དེ་ནས་དགུང་ལོ་བརྒྱད་བཞེས་པ་ན། ནུབ་གཅིག་སེག་རིའི་རྩེ་ནས་ཟླ་བའི་དཀྱིལ་འཁོར་ཉ་གང་བ་ཞིག་ཤར་བྱུང་བས་རང་ཉིད་ཀྱི་སྐུ་ལ་དར་དཀར་གྱི་གོས་དང་རིན་པོ་ཆེའི་རྒྱན་གྱིས་བརྒྱན། རྡོ་དྲིལ་འཛིན་པས་ཟླ་བ་དེ་ལ་ཞུགས་ཏེ་དྲིལ་བུ་གསིལ་བའི་སྒྲས་འཇིག་རྟེན་གྱི་ཁམས་ཁྱབ་པ་ཞིག་རྨིས་གསུང་སྟེ་དེ་ནི་རྒྱལ་བ་དབེན་ས་བ་ཆེན་པོ་འདིས་རྗེ་བླ་མའི་མདོ་སྔགས་ཀྱི་བསྟན་པ་འཛིན་མའི་ཁྱོན་ཐམས་ཅད་དུ་དར་ཞིང་རྒྱས་པར་མཛད་པའི་འཕྲིན་ལས་རྒྱ་ཆེ་རྒྱུན་མི་འཆད་འབྱུང་བ་འདི་ལ་དགོངས་པར་ངེས་སོ། །རྒྱལ་བ་དབེན་ས་བ་འཁྲུངས་ཙམ་ཉིད་ནས་བླ་མ་ལྷའི་རྣལ་འབྱོར་གྱི་སྒྲུབ་པ་ལ་ཞུགས་པས་སྟོན་པ་མཆོག་དང་འཇམ་མགོན་བླ་མས་བྱིན་གྱིས་བརླབས་པའི་སྣང་བ་ཁྱད་པར་ཅན་བྱུང་བའི་ཚུལ་དེ་ལ་སྲས་ཀྱི་ཐུ་བོ་མཁས་གྲུབ་སངས་རྒྱས་ཡེ་ཤེས་ཀྱིས་བསྟོད་པ་མཛད་པ་ནི། བླ་མ་མཆོག་དང་ལྷག་པའི་ལྷ་རྣམས་ཀྱིས། །འགྲོ་བའི་དཔལ་མགོན་མཆོག་ཏུ་ཉེར་གཟིགས་ནས། །གཞོན་ནུའི་དུས་ནས་བྱིན་བརླབས་དབེན་ས་བ། །བློ་བཟང་དོན་གྲུབ་ཞབས་ལ་གསོལ་བ་འདེབས། །ཞེས་གསུངས་སོ། །དེ་ནས་སྔོན་ལན་ཅིག་མ་ཡིན་པར་གོམས་པའི་བག་ཆགས་བཟང་པོའི་མཐུ་ཡོངས་སུ་བརྟན་པས། འཁོར་བ་མཐའ་དག་མེ་འབར་བའི་རླུབས་ལྟར་གཟིགས་པའི་ངེས་འབྱུང་གི་བསམ་ཤུགས་དྲག་པོས་རབ་ཏུ་འབྱུང་བའི་ཐབས་ཇི་ལྟར་བྱ་ཞེས་ཉིན་མཚན་ཀུན་ཏུ་དེ་འབའ་ཞིག་ཐུགས་ལ་བརྣགས་སོ། །

                    དེ་ནས་ཇི་ལྟར་སྨོན་པ་ལྟར་དགུང་ལོ་བཅུ་གཅིག་བཞེས་པ་ཕག་ལོ་ཟླ་བ་དང་པོའི་ཚེའི་བཅུའི་ཉིན་འཁོར་དབུས་སྡིངས་ཀྱི་དགོན་པར་ཆོས་རྗེ་ལྷ་རི་རྩེ་པ་གྲགས་པ་དོན་གྲུབ་པའི་མཁན་པོ་དང༌། ཞལ་སྔ་ནས་ཚུལ་ཁྲིམས་རིན་ཆེན་པས་སློབ་དཔོན་མཛད་གནས་བརྟན་ཆོས་ཀྱི་རྒྱལ་མཚན་དང༌། རབ་འབྱམས་པ་ལེགས་པ་སོགས་ཁ་སྐོང་བར་འོས་པ་དད་པའི་དགེ་འདུན་ཡོངས་སུ་རྫོགས་པའི་དབུས་སུ་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ་མཚན་ཡང་བློ་བཟང་དོན་གྲུབ་ཅེས་བྱ་བར་གསོལ་ཏོ། །འདི་ནི་སྔོན་ཐུབ་པའི་དབང་པོ་ཡུམ་སྒྱུ་འཕྲུལ་མ་ལས་འཁྲུངས་མ་ཐག་རྒྱལ་པོ་ཟས་གཙང་མས་དོན་ཐམས་ཅད་གྲུབ་པ་ཞེས་མཚན་གསོལ་བ་ལྟར། རྒྱལ་སྲས་བདག་ཉིད་ཆེན་པོ་འདི་ཡང་རྒྱལ་བའི་བསྟན་པའི་སྒོར་བྱོན་མ་ཐག་ཕྱོགས་བཅུའི་རྒྱལ་བ་སྲས་བཅས་ཐམས་ཅད་ཀྱིས་མཁན་སློབ་གཉིས་བྱིན་གྱིས་བརླབས་ཏེ་བློ་བཟང་ཐུབ་དབང་རྡོ་རྗེ་འཆང་ཆེན་པོའི་མདོ་སྔགས་སྙན་བརྒྱུད་ཀྱི་བསྟན་པ་ཡོངས་རྫོགས་ད་ནི་འཇིག་རྟེན་འདིར་ངེས་པར་དར་བར་འགྱུར་བས་རྒྱལ་བ་སྲས་བཅས་ཀུན་གྱི་ཐུགས་ལ་བརྣགས་པའི་དོན་གྲུབ་བོ་ཞེས་མཚོན་པའི་ཕྱིར་བློ་བཟང་དོན་གྲུབ་ཅེས་མཚན་གསོལ་བར་ངེས་སོ། །ཚུལ་འདི་ལ་མཁས་གྲུབ་ཆེན་པོ་སངས་རྒྱས་ཡེ་ཤེས་ཀྱིས། རྗེ་བཙུན་དམ་པ་གྲགས་པའི་མཚན་ཅན་གྱིས། །བློ་བཟང་དོན་གྲུབ་ཅེས་བྱར་མཚན་གསོལ་ནས། །བསྟན་ལ་རབ་ཏུ་བྱུང་མཛད་དབེན་ས་བ། །བློ་བཟང་དོན་གྲུབ་ཞབས་ལ་གསོལ་བ་འདེབས། །ཞེས་བསྔགས་པ་མཛད་དོ། །དེ་ལྟར་རྒྱལ་སྲས་བདག་ཉིད་ཆེན་པོ་འདི་ལྷ་དང་བཅས་པའི་འཇིག་རྟེན་མཐའ་དག་གི་ཡོན་གནས་དམ་པ་ཐུབ་པའི་དབང་པོ་གཉིས་པ་ལྟ་བུར་གྱུར་ཅིང༌། དེའི་ཚེ་མཁན་སློབ་དགེ་འདུན་དང་བཅས་པས་ཀྱང་མེ་ཏོག་གཏོར་ཞིང་ཤིས་པ་བརྗོད་དེ་དོན་དེ་ལྟར་དུ་འགྱུར་བར་སྨོན་ལམ་མཛད་དོ། །ཚུལ་དེ་ནི་རྒྱལ་བ་དབེན་ས་བ་ཆེན་པོ་རང་ཉིད་ཀྱི་གསུང་ལས་བྱུང་སྟེ་ཕག་ལོ་རྟ་ཟླའི་ཚེས་བཅུ་ལ། སོ་སོ་ཐར་པའི་སྡོམ་པ་བླངས། །སངས་རྒྱས་བསྟན་ལ་ཞུགས་པ་དང༌། །ངུར་སྨྲིག་རྒྱལ་མཚན་བསྐོན་པ་མཉམ། །ཞེས་གསུངས་སོ། །རྒྱལ་བ་དབེན་ས་བ་ཆེན་པོ་རང་ཉིད་སྔོན་ཡུན་རིང་པོ་ནས་རྒྱལ་སྲས་ཀྱི་སྤྱོད་པ་རྒྱ་མཚོ་ལ་བསླབ་པ་མཐར་ཕྱིན་པ་ཞིག་ཡིན་ཡང༌། ཕྱི་རབས་ཀྱི་གདུལ་བྱ་རྣམས་རྒྱལ་བའི་བསྟན་པ་ལ་ཞུགས་ནས་ཐོས་བསམ་སྒོམ་གསུམ་འདི་ལྟར་བྱ་དགོས་སོ་ཞེས་འདོམས་པའི་ཕྱིར་དང༌། རྗེ་བླ་མས། དང་པོར་རྒྱ་ཆེན་ཐོས་པ་མང་དུ་བཙལ། །བར་དུ་གཞུང་ལུགས་ཐམས་ཅད་གདམས་པར་ཤར། །ཐ་མར་ཉིན་མཚན་ཀུན་ཏུ་ཉམས་སུ་བླངས། །ཀུན་ཀྱང་བསྟན་པ་རྒྱས་པའི་ཆེད་དུ་བསྔོས། །ཚུལ་འདི་བསམས་ཤིང་མདུན་མ་ལེགས་ནས་གདའ། །ཞེས་གསུངས་པ་ལྟར་ཕ་རྗེས་བུས་ཟིན་པ་ཞིག་བྱ་བའི་ཕྱིར་རྒྱ་ཆེན་ཐོས་པ་འཚོལ་བར་བཞེད་ནས་དབྱར་ཆོས་ལ་དགེ་འཕེལ་དུ་ཕེབས་པ་ན། སློ བ་དཔོན་ཚུལ་ཁྲིམས་རིན་ཆེན་པས་ཚུལ་ཁྲིམས་སྒང་གི་གདན་ས་བཞག་སྟེ་འབྲས་སྤུངས་ལ་ཕེབས་པ་དང་ཐུག་ནས་འབྲས་སྤུངས་སུ་མཁན་པོ་རིན་པོ་ཆེ་གྲགས་པ་དོན་གྲུབ་དང་། སློབ་དཔོན་རིན་པོ་ཆེ་ཚུལ་ཁྲིམས་རིན་ཆེན་པ་གཉིས་དང་ལྷན་དུ་བྱོ ན། དེ་ནས་འབྲས་སྤུངས་སུ་དབྱར་སྟོན་སྦྲེལ་ནས་བཞུགས་ཏེ་ཆོས་སྤྱོད་ཀྱི་རིམ་པ་ཅི་རིགས་པ་ཐུགས་ལ་ཆུད་པར་མཛད། རྗེ་ལྷ་རི་པ་ལ་བྱང་ཆུབ་ལམ་གྱི་རིམ་པ་དང་། དཔེ་ཆོས་རིན་སྤུངས་སོགས་ཆོས་བཀའ་དུ་མ་དང༌། དཔལ་དུས་ཀྱི་འཁོར་ལོའི་དབང༌། བཅོམ་ལྡན་འདས་རྡོ་རྗེ་འཇིགས་བྱེད་ཀྱི་དབང་བཞི་ཡོངས་སུ་རྫོགས་པ་ཞུ་བར་མཛད། རྗེ་ལྷ་རི་པ་འདིས་རྡོ་རྗེ་ཐེག་པའི་སྒོར་དང་པོར་སྨིན་པར་མཛད་པས་བཀའ་དྲིན་ཟླ་མེད་དུ་འཛིན་པར་མཛད་དོ། །དེ་ནས་ཟླ་བ་བཅུ་པའི་མཇུག་ཏུ་དབེན་སར་ཕེབས། སླར་རི་བོ་དགེ་འཕེལ་དུ་ཆོས་ཀྱི་རྗེ་བློ་གྲོས་རྒྱལ་མཚན་པའི་དྲུང་དུ་གསང་བ་འདུས་པ་མི་བསྐྱོད་པའི་དབང་བཞི། རྩ་རྒྱུད་ཀྱི་ལུང་། རྡོ་རྗེ་མི་འཁྲུགས་པའི་དབང་རྗེས་གནང༌། གཟུངས་ཀྱི་ལུང་དང་བཅས་པ། སྨན་བླའི་རྗེས་གནང་ལུང་དང་བཅས་པ། སྣར་ཐང་བརྒྱ་རྩའི་རྗེས་གནང་ལུང་དང་བཅས་པ་ཡོངས་སུ་རྫོགས་པར་གསན་ནོ། །

                   དེ་ནས་རྒྱལ་བའི་བསྟན་པ་ལ་ཞུགས་ནས་ལམ་ལ་སློབ་པར་འདོད་པ་རྣམས་ལ་ཚེ་འདིའི་རྙེད་བཀུར་སྙན་གྲགས་ཙམ་གྱི་ཕྱིར་དུ་ཐོས་བསམ་བྱེད་པ་ནི་བདུད་རྩི་དུག་ཏུ་བསྒྱུར་བ་ལྟར་ངལ་བ་འབྲས་མེད་དུ་འགྱུར་བ་དང་དལ་བ་སྟོང་ཟད་དུ་བྱེད་དོ་ཞེས་འདོམས་པ་དང༌། ཐོས་བསམ་བྱེ ད་པའི་ཚེ་རང་རྒྱུད་འདུལ་བའི་ཕྱིར་དུ་ཉོན་མོངས་པའི་གཉེན་པོར་དྲི་མ་མེད་པའི་རིགས་ལམ་འཚོལ་བ་ཡིན་གྱི་དེ་ལྟ་མིན་པར་ཤིང་རྟ་ཆེན་པོའི་གཞུང་གི་དགོངས་པ་མི་འཚོལ་བར་ཁོ་འདི་ཟེར་ན་ང་འདི་ཟེར་གྱི་གཤགས་འགྱེད་ཙམ་དང༌། ཚིག་ཟུར་འཆོས་པའི་རྩོད་པ་ལྷུར་ལེན་པ་ནི་སྙིང་པོ་གང་ཡང་མེད་དོ་ཞེས་འདོམས་པ་དང༌། རང་ཉིད་གྲུབ་པའི་གོ་འཕང་མཐོན་པོར་གཤེགས་པའི་ངང་ཚུལ་སྟོན་པ་སོགས་ཀྱི་དགོས་པ་མང་པོ་གཟིགས་ནས་དེའི་དགུན་བཀྲ་ཤིས་ལྷུན་པོར་ཕེབས་ནས་ཐོས་བསམ་གླིང་གི་གདན་ས་པ་འཇམ་པའི་དབྱངས་བློ་བཟང་བཤེས་གཉེན་པའི་དྲུང་དུ་བསྡུས་གྲྭ་རྩི་བ་དང་གཞུང་དང་ཆོས་སྤྱོད་མང་པོའི་ལུང་ཡང་གསན། དེའི་ཚེ་ཐོག་མར་ཉིན་གཅིག་ཙམ་ཞིག་སྦྱོར་བ་རྩི་བ་སོགས་ལ་ཐོགས་པ་མེད་པའི་སྤོབས་པ་མཐུ་ཅན་གྱུར་ཀྱང༌། ཕྱིས་ནི་ཆོས་བརྒྱད་ཀྱི་རོལ་རྩེད་ལ་རྒྱབ་ཀྱིས་ཕྱོགས་པ་སྨྱོན་པ་ལྟ་བུ་བརྟུལ་ཞུགས་ཀྱི་གནས་ནས་གཞན་དག་གིས་ཐོས་བསམ་གྱི་སྦྱོར་བ་ལ་བསྐུལ་བའི་བདག་རྐྱེན་ཉེ་བར་བསྒྲུབས་ཀྱང་དོན་སྐད་ཅིག་ཀྱང་ཉམས་སུ་མི་ལེན་པའི་ཚིག་གི་སྦྱོར་བ་ཁོ་ན་བརྩོན་པ་ལྷུར་ལེན་པ་ལ་སྙིང་པོ་རང་ཅི་ཡོད། ཆུའི་ལྦུ་བ་དང་མཚུངས་པའི་ཚིག་ཕྲེང་དག་ནི་ཉིན་རེ་བཞིན་ཟློས་བུར་སྨྲ་བ་ཁོ་ནའོ། །ཞེས་རིག་པའི་བརྟུལ་ཞུགས་ཀྱི་སེང་གེའི་སྒྲ་ཆེན་པོ་བསྒྲགས།དོན་འདི་ནི། བདག་ཉིད་ཆེན་པོ་རང་ཉིད་ཚེ་རབས་དུ་མར་གོམས་པས་ལུང་གི་ཆོས་ཀྱི་བདག་པོར་གྱུར་པས་སྐུ་ཚེ་འདིར་ཐོས་བསམ་གྱི་སྦྱངས་པ་ལ་མི་ལྟོས་པ་དང༌། ཉམས་ལེན་མེད་པར་ལྟར་སྣང་གི་ཚིག་འཁྲི་ལ་སྙིང་པོར་འདུ་ཤེས་པའི་རྟོག་གེ་བ་རྣམས་སྤ་བཀོང་བར་མཛད་པ་དང་གཅིག་ཏུ་རྒྱལ་བ་དགྱེས་པའི་ལམ་བཟང་བསྒྲུབས་པས་སྙིང་པོའི་བསྟན་པ་ཕྱོགས་མཐར་སྤེལ་བར་མཛད་པ་ལ་དགོངས་པའོ། །དེ་ནས་སླར་ཡང༌། དགེ་འཕེལ་དུ་རྗེ་བློ་གྲོས་རྒྱལ་མཚན་པ་ལ་ཀུན་མཁྱེན་སྟོབས་འབར་འོད་ཟེར་གྱིས་མཛད་པའི་འདུལ་བའི་བསླབ་བྱ། རྗེ་བཙུན་ཙོང་ཁ་པའི་རྣམ་ཐར་སོགས་ཀྱི་ལུང་དུ་མ་གསན། 

                                                                                                                       རྩོམ་སྒྲིག་པ། མང་ར་བ།
            གསལ་འདེབས། 
                   རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                    དྲ་བའི་སྦྲེལ་ཐགhttp://www.tb1025.cn