རྗེ་རིན་པོ་ཆེའི་གསུང་ལ་ཐུགས་སྲས་མཁས་གྲུབ་ཆེན་པོ་རྣམས་ཀྱིས་ཟིན་བྲིས་སུ་བྱས་པའི་མདོ་སྔགས་ཀྱི་ལེགས་བཤད་མང་དུ་བཞུགས་པ་ནི་ཡོངས་སུ་གྲགས་པ་ལྟར་རོ། །འདི་ལྟ་བུའི་མདོ་སྔགས་ཀྱི་བསྟན་བཅོས་རྒྱ་ཆེན་པོ་འདི་སྙེད་ཅིག་མཛད་པ་འདི་དག་ཐམས་ཅད་རྒྱལ་བ་རང་ཉིད་ཀྱི་གསུང་དང༌། ཤིང་རྟ་ཆེན་པོ་གཉིས་ཀྱི་གཞུང་ཇི་ལྟ་བ་བཞིན་དུ་ཐེག་པ་གོང་འོག་དང་རྒྱུད་སྡེ་གོང་འོག་གྲུབ་མཐའ་རྣམ་བཞི་གང་གི་ཐད་ལའང་རང་རང་གི་ལུགས་མ་འདྲེས་པར་སྟོན་པ་ལས། ཕན་ཚུན་འདྲེས་པའི་སྐྱོན་ཕྲ་མོའང་མེད་ཅིང༌། སྔ་ཕྱི་འགལ་བ་རང་རང་ཚིག་འགལ་བ་དང་ཟློས་བུར་སྨྲ་བ་སོགས་ཀྱི་སྐྱོན་ཡང་རྣམ་པ་ཀུན་ནས་མེད་པར་དྲི་མ་མེད་པའི་རིགས་ལམ་སྦྱངས་པའི་མཁས་པ་རྣམས་ཀྱིས་གཟུ་བོར་བློས་ཇི་ཙམ་དཔྱད་ཀྱང་འདིའི་ཐད་ནས་ནོར་རོ་ཞེས་ཚིག་གཅིག་ལའང་སྐྱོན་གདགས་སུ་མེད་པ་དང༌། ཐ་སྙད་ཀྱི་གཙུག་ལག་དག་དང་ཡང་མི་འགལ་བར་སྔོན་ཆོས་རྒྱལ་སྲོང་བཙན་སྒམ་པོའི་དུས་ཆོས་རྒྱལ་ཐུགས་རྗེ་ཅན་གྱི་བཀའ་ལྟར་འཇམ་དབྱངས་ཀྱི་སྤྲུལ་པ་ཐོན་མིས་ཡི་གེའི་བརྡ་ཆད་འདི་ལྟར་བྱ་དགོས་སོ་ཞེས་བོད་ཁམས་ཡོངས་ལ་གདམས་པའི་བསྟན་བཅོས་སུམ་ཅུ་པ་དང་རྟགས་འཇུག་ནས་ཇི་ལྟར་བཤད་པ་ལྟར་དོན་སོ་སོ་ལ་ཡི་གེའི་སྔོན་འཇུག་སོགས་ཐོབ་ཇི་ལྟར་དགོས་པ་རྣམས་ཅུང་ཟད་ཀྱང་མ་འཕྱུགས་པ་དང༌། སྔོན་གྱི་ཆོས་རྒྱལ་ལོ་པཎ་རྣམས་ཀྱིས་བཀའ་བཅད་མཛད་པ་ལྟར་གྱི་ཆོས་ཀྱི་བརྡ་ཆད་ཁོ་ན་ལས་ཡུལ་མི་རང་བཞིན་པའི་ཕལ་སྐད་དང༌། རང་རང་གི་ཡུལ་ཕྱོགས་ཀྱི་སྐད་སོགས་ཀྱི་སྐྱོན་ཕྲ་མོ་ཡང་མ་འདྲེས་པར་དོན་བཟང་བ།ཚིག་འབྲུ་བཟང་བ། མ་འདྲེས་པ། མ་བསྔགས་པ། ཡོངས་སུ་རྫོགས་པ། གདུལ་བྱའི་རྒྱུད་དང་འཚམ་པ། སུས་བལྟས་ཀྱང་ཕན་ཐོགས་པ་སོགས་རྒྱལ་བས་ཆོས་ཀྱི་བསྔགས་པ་ཇི་ལྟར་མཛད་པ་དང་རྣམ་པ་ཀུན་ནས་མཐུན་པ་ཤ་སྟག་ཏུ་ཡོད་དོ། །

                    ཚུལ་འདིས་ཀྱང་རྗེ་ཐམས་ཅད་མཁྱེན་པ་འདི་ཉིད་གངས་རིའི་ཁྲོད་འདིར་མཚུངས་ཟླ་མེད་ཅིང་ཕྱི་རབས་ཀྱི་གདུལ་བྱ་ཡོངས་ལ་བཀའ་དྲིན་ཟླ་མེད་པར་གྲུབ་བོ། །རྗེ་རིན་པོ་ཆེ་འདི་ཉིད་ཀྱི་སྐུ་གསུང་ཐུགས་ཀྱི་རྣམ་ཐར་བསམ་གྱི་མི་ཁྱབ་པ་སྔར་བརྗོད་པ་དེ་ལྟར་ཡིན་ཞིང༌། འཕྲལ་གྱི་མཛད་སྤྱོད་ཀྱང་སྙིགས་མའི་སྐྱེ་བོ་སུ་དང་ཡང་མི་མཚུངས་པའི་ངོ་མཚར་རྨད་དུ་བྱུང་བ་ཞིག་བཞུགས་ཏེ། རྗེ་རིན་པོ་ཆེ་འདི་ཉིད་མདོ་སྨད་དུ་སྐུ་འཁྲུངས་པ་ནས་མཐར་མྱ་ངན་ལས་འདས་པའི་བར་ལ་ཐུགས་རྒྱུད་འཁྲུགས་ཏེ་གཞན་ལ་ཞེ་གཅོད་པའི་ཚིག་ངན་པ་སྨྲ་བ་དེ་དུས་ཀྱི་སྐུ་དངོས་ཀྱི་གདུལ་བྱ་སུ་ལའང་བསྟན་རྒྱུ་མེད་ཅིང༌། མཚན་ཉིད་ཀྱི་སློབ་གཉེར་མཛད་པའི་སྐབས་སུའང་དེང་སང་གི་གདུལ་བྱ་ཕལ་ཆེར་ཕ་རོལ་དང་རྩོད་པའི་ཚེ་ཕ་རོལ་སྨ་དབབ་པའི་ཚིག་སྨྲ་གང་ཐུབ་དང༌། ལུས་ཀྱི་རྣམ་འགྱུར་ཡང་འགྱིང་བ་དང་ཁེངས་པ་དང་ཕ་རོལ་གནོན་པའི་རྣམ་འགྱུར་བྱེད་པ་འདི་འདྲ་གཏན་ནས་མིན་པར་རྗེ་བླ་མ་འདིས་དབུས་གཙང་གྲྭ་ས་ཆེན་པོ་རྣམས་སུ་ཐུགས་གཉེར་མཛད་པ་དང༌། གྲྭ་སྐོར་མཛད་པའི་སྐབས་གང་དུའང་རྒོལ་བ་ཕ་རོལ་པོ་ལ་ངན་སྨྲ་མཛད་པ་ནམ་ཡང་མི་སྲིད་ཅིང་སྐུ་ལུས་ཀྱི་རྣམ་འགྱུར་ཡང་ཞི་ཞིང་དུལ་བ་དང་འཇམ་ཞིང་ངེས་པ་དང༌། གསུང་སྙན་ཞིང་བརྗིད་ལ་གསོང་པོར་སྨྲ་བ་དང༌། ཕ་རོལ་པོ་ལ་ཕན་པའི་ཚིག་ཁོ་ན་བརྗོད་པ་ལས་སྐུ་དང་གསུང་གི་རྣམ་འགྱུར་ལ་