གཞན་ཡང་གནས་དེར་ཆོས་ཀྱི་རྗེ་ཐུབ་བསྟན་རྣམ་རྒྱལ་བའི་དྲུང་དུ་སྤྱན་རས་གཟིགས་བཅུ་གཅིག་ཞལ། ཐུགས་རྗེ་ཆེན་པོ་ཕྱག་བཞི་པ་ཛཾ་ལ་དམར་པོ་ཡབ་ཡུམ། མགོན་པོའི་བཀའ་ཆེན་བཅུ་གསུམ་དུ་གྲགས་པའི་རྗེས་གནང་ལུང་མན་ངག་དང་བཅས་པ། ཆོས་རྒྱལ་ཕྱི་ནང་གསང་གསུམ། གཏུམ་པོ་ཁྱུང་ལྔའི་ལུང་མན་ངག་བཅས་པ། ནམ་མཁའ་སྒོ་འབྱེད། ཚེ་རིང་མཆེད་ལྔའི་དབང་དང༌། འཇམ་དབྱངས་མགོན་པོའི་གཅོད་གཞུང་ཊཱིཀྐ་དང་བཅས་པ་སོགས་གཅོད་ཀྱི་གདམས་པ་དུ་མ་དང༌། རྗེ་བླ་མ་ནས་བརྒྱུད་པའི་ནཱ་རོའི་ཆོས་དྲུག་གི་ཁྲིད་གསང་འདུས་རིམ་ལྔའི་ཁྲིད་ལག་རྗེས། པཎ་ཆེན་ཆོས་རྒྱལ་གྱི་བསྲེ་འཕོ། ཕྱག་རྒྱ་སྲོ ག་རྩོལ་གྱི་གདམས་ངག་སོགས་ཡིག་ཆུང་དུ་མ་དང༌། འཕོ་ཁྲིད་ཆེན་མོ། ནེ་གུ་ཆོས་དྲུག་གི་ཁྲིད། ལྷ་མོ་ཤྲ་མ་ཎའི་སྒྲུབ་ཐབས། མཁའ་འགྲོ་སེང་གདོང་ཅན་དཔལ་ལྡན་དམག་ཟོར་རྒྱལ་མོ། གུར་ཞལ། ཕྱག་བཞི་པ། རྣམ་སྲས་གནོད་སྦྱིན་བེཀྩེ་རྣམས་ཀྱི་རྗེས་གནང་དང་སྙིང་པོའི་བཟླས་ལུང་དང་བཅས་པ་གསན་ནོ། །དེ་ལྟར་མང་དུ་ཐོས་པ་མཛད་པའི་ཚུལ་དེ་ལ་མཁས་གྲུབ་སངས་རྒྱས་ཡེ་ཤེས་ཀྱིས་བསྟོད་པ་མཛད་པ་ནི། གཅིག་ཏུ་སྙིང་པོའི་དོན་ལ་གཞོལ་བའི་ཐུགས། །མཆོག་ཏུ་གྱུར་པས་མཁས་གྲུབ་གཞན་ལས་ཀྱང༌། །གདམས་པའི་བདུད་རྩི་མང་གསོལ་དབེན་ས་པ། །བློ་བཟང་དོན་གྲུབ་ཞབས་ལ་གསོལ་བ་འདེབས། །ཞེས་གསུངས་པ་ལྟར་རོ། །

                  དེ་ནས་རྒྱལ་བ་དབེན་ས་པ་ཆེན་པོ་ཆོས་འཁོར་དབུས་སྡིངས་སུ་ཕེབས་ཏེ་ཟུང་འཇུག་གྲུབ་པའི་དཔའ་བོ་བླ་མ་རྗེ་བཙུན་སྐྱབས་མཆོག་དཔལ་བཟང་པོའི་དྲུང་དུ་གསང་བདེ་འཇིགས་གསུམ་གྱི་དབང་ཡོངས་རྫོགས། མགོན་པོ། ཆོས་རྒྱལ་བཅུ་གཅིག་ཞལ།དོན་ཞགས། གཏུམ་པོ་ཁྱུང་ལྔ་རྣམས་ཀྱི་རྗེས་གནང་བཟླས་ལུང་དང་བཅས་པ། གྲུབ་རྒྱལ་ལུགས་ཀྱི་ཚེ་དབང་ལ་སོགས་པ་མདོ་སྔགས་ཀྱི་ཆོས་བཀའ་ཡོངས་སུ་རྫོགས་པ་ཞུས་ཤིང༌། བླ་མ་དང་ཡི་དམ་དབྱེ ར་མི་ཕྱེ ད་པའི་ཡེ་ཤེས་ཀྱི་དཀྱིལ་འཁོར་དངོས་སུ་གཟིགས་པ་དང་ངོ་མཚར་བའི་ལྟས་དུ་མ་གཟིགས་པ་ནི་རྒྱལ་བ་དབེན་ས་པ་ཆེན་པོས་བདག་ཉིད་ཆེན་པོ་རྗེ་བཙུན་སྐྱབས་མཆོག་དཔལ་བཟང་ཕྱག་ན་རྡོ་རྗེ་གཏུམ་མོའི་དབང་ཞུས་པའི་དུས་སུ་རྗེ་སྐྱབས་མཆོག་དཔལ་བ་དེ་སྐུ་མདོག་མཐིང་ཁ་འོད་ཟེར་ལྔ་འཕྲོ་བ་ལ་མེ་སྣ་ལྔ་འབར་བས་མཛེས་པར་བསྐོ ར་བ། གཏོར་མ་དང་རྡོ་དྲིལ་ནམ་མཁར་གནས་ཤིང༌། དྲི་ཞིམ་པོ་བྲོ ་བ་དང༌། ལྷའི་རོལ་མོའི་སྒྲ་ཡང་མངོན་སུམ་དུ་གསན། ཡང་དོན་ཞགས་དང༌། བཅུ་གཅིག་ཞལ་གྱི་དབང་ཞུས་པའི་དུས་སུ་སྔར་བསྟན་མ་མཐོང་བའི་རྡུལ་ཚོན་གྱི་དཀྱིལ་འཁོར་ཡིད་འཕྲོག་པ་ཞིག་ལྷའི་མེ་ཏོག་སྣ་ཚོགས་པ་སོགས་མཆོད་པའི་ཚོགས་ཀྱང་དུ་མ་འདུག་ཅིང༌། དྲི་ཞིམ་པོ་དང་ལྷའི་སིལ་སྙན་གྱི་སྒྲ་སྙན་པོ་ཡང་འཁྲོལ། རྗེ་སྐྱབས་མཆོག་དཔལ་བ་དེ་ཉིད་ཀྱི་སྐུ་ཡང་ཟླ་བའི་དཀྱིལ་འཁོར་མངོན་པར་གང་བ་ལྟ་བུར་དཀར་ཞིང་འོད་ཟེར་འཕྲོ་བ་མཐོང་བས་རྐྱེན་བྱས་ནས་དགའ་སྤྲོ་དཔག་ཏུ་མེད་པ་སྐྱེས། དེ་ནས་རྒྱལ་བ་དབེན་ས་པ་ཆེན་པོ་རྗེ་སྐྱབས་མཆོག་དཔལ་བ་ཉིད་ལ་གསོལ་བ་ཡུན་རིང་དུ་བཏབ་ནས། འདས་མ་འོངས་ཀྱི་སྐྱེ་བ་བཞེས་ཚུལ། སྐུ་སྐྱེ་བ་འདི་ངོ་མཚར་ཆེ་བའི་ཡོན་ཏན་འཁྲུངས་ཚུལ་རྣམས་གསུང་བར་ཞུས་པས་རྗེ་སྐྱབས་མཆོག་དཔལ་བས་འདི་ལྟར་གསུངས་ཏེ།སངས་རྒྱས་འཇིག་རྟེན་དུ་བྱོན་པའི་ཚེ་བྱང་ཆུབ་སེམས་དཔའ་འདུལ་བའི་ཏོག་ཅེས་པར་སྐྱེས་ནས་སངས་རྒྱས་དངོས་ལ་ཐེག་པ་ཆེན་པོའི་ཆོས་དཔག་ཏུ་མེད་པ་ཉན། དེའི་འོག་ཏུ་རྒྱ་གར་ཤར་ཕྱོ གས་སུ་སྟོབས་ལྡན་གྱི་རྒྱལ་པོ་ཞིག་ཏུ་སྐྱེས་ཏེ་ཆོས་ལྡན་གྱི་ཁྲིམས་བཅས་ནས་མི་དགེ་བ་བྱེད་པ་རྣམས་ཀྱི་མིག་འདོན་པ་དང༌། རྐང་ལག་གཅོད་པ་སོགས་བྱས་པའི་སྟོབས་ཀྱིས་མ་འོངས་པ་མིག་དང་རྐང་ལག་སོགས་ལ་སྐྱོན་ཅུང་ཟད་འོང་བ་འདྲ་གསུང་། དེ་ནས་སུམ་ཅུ་རྩ་གསུམ་དུ་སྐྱེས། དེར་ཡུན་རིང་པོ་མ་ལོན་པར་རྒྱ་གར་དུ་སློབ་དཔོན་ཡོན་ཏན་འོད་དུ་གྱུར་ནས་བསྟན་པ་དང་འགྲོ་བའི་དོན་ཚད་མེད་པ་བྱས། དེའི་ཕྱི ་མ་རྒྱ་ནག་རི་བོ་རྩེ་ལྔར་སོང་ནས་རྗེ་བཙུན་འཇམ་པའི་དབྱངས་ལ་ཆོས་མང་དུ་ཉན་ཞིང་རྗེ་བཙུན་གྱིས་ལུང་བསྟན་པ་ལ་བརྟེན་ནས་བལ་པོར་རྡོ་རྗེ་གཞོན་ནུ་ཞེས་བྱ་བའི་སྔགས་པ་ཞིག་གི་རྟེན་བཟུང་སྟེ་ཐེག་པ་ཆེན་པོ་གསང་སྔགས་ཀྱི་བསྟན་པ་དར་བར་བྱས།

                    དེ་ནས་ལོ་ཙཱ་བ་ཚུལ་ཁྲིམས་རྒྱལ་བར་སྐྱེས་ནས་ཇོ་བོ་རྗེ་བོད་ལ་གདན་འདྲེན་པ་སོགས་དཀའ་སྤྱད་མང་པོ་བྱས་ཤིང་དམ་པའི་ཆོས་མང་པོ་བསྒྱུར་བ་ཡང་དྲན་གསུང་། གཞན་ཡང་རྗེ་ནཱ་རོ་པའི་སྤྲུལ་པར་གྲགས་པའི་འགྲོ་བའི་མགོན་པོ་གཙང་པ་རྒྱ་རས་དང༌། ཆོས་ཀྱི་རྒྱལ་པོ་ཙོང་ཁ་པ་ཆེན་པོའི་སྲས་ཀྱི་ཐུ་བོ་འདུལ་འཛིན་གྲགས་པ་རྒྱལ་མཚན་གཉིས་ཀྱང་དམ་པ་འདིའི་སྐུའི་སྐྱེ་བ་ཡིན་པ་ཡང་རྒྱལ་བ་དབེན་ས་པ་ཆེན་པོ་ཉིད་ཀྱི་ཡེ་ཤེས་ཀྱིས་མངོན་སུམ་དུ་གཟིགས་ཤིང་རྗེ་བཙུན་འཇམ་པའི་དབྱངས་ཀྱིས་གནང་བའི་ལུང་བསྟན་གསང་བའི་མེ་ལོང་ལས་ཀྱང་དེ་ལྟར་དུ་འབྱུང་ངོ༌། །དེ་ནས་རྗེ་སྐྱབས་མཆོག་དཔལ་བ་དགུང་ལོ་དྲུག་ཅུ་རེ་གསུམ་བཞེས་པའི་ཚེ་འཇིགས་བྱེད་སྒྲུབ་མཆོད་ཅིག་མཛད་པའི་དུས་སུ་དཔལ་རྡོ་རྗེ་འཇིགས་བྱེད་ཀྱི་དཀྱིལ་འཁོར་དང་ཡོངས་སུ་རྫོགས་པ་དང༌། དགྲ་ནག་དང་བཤེད་དམར་ལྷ་ལྔའི་དཀྱིལ་འཁོར་དང་བཅས་པའི་ཞལ་མངོན་སུམ་དུ་གཟིགས་ཤིང༌། དེའི་དུས་སུ་རྒྱལ་བ་དབེན་ས་པ་ཆེན་པོས་ཡི་དམ་གྱི་དབང་གསན་པས་སྐུ་ལས་མེ་འབར་ཞིང་ཞབས་བརྡབས་པས་ས་གཡོ་བ་དང༌། དཀྱིལ་འཁོར་ཡང་མེ་ཁ་དོག་སྣ་ལྔ་པས་བསྐོར་བ་སོགས་ངོ་མཚར་བའི་ལྟས་མང་དུ་གཟིགས་སོ། །དེ་ནས་སྤྲེའུ་ལོ་ཟླ་བ་ལྔ་པའི་ཚེས་བརྒྱད་ཀྱི་ཐོ་རངས་བཅོམ་ལྡན་འདས་མི་བསྐྱོད་རྡོ་རྗེའི་དཀྱིལ་འཁོར་གྱི་ཞལ་མཐོང་ལུས་དབེན་དང་ངག་དབེན་ལ་བརྟན་པ་ཐོབ་གསུང་ཞིང་དེ་དུས་རྒྱལ་བ་དབེན་ས་པ་ཆེན་པོས་རྗེ་སྐྱབས་མཆོག་དཔལ་ལ་གསང་བ་འདུས་པའི་དབང་ཞུས་ཏེ་ཡེ་ཤེས་འབེབས་པའི་དུས་སུ། རྗེ་སྐྱབས་མཆོག་དཔལ་བའི་སྐུ་འོད་ཟེར་ཁ་དོག་སྣ་ལྔའི་རང་བཞིན་ཅན་དུ་བྱས་ནས་དཀྱིལ་འཁོར་གྱི་སྟེང་ན་ཕར་འབྱོན་ཚུར་འབྱོན་མཛད་ཀྱང༌། རྡུལ་ཚོན་ལ་མི་གནོད་པ་སོགས་ཡ་མཚན་པའི་ལྟས་དུ་མ་བྱུང་ངོ༌། །

                  དེའི་ཚེ་རྗེ་སྐྱབས་མཆོག་དཔལ་བས་འདི་ལྟར་གསུངས་ཏེ། ད་ནི་རྨི་ལམ་ལ་བརྟན་པ་ཐོབ་ནས་འབད་མེད་དུ་ཟིན། ཁྱད་པར་ཚེས་བཅོ་ལྔ་དང་གནམ་གང་ལ་རྨི་ལམ་གྱི་ལུས་ཁྱད་པར་ཅན་བཟུང་ནས་ཐུབ་ཆེན་དང༌། བྱམས་པ་རྒྱལ་སྲས་འཇམ་དཔལ་སྙིང་པོ་སོགས་ཀྱི་སྤྱན་སྔར་གསོ་སྦྱོང་རྒྱུན་པར་བྱེད་ཅིང་ཆོས་མང་དུ་ཞུས། གཞན་ཡང་བདེ་བ་ཅན་དང༌། འོག་མིན་སྟུག་པོ་བཀོད་པ་དང༌། མངོན་དགའ་སོགས་ལོངས་སྤྲུལ་གྱི་ཞིང་ཁམས་མང་པོ་བལྟ་བར་ཕྱིན་པས་ཞིང་དེ་དག་གི་རྒྱལ་བ་སྲས་དང་བཅས་པ་ཡང་མཐོང་དབང་དང་བྱིན་རླབས་དཔག་ཏུ་མེད་པ་ཡང་དག་སྩལ། བདག་ཉིད་ཀྱིས་ཀྱང་ལུས་ཚད་མེད་པ་སྤྲུལ་ནས་བདུན་རྣམ་དག་ཕུལ་གསུང་ངོ༌། །དེ་ནས་རྗེ་སྐྱབས་མཆོག་དཔལ་བ་དགུ་ལོ་བདུན་ཅུ་དོན་བརྒྱད་བཞེས་པའི་ཚེ་བཅོམ་ལྡན་འདས་འཁོར་ལོ་སྡོམ་པའི་སྒྲུབ་པ་ཞིག་མཛད་པའི་དུས་སུ། བདེ་མཆོག་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་ཡོངས་སུ་རྫོགས་པའི་ཞལ་གཟིགས་ཤིང་དེར་གཙོ་བོས་དབང་བཞི་རྫོགས་པར་བསྐུར་ནས་མྱུར་དུ་མཁའ་སྤྱོད་དུ་འབྱོན་པའི་འདུན་པ་ཐོངས་ཞེས་གསུང་གི་གནང་བས་དབུགས་དབྱུང་བ་བརྙེས། དེའི་ཚེ་རྒྱལ་བ་དབེན་ས་པ་ཆེན་པོས་བདེ་མཆོག་གི་དབང་ཞུས་པས་ནང་མཆོད་ཁ་དོག་ལྔ་ལྡན་དུ་ཁོལ་བ་དང༌།རྗེ་སྐྱབས་མཆོག་དཔལ་བ་དཀྱིལ་འཁོར་གྱི་སྟེང་དུ་མདའ་གང་ཙམ་འཕགས་ནས་གར་མཛད་པ་སོགས་ཕུལ་དུ་བྱུང་བའི་ལྟས་དུ་མ་ཞིག་གཟིགས། ཉིན་གཅིག་གི་ཚེ་རྗེ་སྐྱབས་མཆོག་དཔལ་བ་དང་རྒྱལ་བ་དབེན་ས་པ་ཆེན་པོ་གཉིས་ཀས་དབུས་རིའི་རྩེར་ཕེབས་པ་ན་རྗེ་སྐྱབས་མཆོག་དཔལ་བ་སྤྱན་ནམ་མཁར་ཧྲིག་ཧྲིག་གཟིགས་ཤིང་ཕྱག་ཐུགས་ཀར་ཐལ་མོ་སྦྱོར་བར་མཛད། དེ་ལ་རྒྱལ་བ་དབེན་ས་པ་ཆེན་པོས་ཅི་འདྲ་ཞིག་མཆིས་ཞུས་པས། རྒྱལ་བ་རྡོ་རྗེ་འཆང་ལ་གྲུབ་ཆེན་བརྒྱད་ཅུས་བསྐོར་ནས་བྱིན་གྱིས་བརླབས་པའི་ཉམས་ཤིག་ཤར་གསུང༌།

                  དེ་ནས་དགུང་ལོ་བརྒྱད་ཅུ་གྱ་གཅིག་བཞེས་པའི་སྟོན་ཞིག །དོན་དུ་ན། དབེན་དགོན་འདི་ཉིད་འབྱུང་བའི་ས་གཞི་བྱིན་གྱིས་བརླབས་པར་འདུག་ཀྱང༌། ཐ་མལ་བ་རྣམས་ཀྱི་ངོར་ཞབས་འཆག་པར་སྙད་དེ་ཡབ་སྲས་གཉིས་ཀས་དབུས་རིའི་རྩེ་མོར་ཕེབས་པ་ན་རྗེ་བཙུན་སྐྱབས་མཆོག་དཔལ་བཟང་ཕྱག་གཉིས་ཐལ་མོ་སྦྱར་ནས་དབུ་གུག་གུག་པ་ལན་མང་དུ་མཛད་ཅིང་འདུག་པ་ལ་རྒྱལ་བ་དབེན་ས་པ་ཆེན་པོ་དེ་འདྲ་ཅི་ཡིན་ཞུས་པས་རྒྱལ་བ་བློ་བཟང་གྲགས་པ་ལ་རྒྱ་བོད་ཀྱི་མཁས་གྲུབ་མང་པོས་བསྐོར་ནས་བྱོན། བྱི ན་གྱིས་ཀྱང་བརླབས་གསུང་།ལན་ཅིག་ད་ནི་དཔལ་མགོན་པོ་ཡབ་ཡུམ་དང༌། དམ་ཅན་ཆོས་རྒྱལ་འཁོར་བཅས་ཀྱིས་བྲན་བཞིན་བཀའ་ཉན་པར་འདུག་གསུང་ངོ༌། །

                                                                                                                                     རྩོམ་སྒྲིག་པ། མང་ར་བ།
            གསལ་འདེབས། 
                   རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                    དྲ་བའི་སྦྲེལ་ཐགhttp://www.tb1025.cn