ལན་ཅིག་བྲག་གཡང་ཆེན་པོ་མིས་མི་ཐར་བ་ཞིག་ཡོད་པར་རྫུ་འཕྲུལ་གྱིས་གཤེགས་པ་བྲང་དཔོན་དོན་བཀྲས་བྱ་བས་མཐོང་ནས། ཆོས་རྗེ་ལགས་དེ་འདྲའི་ལྟད་མོ་སྟོན་པ་ཞེས་ཐལ་མོ་སྦྱར་ནས་ཕྱག་འཚལ་དུ་བྱུང་བ་ལ་རྒྱལ་བ་དབེན་ས་པ་ཆེན་པོས་ཁྱོད་སུ་དང་ནོར་གང་མཐོང་གསུངས་སྔར་གྱི་མཐོང་ཚུལ་ཞུས་པས། ངས་བྲག་གཡང་དེ་འདྲ་ལ་ག་ལ་ཐར་བྲང་དཔོན་རང་མིག་འཁྲུལ་བའམ། བྲག་འདིའི་གཞི་བདག་ཇོ་བོ་བྲག་དཀར་བ་མཐོང་བ་ཡིན་ཡོང་གསུངས་དེ་ནས། དགུང་ལོ་ཉི་ཤུ་ལྷག་ཙམ་འགྲོ་བའི་དུས་རྒྱལ་བ་གཡུང་གི་སྒྲུབ་གནས་བྲག་རྒྱ་བོ་རྡོ་རྗེ་ཕོ་བྲང་དུ་དཔལ་གསང་བ་འདུས་པའི་མན་ངག་གི་གནད་ཕྲ་མོ་ཞིག་ཐུགས་ཉམས་སུ་བཞེས་པ་ལ་བརྟེན་ནས་རྨད་དུ་བྱུང་བའི་རྟོགས་པ་ཁྱད་པར་ཅན་བརྙེས་ཏེ། རྒྱ་བོད་ཀྱི་མཁས་གྲུབ་མང་པོའི་གཞུང་རྣམས་དང༌། རྒྱལ་བའི་བཀའ་རབ་འབྱམས་ངག་ནས་ཐོགས་མེད་དུ་འདོན་ནུས་པ་བྱུང་སྟེ་ཚུལ་དེ་ལ་མཁས་གྲུབ་སངས་རྒྱས་ཡེ་ཤེས་ཀྱིས་བསྔགས་པ་ནི། དེ་ནས་རིང་པོར་མ་ལོན་སྐད་ཅིག་ལ། །གྲུབ་པའི་གནས་མཆོག་རྡོ་རྗེའི་ཕོ་བྲང་དུ། །ཉམས་དང་རྟོགས་པ་ཆེར་འབར་དབེན་ས་པ། །བློ་བཟང་དོན་གྲུབ་ཞབས་ལ་གསོལ་བ་འདེབས། །ཞེས་དང༌། དེ་ནས་ཆོས་ཀུན་ཚིག་དོན་ཐུགས་ཆུད་ཅིང་། །བདེ་ཆེན་ཆང་གིས་མྱོས་པའི་དཔའ་བོའི་གར། །གཅིག་པུའི་ཉམས་ཀྱིས་བསྒྱུར་མཛད་དབེན་ས་པ། །བློ་བཟང་དོན་གྲུབ་ཞབས་ལ་གསོལ་བ་འདེབས། །ཞེས་གསུང་པ་ལྟར་རོ། །

                  གཞན་ཡང་འཕགས་པའི་ཡུལ་གྱི་འཕྲལ་སྐད་དང༌། ལེགས་སྦྱར་གྱི་སྐད་སོགས་སྐད་ཀྱི་རིགས་མི་འདྲ་བ་དུ་མ་ལའང་མཁྱེན་པ་ཐོགས་པ་མེད་པར་གྱུར་ཏེ། ལན་ཅིག་ཤངས་ལ་འབྱོར་པའི་ལམ་ཁར་རྒྱལ་པོ་ཆུ་ཐགས་བུད་མཚམས་ན་ཡར་ལ་རྫོ་ཀི་འགའ་ཞིག་དང་འགྲོགས་ཏེ་ཨ་ཙ་རྱའི་འཕྲལ་སྐད་ཀྱིས་དེ་དག་དང་གསུང་གླེང་མཛད་པས་ཚོང་པ་མང་པོ་འདུག་པ་ཡ་མཚན་དུ་གྱུར་ནས་འདུག་གསུང༌། ཡང་དུས་གཅིག་རོང་ཕྱོགས་སུ་ཕེབས་པས་ས་སྐྱའི་བདག་ཆེན་རྡོ་རྗེ་གླིང་པ་དང༌། བྱམས་ཆེན་པའི་སློབ་དཔོན་མང་པོ་དང༌། སྐྱེ ད་ཚལ་བའི་དགེ་བཤེས་འགའ་ཞིག་དང༌། རྟ་ནག་པའི་ལོ་ཆེན་ཟེར་བ་གཅིག་རྣམས་ཁ་རུ་སྟེང་དུ་འཚོགས་ནས་སྒྲའི་བཤད་པ་ཡུས་ཡུས་བྱེད་ཅིང་དགེ་ལྡན་རྣམས་ཀྱིས་སྒྲ་མི་ཤེས་ཟེར་ཞིང་གཏམ་མང་པོ་གླེང་བའི་སར་རྗེ་བླ་མ་ཉིད་ཀྱིས་བྱོན་ནས། བརྒྱད་སྟོང་པ་སཾ་སྐྲ་ཏའི་སྐད་དུ་འདོན་གྱིན་བཤད་པ་མཛད་པས། དེ་དག་གི་སྒྲའི་ཡོན་ཏན་གྱིས་གང་དུ་ཡང་མ་ཕྱི ན་ཅིང་ལུང་རིགས་གང་གིས་ཀྱང་ལན་འདོན་པར་མ་ནུས་པ་ན། བདག་ཉིད་ཆེན་པོ་འདིའི་པཎ་ཞྭ་སེར་པོ་དང༌། རས་ཀྱི་ཆོས་གོས་དང་མཐང་གོས་སོགས་ལ་དཔགས་ཏེ་འདི་ནི་རྒྱ་འདྲེ་མངོན་སུམ་མོ་ཞེས་ཞེ་སྡང་ཤིན་ཏུ་འབར་བའི་རྒྱུད་དང་སྦྱར་བའི་ཚིག་ངན་གྱི་དུག་མདའ་ཤིན་ཏུ་མི་བཟད་པའི་ཆར་ཕབ་ཀྱང་དམ་པ་འདིས་ལན་བརྒྱར་གོམས་པའི་བཟོད་པའི་གོ་ཆ་ལ་བརྟེན་པས་བ་སྤུའི་རྩེ་མོ་ཙམ་ཡང་འཁྲུགས་པ་མེད་དོ། །དེ་རྣམས་ཀྱི་ཁྲོད་ནས་ནོར་བུ་གླིང་པའི་སློབ་དཔོན་ན་རེ། དེ་འདྲ་མ་གསུང་ཁོང་སྐྱེས་བུ་ངོ་མཚར་ཆེ་བ་ཞིག་སྣང་ཟེར་ཁོང་རང་གི་དཀར་ཡོལ་བཀྲུས་ནས་ཇའི་སྐལ་བ་དྲངས། དེར་རྒྱལ་བ་དབེན་ས་པ་ཆེན་པོ་ཉིད་གདུལ་བྱ་མ་རུངས་པ་དེ་དག་སྐྲག་པར་བྱ་བའི་ཕྱིར་སྟོད་ནས་མེ་འབར་བ་དང༌། སྨད་ནས་ཆུ་འཁྲུག་པ་སོགས་རྫུ་འཕྲུལ་ཡ་མ་ཟུང་སྟོན་པ་དང༌། ཁྲོ་བོའི་དབང་པོའི་སྐུར་བཞེངས་ཏེ་འདོད་ན་རི་རབ་ཀྱང་ཐལ་བར་རློག་པ་སོགས་མཐུ་སྟོབས་དང་རྫུ་འཕྲུལ་དཔག་མེད་སྟོན་ནུས་མོད་ཀྱང་གདུལ་བྱ་མ་རུང་པ་དེ་དག་ཉོན་མོངས་པའི་གདོན་དྲག་པོས་ཟིན་པས་རེ་ཤིག་བཅོས་ཐབས་མེད་དེ། ཁོ་བོས་ཇི་འདྲ་བའི་རྫུ་འཕྲུལ་མངོན་པར་འདུ་བྱས་ཀྱང་གདོན་དྲག་པོས་བརླམས་པའི་ནད་པ་ལ་སྨན་གྱི་རིགས་གང་ཡང་མི་འཕྲོད་པ་ལྟར་སྐལ་བ་མེད་པའི་སྐྱེ་བོ་འདི་དག་ལ་དོན་མི་འགྱུར་བར་མ་ཟད། ལོག་པར་རྟོག་པ་འཕེལ་བར་འགྱུར་རོ་སྙམ་དུ་དགོངས་ནས་གཙང་ལ་ཕེབས་སོ། །

