རྗེ་བཙུན་རེད་མདའ་བ་གཞོན་ནུ་བློ་གྲོས་ནི། ས་སྐྱ་དང་ཉེ་བའི་སའི་ཆ་རེད་མདའ་ཁང་སོར་བློན་པོ་འགར་སྟོང་བཙན་ཡུལ་བསྲུང་གི་བརྒྱུད་དུ་ཡབ་བཀྲ་ཤིས་རྒྱལ་མཚན་དང༌། ཡུམ་དབང་ཕྱུག་སྐྱིད་གཉིས་ཀྱི་སྲས་སུ་ས་མོ་གླང་ལ་སྐུ་འཁྲུངས། རྒྱལ་སྲས་འདི་ཡུམ་གྱི་ལྷུམས་སུ་ཞུགས་པའི་ཚེ་ཡུམ་ལ་ཉི་ཟླ་ཤར་བ་དང༌། སྒྲོན་མ་མེ་སྦར་བ་དང༌། གཙུག་ལག་ཁང་བཞེངས་པ་སོགས་རྨི་ལྟས་བཟང་པོ་བྱུང༌། རྒྱལ་སྲས་འདི་བཙས་པའི་ཚེ་ཡང་ངོ་མཚར་བའི་ལྟས་མང་དུ་བྱུང༌། དེ་ནས་རྒྱལ་སྲས་གཞོན་ནུ་དེ་ཡབ་ཡུམ་གཉིས་ཀྱིས་འོ་མ་དང་། ཞོ་དང༌། མར་གྱི་ཉིང་ཁུ་སོགས་ཀྱིས་བསྐྱེད་བསྲིངས་ཏེ་མཚན་ཡང་བཙུན་ནེ་ཞེས་བྱ་བར་གསོལ་ཏེ། སྨྲ་ཤེས་དོན་གོ་ཚུན་ཆད་དཀོན་མཆོག་གསུམ་གྱི་སྒྲ་ཐོས་པའམ། རྟེན་མཐོང་བ་ན་དད་ཅིང་གུས་པ་ཆེར་སྐྱེ་བ་བྱུང༌། རྒྱས་སྲས་འདི་ཆུང་ངུའི་དུས་ན་ཡབ་ཡུམ་གཉིས་ཀ་འདས་པས་ཨ་ནེ་མོ་བཀྲ་ཤིས་འབུམ་བྱ་བས་བསྐྱངས། རྒྱལ་སྲས་བདག་ཉིད་ཆེན་པོ་འདིས་བྱིས་པའི་དུས་སུ། ཨ་ནེ་ལ། ང་ཡང་ན་ས་སྐྱ་དཔོན་ཆེན་གྱི་ལག་རྟགས་བླངས་ནས་བོད་ཁམས་བདེ་ལ་འགོད། ཡང་ན་བསྟན་པའི་སྒོར་ཞུགས་ཏེ་སངས་རྒྱས་ཀྱི་བསྟན་པ་ཉིན་མོ་ལྟར་གསལ་བར་བྱེད་གསུངས་པས། ཨ་ནེ་ན་རེ། བཙུན་ནེ་བློ་བོ་ཆེ་ཁྱོད་ཀྱིས་དེ་ལྟར་ཨེ་ཡོང་ཞེས་ཟེར་ཞིང༌། དེ་ནས་བཟུང་སྟེ་རྒྱལ་སྲས་གཞོན་ནུ་འདི་ལ་བཙུན་ནེ་བློ་བོ་ཆེ་ཞེས་འབོད་པ་བྱུང༌། དེ་ནས་རྒྱལ་སྲས་གཞོན་ནུ་དེ་སྐྱེས་རབས་མང་པོར་ཆོས་ལ་སྦྱངས་པའི་བག་ཆགས་བརྟས་པས་བྱིས་པ་གཞན་དག་ནུ་ཞོ་ལེན་པ་དང་འཁྲུལ་པའི་རྩེད་མོ་ལ་བསླབ་མི་དགོས་པར་ངང་གིས་འཇུག་པ་ལྟར། རྒྱལ་སྲས་འདི་དམ་པའི་ཆོས་འཚོལ་བ་ལ་ངང་གིས་འཇུག་པ་ཞིག་བྱུང་སྟེ། འཕགས་ཆེན་ཆོས་བཟང་དཔལ་ལ་སྐྱབས་འགྲོ་སེམས་བསྐྱེད་དང༌། བསྙེན་གནས་ཀྱི་སྡོམ་པ་དང༌། ཐུགས་རྗེ་ཆེན་པོའི་ཆོས་སྐོར་མང་དུ་ཞུ་བར་མཛད།

                   དེ་ནས་རྒྱལ་སྲས་འདིའི་ཐུགས་ལ་དལ་བའི་རྟེན་བཟང་པོ་ལན་ཅིག་ཐོབ་པའི་དུས་འདིར་སྔོན་བྱོན་དམ་པའི་རྗེས་སུ་ཞུགས་ཏེ་ཐོས་བསམ་སྒོམ་གསུམ་མཐར་ཕྱིན་པ་ཞིག་མ་བྱས་ན་ཡིད་བཞིན་གྱི་ནོར་བུའི་གླིང་ནས་ལག་སྟོང་དུ་ལྡོ ག་པ་ལྟར་དལ་འབྱོར་ཐོབ་པ་དོན་མེད་དུ་འགྱུར་ཞིང༌། དེ་ཡང་ཁྱིམ་དུ་གནས་པ་ནི་ཉེས་པ་དང་ཉོན་མོངས་པ་དུ་མའི་འབྱུང་གནས། སྡུག་བསྔལ་དུ་མས་གཟིར་བའི་བཙོན་ར་དང་འདྲ་བ་འདི་ལས་མྱུར་དུ་ཐར་བར་བྱས་ནས་ཆོས་རྣམ་དག་ཅིག་བྱའོ་སྙམ་དུ་དགོངས་ནས་ངེས་འབྱུང་གི་བསམ་པ་ཤུགས་དྲག་པོས་དགུང་ལོ་བཅོ་བརྒྱད་པ་ལ་ས་བཟང་པཎ་ཆེན་གྱི་དྲུང་དུ་དགེ་ཚུལ་གྱི་སྡོམ་པ་མནོས་ཏེ་མཚན་གཞོན་ནུ་བློ་གྲོས་སུ་བཏགས། དེ་ནས་མཁས་པའི་དབང་པོ་ཉ་དབོན་ཀུན་དགའ་དཔལ་བ་དང༌། ལུང་རིགས་སྨྲ་བ་མཁན་ཆེན་སངས་རྒྱས་དཔལ་བ་གཉིས་ལ་གཏུགས་ཏེ་ཚད་མ་རྣམ་འགྲེལ་ལ་སྦྱངས་པས་དྲི་མ་མེད་པའི་རིགས་པས་རྟོག་གེའི་ཚིག་དོན་བརྒྱད་ལེགས་པར་རྟོགས་ནས་མཁས་པའི་གྲགས་པས་ཁྱབ་པར་མཛད། དེ་རྗེས་སྡེ་བདུན་མདོ་འགྲེལ་དང་བཅས་པ་ལ་སྦྱངས་ཤིང༌། མཁྱེན་རབ་དབང་ཕྱུག་ས་སྐྱ་པཎྜི་ཏ་དང༌། འུ་ཡུག་པ་རིགས་པའི་སེང་གེའི་ལེགས་བཤད་རྣམས་ལའང་གཟིགས་པས། དཔལ་ལྡན་ཆོས་ཀྱི་གྲགས་པའི་གཞུང་ལུགས་ཕྱིན་ཅི་མ་ལོག་པར་ཐུགས་སུ་ཆུད་དེ་རྣམ་འགྲེལ་གྱི་ཊཱིཀྐ་ཆེ་ཆུང་གཉིས་སྤྱི་དོན་དང་བཅས་པའང་མཛད། དེ་ནས་བསྟན་བཅོས་མངོན་པར་རྟོགས་པའི་རྒྱན་འགྲེལ་པ་དང་བཅས་པ་ལ་ལེགས་པར་སྦྱངས་པས། རིང་པོར་མ་ལོན་པར་མཁས་པའི་ཕུལ་དུ་ཕྱིན་པར་གྱུར། གཞན་ཡང་དཔལ་ལྡན་བླ་མ་དམ་པ་བསོད་ནམས་རྒྱལ་མཚན་པ་སོགས་ལའང་ཕར་ཕྱིན་གསན། ཁྱད་པར་དུ་ཉི་ཁྲི་སྣང་བ་དང༌། བརྒྱད་སྟོང་འགྲེལ་ཆེན་འབྲེ་མར་གྱི་ཊཱིཀྐ་རྣམས་ལའང་ཞིབ་ཏུ་གཟིགས་པས། འཕགས་སེང་གཉིས་ཀྱི་དགོངས་པ་ཇི་ལྟ་བ་བཞིན་དུ་ཐུགས་སུ་ཆུད་དེ། ཕར་ཕྱིན་གྱི་ཊཱིཀྐ་དང༌། དོན་བདུན་ཅུ་ལ་རྣམ་བཤད་ཀྱང་མཛད། དེ་ནས་ཆོས་ཐམས་ཅད་ཀྱི་མ་མོ་མངོན་པའི་སྡེ་སྣོད་གསན་པར་དགོངས་ནས། ལོ་ཆེན་བྱང་ཆུབ་རྩེ་མོའི་ཞབས་ལ་བསྟེན་ཏེ། མངོན་པ་གོང་འོག་ཚར་མང་དུ་གསན་ཅིང༌། ས་སྡེ་ལྔ་དང་སྡོམ་རྣམ་པ་གཉིས། པྲཱ་ཀཱ་ར་ཎ་སྡེ་བརྒྱད་འགྲེལ་བཤད་དང་བཅས་པ་ལ་གཟིགས་ཤིང༌། མཁས་པའི་དབང་པོ་དཔང་ལོའི་ལེགས་བཤད་རྣམས་ལའང་གཟིགས་པས། ཐོགས་མེད་སྐུ་མཆེད་ཀྱི་བཞེད་པ་ཇི་བཞིན་ཐུགས་སུ་ཆུད་ནས། མངོན་པ་གོང་འོག་གི་ཊཱིཀྐ་བསྡུས་དོན་དང་བཅས་པ་མཛད།

                    དེ་ནས་མཁན་ཆེན་ལྡོག་ལོག་པ་ཀུན་དགའ་བཟང་པོའི་དྲུང་དུ་བྱོན་ཏེ། མཁན་སློབ་དགེ་འདུན་དང་བཅས་པའི་དབུས་སུ་བསྙེན་པར་རྫོགས་ཏེ། མཁན་ཆེན་པའི་དྲུང་དུ་མདོ་རྩ་བ་ཚར་གཅིག་གསན་པས། མཁན་ཆེན་པའི་ཞལ་ནས་འདུལ་བ་ངེད་ལས་ཁྱེད་མཁས་པར་བྱུང་བར་གདའ་བས་ཆོས་བདག་པོ་ལ་འཕྲོད་དོ་གསུངས། མཁན་ཆེན་འདིས་བསྐུལ་ནས་མདོ་རྩའི་ཊཱིཀྐ་དང༌། ལས་ཆོག་ཀྱང་མཛད་དེ་ཕྱིན་ཆད་ནས་དབྱར་གནས་དང་གསོ་སྦྱོང་དགག་དབྱེ་གསུམ་འཆག་མེད་དུ་མཛད་དོ། །དེ་ནས་དབུ་མའི་གཞུང་ལ་སྦྱོང་བར་བཞེད་དེ་ཆོས་རྗེ་བྱང་སེང་བའི་དྲུང་དུ་དབུ་མ་རིགས་ཚོགས་དང༌། བཞི་བརྒྱ་པ། འཇུག་པ་སོགས་དབུ་མའི་སྐོར་རྣམས་གསན་ཏེ། དཀོན་མཆོག་ལ་གསོལ་བ་བཏབ་ཅིང་ཡང་ཡང་དཔྱད་པས། སྔོན་གྱི་སྨོན་ལམ་དང་དཀོན་མཆོག་གི་བྱིན་རླབས་ལ་བརྟེན་ནས་ཀླུ་སྒྲུབ་ཡབ་སྲས་ཀྱི་དགོངས་པ་ཕྱིན་ཅི་མ་ལོག་པར་ཐུགས་སུ་ཆུད་དེ་དབུ་མ་རྩ་བ་ཤེས་རབ་དང༌། དབུ་མ་ལ་འཇུག་པ་དང༌། བཞི་བརྒྱ་པ་གསུམ་ལ་ཊཱིཀྐ་མཛད་ཅིང༌། རྩ་ཤེའི་འགྲེལ་པ་ཚིག་གསལ་ལ་སྤྱི་དོན་ཡང་མཛད་དོ། དེ་ནས་བདག་ཉིད་ཆེན་པོ་འདི་དང་འདིའི་རྗེས་སུ་སློབ་པ་ཐམས་ཅད་ཀྱིས་དབུ་མ་ལ་འཆད་ཉན་མཛད་པས་དབུ་མའི་སྲོལ་ལེགས་པར་གཏོད་དེ་ཁོ་བོས་བསྟན་པ་ལ་བྱ་བ་བྱས་པ་ཡིན་ཞེས་གསུངས་སོ། །དེ་རྗེས་ཐེག་པའི་ཡང་རྩེ་རྡོ་རྗེ་ཐེག་པ་ལ་འཇུག་པར་དགོངས་ནས། ལོ་ཆེན་བྱང་ཆུབ་རྩེ་མོའི་དྲུང་དུ་གསང་བ་འདུས་པ་མི་སྐྱོད་པའི་དབང་ཞུས་ཏེ་གསང་མཚན་མི་སྐྱོད་རྡོ་རྗེར་བཏགས། ལོ་ཆེན་སྐྱབས་མཆོག་དཔལ་བཟང་པོའི་དྲུང་དུ་རྒྱུད་ཀྱི་བཤད་པ། དཔལ་ལྡན་བླ་མ་དམ་པ་བསོད་ནམས་རྒྱལ་མཚན་པའི་དྲུང་དུ་དཔལ་གསང་བ་འདུས་པའི་འགྲེལ་པ་སྒྲོན་གསལ་ཆ་ལག་དང་བཅས་པ་ཞིབ་པར་གསན་ཅིང༌། ཀྱཻ་རྡོ་རྗེའི་མན་ངག་ལམ་འབྲས་བུ་དང་བཅས་པ་སོགས་སྔགས་ཀྱི་ཟབ་ཆོས་མང་དུ་གསན། ས་བཟང་པཎ་ཆེན་གྱི་དྲུང་དུ་བདེ་མཆོག་གི་དབང༌། ལོ་ཆེན་སྐྱབས་མཆོག་པ་ལ་རྡོ་རྗེ་ཕྲེང་བ། འཇམ་རྡོར། འཇིག་རྟེན་དབང་ཕྱུག །ས་སྐྱ་པའི་རྡོ་རྗེ་གཞོན་ནུ། རིམ་ལྔ་མདོར་བྱས། སྤྱོད་བསྡུས་སྒྲོན་མ་སོགས་གསན་ཅིང༌། ས་སྐྱ་པ་དང་བུ་སྟོན་རིན་པོ་ཆེ་ལ་སོགས་པའི་ཡིག་ཆ་རྣམས་ལའང་ཡང་དག་པར་གཟིགས་ཏེ། དཔལ་གསང་བ་འདུས་པའི་རྒྱུད་འགྲེལ་ཆ་ལག་དང་བཅས་པ་ཐུགས་སུ་ཆུད་ནས། རྩ་རྒྱུད་ལ་ཊཱིཀྐ། མངོན་རྟོགས། བདག་འཇུག་མཆོད་ཕྲེང༌། རིམ་ལྔའི་བསྡུས་དོན་སོགས་མཛད་ཅིང༌། གཞན་ཡང་རྒྱུད་བླ་མ། བཤེས་སྤྲིང༌། ལུང་ཀུན་ལས་བཏུས་པ་རྣམས་ལ་ཊཱིཀྐའང་མཛད་དོ། །རྒྱལ་བའི་སྲས་པོ་ཐོགས་མེད་བཟང་པོ་དཔལ་གྱི་དྲུང་དུ་སྨོན་འཇུག་གཉིས་ཀྱི་སེམས་བསྐྱེད། བློ་སྦྱོང་ལ་སོགས་པའི་ཆོས་སྐོར་མང་དུ་ཞུ་བར་མཛད་དོ། །

                                                                                                                       རྩོམ་སྒྲིག་པ། མང་ར་བ།

           གསལ་འདེབས། 
                   རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

                    དྲ་བའི་སྦྲེལ་ཐགhttp://www.tb1025.cn་