ས་སྐྱ་ལེགས་བཤད་ལས་རབ་བྱེད་གཉིས་པ་ཡ་རབས་བརྟག་པ་བཞུགས་སོ།།

ཡོང་ཁུངས།   ངེད་དགེ་ལུགས་པའི་དྲ་བ།     སྤེལ་དུས།  2016-09-21 23:43:04     རྩོམ་པ་པོ།   ས་སྐྱ་པཎྜི་ཏ་ཀུན་དགའ་རྒྱལ་མཚན།    ཀློག་ཐེངས།  

611732892346852030.jpg

 

རྟག་ཏུ་དམ་པའི་ཡོན་ཏན་རྣམས།།
སྐྱེ་བོ་དམ་པས་ལྷག་པར་སྒྲོགས།།
མ་ལ་ཡ་ཡི་ཙན་དན་དྲི།།
རླུང་གིས་ཕྱོགས་བཅུར་རྒྱས་པར་བྱེད།།
དམ་པ་དཔོན་དུ་བསྐོས་གྱུར་ན།།
དོན་གྲུབ་པ་དང་བདེ་སྐྱིད་འཐོབ།།
ནོར་བུ་རྒྱལ་མཚན་རྩེར་མཆོད་ན།།
ཡུལ་ཕྱོགས་དགེ་ཞེས་མཁས་རྣམས་སྒྲོགས།།
རྒྱལ་ངན་གཞན་གྱིས་གཙེས་པ་ན།།
ལྷག་པར་ཆོས་རྒྱལ་དྲན་པར་འགྱུར།།
རིམས་ཀྱིས་བཏབ་པའི་སེམས་ཅན་རྣམས།།
གངས་ཆུ་འབའ་ཞིག་ཡིད་ལ་བྱེད།།
སྡིག་སྤྱོད་རྒྱལ་བོས་གཙེས་པ་ན།།
མི་དབང་ཆོས་རྒྱལ་ལྷག་པར་སྐྱོང་།།
འབྱུང་བོའི་གདོན་གྱིས་བཏབ་པ་ལ།།
གསང་སྔགས་གྲུབ་པས་རྗེས་སུ་འཛིན།།
དམ་པ་སྡིག་པ་ཆུང་ཡང་སྤོང་།།
དམན་རྣམས་ཆེན་པོའང་དེ་ལྟ་མིན།།
ཞོ་ལ་རྡུལ་ཕྲན་འབྱར་བ་སེལ།།
ཆང་ལ་ཕབ་ཀྱང་ལྷག་པར་འདེབས།།
སྐྱེ་བོ་དམ་པ་རྒུད་གྱུར་ཀྱང་།།
སྤྱོད་པའི་ཁྱད་པར་ལྷག་པར་མཛེས།།
མེ་ནི་ཐུར་དུ་ཁ་བསྟན་ཀྱང་།།
མེ་ལྕེ་གྱེན་དུ་འབར་བ་མཐོང་།།
དམ་པ་རྒྱང་ན་གནས་ན་ཡང་།།
འཁོར་འདབས་ཕན་པས་རིང་ནས་སྐྱོང་།།
མཁའ་ལ་སྤྲིན་ཆེན་འཁྲིགས་པ་ཡིས།།
ས་ཡི་ལོ་ཏོག་ཁྱད་པར་འཕེལ།།
གསོན་ཆེན་སྙན་གྲགས་དགའ་བའི་རྒྱུ།།
འཇིག་རྟེན་གཞན་དུ་བསོད་ནམས་དགའ།།
དེ་གཉིས་མེད་པའི་ནོར་ཙམ་གྱིས།།
མཁས་རྣམས་དགའ་བ་བསྐྱེད་མི་ནུས།།
ཕྱི་རྗེས་རིང་དུ་ལྟ་བ་དང་།།
བག་སྤྱོད་པ་ལ་བཟོད་བསྲན་ཆེ།།
བརྩོན་འགྲུས་ཆེ་ཞིང་བརྟན་ལ་གྲིམས།།
བྲན་གཡོག་ཡིན་ཡང་དཔོན་དུ་འགྱུར།།
སྦྱིན་ལ་རྟག་ཏུ་སེམས་སྤྲོ་བ།།
དེ་ཡི་གྲགས་པ་རླུང་བཞིན་ལྡང་།།
ཕོངས་པ་སློང་བ་འདུལ་བ་བཞིན།།
འབུལ་བར་འདོད་རྣམས་དེ་བས་མང་།།
བྱིན་ནས་སླར་ཡང་མི་ལེན་པ།།
དམན་པའི་བརྙས་པ་དང་དུ་ལེན།།
ཕན་པ་ཆུང་ངུའང་མི་བརྗེད་པ།།
བདག་ཉིད་ཆེན་པོའི་ཆེ་རྟགས་ཡིན།།
དམ་པའི་ཡོན་ཏན་སྤས་གྱུར་ཀྱང་།།
འཇིག་རྟེན་ཀུན་ལ་ཁྱབ་པར་གསལ།།
སྣ་མའི་མེ་ཏོག་ལེགས་བཀབ་ཀྱང་།།
དྲི་ཞིམ་ཀུན་ཏུ་ཁྱབ་པར་འགྱུར།།
རྒྱལ་བོ་རང་ཡུལ་ཆེ་བ་ཙམ།།
དམ་པ་གང་དུ་ཕྱིན་སར་བཀུར།།
མེ་ཏོག་ཕལ་ཆེར་ཉིན་རེའི་རྒྱུན།།
གཙུག་གི་ནོར་བུ་གང་དུའང་མཆོད།།
ལྗོན་ཤིང་དུལ་པ་འབྲས་བུ་མང་།།
རྨ་བྱ་དལ་བ་མཇུག་སྒྲོ་བཟང་།།
རྟ་མཆོག་དུལ་བ་འགྲོ་མགྱོགས་ཏེ།།
དམ་པ་དུལ་བ་མཁས་པའི་རྟགས།།
དམ་པ་རྣམས་དང་ཕལ་བ་ལ།།
བྱས་པ་མཉམ་ཡང་དྲིན་མི་འདྲ།།
ཞིང་ལ་ས་བོན་ཁྱད་མེད་ཀྱང་།།
ལོ་ཏོག་ཁྱད་པར་དཔག་ཏུ་མེད།།
བདག་ཉིད་ཆེ་ལ་ཕན་བཏགས་ན།།
ཅུང་ཟད་ཙམ་ལའང་འབྲས་བུ་འབྱིན།།
སྐྱུ་རུ་ར་གཅིག་བྱིན་པ་ལ།།
ཆོས་རྒྱལ་བུ་དང་མཉམ་ལ་ལྟོས།།
བཟང་བོའི་ཆོ་རིགས་སྤྱོད་པས་བསྲུང་།།
སྤྱོད་པ་ཉམས་ན་རིགས་དོན་མེད།།
ཙན་དན་དྲི་བཟང་སྐྱེ་བོ་དགའ།།
དེ་བསྲེགས་སོལ་བ་སུ་ཞིག་ལེན།།
ཆེན་པོ་རེ་ཞིག་རྒུད་གྱུར་ཀྱང་།།
དེ་ལ་གདུང་བ་བསྐྱེད་མི་དགོས།།
ཟླ་བ་རེ་ཞིག་གཟས་བཟུང་ཡང་།།
དེ་མ་ཐག་ཏུ་གྲོལ་བར་འགྱུར།།
ཆེན་པོས་དགྲ་ལ་བྱམས་བྱས་ན།།
དགྲ་ཉིད་དེ་ཡི་དབང་དུ་འགྱུར།།
མང་པོས་བཀུར་བས་ཀུན་བསྐྱངས་པས།།
ཀུན་གྱིས་རྒྱལ་བོར་དབང་བསྐུར་ཏོ།།
དམ་པ་ཇི་ལྟར་རྒུད་གྱུར་ཀྱང་།།
