དེ་ནས་ལྷ་སར་ཕྱགས་བཏེག ཇོ་བོ་རིན་པོ་ཆེའི་དྲུང་དུ་བྱོན་ཏེ་ཕྱག་དང་མཆོད་པ་དང་སྨོན་ལམ་རྣམ་པར་དག་པ་རྒྱ་ཆེར་མཛད་ནས་ད་དུང་ཡང་བསྟན་པ་རིན་པོ་ཆེ་ཡུན་རིང་དུ་གནས་པའི་གསོལ་འདེབས་ཤུགས་དྲག་མཛད། དེ་ནས་བྱམས་ཆེན་ཆོས་རྗེ་ཤཱཀྱ་ཡེ་ཤེས་པས་སྤྱན་དྲངས་ཏེ་སེ་ར་ཆོས་སྡིངས་སུ་བྱོན། བྱམས་ཆེན་ཆོས་རྗེ་དཔོན་སློབ་རྣམས་ཀྱིས་བསྙེན་བཀུར་དང་མཆོད་པ་ཚད་མེད་པས་མཆོད། བྱམས་ཆེན་ཆོས་རྗེ་ལ་སེ་རར་ཤིང་རྟ་ཆེན་པོའི་གཞུང་ལུགས་རྣམས་ལ་འཆད་ཉན་གྱི་བསྟན་པ་རྒྱ་ཆེར་སྤེལ་དགོས་པའི་ཞལ་ཏ་མང་དུ་གནང་ཞིང༌། ཁྱད་པར་གངས་རིའི་ཁྲོད་འདིར་སྔགས་ཀྱི་རྒྱུད་སྡེ་ལ་འཆད་ཉན་རྣམ་པར་དག་པ་ཡོང་ཡེ་རྣམ་པ་ཐམས་ཅད་དུ་ནུབ་པར་གྱུར་ནས་རིང་ཞིག་ལོན། རྗེ་རང་ཉིད་ཀྱིས་བཤད་པ་རྣམ་པར་དག་པ་མཛད་པའི་གསུང་གི་བདུད་རྩི་ཉམས་སུ་མྱོང་བས་བློ་གྲོས་ཀྱི་ལུས་ཡོངས་སུ་ཚིམ་པ་མང་དུ་བྱོན་མོད་ཀྱི། དེ་ལྟ་ནའང་ད་དུང་རྒྱུད་སྡེའི་འཆད་ཉན་རྐང་ཚུགས་པའི་གྲྭ་ས་ཐིངས་པ་སྔོན་ཆད་མེད་པས། དེ་འདྲ་བའི་འཆད་ཉན་གྱི་གཞི་རྣམ་པར་དག་པ་ཚུགས་ན་ཅི་མ་རུང་སྙམ་དུ་བསྟན་པ་འབའ་ཞིག་ལ་དགོངས་པའི་ཐུགས་ཀྱི་འདུན་པ་ཤུགས་དྲག་པོས་བྱམས་ཆེན་ཆོས་རྗེ་སེ་ར་ཆོས་སྡིངས་སུ་གཞི་འདུལ་བའི་བསླབ་ཁྲིམས་རྣམ་པར་དག་པ་ལ་གནས་ནས་དཔལ་གསང་བ་འདུས་པ་དང་བདེ་མཆོག་གཉིས་ཀྱི་བཤད་སྒྲུབ་རྐང་ཚུགས་པའི་རྒྱུད་གྲྭ་ཞིག་འཛུགས་དགོས་པའི་ཞལ་ཏ་གནང་སྟེ་སེ་ར་ཆོས་སྡིངས་སུ་ཆོས་རྗེ་བས་ཐུགས་ཁུར་ཆེས་ཆེར་བཞེས་ནས།གཞི་འདུལ་བའི་བསླབ་ཁྲིམས་རྣམ་པར་དག་པ་ལ་བརྟེན་ཏེ།དཔལ་གསང་བ་འདུས་པ་དང་བདེ་མཆོག་གི་རྩ་རྒྱུད་ལ་འཆད་ཉན་རྐང་ཚུགས་པའི་གྲྭ་ས་རྣམ་པར་དག་པ་འཛུགས་པའི་ཞལ་བཀོད་དང་ཆོས་དཔོན་བསྐོ་བ་ལ་སོགས་པ་མཛད་ཅིང༌།རྟེན་འབྲེལ་ཁྱད་པར་ཅན་བསྒྲིག་པའི་ཆེད་དུ་གནས་དེར་གསོ་སྦྱོང་མཛད།རྒྱུད་ཀྱི་རྒྱལ་པོ་གཉིས་ཀྱི་དབུ་ནས་ཆོས་ཐུན་རེ་གསུངས་སོ། །

