སློབ་མའི་ཚོགས་ཇི་ལྟར་བྱོན་པའི་ཚུལ་སོགས། དེ་ལྟར་རྗེ་རིན་པོ་ཆེས་སངས་རྒྱས་འཇིག་རྟེན་དུ་སླར་བྱོན་པ་ལྟར་མདོ་སྔགས་ཀྱི་བསྟན་པ་ཡོངས་སུ་རྫོགས་པ་རྒྱ་ཆེར་སྤེལ་བར་མཛད་པས་རྒྱུད་འཛིན་གྱི་སློབ་མ་ཕྱོགས་ཀྱི་ཐ་གྲུ་ཀུན་ཏུ་བཞུགས་པས་མཐའ་དག་བརྗོད་པར་སུ་ཞིག་གིས་ནུས།བསིལ་ལྡན་གྱི་ལྗོངས་འདིར་བསྟན་པ་འཛིན་སྐྱོང་སྤེལ་གསུམ་མཛད་པའི་བསྟན་འཛིན་ཆེན་པོ་ཇི་སྙེད་བྱོན་པ་དག་ཀྱང་བགྲང་བར་མི་ནུས་ལ། སྔོན་གྱི་མཁས་པ་དག་གིས་གཙོ་བོ་དག་ལས་ཕྱོགས་ཙམ་རེ་བརྗོད་པ་ལའང་མང་དུ་མཆིས་ཤིང༌། བརྗོད་ཚུལ་ཡང་མི་འདྲ་བ་མང་དུ་སྣང་སྟེ། མཁས་གྲུབ་ནོར་བཟང་རྒྱ་མཚོས་ནི་རྗེའི་ཐུགས་སྲས་བསམ་གྱིས་མི་ཁྱབ་པ་བྱུང་བ་རྣམས་ཀྱི་ནང་ནས་ཁྱད་པར་དུ་འཕགས་པ་འགའ་ཞིག་བརྗོད་པ་ནི། གཙང་ནས་རྒྱལ་ཚབ་དར་མ་རིན་ཆེན་སོགས་དགུ། དབུས་ནས་འདུལ་འཛིན་གྲགས་པ་རྒྱལ་མཚན་སོགས་བཅུ་གསུམ། ཁམས་ནས་ཚ་ཁོ་མཁན་ཆེན་ངག་དབང་གྲགས་པ་སོགས་ལྔ། མངའ་རིས་ནས་བྱང་སེམས་ཤེས་རབ་བཟང་པོ་སོགས་ལྔ་རྣམས་གཙོ་བོར་མཛད་དེ། དེ་དག་གི་མཚན་རྣམས་ནི་མཁས་གྲུབ་ནོར་བཟང་རྒྱ་མཚོ་ཉིད་ཀྱིས་མཛད་པའི་རྗེའི་བུ་སློབ་བྱུང་ཚུལ་དུ་གསལ་ལོ། །རྗེ་རིན་པོ་ཆེ་ལ་མི་ཕྱེད་པའི་དད་པ་ཅན་བཟང་བཟང་ནེ་རིང་པ་འཆི་མེད་རབ་རྒྱས་ཀྱིས་ནི་རྗེའི་ཐུགས་སྲས་གཙོ་བོ་རྣམས་བསྡུས་པའི་སྡོམས་འདི་ལྟར་མཛད་དེ། ལུང་བསྟན་རྣམ་དག་ཡོད་པའི་བུ་ཆེན་ཐུགས་སྲས་བདུན། སྔོན་དུས་བྱ་བྲལ་མཛད་དུས་ཀྱི་ཕྱག་ཕྱི་བ་བློས་བཏང་བརྒྱད། སྐུ་བསྙུན་དུས་བསྙུན་གཡོག་དང༌། སྐུ་རིམ་རྐང་ཚུགས་མཛད་པའི་བུ་ཆེན་བདུན།གདན་སའི་ལུགས་གཉིས་སྤེལ་བའི་བུ་ཆེན་མཁས་གྲུབ་བརྒྱད། ཡི་གེས་ཐུགས་ཟིན་པའི་བུ་ཆེན་གསུམ། འཕྲིན་ལས་རྩོད་པ་མེད་པའི་བུ་ཆེན་གསུམ། སྒྲུབ་པ་གཙོ་བོར་མཛད་པའི་བུ་ཆེན་རྟོགས་ལྡན་གྱི་མཚན་ཅན་བཞི་དང༌། རི་སྒྲུབ་གཉིས།གཞུང་ལུགས་རབ་འབྱམས་མཁྱེན་པའི་མཁས་མཆོག་གཉིས། སྟོད་སྨད་ཀྱི་ཤེས་རབ་བཟང་པོ་རྣམ་གཉིས། བྱང་སེམས་རྣམ་གཉིས། སེམས་དཔའ་རྣམ་གཉིས། གྲགས་པ་རྣམ་གཉིས། བཀའ་བབ་ཀྱི་བུ་ཆེན་དྲུག སྡེ་དཔོན་གྲུབ་ཐོབ་ཀྱི་བུ་ཆེན་རྩོད་མེད་གསུམ། རིགས་རུས་ཁུངས་བཙུན་གྱི་མཁས་གྲུབ་རྣམ་པ་གསུམ། རྒྱལ་ཚབ་བསྟན་འཛིན་གྱི་བུ་ཆེན་རིན་པོ་ཆེ་རྣམ་གསུམ། སྡེ་དཔོན་ཐུགས་གྲོལ་གྱི་མཁས་པ་གཅིག །བྱ་བཏང་སྦས་པའི་གྲུབ་ཐོབ་གཅིག །མཁས་མཆོག་ཡོངས་གྲགས་ཀྱི་ཆོས་རྗེ་གཉིས། བྱ་བཏང་ཡོངས་གྲགས་ཀྱི་གྲུབ་ཐོབ་གཅིག་ཅེས་སྡེ་ཚན་ཚོམས་སུ་བགྲངས་སོ། །

