ས་སྐྱ་ལེགས་བཤད་ལས་རབ་བྱེད་དང་བོ་མཁས་པ་བརྟག་པ་བཞུགས་སོ།།

ཡོང་ཁུངས།   ངེད་དགེ་ལུགས་པའི་དྲ་བ།     སྤེལ་དུས།  2016-09-21 23:23:09     རྩོམ་པ་པོ།   ས་སྐྱ་པཎྜི་ཏ་ཀུན་དགའ་རྒྱལ་མཚན།    ཀློག་ཐེངས།  

རིག་པས་དཔྱད་ན་ཆོས་ལུགས་མི་འགལ་ཞིང་།།

འཇིག་རྟེན་བྱ་བ་ཀུན་ནས་ལེགས་བསྒྲུབ་པ།།

དམ་པ་རྣམས་ཀྱི་སྤྱོད་ཚུལ་ཅི་འདྲ་ཞིག།

བཤད་པ་འདི་ནི་ལེགས་བཤད་རིན་ཆེན་གཏེར།།

མཁས་པ་ཡོན་ཏན་མཛོད་འཛིན་པ།།

དེ་དག་ལེགས་བཤད་རིན་ཆེན་སྡུད།།

རྒྱ་མཚོ་ཆེན་པོ་ཆུ་བོའི་གཏེར།།

ཡིན་ཕྱིར་ཆུ་བོ་ཐམས་ཅད་འབབ།།

སྐྱེ་བོ་ཡོན་ཏན་ཡོད་མེད་པའི།།

བླང་དོར་བློ་གྲོས་ལྡན་པ་མཁས།།

རྡུལ་དང་འདྲེས་པའི་ལྕགས་ཕྱེ་རྣམས།།

ཁབ་ལེན་རྡོ་ཡིས་ལེན་པར་ཤེས།།

ལེགས་བཤད་མཁས་པའི་བློ་གྲོས་ཀྱིས།།

གོ་ཡི་བླུན་པོས་དེ་ལྟ་མིན།།

ཉི་མའི་འོད་ཟེར་ཤར་བ་ན།།

འབྱུང་བོའི་བྱ་རྣམས་ལོང་བར་འགྱུར།།

ཤེས་རབ་ལྡན་པས་ཉེས་པ་དག།

སེལ་བར་ནུས་ཀྱི་བླུན་པོས་མིན།།

ནམ་མཁའ་ལྡིང་གིས་དུག་ཅན་སྤྲུལ།།

གསོད་པར་ནུས་ཀྱི་ཁྭ་ཏས་མིན།།

བློ་གྲོས་ཆེན་པོ་རྒུད་ན་ཡང་།།

ལྷག་པར་བློ་གྲོས་སྟོབས་ལྡན་འགྱུར།།

རི་དྭགས་རྒྱལ་བོ་བཀྲེས་པ་ན།།

གླང་ཆེན་སྤྱི་བོར་མྱུར་དུ་འགེམས།།

མཁས་པ་རྩད་ཅིང་མ་དྲིས་པ།།

དེ་ཡི་བར་དུ་གཏིང་མི་དཔོགས།།

རྔ་ལ་དབྱུག་གུས་མ་བསྣུན་པ།།

དེ་སྲིད་གཞན་དང་ཁྱད་ཅི་ཡོད།།

རིག་པ་ནངས་པར་འཆི་ཡང་བསླབ།།

ཚེ་འདིར་མཁས་པར་མ་གྱུར་ཀྱང་།།

སྐྱེ་བ་ཕྱི་མར་བཅོལ་བ་ཡི།།

ནོར་ལ་རང་ཉིད་ལེན་དང་མཚུངས།།

ཡོན་ཏན་ལྡན་ན་སྐྱེ་བོ་ཀུན།།

མ་བསྡུས་པར་ཡང་རང་ཉིད་འདུ།།

དྲི་ལྡན་མེ་ཏོག་རྒྱང་རིང་ཡང་།།

བུང་བ་སྤྲིན་གྱི་ཚོགས་བཞིན་འཁོར།།

མཁས་པ་ཡོན་ཏན་ཀུན་བསླབས་པ།།

མཐར་ཕྱིན་གཅིག་གིས་འཇིག་རྟེན་གསལ།།

བློ་ངན་ཤེས་པ་མང་ན་ཡང་།།

