རྗེ་བཙུན་བླ་མ་དམིགས་པ་མེད་པའི་ཐུགས་རྗེ་ཆེན་པོ་དང་ལྡན་པ་ཐུབ་དབང་རྡོ་རྗེ་འཆང་དང་དབྱེར་མ་མཆིས་པའི་ཞབས་ལ་ཕྱག་འཚལ་ཞིང་སྐྱབས་སུ་མཆིའོ། །བརྩེ་བ་ཆེན་པོས་དུས་ཐམས་ཅད་དུ་རྗེས་སུ་གཟུང་དུ་གསོལ། དཔལ་ལྡན་བླ་མ་བདེ་ཆེན་དངོས་གྲུབ་ཀུན། །ཀུན་ལ་སྦྱིན་མཛད་བློ་བཟང་རྡོ་རྗེ་འཆང༌། །སྐྱབས་གསུམ་ཀུན་འདུས་རྗེ་བཙུན་སྤྲུལ་པའི་སྐུ། །བློ་བཟང་དོན་འགྲུབ་ཞབས་ལ་གསོལ་བ་འདེབས། །ཞེས་བསྔགས་པ་རྒྱལ་བ་དབེན་ས་བ་བློ་བཟང་དོན་གྲུབ་ནི། སྔོན་འདས་པའི་བསྐལ་པ་བརྗོད་ཀྱིས་མི་ལང་བའི་ཡང་བརྗོད་ཀྱིས་མི་ལང་བའི་སྔོན་རོལ་ནས་བྱང་ཆུབ་མཆོག་ཏུ་ཐུགས་བསྐྱེད་དེ་རྒྱལ་སྲས་ཀྱི་སྤྱོད་པ་རྒྱ་མཚོའི་ཕ་རོལ་ཏུ་སོན་པ་ཞིག་མི་མཇེད་འཇིག་རྟེན་གྱི་ཁམས་འདིར་སྟོན་པ་ཐུབ་པའི་དབང་པོའི་མདོ་སྔགས་ཀྱི་བསྟན་པ་སྤེལ་བའི་སླད་དུ་རྒྱ་གར་ཤར་ནུབ་ཁ་ཆེ་བལ་ཡུལ་སོགས་སུ་སྤྲུལ་པའི་བཀོད་པ་སྣ་ཚོགས་བསྟན་ནས་རྒྱལ་བའི་བསྟན་པ་འཛིན་ཅིང་སྤེལ་བར་མཛད། བྱང་ཕྱོགས་གངས་རིའི་ལྗོངས་འདིར་ཡང་སྤྲུལ་པ་སྣ་ཚོགས་བསྟན་ཏེ་གང་དུ་རྒྱལ་བའི་བསྟན་པ་མ་དར་བའི་ས་རྣམས་སུ་ཐུབ་དབང་བསྟན་པའི་སྒྲོན་མེ་གསར་དུ་བཙུགས། ཅུང་ཟད་དར་བའི་ས་རྣམས་སུ་ཉམས་པ་རྣམས་གསོས། ཅུང་ཟད་རྒྱུན་གནས་པ་རྣམས་དར་བར་མཛད་པའི་འཕྲིན་ལས་རྒྱ་ཆེ་རྒྱུན་མི་ཆད་དུ་འཇུག་བཞིན་པ་ལས། དུས་འདིར་འཇམ་མགོན་བླ་མའི་སྙན་བརྒྱུད་ཀྱི་བསྟན་པ་འཛིན་ཅིང་སྤེལ་བའི་སླད་དུ་བསམ་བཞིན་དུ་བྱོན་པ་ཞིག་སྟེ། དེ་ཡང་གཡས་རུ་གཙང་འགྲམ་དགེ་རྒྱས་བྱེ་མ་གླིང་གི་གཙུག་ལག་ཁང་དང་ཉེ་བའི་སའི་ཆ་ལྷ་ཁུད་ཅེས་བྱ་བའི་ཡུལ་གྱི་ཕུ་དབེན་ས་ཞེས་པ་སྔོན་བྱོན་དམ་པ་དུ་མས་བྱིན་གྱིས་བརླབས་པའི་གནས་སུ་མཁས་གྲུབ་ཆེན་པོ་བསོད་ནམས་ཕྱོགས་གླང་སོགས་དམ་པ་དུ་མ་འཁྲུངས་པའི་རྒྱུད་པ། རུས་ཁྱད་པར་ཅན་མདོངས་ཀྱི་རུས། དེ་ལྟ་བུའི་རིགས་རུས་ཆོ་འབྲང་རྒྱུད་པ་མ་སྨད་པའི་རིགས་སུ་ཡབ་བསོད་ནམས་རྡོ་རྗེ་ཞེས་གྲགས་པ་ཡ་རབས་ཀྱི་སྤྱོད་ཚུལ་གྱི་གཟི་བྱིན་དུ་མས་མཛེས་པ་དང༌། ཡུམ་དཔལ་འཛོམ་སྐྱིད་ཅེས་པ་གཟུགས་དང་ལང་ཚོ་ཕུན་ཚོགས་པ་ཞིག་སྟེ་ཡབ་ཡུམ་དེ་གཉིས་ཀྱི་སྲས་སུ་བསམས་བཞིན་དུ་ཁྲོ་བོ་ཞེས་པ་ཤིང་མོ་གླང་གི་ལོ་ཟླ་བ་དང་པོའི་དཀར་ཚེས་བཅུའི་ཉིན་ངོ་མཚར་བའི་ལྟས་དང་བཅས་ཏེ་སྐུ་བལྟམས། བལྟམས་མ་ཐག་ཏུ་མ་གྱུར་སེམས་ཅན་ཐམས་ཅད་སྙི ང་རེ་རྗེ་ཨོ་མ་ཎི་པདྨེ་ཧཱུཾ། ཞེས་ཡི་གེ་དྲུག་པའི་སྒྲ་བསྒྲགས་པས་འཇིག་རྟེན་ཐམས་ཅད་དུ་དབྱངས་ཀྱི་ང་རོས་ཁྱབ་ནས་ལྷའི་དབང་པོ་བརྒྱ་བྱིན་དང་རྒྱལ་པོ་ཆེན་པོ་བཞི་ལ་སོགས་པ་དཀར་ཕྱོགས་སྐྱོང་བའི་ལྷ་དང་སྲུང་མ་ཐམས་ཅད་དགའ་ཞིང་མགུ་ལ་ངོ་མཚར་རྨད་དུ་གྱུར་ཏེ་ད་ནི་འཇིག་རྟེ ན་མགོན་དང་བཅས་སོ། །ཐུབ་པའི་བསྟན་པ་ཉམས་པ་གསོས་པར་འགྱུར་རོ། །བདུད་སྡེ་དཔུང་དང་བཅས་པ་ཉམས་པར་འགྱུར་རོ། །དཀར་ཕྱོགས་ཀྱི་ལྷ་རྣམས་རྒྱལ་ལོ། །ཞེས་དགའ་བའི་ཅ་ཅོའི་སྒྲ་བསྒྲགས་པ་གོང་ནས་གོང་དུ་འོག་མིན་གྱི་བར་དུ་ཁྱབ་པར་བྱས་སོ། །ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་དགྱེས་ནས་རྒྱལ་སྲས་བདག་ཉིད་ཆེན་པོ་འདིའི་དོན་གྲུབ་པར་གྱུར་ཅིག་ཅེས་སྨོན་ལམ་མཛད་ཅིང་མེ་ཏོག་གཏོར་བར་ངེས་སོ། །རྒྱལ་བ་དབེན་ས་བ་ཆེན་པོ་ཡུམ་གྱི་མངལ་ནས་འཁྲུངས་མ་ཐག །རྒྱལ་སྲས་དཔའ་བོའི་ངང་ཚུལ་གསལ་བར་བསྟན་ཏེ་སྙིང་རྗེའི་སྒྲ་དབྱངས་བསྒྲགས་པའི་ཚུལ་འདི་ལ་སྲས་ཀྱི་ཐུ་བོ་མཁས་གྲུབ་སངས་རྒྱས་ཡེ་ཤེས་ཀྱིས་བསྟོད་པ་འདི་ལྟར་མཛད་དེ། བསྐལ་བཟང་ཡུམ་གྱི་ལྷུམས་བཞུགས་བལྟམས་པའི་ཚེ། །འགྲོ་ལ་བརྩེ་བའི་སྙིང་རྗེའི་སྒྲ་དབྱངས་བསྒྲགས། །གྲུབ་པའི་གདུང་མཆོག་འཛིན་པའི་དབེན་ས་བ། །བློ་བཟང་དོན་གྲུབ་ཞབས་ལ་གསོལ་བ་འདེབས། །ཞེས་བསྔགས་སོ། །རྒྱལ་སྲས་བདག་ཉིད་ཆེན་པོ་འདི་དབེན་སར་ཡུམ་གྱི་མངལ་ནས་བཙས་མ་ཐག་ཤངས་མདོ་རི་བོ་དགེ་འཕེལ་གྱི་མཁན་པོ་རྗེ་ལེགས་པའི་བློ་གྲོས་ཀྱིས། ཇི་ལྟར་གཞོན་ནུ་དོན་གྲུབ་ཡུམ་སྒྱུ་འཕྲུལ་མ་ལས་འཁྲུངས་མ་ཐག་ལྷ་རྣམས་ཀྱིས་ཁྲུས་གསོལ་བ་ཇི་ལྟ་བ་རྒྱས་སྲས་གཞོན་ནུ་དེ་ལ་ཁྲུས་གསོལ་ཞིང་ད་ནི་འཇིག་རྟེན་མགོན་དང་སྐྱབས་དང་དཔུང་གཉེན་དང་བཅས་སོ་ཞེས་གོ་བའི་ཆེད་དུ་མཚན་མགོན་པོ་སྐྱབས་ཞེས་བཏགས་སོ། །

                   དེ་འདྲ་བའི་རྒྱལ་སྲས་གཞོན་ནུ་དེ་ནི། དབུ་གདུགས་ལྟ་བུ་དང༌། དཔྲལ་བ་དབྱེ ས་ཆེ་ཞིང་སྨིན་མ་འཛར་ལ་ཤངས་ཀྱི་གཟེངས་མཐོ་བ་དང༌། སྙན་ཤལ་རིང་དུ་འཕྱང་ཞིང་ཡན་ལག་དང་ཉིང་ལག་རྒྱས་ལ་དཀུ་སྐབས་ཕྱེ ད་པ་དང༌། དབང་པོ་ཡོངས་སུ་གསལ་ཞིང་པགས་པའི་མདོག་ནི་མེ་ཏོག་ཀུ་མུ་ད་ལྟར་དཀར་བས་འཇིག་རྟེན་གྱི་སྐྱེ་བོ་གཞན་དང་མི་འདྲ་བའི་མཚན་གྱི་དཔལ་གྱིས་མཛེས་པ་མིག་གི་བདུད་རྩི་ལྟ་བུ་ཞིག་བྱུང་ངོ༌། །དེའི་ཚེ་རྗེ་སྐྱབས་མཆོག་དཔལ་བཟང་དེ་ཉིད་ལྷག་པའི་ལྷ་རྣམས་དང་བླ་མ་རྣམས་ཀྱིས་འཇམ་མགོན་སྙན་བརྒྱུད་ཀྱི་བསྟན་པ་འཛིན་པའི་སྐྱེས་བུ་དམ་པ་ཞིག་དབེན་སར་མྱུར་དུ་འབྱུང་བས་དེ་ལ་མདོ་སྔགས་ཀྱི་ལམ་གྱི་གནད་ཐམས་ཅད་རྫོགས་པར་སྟོན་ཅིག་ཅེས་ལུང་བསྟན་པས་བསྐུལ་ཏེ་དབེན་སའི་དགོན་པ་ཞོལ་དུ་ཕེབས་ནས་ཐམས་ཅད་མཁྱེན་པ་བསོད་ནམས་ཕྱོགས་གླང་གི་གདན་སར་བཞུགས་ཏེ། རིགས་སད་པ་དུ་མ་ལ་དམ་པའི་ཆོས་ཀྱི་བགོ་སྐལ་སྩལ་ཞིང༌། གཙོ་བོར་ཆོས་བརྒྱད་ཀྱི་རོལ་པ་བཙན་ཐབས་སུ་བཅད་ནས་ཟབ་