                    དེའི་ཚེ་གྲུབ་ཆེན་ཆོས་རྡོ་རྗེའི་འཁོར་དུ་གྲུབ་པ་ཐོབ་པའི་སློབ་མ་བཅུ་ཙམ་ཡོད་པའི་ནང་ནས། རྗེ་འདི་ཉིད་སྲས་ཀྱི་ཐུ་བོར་དགོངས་སྙན་བརྒྱུད་ཀྱི་བེའུ་བུམ་དང༌། སྤྲུལ་པའི་གླེགས་བམ་ཕྱག་ཏུ་གཏད་དེ་ལྷ་དང་བླ་མའི་ཚོགས་ཀྱིས་ལྷན་ཅིག་ཏུ་ཆོས་ཀྱི་རྒྱལ་ཚབ་ཏུ་དབང་བསྐུར་ཏོ། །དེ་ལྟར་རྒྱལ་བ་དབེན་ས་པ་ཆེན་པོ་ལ་གྲུབ་ཆེན་ཆོས་རྡོ་རྗེས་འཇམ་མགོན་བླ་མའི་མདོ་སྔགས་ཀྱི་སྙན་བརྒྱུད་མན་ངག་ཡོངས་རྫོགས་གནང་བའི་མཐར་སྤྲུལ་པའི་གླེགས་བམ་ཕྱག་ཏུ་གཏད་དེ་སྙན་བརྒྱུད་བསྟན་པའི་བདག་པོར་མངའ་གསོལ་བའི་ཚུལ་ལས་བརྩམས་ཏེ། མཁས་གྲུབ་སངས་རྒྱས་ཡེ་ཤེས་ཀྱིས་བསྟོད་པ་མཛད་པ་ནི།  གྲུབ་པའི་དབང་པོས་རང་གི་འཁོར་རྣམས་ལ། །སྒྲིབ་མེད་ཡེ་ཤེས་སྤྱན་གྱིས་བརྟགས་པ་ན། ཁྱོད་ལས་མཆོག་གཞན་མ་གཟིགས་དབེན་ས་པ། །བློ་བཟང་དོན་གྲུབ་ཞབས་ལ་གསོལ་བ་འདེབས། །ཞེས་དང༌། །དེ་ནས་རང་གི་ཆོས་ཀྱི་རྒྱལ་ཚབ་ཏུ། །དབང་བསྐུར་སྤྲུལ་པའི་གླེབས་བམ་ཕྱག་ཏུ་བཞག །ཆོས་ཀྱི་རྒྱལ་སྲིད་ཡོངས་གཏད་དབེན་ས་པ། །བློ་བཟང་དོན་གྲུབ་ཞབས་ལ་གསོལ་བ་འདེབས། །ཞེས་དང༌། དེ་ཚེ་བླ་མ་ལྷ་དང་སྲུང་མའི་ཚོགས། །དགོངས་གཅིག་ཉིད་ཀྱིས་ལེགས་པར་མངའ་གསོལ་བ། ཁམས་གསུམ་ཆོས་ཀྱི་རྒྱལ་པོ་དབེན་ས་པ། །བློ་བཟང་དོན་གྲུབ་ཞབས་ལ་གསོལ་བ་འདེབས། །ཞེས་གསུངས་སོ། །དེ་ནས་རྒྱལ་བ་དབེན་ས་པ་ཆེན་པོས་གྲུབ་པའི་གནས་མཆོག་པདྨ་ཅན་ཞེས་ཀྱང་བྱ་པདྨ་འོད་ཀྱི་གཞལ་ཡས་ཞེས་ཀྱང་བྱ་བའི་གནས་དེར་དག་པའི་འཁོར་གྱི་ཚོགས་ལ་ཆོས་ཀྱི་འཁོར་ལོ་དང་པོར་བསྐོར་ཞིང༌། གཞན་ཡང༌། གྲུབ་པའི་གནས་དུ་མར་སྐྱེ་བོ་ཕལ་ཆེར་ལ་ལྐོག་ཏུ་གྱུར་པའི་ཚུལ་གྱིས་སྐལ་བ་དང་ལྡན་པ་རྣམས་ལ་ཆོས་ཀྱི་འཁོར་ལོ་དུ་མ་བསྐོར་བས། གྲུབ་པའི་གདུང་འཚོབ་བརྙེས་པའི་སྐྱེ་བོས་གངས་ཁྲོད་ཀྱི་དབེན་པ་མཐའ་དག་ཁྱབ་པར་རྗེ་ཉིད་ཀྱི་གསུང་ལས་དོན་གྱིས་འབྱུང་ངོ༌། །རྒྱལ་བ་དབེན་ས་པ་ཆེན་པོས་གྲུབ་པའི་གནས་མཆོག་ཏུ་དག་པའི་འཁོར་འགའ་ཞིག་ལ་ཆོས་ཀྱི་འཁོར་ལོ་ཐོག་མར་བསྐོར་བའི་ཚུལ་ལ་མཁས་གྲུབ་སངས་རྒྱས་ཡེ་ཤེས་ཀྱིས་བསྟོད་པ་མཛད་པ་ནི། པདྨ་ཅན་དང་དེ་བཞིན་གྲུབ་པའི་གནས། །རྣམས་སུ་ཟབ་རྒྱས་ཆོས་ཀྱི་ཆར་ཕབ་ནས། །ཀུན་ཏུ་གྲུབ་པས་ཁྱད་མཛད་དབེན་ས་པ། །བློ་བཟང་དོན་གྲུབ་ཞབས་ལ་གསོལ་བ་འདེབས། །ཞེས་གསུངས་སོ། །