སྐྱོན་ཆགས་པ་དེ་དུས་སྐུ་དངོས་སུ་མཐོང་བ་ལའང་དུས་འདིའི་ཆ་འདི་ལྟར་མཛད་དོ་ཞེས་བསྟན་རྒྱུ་མེད་པ་ཡོངས་སུ་གྲགས་པ་ལྟར་ཡིན་ལ། དེའི་དབང་གིས་གྲྭ་ས་གང་དང་གང་དུ་བྱོན་པ་དེ་དང་དེར་རྗེ་འདིའི་སྐུ་མཐོང་བ་དང་གསུང་གི་གདངས་ཐོས་པ་ཙམ་གྱིས་སྣང་བ་འགྱུར་ཏེ་རྗེ་འདིའི་ཞབས་དྲུང་དུ་བསྙེན་ཏེ་སློབ་མར་ཁས་ལེན་པ་ཤ་སྟག་བྱུང་སྟེ་སྐད་ཅིག་ཉིད་ལ་གངས་ཅན་གྱི་སའི་ཆ་ཐམས་ཅད་རྗེ་འདིའི་སློབ་མས་ཁྱབ་པ་འདི་བྱུང་བ་ཡིན་ནོ། །

                    རྗེ་འདི་ལ་རྒྱ་མཚོའི་གླིང་བར་ཚུན་ཆད་ནས་གདུལ་བྱ་འདུས་ཏེ་ས་ཆེན་པོའི་ཁྱོན་འདི་ཐམས་ཅད་སློབ་མས་གང་བ་དེ་ལྟ་བུ་བྱུང་ཡང་ཆེན་པོར་རློམ་པའི་ཆེ་འགྱིང་ནམ་ཡང་མི་མཛད་ཅིང༌། རང་ཉིད་ཤེས་བྱ་ཀུན་ལ་ཐོགས་པ་མེད་པའི་མཁྱེན་པ་མངའ་བ་ཡིན་ཡང༌། སྔོན་བྱོན་པའི་བསྟན་འཛིན་གྱི་སྐྱེས་བུ་དམ་པ་རྣམས་ལ་སྐྱོན་བརྗོད་ནམ་ཡང་མི་མཛད་པར་དག་སྣང་དང་བཀའ་དྲིན་དྲན་པའི་གུས་པ་ལྷུར་མཛད་དེ། སྔོན་བྱོན་པའི་ལོ་ཙཱ་བ་བཀའ་དྲིན་ཅན་རྣམས་དང༌། བསྟན་པའི་གསལ་བྱེད་གྲུབ་མཐའ་རིས་སུ་མ་ཆད་པ་ཀུན་ལ་དག་སྣང་དང་གུས་པ་ལྷུར་མཛད་དེ་སོ་སོའི་ཡིག་ཆར་ནོར་འཁྲུལ་སོགས་ཅི་ཡོད་ཀྱང་དེ་རྒྱུ་མཚན་དུ་བྱས་ཏེ་དམ་པ་དེ་དང་དེ་དག་ལ་སྐྱོན་བརྗོད་པ་ནམ་ཡང་མི་མཛད་དེ། རྗེའི་མདོ་སྔགས་ཀྱི་གསུང་རབ་ཇི་སྙེད་ཅིག་བཞུགས་པ་དག་གི་ནང་ན་སྔོན་བྱོན་པའི་ལོ་ཙཱ་བ་བཀའ་དྲིན་ཅན་དེ་དག་དང༌། སྒྲུབ་པ་མཛད་པའི་སྐྱེས་བུ་དམ་པ་ཇི་སྙེད་ཅིག་བྱོན་པ་དེ་དག་དང༌། དགེ་འདུན་གྱི་སྡེ་འཛུགས་པའི་དམ་པ་གྲུབ་མཐའ་རིས་མི་འདྲ་བ་མང་པོ་ཞིག་བྱོན་པ་དེ་དག་སུ་ལའང་