                    དེ་དག་སོ་སོའི་མཚན་དང༌། ངོས་འཛིན་ནི་ཁོང་པས་མཛད་པའི་རྗེའི་རྣམ་ཐར་གསེར་གྱི་མཆོད་སྡོང་དུ་གསལ་ལོ། །པཎ་ཆེན་བསོད་ནམས་གྲགས་པས་མཛད་པའི་ཆོས་འབྱུང་ཡིད་ཀྱི་མཛེས་རྒྱན་དུ་རྗེ་རིན་པོ་ཆེའི་སློབ་མ་གཙོ་བོ་དག་སྡེ་ཚན་སྡེ་ཚན་དུ་བྱས་ནས་ཚོམས་སུ་བསྡུས་པ་ནི། བླ་མ་ཆོས་འབྲེལ་གསན་པ་གསུམ། བྱ་བྲལ་ལ་མ་ཕེབས་གོང་གི་སློབ་མ་ལྔ་ཚར་བཞི། བྱ་བྲལ་ལ་ཐེགས་དུས་ཀྱི་འཁོར་དག་པ་རྣམ་བརྒྱད། སྲས་ཀྱི་ཐུ་བོ་གཉིས། གཉིས་པོ་དེའི་སྟེང་དུ་འཇམ་དཀར་བ་བསྣན་ཏེ་གསང་བདག་གིས་ལུང་བསྟན་པའི་འཁོར་ཁྱད་འཕགས་གསུམ། ནང་ཐུགས་ཀྱི་སྲས་གཅིག འཕྲིན་ལས་ནམ་མཁའ་དང་མཉམ་པའི་བུ་ཆེན་བཞི། དབུས་གཙང་བསྟན་པའི་སྒྲོན་མེ་བཅུ། གཞན་དོན་ལྷུན་གྱིས་གྲུབ་པའི་སེམས་དཔའ་དྲུག མི་དབང་གཙུག་ན་མཛེས་པའི་ཏི་ཤྲཱི་གཉིས།རྒྱ་ཆེན་མང་དུ་ཐོས་པའི་དབོན་སྲས་གཉིས། སྦྱངས་པའི་ཡོན་ཏན་འཛིན་པའི་ཅོག་པུ་བ་ཆེ་ཆུང་གཉིས། རྣམ་དཔྱོད་ཕུལ་དུ་བྱུང་བའི་མཁས་པ་གཉིས། བསྟན་པ་ཕྱོགས་མཐར་སྐྱོང་བའི་དར་ཆེན་དྲུག སྐད་གཉིས་སྨྲ་བའི་ལོ་ཙཱ་བ་གཉིས། ས་སྐྱོང་ཆོས་རྗེ་དྲུག གསུང་རབ་མང་དུ་མཁྱེན་པའི་བསྟན་འཛིན་བརྒྱད། མདོ་རོང་གི་མཁས་པ་བཞི། མཁའ་སྤྱོད་གྲུབ་པའི་གདུང་རྒྱུད་གཉིས། ཡ་མཚན་ཅན་གྱི་སྐྱེས་བུ་གཉིས། སྐྱེ་དགུའི་གཙུག་རྒྱན་སྤྱན་སྔ་བརྒྱད། ཁྲི་སྟེང་མཛེས་པའི་བླ་ཆེན་བཞི། ཚོགས་པ་སྐྱོང་བའི་མཁན་པོ་བཞི། སྡེ་དགོན་ཕྲ་མོའི་ཆེན་པོ་ལྔ། དབང་བཞི་སྐུར་བའི་ཆོས་བསྒོ་བ་གཉིས། ལུང་རིགས་སྨྲ་བའི་དཀའ་བཅུ་བ་བཞི། ཚིག་དོན་སྨྲ་བའི་དཀའ་བཞི་བ་བཅུ། བརྟུལ་ཞུགས་འཛིན་པའི་ཇོ་སྟན་བཞི། ཚུལ་ཁྲིམས་རྣམ་པར་དག་པའི་གནས་བརྟན་དྲུག །ཚེ་བློས་བཏང་གི་རྟོགས་ལྡན་ལྔ། ལྷ་གཟིགས་གྲགས་པ་རྒྱ་མཚོ་སོགས་བསྟན་འཛིན་བཅོ་ལྔ་རྣམས་སྡེ་ཚན་དུ་བྱས་ཏེ་བགྲངས་སོ། །འདི་དག་གི་མཚན་དང་ངོས་འཛིན་རྣམས་ཆོས་འབྱུང་དེ་ཉིད་དུ་གསལ་ལོ། །འདིར་ནི་ཐམས་ཅད་བརྗོད་པར་མི་ནུས་ཀྱི་སྲས་ཀྱི་ཐུ་བོ་གཉིས་སོགས་ཡོངས་སུ་གྲགས་པ་འགའ་ཞིག་གི་རྣམ་ཐར་བརྗོད་པར་བྱའོ།། །།

                                                                                                                                        རྩོམ་སྒྲིག་པ། མང་ར་བ།
            གསལ་འདེབས། 
                   རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                    དྲ་བའི་སྦྲེལ་ཐགhttp://www.tb1025.cn