སྡིག་དང་འདྲེའ་པའི་ཟས་མི་ཟ།།
སེང་གེ་བཀྲེས་ཀྱང་མི་གཙང་བའི།།
ངན་སྐྱུགས་ཟ་བར་མི་བྱེད་དོ།།
དམ་པ་སྲོག་ལ་བབས་ན་ཡང་།།
རང་བཞིན་བཟང་བོ་ག་ལ་འདོར།།
ས་ལེ་སྦྲུམ་ནི་བསྲེགས་བཅད་ཀྱང་།།
དེ་ཡི་ཁ་དོག་ཉམས་མི་འགྱུར།།
སྐྱེས་མཆོག་རྣམས་ལ་དམན་པ་རྣམས།།
ཁྲོ་ཡང་ལན་དུ་ག་ལ་ཁྲོ།།
ཅེ་སྤྱང་དྲེགས་པས་སྐད་འབྱིན་ཡང་།།
རི་དྭགས་རྒྱལ་པོས་སྙིང་རྗེས་སྐྱོང་།།
བདག་ཉིད་ཆེ་ལ་སྐྱེ་བོ་རྣམས།།
སྐྱོན་འཚོལ་འགྱུར་གྱི་དམན་ལ་མིན།།
འཕན་ཟེལ་རིན་ཆེན་ལ་ལྟ་ཡི།།
མགལ་དུམ་ལ་ནི་སུ་ཞིག་དཔྱོད།།
བསྟོད་པས་དགའ་བར་མི་འགྱུར་ལ།།
སྨད་པས་མི་དགར་མི་འགྱུར་ཞིང་།།
རང་གི་ཡོན་ཏན་ལེགས་གནས་པ།།
སྐྱེ་བོ་དམ་པའི་མཚན་ཉིད་ཡིན།།
སྡིག་པ་དང་ནི་མཐུ་རྩལ་ལས།།
བྱུང་བའི་ལོངས་སྤྱོད་ལོངས་སྤྱོད་མིན།།
ཁྱི་དང་བྱི་ལ་འགྲངས་ན་ཡང་།།
ངོ་ཚ་བོར་བའི་རྣམ་ཐར་ཡིན།།
འཁོར་ལ་ཕུན་སུམ་ཚོགས་གྱུར་ན།།
རྗེ་དཔོན་ཉིད་ཀྱི་ཆེ་བ་ཡིན།།
རྟ་ལ་རྒྱུན་དུ་བྱས་པ་དེ།།
བདག་པོ་ཉིད་ལ་མི་མཛེས་སམ།།
ཇི་ལྟ་ཇི་ལྟར་རྗེ་དཔོན་གྱིས།།
འཁོར་ལ་དྲིན་གྱིས་བསྐྱངས་གྱུར་པ།།
དེ་ལྟ་དེ་ལྟར་འཁོར་གཡོག་རྣམས།།
རྗེ་དཔོན་ཉིད་ཀྱི་བྱ་བ་བསྒྲུབ།།
བདག་ཉིད་ཆེན་པོ་གནས་པའི་སར།།
མཁས་པ་གཞན་རྣམས་སུ་ཡིས་བརྩི།།
མཁའ་ལ་ཉི་མ་ཤར་བ་ན།།
རྒྱུ་སྐར་མང་ཡང་མཐོང་མི་འགྱུར།།
 

                              རྩོམ་སྒྲིག་པ། བྱ་མདོ་གུར་ཀུམ།
གསལ་འདེབས། 
             རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་།གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
དྲ་བའི་སྦྲེལ་ཐགhttp://www.tb1025.cn

བརྒྱུད་འགོད།