                   དེ་ནས་དེའི་སྐབས་རྣམས་སུ་ཡང་གང་དང་གང་དུ་ཞབས་ཀྱི་འཁོར་ལོ་བཀོད་པའི་ས་ཕྱོགས་དང༌། དབེན་པའི་གནས་དེ་དང་དེ་དག་གི་མི་བསྲུན་པའི་གཞི་བདག་རྣམས་དམ་ལ་བཏགས་ཏེ། སྲོག་གི་སྙིང་པོ་བཞེས་ནས་སླན་ཆད་དགེ་བའི་བར་ཆད་མི་བགྱིད་པའི་བཀའ་ཡང་དག་པར་སྩལ། དེ་ཡང་པདྨ་ཅན་དུ་ཕེབས་པའི་ལམ་ཁར་སྡིག་པ་ར་ཅན་ལུག་ཐོང་ཙམ་ཞིག་བདག་ཉིད་ཆེན་པོ་ལ་འཇིགས་པ་སྟོན་པ་ལྟར་བྱེད་པ་ན་བདག་ཉིད་ཆེན་པོས་ཇི་མི་སྙམ་པར་ཏིང་ངེ་འཛིན་གྱིས་ཕྱག་རྒྱས་བཅིངས་ཏེ་ཕེབས་པས་ཆོ་འཕྲུལ་རང་ཞིར་སོང༌། ཕྱི ས་ནི་གཞི་བདག་དེས་ཚུལ་བཞིན་འཕྲིན་ལས་བསྒྲུབས་ཏེ། རྗེ་འདི་པ་འཚོ་བའི་ཆ་རྐྱེན་གྱི་གཏུགས་ནས་གནས་དེ་ལས་འབྱོན་པར་བཞེད་པ་ན་གནའ་རོ་སོགས་འཚོ་བའི་ཡོ་བྱད་སྒྲུབ་ཁང་གི་ཉེ་ལོགས་སུ་ཡང་ཡང་འཇོག་པར་བྱེ ད། དེའི་ཚུལ་རིག་སྟེ་གནས་འདིར་རྒྱུན་རིང་ན་དགེ་སྦྱོར་འཕེལ་ཡང་སེམས་ཅན་ལ་གནོད་པར་དགོངས་ནས་ཕེབས། ཕྱི ས་དབེན་སར་བཞུགས་པའི་ཚེ་ཡང༌། ཇོ་མོའི་གཞི་བདག་དེས་གསའི་རྣམ་པར་ཀུན་གྱིས་མཐོང་བར་བྱས་ཏེ་རྗེ་ཉིད་འཇལ་བ་ལ་བྱུང་གསུང་ངོ༌། །ཚུལ་དེ་ལ་མཁས་གྲུབ་སངས་རྒྱས་ཡེ་ཤེས་ཀྱིས་བསྟོད་པ་མཛད་པ་ནི། སྐུ་གསུང་ཐུགས་ཀྱི་རྣམ་པ་སྣ་ཚོགས་པས། །ཞིང་སྐྱོང་གཞི་བདག་ཚོགས་རྣམས་དམ་ལ་བཞག །འགྲོ་ལ་ཕན་བདེ་རྒྱས་མཛད་དབེན་ས་པ། །བློ་བཟང་དོན་གྲུབ་ཞབས་ལ་གསོལ་བ་འདེབས། །ཞེས་གསུངས་སོ། །

                                                                                                                            རྩོམ་སྒྲིག་པ། མང་ར་བ།
            གསལ་འདེབས། 
                   རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                    དྲ་བའི་སྦྲེལ་ཐགhttp://www.tb1025.cn