༄༅། །བླ་མ་དཀོན་མཆོག་གསུམ་ལ་ཕྱག་འཚལ་ལོ། །
རྒན་ལ་གཞོན་གྱིས་གྲོས་འདེབས་མི་རིགས་ཀྱང་། ། གཞོན་ལ་རྒན་གྱིས་ཁ་བརྡ་འོས་པའི་ཕྱིར། །
འཇིག་རྟེན་ལུགས་ཀྱི་རྗེས་འབྲང་སྙིང་གཏམ་འདི། ། གཞོན་པ་རྣམས་ལ་ཕན་པའི་སེམས་ཀྱིས་འབྲི། །
རང་བཞིན་བསམ་པ་དྲང་ན་བཟང་མོད་ཀྱང་། ། ཧ་ཅང་དྲང་ན་དུས་ངན་མི་རྣམས་ཀྱིས། །
རྩེ་རྒོད་བྱེད་རྟེན་སྤྲང་པོའི་སྤྲེའུ་འདྲ། ། དྲང་ཚོད་རན་པར་འཛིན་པ་སྙིང་གཏམ་ཡིན། །
ཁ་མཁས་སྨྲ་ལྕེ་བདེ་ན་བཟང་མོད་ཀྱང་། ། དུས་ཚོད་གནས་སྐབས་མེད་པར་ཁ་མང་ན། །
རང་གི་ནང་཈མས་བཟང་ངན་མི་ལ་སྟོན། ། བཤད་ཚོད་རན་པར་འཛིན་པ་སྙིང་གཏམ་ཡིན། །
ཁ་ཉུང་ཁོག་པ་གྲིམ་ན་བཟང་མོད་ཀྱང་། ། སུས་ཀྱང་མི་ཤེས་ཆུ་མགོ་ལྐུགས་པ་འདྲ། །
ཐང་ལྷོད་རན་པར་འཛིན་པ་སྙིང་གཏམ་ཡིན། ། དགྲ་ལ་ཞེ་སྡང་ཆེ་ན་བཟང་ཟེར་ཡང་། །
རྒྱུ་མཚན་མེད་པར་ཧ་ཅང་འབར་ཆེ་ན། ། ཀུན་དང་འཁོན་པ་སྒོ་ཁའི་ཁྱི་དང་འདྲ། །
འབར་རྒྱུ་འཁོར་རྒྱུ་མ་མང་སྙིང་གཏམ་ཡིན། ། ཁ་འཇམ་སེམས་རྒྱུད་འཇམ་ན་བཟང་མོད་ཀྱང་། །
བཟང་པོ་མི་བརྩི་ངན་པ་བྲིན་དུས་འདིར། ། ཉམ་ཆུང་རྣམས་ལ་བཟང་ངན་ཀུན་གྱིས་བརྙས། །
འཇམ་ས་རྩུབ་ས་མ་ནོར་སྙིང་གཏམ་ཡིན། ། ནོར་ལ་འཛིན་ཆགས་ཆུང་ན་བཟང་མོད་ཀྱང་། །
ནོར་མེད་སྤྲང་པོ་ཀུན་གྱིས་མཐོང་ས་མེད། ། ཕྱུག་པོའི་ཁྱི་ཡང་གྲལ་མགོར་འཇོག་དུས་འདིར། །
ནོར་རྫས་ཅུང་ཟད་གསོག་པ་སྙིང་གཏམ་ཡིན། ། བྲེ་སྲང་གཡོ་སྒྱུ་མནའ་ལ་མི་འཛེམ་པའི། །
ཁེ་ཚོང་ངན་པས་རྒྱལ་ཁམས་མི་ཁ་བརླགས། ། ཁེ་ཆེ་མངོན་ཆུང་སྡིག་པའི་ལས་ལ་འཛེམ། །
ཟས་ནོར་གསོག་ཚུལ་ཤེས་པ་སྙིང་གཏམ་ཡིན། ། གསོག་རིམ་ཕྲ་ཞིབ་མཛངས་ན་བཟང་མོད་ཀྱང་། །
