མཐའ་ཡས་ཐོབ།།
བརྗོད་ཀྱིས་མི་ལང་མཁྱེན་བརྩེའི་དཔལ་ལ་འབྱོར།།
གྲངས་ཀྱིས་མི་ཟིན་འགྲོ་བ་སྒྲོལ་བའི་ཕྱིར།།
འཁུར་གྱིས་མི་ངལ་སྤྲུལ་བ་འགྱེད་པ་སོགས།།
བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།
མདོར་ན་ཚེ་འདིར་ནད་མེད་བདེ་སྐྱིད་ལྡན།།
མཐུན་རྐྱེན་མ་ལུས་འདོད་པ་བཞིན་དུ་འགྲུབ།།
ཕྱི་མའི་སྐྱེ་ཀུན་བླ་མས་རྗེས་བཟུང་ནས།།
རྒྱལ་སྲས་སྤྱོད་པའི་ཕ་རོལ་ཕྱིན་པ་སོགས།།
བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།
སྐྱེ་བ་ཀུན་ཏུ་ཡང་དག་བླ་མ་དང་།།
འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང་།།
ས་དང་ལམ་གྱི་ཡོན་ཏན་རབ་རྫོགས་ནས།།
རྡོ་རྗེ་འཆང་གི་གོ་འཕང་མྱུར་ཐོབ་ཤོག།
སངས་རྒྱས་སྐུ་གསུམ་བརྙེས་པའི་བྱིན་རླབས་དང་།།
ཆོས་ཉིད་མི་འགྱུར་བདེན་པའི་བྱིན་རླབས་དང་།།
དགེ་འདུན་མི་ཕྱེད་མཐུན་པའི་བྱིན་རླབས་ཀྱིས།།
ཇི་ལྟར་བསྔོ་བ་སྨོན་ལམ་འགྲུབ་གྱུར་ཅིག།
ཅེས་བླ་མ་དང་རྗེ་བཙུན་མ་ལ་གསོལ་བ་འདེབས་ཤིང་བསམ་པ་ལྷུན་འགྲུབ་མ་འདི་ལྟ་བུ་ཞིག་དགོས་ཞེས་ཁོ་ཚེ་དགའ་ལྡན་ཆོས་འཁོར་གླིང་གི་གྲྭ་རིགས་དགེ་སློང་སྐལ་བཟང་བློ་གསལ་གྱིས་འདོད་མོས་བཞིན།༧ཤཱཀྱའི་དགེ་སྦྱོར་མི་བསྐྱོད་དགྱེས་གར་རྡོ་རྗེས་སྦྱར་བ་དགེའོ།།
རྩོམ་སྒྲིག་པ།ཤེས་རབ་རལ་གྲི།
གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
དྲ་བའི་སྦྲེལ་ཐགhttp://www.tb1025.cn