                    དེ་ནས་རིམ་གྱིས་ཡར་ལམ་བདེ་ཆེན་རྩེར་ཕྱགས་ཕེབས། དེར་ཡང་བྲག་དཀར་རྫོང་དཔོན་པོ་ཡབ་ཡུམ་ལ་དཔལ་གསང་བ་འདུས་པ་དང་འཁོར་ལོ་བདེ་མཆོག་གཉིས་ཀྱི་བཤད་གྲྭ་རྣམ་པར་དག་པ་ཚུགས་པའི་གྲྭ་ཚང་ཞིག་འཛུགས་དགོས་པའི་ཞལ་ཏ་བྱོན་ཞིང༌། ཁོང་པས་ཀྱང་དད་པ་ཆེན་པོས་དགའ་སྤྲོ་དང་བཅས་ཏེ་བཀའི་ཁུར་སྤྱི་བོས་མནོས་ནས་བདེ་ཆེན་རྩེར་དཔལ་གསང་བ་འདུས་པ་དང་འཁོར་ལོ་སྡོམ་པ་གཉིས་ཀྱི་འཆད་ཉན་རྣམ་པར་དག་པ་རྐང་ཚུགས་པ་གཞི་འདུལ་བའི་བསླབ་ཁྲིམས་ཕྱག་སྲོལ་མ་ཉམས་པ་ལ་བརྟེན་པའི་གྲྭ་ས་བཙུགས། རྗེ་རང་ཉིད་ཀྱིས་ཀྱང་མཐུན་རྐྱེན་བགྱིས་ནས་གཞི་འཛུགས་པ་སོགས་ཀྱི་རྐྱེན་དུ་བབ་པའི་ཡོ་བྱད་དཔག་ཏུ་མེད་པའི་གནང་སྦྱིན་མཛད་ཅིང་རྫོང་དཔོན་པས་བདག་རྐྱེན་ཕུན་སུམ་ཚོགས་པའི་ཐུགས་ཁུར་བཞེས་སོ། །དེ་ནས་གནད་དེ་ཉིད་ལ་རབ་ཏུ་གནས་པ་ཞུས་པས། ད་ལན་མིན་པ་རབ་གནས་བྱེད་པ་མི་འོང་བས་ད་ལན་རྒྱས་པ་ཞིག་བྱེད་དགོས་གསུངས་ནས་རབ་ཏུ་གནས་པ་རྒྱས་པར་མཛད་དེ། གནས་དེ་ཉིད་ཀྱི་གཙུག་ལག་ཁང་དེ་ལ་གསང་སྔགས་མཁར་ཞེས་བྱ་བར་མིང་དུ་གདགས་པའང་མཛད་དོ། །དེ་ནས་བྲག་དཀར་དུ་བྱོན།དེ་ནས་གྲུ་བཞིར་གདན་འདྲེན་ཞུས་ནས་བྱོན་ཏེ། དེ་ཡང་འབྲས་སྤུངས་ནས་ཕྱགས་བཏེག་ནས་དགའ་ལྡན་དུ་མ་ཕེབས་ཀྱི་རིང་ལ་གང་དུ་སྤྱན་དྲངས་པ་ཐམས་ཅད་དུ་ད་ཡང་ཡང་འོང་བ་མི་འོང་བས་ད་ལན་འགྲོ་དགོས་གསུངས་ནས་ཞལ་གྱིས་བཞེས་པར་མཛད་དོ། །

                    གྲུ་བཞིར་ཕེབས་པའི་ནུབ་གཎྜི་བརྡུངས་པའི་སྒྲ་ཆེན་པོ་གྲག་པས་ཐམས་ཅད་ཐེ་ཚོམ་དུ་གྱུར་ནས་བརྟགས་ཀྱང༌། མི་ཞིག་གིས་བརྡུངས་པ་མ་ཡིན་པར་ངེས་པ་ཙམ་དུ་ཟད་ཀྱི། གཞན་དུ་ན་རྡུང་བར་བྱེད་པ་སུ་ཞིག་གིས་གནས་གང་དུ་བརྡུངས་པ་སོགས་གང་དུའང་བརྟག་པར་མི་ནུས་པར་ཡུན་རིང་དུ་སྒྲ་ཤིན་ཏུ་གྲག་ཅིང་གསུང་མཐོ་བ་རྡུང་བར་བྱེད་པ་ཞིག་བྱུང་ངོ༌། །གཞན་ཡང་འབྲས་སྤུངས་ནས་ཡར་ལ་ཕྱགས་མ་བཏེག་པའི་གོང་ཙམ་གྱི་སྐབས་སུའང༌།ས་ཆེན་པོ་གློ་བུར་ཉིད་དུ་གཡོ་བ་དང༌། ནམ་མཁའི་དབྱིངས་མཐའ་མི་མངོན་པའི་ལམ་རིང་པོ་ནས་འོངས་པའི་འཇའ་ཚོན་རྣམ་པར་བཀྲ་བ་མཐའ་ཡས་པ་རི་བོ་དགའ་ལྡན་གྱི་རྩེ་ལ་ཡང་དང་ཡང་དུ་ཟུག་པ་བྱུང་སྟེ། དེ་ནི་རྗེ་རིན་པོ་ཆེ་འདི་ཉིད་འོད་གསལ་ཆོས་སྐུ་མངོན་དུ་མཛད་ནས་གཟུགས་ཀྱི་སྐུར་བཞེང་བ་དང་མཉམ་དུ་ཕྱོགས་བཅུའི་ཞིང་རབ་འབྱམས་ཐམས་ཅད་དུ་སྤྲུལ་བ་འགྱེད་པར་མཛད་པས། ཕྱོགས་བཅུའི་སངས་རྒྱས་ཀྱི་ཞིང་དག་ནས་མཆོད་རྫས་སྣ་ཚོགས་ཐོགས་པའི་ལྷ་བགྲང་བ་ལས་འདས་པས་བསུ་བ་བྱས་པ་ཡིན་པར་གདོན་མི་ཟ་སྟེ། དཔལ་འཁོར་ལོ་སྡོམ་པའི་རྩ་རྒྱུད་ལས། འཁོར་ལོ་སྡོམ་པའི་རྣལ་འབྱོར་པ་དམ་ཚིག་དང་སྡོམ་པ་ཚུལ་བཞིན་དུ་བསྲུང་བ་དག་འཆི་བའི་དུས་བྱེད་པ་ན་དཔའ་བོ་དང་དཔའ་མོ་བགྲང་བ་ལས་འདས་པས་མཆོད་པའི་བྱེ་བྲག་སྣ་ཚོགས་པ་ཐོགས་ཏེ་མཁའ་སྤྱོད་དུ་འཁྲིད་པར་གསུངས་ནས། རྗེ་བདག་ཉིད་ཆེན་པོ་འདི་ལྟ་བུ་འོད་གསལ་ཆོས་སྐུ་མངོན་དུ་མཛད་ནས་ཟུང་འཇུག་གི་སྐུར་བཞེངས་པ་ལ་ཕྱོགས་བཅུའི་དཔའ་བོ་དང་དཔའ་མོ་ཐམས་ཅད་ཀྱིས་མཆོད་པ་བྱེད་པ་དང༌། ཞིང་གང་དང་གང་དུ་བྱོན་པ་དེ་དང་དེར་མཆོད་པའི་བྱེ་བྲག་སྣ་ཚོགས་ཐོགས་པས་བསུ་བ་བྱེད་པ་ལྟ་ཅི་སྨོས་སོ། །

                    ཞིང་འདིའི་གདུལ་བྱ་རྫོགས་ཏེ་འཇམ་དཔལ་སྙིང་པོའི་དྲུང་དུ་གཤེགས་པའི་སྐོར་སོགས། དེ་ནས་གྲུ་བཞི་ནས་ཕྱགས་བཏེག་ནས་དགའ་ལྡན་དུ་ཕེབས་པ་ན་ཐོག་མར་ཡངས་པ་ཅན་གྱི་གཙུག་ལག་ཁང་ཆེན་པོར་བྱོན་ཏེ་འདིར་ད་ཡང་ཡང་འོང་བ་མི་འོང་བས་མཆོད་གཏོར་རྒྱ་ཆེར་ཤོམས་གསུངས་ནས་སྟོན་པའི་སྐུ་དང༌། གཞལ་ཡས་ཁང་རྣམས་དང༌། ཡི་དམ་གྱི་དྲུང་དུ་མཆོད་པ་དང་གཏོར་མ་རྒྱ་ཆེར་མཛད་དེ་གསོལ་བ་གདབ་པ་དང་སྨོན་ལམ་གྱི་རིམ་པ་ལ་སོགས་པ་མང་དུ་མཛད། དེ་ནས་འདུ་ཁང་དུ་དགེ་འདུན་གྱི་མང་ཇ་འདྲེན་པ་ཞིག་གིས་གདན་དྲངས་པས་ཚོགས་ཀྱི་དབུས་སུ་ཕེབས་ཏེ་སྦྱིན་བདག་སོགས་ཀྱི་ཆེད་དུ་ཞུ་བ་སུའང་མེད་པར་བདེ་བ་ཅན་གྱི་སྨོན་ལམ་རྒྱས་པར་དགེ་འདུན་ཚོགས་པ་རྒྱ་མཚོའི་དབུས་སུ་ཤིས་བརྗོད་དང་བཅས་པ་མཛད་དེ། ཕྱི་རབས་ཀྱི་གདུལ་བྱ་རྣམས་ལ་རྗེ་ཉིད་ཀྱིས་ཇི་ལྟར་གསུངས་པའི་མདོ་སྔགས་ཡོངས་སུ་རྫོགས་པའི་ལམ་སྲོལ་བཟང་པོ་འདི་ཉིད་མི་ཉམས་ཤིང་གོང་ནས་གོང་དུ་འཕེལ་བའི་རྟེན་འབྲེལ་བསྒྲིག་པའི་ཕྱིར་འདུས་པ་རྒྱ་མཚོའི་དབུས་སུ་བྱོན་ནས་ཐུགས་སྨོན་དང་བཀྲ་ཤིས་དེ་ལྟར་མཛད་དོ། །

