༄༅། ། བླ་མ་མཁྱེན་མཁྱེན།
སྙིགས་དུས་སེམས་ཅན་སྙིང་རེ་རྗེ།།
བླ་མ་དད་པ་མེད་བཞིན་དུ།།
བསྟོད་བཀུར་བྱེད་པ་རྫུན་དུ་གདའ།།
ལུས་རྟེན་ཆུ་ཟོས་བྱེད་བཞིན་དུ།།
འཆི་བར་སྐྲག་པ་རྫུན་དུ་གདའ།།
སྙིང་ནས་སྐྱབས་འགྲོ་མི་བྱེད་པར།།
དགེ་བ་བྱེད་པ་རྫུན་དུ་གདའ།།
ཚེ་འདིའི་བདེ་ལ་ཆགས་བཞིན་དུ།།
དབེན་པར་སྡོད་པ་རྫུན་དུ་གདའ།།
འདོད་པ་ལྷག་པར་འཕེལ་བཞིན་དུ།།
ངེས་འབྱུང་སྐྱེ་བ་རྫུན་དུ་གདའ།།
སྡིག་བྱས་འགྱོད་པ་མི་བྱེད་པར།།
བཤགས་པ་བྱེད་པར་རྫུན་དུ་གདའ།།
ཕྱིན་ཆད་སྡོམ་སེམས་མི་བྱེད་པར།།
སྡིག་པ་འདག་པ་རྫུན་དུ་གདའ།།
སེམས་ཀྱིས་སེར་སྣ་བྱེད་བཞིན་དུ།།
སྦྱིན་པ་གཏོང་བ་རྫུན་དུ་གདའ།།
ཉེས་ལྟུང་ངོས་འཛིན་མི་ཤེས་བཞིན།།
ཚུལ་ཁྲིམས་སྲུང་བ་རྫུན་དུ་གདའ།།
རང་ལ་གཙེས་འཛིན་བྱེད་བཞིན་དུ།།
བཟོད་པ་སྒོམ་པ་རྫུན་དུ་གདའ།།
དོན་མེད་གཡེང་བ་བྱེད་བཞིན་དུ།།
བརྩོན་འགྲུས་བྱེད་པ་རྫུན་དུ་གདའ།།
ལུས་སེམས་ཅུང་ཟད་མི་བརྟན་པར།།
བསམ་གཏན་སྒོམ་པ་རྫུན་དུ་གདའ།།
མི་ཉན་བརྗེད་ངས་མཆིས་བཞིན་དུ།།
གྲོས་པ་བྱེད་པ་རྫུན་དུ་གདའ།།
གྲོས་དོན་བསམ་པ་མི་བྱེད་པར།།
ཤེས་རབ་ཆེ་རློམ་རྫུན་དུ་གདའ།།
བཀའ་ལ་ཡིད་ཆེས་མེད་བཞིན་དུ།།
བསྟན་པ་འཛིན་པ་རྫུན་དུ་གདའ།།
རང་དོན་འཁྲི་བ་མ་ཆོད་པར།།
གཞན་དོན་སྒྲུབ་པ་རྫུན་དུ་གདའ།།
རྟོགས་པ་རྒྱུད་ལ་མ་སྐྱེས་པར།།
གྲུབ་རྟགས་སྟོན་པ་རྫུན་དུ་གདའ།།
ཉོན་མོངས་མངོན་དུ་འགྱུར་བཞིན་དུ།།
ཐམས་ཅད་མཁྱེན་པ་རྫུན་དུ་གདའ།།
ཅི་གསུང་བཀའ་ལ་མི་ཉན་པར།།
ལགས་སོ་ཟེར་བ་རྫུན་དུ་གདའ།།
རྫུན་པ་ཉི་ཤུའི་གཏམ་སྦྱོར་འདི།།
རྫུན་པའི་དོན་ལ་ཆེས་མཁས་པའི།།
རྫུན་དོན་རྟོགས་པའི་བླ་གཟུགས་ཀྱིས།།
རྫུན་ཚིག་འདི་དག་བྲིས་པ་དགེ།

 ཞེས་ཤཱཀྱའི་བཙུན་པ་ཤིང་བཟའ་སྐྱེས་མིང་འཛིན་པ་བློ་བཟང་བསྟན་པའི་དབང་ཕྱུག་ཚུལ་ཁྲིམས་ཕུན་ཚོགས་དཔལ་བཟང་བོས་སྦྱར་བའོ།།