ཧ་ཅང་སེར་སྣ་ཆེ་ན་འཁོར་མཁན་མེད། ། རང་ལ་མི་ཕན་ཡི་དྭགས་གཏེར་སྲུང་འདྲ། །
གསོག་ཚོད་གཏོང་ཚོད་ཟིན་པ་སྙིང་གཏམ་ཡིན། ། ཟླ་གྲོགས་མཛའ་མཐུན་མང་ན་བཟང་མོད་ཀྱང་། །
གྲོ གས་པོ་ངན་པས་རང་ཉིད་ཐུར་དུ་འཁྲིད། ། ཐ་མ་རང་གཞན་གཉིས་ཀ་ཆུ་ལ་བསྐུར། །
འགྲོགས་ས་མཐུན་ས་མ་ནོར་སྙིང་གཏམ་ཡིན། ། དགའ་སྡུག་མེད་པའི་སེམས་ཅན་དཀོན་ན་ཡང་། །
ཧ་ཅང་དགའ་སྡུག་འགྱུར་ལྡོག་མང་བ་དེ། ། ཀུན་ལ་རྩིས་མེད་སྤུན་དུ་འགྲོགས་མཁན་མེད། །
གྲོགས་ལ་ཕྱི་ཐག་མ་ཐུང་སྙིང་གཏམ་ཡིན། ། རང་ལ་བློ་གཏད་གྲོགས་དང་ཉེ་དུ་ལ། །
ལྐོག་ན་ཤ་ཚ་མེད་པ་ཁྱི་དང་འདྲ། ། སྙིང་ནས་བློ་གཏད་བསླུས་ན་ཁྲེལ་མེད་ཡིན། །
ཁྲེལ་དང་བློ་གཏད་ཐུབ་པ་སྙིང་གཏམ་ཡིན། ། མངོན་སུམ་ཐུག་ན་ངོ་བསྟོད་མཐུན་འགྱུར་བྱེད། །
སོང་བའི་རྗེས་ནས་སྐྱོན་མཚང་ཡོད་ཚད་སྒྲོག ། ཁ་གཅིག་ནང་ནས་ལྕེ་གཉིས་སྦྲུལ་དང་འདྲ། །
མངོན་གཏམ་ལྐོག་གཏམ་མ་མང་སྙིང་གཏམ་ཡིན། ། ཡ་ཡ་གོ་གོ་ཐམས་ཅད་ངོ་འཛིན་ཡིན། །
ལྐོག་ཏུ་སོང་ན་དེ་ལྟར་ཡིན་པ་དཀོན། ། རེད་རེད་ཡིན་ཡིན་མང་པོས་ཤོད་ལ་འཕེན། །
ཟེར་ཚད་བདེན་པར་མ་འཛིན་སྙིང་གཏམ་ཡིན། ། དྲན་རྒྱ་ཆེ་ན་བྱ་བ་མང་དུ་འགྲོ། །
བྱ་བ་མང་ན་ཕལ་ཆེར་མཐར་མི་ཕྱིན། ། མཐར་མ་ཕྱིན་ན་རང་གནོད་གཞན་གྱིས་འཕྱ། །
དྲན་རྒྱུ་བྱེད་རྒྱུ་མ་མང་སྙིང་གཏམ་ཡིན། ། ཀུན་གྱིས་བཀུར་དུས་རང་ཚོད་རང་གིས་ཟུངས། །
ཀུན་གྱིས་བརྙས་དུས་རང་དཔའ་རང་གིས་ཟུངས། ། རང་མགོ་རང་གིས་འདོན་པ་སྙིང་གཏམ་ཡིན། །
དེ་རྣམས་འཇིག་རྟེན་ཁོ་ནའི་དབང་དུ་བཏང་། ། ཆོས་ཀྱི་ཁ་བརྡ་དགོས་ན་རིམ་གྱིས་བཤད། །
བཤད་པའི་གཏམ་ལ་ཉན་དང་མི་ཉན་ཡང་། ། ཕན་པའི ་སེ མས་ཀྱི ས་བྲི ས་པ་མངྒ ་ལཾ ། །
ཆོས་ཟབ་མོ་སྟོན་པའི་བླ་མ་དང་། ། ལུས་བསྐྱེད་པའི་དྲིན་ཆེན་ཕ་མ་དང་། །
དྲིན་ཆེ་བའི་ཨ་ཁུ་ཆོས་རྒན་རྣམས། ། གང་བཀུར་བའི་མི་ལ་བསོད་ནམས་སྐྱེ། །
ཕ་ཨ་ཁུའི་ཐད་ན་ལྕགས་དང་འདྲ། ། དགྲ་ནག་པོའི་ཐད་ན་རྩྭ་དང་འདྲ། །
མི་དེ་འདྲ་ཕྱི་ནང་གོ་ནོར་ཡིན། ། དགྲ་སྤུན་དང་མ་ནོར་གྲོགས་པོ་ཚོ། །
སྐད་བཏང་ན་མི་བཤད་དགུ་ཀྱང་ནོར། ། གསང་དགོས་པའི་གསང་གཏམ་མི་ལ་བཤད། །
གང་གོ་གོ་ཐམས་ཅད་རླུང་ལྟར་སྒྲོག ། གཏམ་སྒྲོག་རྒྱུ་མ་མང་གྲོགས་པོ་ཚོ། །
ལོ་ན་ནིང་སྙིང་དང་འདྲ་བའི་གྲོགས། ། དུས་ད་ལོ་དགྲ་ནག་དྭངས་མར་སོང་། །
བཟང་གང་བྱས་ཐམས་ཅད་གྱོང་ལ་བཏང་། ། བློ་འགྱུར་ལྡོག་མ་མང་གྲོགས་པོ་ཚོ། །
ཁ་མཛེས་མཛེས་བཤད་པ་འོ་མ་འདྲ། ། ཁོག་བསམ་པ་ནག་པོ་དུག་དང་འདྲ། །
མི་དེ་འདྲ་དུང་གི་སྣག་བུམ་འདྲ། ། བློ་གཏད་ན་མི་རུང་གྲོགས་པོ་ཚོ། །
ལུས་མི་རྟག་སྟོན་ཁའི་མེ་ཏོག་འདྲ། ། སྲོག་མི་རྟག་ནམ་མཁའི་གློག་དང་འདྲ། །
གྲོགས་མི་རྟག་ཚོང་འདུས་མགྲོན་པོ་འདྲ། ། ཚེ་ཕྱི་མ་སོམས་དང་གྲོགས་པོ་ཚོ། །
མི་ལ་ལ་སྐྱི་བསེར་རླུང་དང་འདྲ། ། བཟུང་ན་མི་ཟིན་བར་སྣང་འགྲིམ། །
མི་ལ་ལ་མཆོག་དཀར་གཞུ་དང་འདྲ། ། བཀུག་ན་མི་ཁུག་འཁྱོག་ཅིང་གཅུ། །
མི་ལ་ལ་དྲང་མོ་མདའ་དང་འདྲ། ། གང་འཕངས་སར་ཐག་ཐོགས་མེད་པར་འགྲོ། །
མི་ལ་ལ་ནམ་མཁའི་བྱ་དང་འདྲ། ། དོང་ལ་འཕངས་ཀྱང་གནམ་དུ་བལྟ། །
མི་ལ་ལ་ངན་པ་ཁྱི་དང་འདྲ། ། ལ་ཁར་བྱུང་ཡང་ཐུར་དུ་ལྟ། །
མི་ལ་ལ་དབྱི་མོང་ཤིང་དང་འདྲ། ། མཐོན་པོ་བརྟེན་ནས་ཡར་ཡར་སྐྱེ། །
མི་ལ་ལ་མར་འགྲོ་ཆུ་དང་འདྲ། ། སྣ་བསྐྱིལ་ན་མི་སྡོད་ཐུར་དུ་རྒྱུག །
མི་ལ་ལ་གླེན་པ་གླང་དང་འདྲ། ། བཤད་ན་མི་ཕན་བརྡུངས་ན་ཕན། །
མི་ལ་ལ་མཁར་རྔ་ཆག་པོ་འདྲ། ། སྒྲ་སྐད་ངན་པ་སྣ་ཚོགས་འབྱིན། །
མི་ལ་ལ་ཇ་ཚགས་ཧྲུལ་པོ་འདྲ། ། གསང་གཏམ་ཐམས་ཅད་ཙ་ར་ར། །
མི་ལ་ལ་སྡོང་ཁའི་དར་ལྕོག་འདྲ། ། ཁ་ཡར་ལ་འཁོར་ལ་མར་ལ་འཁོར། །
དབྱར་དུས་ཆུ་འཛིན་འབྲུག་སྒྲ། ། ཆར་རྒྱུན་གློག་དམར་འཁྱུག་པ། །
རྟེན་འབྲེལ་དབང་གིས་འཛོམས་ཀྱང་། ། མྱུར་དུ་འགྱུར་བས་སྐྱོ་བ། །
ལྗོན་ཤིང་འདི་དག་ཀུན་ཀྱང་། ། གཡུ་ལོ་མཛེས་པས་བརྒྱན་ཡང་། །
ནམ་ཞིག་ལོ་འབྲས་བྲུལ་ནས། ། སྐྱ་བོར་འགྱུར་བས་སྐྱོ་བ། །
ནེའུ་གསིང་ཀུན་ཀྱང་ནེ་ཙོའི། ། གཤོག་པ་ཇི་བཞིན་ལྗང་བ། །
ནམ་ཞིག་སེར་པོར་གྱུར་ནས། ། ཡིད་མི་འོང་པས་སྐྱོ་བ། །
མེ་ཏོག་འཛུམ་པའི་ན་ཆུང་། ། བུང་བའི་ལྡིང་སྐོར་གཡོ་ཡང་། །
ནམ་ཞིག་བ་མོས་བཅོམ་ནས། ། ཐལ་བར་འགྱུར་བས་སྐྱོ་བ། །
ཁུ་བྱུག་ངག་སྙན་དེ་ཡང་། ། ད་ལྟ་ལྷང་ལྷང་སྒྲོག་ཀྱང་། །
མྱུར་དུ་ཡུལ་གཞན་འགྲོ་བའི། ། ངང་ཚུལ་བསམ་ནས་སྐྱོ་བ། །
ད་ལྟ་བདེ་སྐྱིད་གཉེན་གསུམ། ། ལས་ཀྱིས་གཅིག་ཏུ་འཛོམས་ཀྱང་། །
མྱུར་དུ་སོ་སོར་འབྲལ་བའི། ། ངང་ཚུལ་བསམ་གྱིན་སྐྱོ་བ། །
ཚེ་ནི་ནམ་མཁའི་གློག་འདྲ། ། ལང་ཚོ་མེ་ཏོག་དང་མཚུངས། །
ད་ལྟ་བརྟན་བརྟན་འདྲ་ཡང་། ། མྱུར་དུ་འཇིག་པས་སྐྱོ་བ། །
དེས་ན་སྒེག་པའི་རྡོ་རྗེ། ། དབེན་པའི་རི་ལ་སོང་ནས། །
ཕྱི་མར་འགྲོ་བའི་རྒྱགས་ཕྱེ། ། སྒྲུབ་པའི་སྙིང་པོར་བྱོས་ཤིག

       རྩོམ་སྒྲིག་པ། བྱ་མདོ་གུར་ཀུམ།
 

  གསལ་འདེབས།

        རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
དྲ་བའི་སྦྲེལ་ཐགhttp://www.tb1025.cn