རྒྱུ་སྐར་བཞིན་དུ་གསལ་མི་ནུས།།

མཁས་པ་ཡོན་ཏན་དཔག་མེད་ཀྱང་།།

གཞན་གྱི་ཡོན་ཏན་ཆུང་ངུའང་ལེན།།

དེ་ལྟར་རྒྱུན་དུ་སྤྱད་པ་ཡིས།།

མྱུར་དུ་ཐམས་ཅད་མཁྱེན་པར་འགྲོ།

མཁས་པ་ཤེས་རབ་ཀྱིས་བསྲུང་ན།།

དགྲ་བོ་མང་ཡང་ག་ལ་ཚུགས།།

འཕགས་རྒྱལ་གྱི་ནི་བྲམ་ཟེའི་བུ།།

གཅིག་པུས་དགྲ་བོའི་ཚོགས་ཀུན་བཅོམ།།

བློ་ཆུང་གྲོས་ཉེས་འཁྲུགས་པའི་ཚེ།།

བློ་ལྡན་ཐབས་ཀྱིས་བདེ་བར་གསོ།།

ཆུ་ཀླུང་རྙོག་པས་ཆུད་གཟན་པ།།

ཆ་དྭངས་ནོར་བུས་དྭངས་པར་བྱེད།།

མཁས་པ་ཇི་ལྟར་ཐབས་རྡུགས་ཀྱང་།།

བླུན་པོ་འཇུག་པའི་ལམ་མི་འགྲོ།།

ཆར་འདོད་བྱེའུ་སྐོམ་ན་ཡང་།།

ས་ལ་བབས་པའི་ཆུ་མི་འཐུང་།།

ཤེས་རབ་ལྡན་པ་མགོ་བསྐོར་ཡང་།།

བྱ་བའི་ཆ་ལ་རྨོངས་མི་འགྱུར།།

སྲོག་ཆགས་གྲོག་མ་མིག་མེད་ཀྱང་།།

མིག་ལྡན་གཞན་ལས་ལྷག་པར་མགྱོགས།།

བློ་གྲོས་ལྡན་པ་གཉིས་བགྲོས་ན།།

བློ་གྲོས་ལེགས་པ་གཞན་འབྱུང་སྲིད།།

ཡུང་བ་དང་ནི་ཚ་ལེ་ལས།།

ཁ་དོག་གཞན་ཞིག་སྐྱེ་བར་འགྱུར།།

ཁོང་མཛངས་བསོད་ནམས་བསགས་པའི་མི།།

གཅིག་བུ་ཡིན་ཡང་ཀུན་ལས་རྒྱལ།།

རི་དྭགས་རྒྱལ་བོ་སེང་གེ་དང་།།

འཁོར་ལོས་བསྒྱུར་ལ་གྲོགས་མི་དགོས།།

ཐབས་ལ་མཁས་ན་ཆེན་པོ་ཡང་།།

བྲན་དུ་བཀོལ་བར་ག་ལ་དཀའ།།

མཁའ་ལྡིང་མཐུ་རྩལ་ཆེ་ན་ཡང་།།

གོས་སེར་ཅན་གྱི་བཞོན་པར་གྱུར།།

འཇིག་རྟེན་འདི་དང་ཕ་རོལ་གྱི།།

བདེ་བ་བསྒྲུབ་པ་ཤེས་རབ་ཡིན།།

རྒྱལ་བོ་ཟླ་བའི་ཤེས་རབ་ཀྱིས།།

བྲན་བཟང་འདི་དང་ཕྱི་མར་བསྐྱབས།།

དཔའ་ཞིང་མཐུ་རྩལ་ཆེ་ན་ཡང་།།

མཁས་པ་མིན་པས་དཔའ་མི་ཐོབ།།

འབྱོར་བ་ཐོབ་པར་གྱུར་ན་ཡང་།།

བསོད་ནམས་མེད་ན་ག་ལ་རྟག།

ཡོན་ཏན་སྐྱོན་གཉིས་སུས་ཀྱང་གསལ།།

འདྲེས་པ་འབྱེད་ཤེས་མཁས་པ་ཡིན།།

ཆུ་ལས་འོ་མ་ངང་བས་ཕྱེ།།

བ་ལས་འོ་མ་ཀུན་གྱིས་ལོང་།།

སྨྲས་ཤིང་བསྐུལ་བར་གྱུར་བ་ན།།

དུད་འགྲོ་ལ་ཡང་གོ་བ་སྐྱེ།།

མ་བསྐུལ་གཞན་གྱིས་མ་སྨྲས་པར།།

བསམ་པ་ཤེས་ན་མཁས་པ་ཡིན།།

བློ་དང་ལྡན་ན་མ་སྨྲས་ཀྱང་།།

རྣམ་འགྱུར་ཉིད་ལས་བསམ་པ་གོ།

བལ་བོའི་སེའུ་མ་ཟོས་ཀྱང་།།

ཁ་དོག་ཉིད་ལས་བྲོ་བ་ཤེས།།

མཁས་པ་རང་གི་ཡུལ་བས་ཀྱང་།།

ཡུལ་ཁམས་གཞན་ན་མཆོད་པ་ཐོབ།།

ནོར་བུ་གཞན་དུ་བྲིན་པ་ཙམ།།

རྒྱ་མཚོའི་གླིང་དུ་ག་ལ་བྲིན།།

མཁས་པ་སློབ་པའི་དུས་ན་སྡུག།

བདེ་བར་སྡོད་ལ་མཁས་མི་སྲིད།།

བདེ་བ་ཆུང་ལ་ཆགས་པ་དེས།།

ཆེན་པོའི་བདེ་བ་ཐོབ་མི་སྲིད།།

བློ་དང་ལྡན་ན་ཉམ་ཆུང་ཡང་།།

སྟོབས་ལྡན་དགྲ་ཡིས་ཅི་བྱར་ཡོད།།

རི་དྭགས་རྒྱལ་བོ་སྟོབས་ལྡན་པ།།

རི་བོང་བློ་དང་ལྡན་པས་བསད།།

སེམས་ཅན་གཞན་དང་རྗེས་མཐུན་པའི།།

སྤྱོད་པ་ཤེས་ན་མཁས་པ་ཡིན།།

དུད་འགྲོ་ཡིན་ཡང་རིགས་མཐུན་རྣམས།།

ཁྱུ་གཅིག་ཏུ་ནི་མི་གནས་སམ།།

ངེས་པར་འབྱུང་བའི་བྱ་བ་འགའ།།

མ་གྲུབ་པ་ན་དཔྱོད་པའི་ཚེ།།

མཁས་རྨོངས་གཉིས་ཀྱི་ཁྱད་པར་ཤེས།།

གྲུབ་ནས་དཔྱོད་པ་བླུན་པོའི་ཚུལ།།

མཁས་པ་རྣམས་ཀྱིས་དཔྱད་པ་ཡི།།

ཤེས་བྱ་ཤེས་ན་མཁས་པར་བགྲང་།།

བ་གླང་རྒན་གཞོན་དཔྱོད་པ་ལ།།

བླུན་པོ་མཁས་ཀྱང་ཡོན་ཏན་མིན།།

རྒྱ་མཚོ་ཆུ་ཡིས་མི་ངོམས་ཤིང་།།

རྒྱལ་པོའི་བང་མཛོད་ནོར་གྱིས་མིན།།

འདོད་ཡོན་སྤྱད་པས་མི་ངོམས་ཏེ།།

མཁས་པ་ལེགས་བཤད་ཀྱིས་མི་ངོམས།།

ལེགས་བཤད་བྱིས་པ་ངག་ལས་ཀྱང་།།

མཁས་པ་རྣམས་ནི་ཡོངས་སུ་ལེན།།

དྲི་ཞིམ་འབྱུང་ན་རི་དྭགས་ཀྱི།།

ལྟེ་བ་ལས་ཀྱང་གླ་རྩི་ལེན།།

                                  རྩོམ་སྒྲིག་པ། བྱ་མདོ་གུར་ཀུམ།

གསལ་འདེབས།

            རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་།གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

དྲ་བའི་སྦྲེལ་ཐགhttp://www.tb1025.cn


བརྒྱུད་འགོད།