དབྱིངས་སྤྲོས་མ།

ཡོང་ཁུངས།   ངེད་དགེ་ལུགས་པའི་དྲ་བ།     སྤེལ་དུས།  2017-06-18 21:20:41     རྩོམ་པ་པོ།   དཀོན་མཆོག་བསྟན་པའི་སྒྲོན་མེ།     ཀློག་ཐེངས།  

619220108852899095.jpg

          དབྱིངས་སྤྲོས་དང་བྲལ་བའི་ལྷ་ལམ་ངོས། །ཡུལ་ཀུན་རྫོབ་སྣང་བའི་འཇའ་ཚོན་དབུས། །གདན་པད་ཟླ་ཉི་མའི་དཀྱིལ་འཁོར་སྟེང༌། །ཕ་དྲིན་ཅན་རྩ་བའི་བླ་མ་དང༌། །དབྱེར་མེད་པ་རྡོ་རྗེ་འཇིགས་མཛད་ཆེ། །སྟེང་ཞལ་དགུ་འབར་བའི་ཁམས་གསུམ་ཟ། །ཕྱག་སོ་བཞིས་མཚོན་ཆ་སྣ་ཚོགས་འཛིན། །ཞབས་བཅུ་དྲུག་བགྲད་པས་ས་གསུམ་གཡོ། །གཡང་སྲིད་ཞིའི་མཐའ་ཡས་སྒྲོལ་བ་ཡི། །མགོན་ཁྱོད་མིན་རེ་ས་གཞན་མེད་དོ། །ཐུགས་བརྩེ་བས་བདག་གི་མགོན་མཛོད་ལ། །དགྲ་ཕྱི་ནང་གཤིན་རྗེའི་གཡུལ་ལས་སྐྱོབ། །རྒྱལ་ཀུན་གྱི་ཡབ་གཅིག་འཇམ་པའི་དབྱངས། །ཁྲོ་རྒྱལ་གྱི་སྐུར་བསྟན་གཤིན་རྗེའི་གཤེད། །ངུར་སྨྲིག་གི་གར་མཁན་ཙོང་ཁ་པ། །གསུམ་འདུས་ཀྱི་ངོ་བོ་དྲིན་ཅན་རྗེ། །ཁྱོད་བླ་མ་ཡི་དམ་མཆོག་གསུམ་དང༌། །དཔལ་ཆོས་སྲུང་ཀུན་གྱི་ངོ་བོ་རུ། །ཡིད་རྩེ་གཅིག་གདུང་བས་གསོལ་འདེབས་ན། །སྤྲང་སྐྱབས་མེད་བདག་གི་སྐྱབས་མཛོད་ཅིག །སྟོང་འཁོར་ལོས་བསྒྱུར་བའི་དཔལ་འབྱོར་ཀྱང༌། །རྨི་ལམ་གྱི་དགའ་སྟོན་རོལ་བ་འདྲ། །ཐབས་བརྒྱ་ཡིས་བསྒྲུབས་ཀྱང་འདོར་དགོས་པའི། །ཚེ་འདི་སྣང་བྱིས་པའི་རྩེད་འཇོ་ཡིས། །གཏན་འདུན་ལ་བསླུ་བའི་བློ་ངན་གྱི། །གདོན་ཁོང་ན་གནས་འདི་དྲུངས་ཕྱུང་སྟེ། །ཆོས་རྣམ་དག་བསླབ་གསུམ་བསྲུང་ནུས་པར། །རྒྱུད་བྱིན་གྱིས་རློབས་ཤིག་བླ་མ་ལྷ། །རང་སྲོག་ལས་འཕང་བའི་གཅེས་སྤྲས་ཀྱིས། །ལན་གྲངས་མེད་བསྐྱངས་པའི་མ་རྒན་རྣམས། །སྡུག་བསྔལ་གྱིས་མནར་བའི་ངང་ཚུལ་ལ། །ཤས་མི་བཟོད་སྙིང་རྗེས་ཡིད་དྲངས་ཏེ། །ཡོངས་འགྲོ་བའི་དོན་གྱི་ཁུར་བཟུང་ནས། །སྐྱབས་བླ་མེད་བྱང་ཆུབ་སྒྲུབ་པ་ཡི། །སེམས་བཅོས་མིན་མྱུར་དུ་སྐྱེ་བ་རུ། །རྒྱུར་བྱིན་གྱིས་རློབས་ཤིག་བླ་མ་ལྷ། །དུས་ཡ་མཐའ་མེད་པའི་འཁོར་བ་འདིར། །བཟོད་མེད་ཀྱི་སྡུག་བསྔལ་མྱོང་གྱུར་ཀྱང༌། །ད་དུང་ཡང་རང་གྲོལ་མི་འོང་བས། །དེའི་རྩ་བར་གྱུར་པ་ངར་འཛིན་གདོན། །ཡུལ་སྟོང་པའི་དངོས་ལ་ཚུགས་ཐུབ་ཀྱི། །བདག་གཞན་དུ་ཕྱེ་བའི་ཕུང་ཁྲོལ་གཞི། །བློ་འཁྲུལ་པའི་རང་མཚང་རྟོགས་ནུས་པར། །རྒྱུད་བྱིན་གྱིས་རློབས་ཤིག་བླ་མ་ལྷ། །ཐ་མལ་གྱི་སྐྱེ་ཤི་ལྕགས་ཀྱི་ཁམས། །སྐུ་གསུམ་གྱི་གསེར་འགྱུར་རྩིས་བྲན་ཏེ། །རྟེན་བརྟེན་པ་དག་པའི་འཁོར་ལོའི་མདངས། །དམིགས་མེད་ཀྱི་དབྱིངས་སུ་བཀྲ་བ་ཡིས། །ལྷན་སྐྱེས་ཀྱི་བདེ་བས་རབ་མྱོས་ཏེ། །དཔལ་ཟུང་འཇུག་མཛེས་མའི་ལང་ཚོ་ལ། །དུས་རྟག་ཏུ་དགའ་བས་སྦྱོར་བ་རུ། །རྒྱུད་བྱིན་གྱིས་རློབས་ཤིག་བླ་མ་ལྷ། །དུས་གསུམ་གྱི་དགེ་ཚོགས་མཆོད་པར་འབུལ། །རང་གཞན་གྱི་སྡིག་ལྟུང་མ་ལུས་བཤགས། །ལར་བསྐལ་པ་རྒྱ་མཚོར་རྟག་བཞུགས་ནས། །ཆོས་ཟབ་རྒྱས་ཀྱི་བདུད་རྩིའི་དགའ་སྟོན་སྩོལ། །འདིས་མཚོན་གྱི་དགེ་བའི་དངོས་པོ་ཀུན། །དུས་དེང་ནས་བྱང་ཆུབ་སྙིང་པོའི་བར། །རྗེ་བླ་མས་འབྲལ་མེད་རྗེས་འཛིན་ཅིང༌། །མཆོག་དང་པོའི་སངས་རྒྱས་ཐོབ་ཕྱིར་བསྔོ། །

          ཞེས་པ་འདི་ནི་སུ་ཉིད་ཤོག་ནས་རྣམ་དཔྱོད་ཡངས་པ་རབ་འབྱམས་པ་ངག་དབང་བསོད་ནམས་ཀྱིས་བསྐུལ་ངོར་ྋབཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །

                                                                                                              རྩོམ་སྒྲིག་པ། བྱ་མདོ་གུར་ཀུམ།
གསལ་འདེབས།
             རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་།གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
དྲ་བའི་སྦྲེལ་ཐགhttp://www.tb1025.cn

 

བརྒྱུད་འགོད།