པ་དང་རྒྱ་ཆེ་བའི་ལམ་རྣམས་ལ་རྩེ་གཅིག་ཏུ་སེམས་ཤིང་གོམས་པར་མཛད་པས་གཞལ་དུ་མེད་པའི་མངོན་པར་རྟོགས་པ་ཡང་བརྙེས། རྗེ་སྐྱབས་མཆོག་དཔལ་བ་དབེན་སའི་དགོན་པ་ཞོལ་དུ་ཕེབས་སྐབས་རྒྱལ་བ་དབེན་ས་བ་ཆེན་པོ་འདི་ཉིད་འཁྲུངས་ནས་རིང་པོ་མ་ལོན་པ་སྐུ་ན་ཤིན་ཏུ་ཕྲ་བའི་སྐབས་ཡིན་ཡང་སྔོན་ཡུན་རིང་པོ་ནས་སྨོན་ལམ་གྱིས་མཚམས་སྦྱར་བའི་མཐུ་དང༌། འཇམ་མགོན་བསྟན་སྲུང་རྣམས་ཀྱིས་བསྐུལ་བའི་མཐུས། རྒྱལ་བ་དབེན་ས་བ་རྒྱལ་སྲས་གཞོན་ནུ་གསར་པའི་ཟླ་ཚེས་ལྟ་བུར་གནས་པ་འདིས་རྗེ་སྐྱབས་མཆོག་དཔལ་བའི་མཚན་ཐོས་པ་ཙམ་གྱིས་དད་ཅིང་གུས་པར་གྱུར་ལ། རྗེ་སྐྱབས་མཆོག་དཔལ་བ་ཡང་རྒྱལ་བ་དབེན་ས་བའི་སྐུ་གཟིགས་པ་ཙམ་གྱིས་ཡུན་རིང་མ་འཕྲད་པའི་ཕ་བུ་གསར་དུ་འཕྲད་པ་བཞིན་དུ་དགའ་བ་དང་སྤྲོ་བས་ཤིན་ཏུ་གཅེས་པར་འཛིན་པར་གྱུར་ཏོ། །

                   དེའི་ཚེ་ཐ་མལ་ཆུ་བུར་མིག་ལྡན་རྣམས་ཀྱི་སྣང་ངོར་རྗེ་སྐྱབས་མཆོག་དཔལ་བས་དབེན་སར་འཁྲུངས་པའི་རྒྱལ་སྲས་གཞོན་ནུ་འདི་ལ་ཐུགས་མཉེས་པའི་སྟངས་ཀ་མཛད་པ་ཙམ་ཞིག་ཏུ་སྣང་ཡང༌། ངེས་པ་དོན་ཏུ་ཟུང་འཇུག་གྲུབ་པའི་དཔའ་བོ་རྗེ་སྐྱབས་མཆོག་དཔལ་བ་དང༌། རྒྱལ་སྲས་སྤྲུལ་པའི་གར་མཛད་པ་དབེན་ས་བ་གཉིས་པོ་ཞལ་འཛོམ་སྟེ་དུས་གསུམ་གསལ་བར་གཟིགས་པས་བསྟན་པ་དང་སེམས་ཅན་གྱི་དོན་དུ་ཇི་ལྟར་མཛད་དགོས་པའི་བཀའ་བགྲོ་བ་མཛད་ཅིང༌། མ་འོངས་པ་ན་ཡབ་སྲས་གཉིས་ཀྱིས་མཛད་པ་ཇི་ལྟར་མཛད་པ་མཐའ་དག་གསུང་མོལ་ཞིབ་ཏུ་མཛད་དོ། །དེ་ནས་རྒྱལ་སྲས་གཞོན་ནུ་དེ་ཉིད་སྔོན་ཡུན་རིང་པོ་ནས་རྒྱལ་སྲས་ཀྱི་སྤྱོད་པ་ལ་གོམས་པ་ཀློངས་སུ་གྱུར་པས་བྱིས་པའི་ངང་ཚུལ་མཐའ་དག་ལས་འདས་ཏེ་ཇི་ལྟར་བྱིས་པ་གཞན་དག་སྐྱེས་ཙམ་ཉིད་ནས་མའི་ནུ་ཞོ་ལེན་པ་ལ་གཞན་གྱིས་བསླབ་མི་དགོས་པར་ངང་གིས་འཇུག་པ་ཅི་འདྲ་བ་དེ་འདྲ་བར་རྒྱལ་སྲས་བདག་ཉིད་ཆེན་པོ་འདི་ནི་སྐྱེས་ཙམ་ཉིད་ནས་གཞན་གྱིས་བསླབ་མི་དགོས་པར་ལྷ་དང་བླ་མ་ལ་གསོལ་བ་འདེབས་པ་ལྷུར་བྱེད་ཅིང་འཁོར་བའི་ངང་ཚུལ་གང་དང་གང་ལའང་མཐོང་བ་ཙམ་གྱིས་ཞེན་པ་ལོག་པ་དང༌། སེམས་ཅན་སུ་དང་སུ་མཐོང་ཡང་འགྲོ་བ་ཉམ་ཐག་འདི་ཐབས་གང་ཞིག་གིས་འཁོར་བའི་བཙོན་ནང་ནས་གདོན་པར་བྱ་སྙམ་དུ་སྙིང་རྗེ་ངམ་ཤུགས་ཀྱིས་སྐྱེ་བ་དང༌། ལྷག་པར་ཆོས་ཀྱི་རྒྱལ་པོ་ཙོང་ཁ་པ་ཆེན་པོ་ཉིད་ལ་གསོལ་བ་འདེབས་ཤིང་རྒྱལ་བ་ཙོང་ཁ་པའིབསྟན་པའི་སྙིང་པོ་ཡོངས་སུ་རྫོགས་པ་འཛིན་ཅིང་སྤེལ་ནུས་པ་དུས་ནམ་ཞིག་ན་འོང་སྙམ་པ་འབའ་ཞིག་ཐུགས་ལ་བརྣགས་ཏེ་ཡུལ་དེའི་ཤར་ཕྱོགས་ན་ཕུག་གཞན་གྱིས་རྙེད་དཀའ་བ་ཞིག་ཡོད་པས་ཕུག་དེར་བདག་ཉིད་གཅིག་པུར་ཞག་ལྔ་དྲུག་ཙམ་རེ་བསྡད་པས་ཡང་ཡང་འཚོལ་དགོས་པ་ཞིག་ཡོད་གསུང༌། གཅིག་པུ་དབེན་པ་ལ་མངོན་པར་དགྱེས་པ་ཞིག་དེ་འདྲ་བའི་གཞོན་ནུ་ཉིད་ནས་རང་འཁྲུངས་སུ་ཡོད་ཅིང༌། དེ་དུས་ནས་སྟོན་པ་ཐུབ་པའི་དབང་པོ་དང་རྒྱལ་བ་ཙོང་ཁ་པ་ལ་གསོལ་འདེབས་ཉིན་མཚན་ཁོར་ཡུག་ཏུ་ཤུགས་དྲག་ཏུ་མཛད་པ་ན་བཅོམ་ལྡན་འདས་ཐུབ་པའི་དབང་པོ་དང་རྒྱལ་བ་བློ་བཟང་གྲགས་པ་གཉིས་ཀྱི་ཞལ་གཟིགས་ཤིང་བྱིན་གྱིས་བརླབས་པའི་སྣང་བས་དུས་འདའ་བ་ཞིག་བྱུང་ངོ༌། །

                                                                                                                                  རྩོམ་སྒྲིག་པ། མང་ར་བ།
            གསལ་འདེབས། 
                   རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                    དྲ་བའི་སྦྲེལ་ཐགhttp://www.tb1025.cn