                    དེ་ནས་གཟིམ་ཁང་དུ་ཕེབས་ཏེ་བཞུགས་གདན་ལ་བཞུགས་པ་ན། ད་ནི་རང་རེའི་དགོན་པ་རང་དབང་ཐོབ་པ་འདིར་སླེབ་བྱུང་བས་བློ་བདེའོ། །ཞེས་བཀའ་སྩལ།དེའི་ཉིན་མོ་འདས་པའི་མཚན་མོའི་གུང་ཐུན་ལ་བབ་པ་ཙམ་ནས་སྐུ་ཁམས་ཅུང་ཞིག་བསྙེལ་བའི་ཚུལ་བསྟན་ཏེ། དེའི་སང་ཉིན་ནས་དགེ་འདུན་ཐམས་ཅད་ཀྱིས་ཀྱང་སྐུ་རིམ་ལ་འབད་པ་འདོན་པར་མཛད། དེ་ལྟ་ནའང་སང་གི་ཉི་ཕྱེད་ཙམ་བར་དུ་སྐུ་ལུས་ཀྱི་ཆ་སོ་སོ་ལ་བསྙུན་ཟུག་ཏུ་མངོན་པར་ཅུང་ཟད་ཡོད་གསུངས་པ་མ་གཏོགས་དེ་ནས་བསྙུན་ཟུག་ཀྱང་ཆེན་པོ་མེད་པར་ཅུང་ཟད་ཐུགས་ཉོག་པར་གསལ་ཙམ་གྱི་བར་ལ་ཉིན་ཞག་གཉིས་ཀྱི་རིང་དུ་སྐུ་རིམ་བསྒྲུབས། དེའི་ཚེ་སྲས་ཀྱི་ཐུ་བོ་རྗེ་དར་མ་རིན་ཆེན་ལ་བསྟན་པའི་བྱ་བ་མཛད་ཚུལ་འདི་ལྟར་དགོས་བྱ་བ་ལ་སོགས་པའི་ཞལ་ཏ་ཞིབ་པར་སྔ་མོ་ནས་གནང་ཚར་བས་དེའི་ཚེ་རྒྱས་པར་མ་གསུངས་ཤིང༌། དབུ་ཞྭ་སྣེ་རིང་དང་གོས་བེར་ཞིག་གནང་སྟེ་དོན་གྱིས་རྒྱལ་ཚབ་ཏུ་བསྐོ་བར་མཛད། གནས་བརྟན་རིན་ཆེན་རྒྱལ་མཚན་པ་ལ་སོགས་པ་སྐུ་དྲུང་ན་འཁོད་པ་ལ། ཚུལ་འདི་ཤེས་པར་གྱིས་ལ་བྱང་ཆུབ་ཀྱི་སེམས་སྒོམས་ཤིག་ཅེས་སོགས་ཙམ་གསུངས། གཞན་སྐུ་ཁམས་ཅུང་ཟད་བསྙེལ་བའི་ཚུལ་བསྟན་པའི་རིང་ལའང་སྔར་གྱི་ཐུན་བཞིའི་རྣལ་འབྱོར་དང་བདག་འཇུག་ལ་སོགས་པའི་ཐུགས་དམ་གྱི་རིམ་པ་རྣམས་འཆག་མེད་དུ་མཛད་པ་དང༌།གཞན་ཡང་གཙོ་བོར་ནང་གི་ཏིང་ངེ་འཛིན་ལ་མཆོག་ཏུ་གཞོལ་བའི་ཐུགས་དམ་ལ་ཁོར་ཡུག་ཏུ་བཞུགས་པར་གྱུར་ཏོ། །

                                                                                                                                           རྩོམ་སྒྲིག་པ། མང་ར་བ།
            གསལ་འདེབས། 
                   རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                    དྲ་བའི་སྦྲེལ་ཐགhttp://www.tb1025.cn