མཚན་ནས་སྨོས་ཏེ་སྐྱོན་བརྗོད་པ་བསྟན་རྒྱུ་མེད་དོ། །འོན་ཀྱང་ཐིག་དྲང་པོར་བཏབ་ན་ཀྱོག་པོ་ཟུར་ལ་ཐོན་པ་ཆོས་ཉིད་ཡིན་པ་ལྟར་རྗེ་རིན་པོ་ཆེ་འདིས་རྒྱལ་བའི་དགོངས་པ་ཤིང་རྟ་ཆེན་པོ་ཀླུ་སྒྲུབ་དང་ཐོགས་མེད་གཉིས་ཀྱིས་ཇི་ལྟར་བཀྲལ་བ་ལྟར་གཏན་ལ་ཕབ་པ་ན། ཤིང་རྟ་ཆེན་པོས་རྒྱལ་བའི་དགོངས་པ་བཀྲལ་བ་དང་མི་མཐུན་པར་སྨྲ་བ་རྣམས་སྐྱོན་ཅན་དུ་རང་ཤུགས་ཀྱིས་ཐོན་འོང་སྟེ་དེ་ནི་རྗེ་འདིའི་སྐྱོན་དུ་ག་ལ་འགྱུར་ཏེ་ཤིང་རྟ་ཆེན་པོ་གཉིས་ཀྱིས་རྒྱལ་བའི་དགོངས་པ་བཀྲལ་བ་བཞིན་ནོ། །

                    གཞན་ཡང་རྗེ་འདིས་སྐུ་ཚེ་ཧྲིལ་པོར་སོ་ནམ་དང་ཚོང་བུན་བསྐྱེད་སོགས་འདུལ་བ་དང་འགལ་བའི་ལས་ནམ་ཡང་མ་མཛད་དེ་བྱ་བྲལ་གྱི་སློབ་མ་སྟོང་ཕྲག་མང་པོ་སྐོང་དགོས་པའི་ཚེ་ཡང་ཆོས་དང་མཐུན་པའི་འཚོ་བ་ཁོ་ན་ལ་སྦྱོར་བ་ལས་བུན་བསྐྱེད་སོགས་ལོག་འཚོའི་རིགས་ལ་སྦྱར་བ་དངོས་ཀྱི་གདུལ་བྱ་སུས་ཀྱང་མཐོང་བ་མེད་ཅིང༌། དཀོན་མཆོག་གི་མཆོད་པ་རླབས་ཆེན་པོ་མཛད་པ་དང༌། དགེ་འདུན་གྱི་སྡེ་སྐྱོང་པ་དང༌། མཆོག་གསུམ་གྱི་རྟེན་གསར་དུ་བཞེངས་པ་སོགས་ལ་མཐུན་པའི་འཚོག་ཆས་ངེས་པར་འཚོལ་དགོས་པ་བྱུང་ན་རྒྱལ་པོ་ཆེན་པོ་རྣམ་ཐོས་སྲས་ལ་གཏོར་མ་ཕུལ་ཏེ་སྔོན་ཐུབ་པའི་སྤྱན་སྔར་ཇི་ལྟར་ཁས་བླངས་པ་ལྟར་རྒྱལ་བའི་བསྟན་པ་སྤེལ་ཕྱིར་འཕྲིན་ལས་འདི་སྒྲུབས་ཤིག་ཅེས་བསྐུལ་པ་ཙམ་གྱིས་གང་དགོས་པའི་ཡོ་བྱད་ཐམས་ཅད་འབད་མེད་ལྷུན་གྲུབ་ཏུ་བྱུང་བ་ནི་སྐུ་དངོས་ཀྱི་གདུལ་བྱ་ཐམས་ཅད་ལ་མཐུན་སྣང་དུ་གྲུབ་པའོ། །གསང་སྔགས་ཀྱི་གྲྭ་ཚང་འཛུགས་པར་བཞེད་པའི་སྐོར་སོགས། དེ་ལྟར་རྗེ་རིན་པོ་ཆེས་བསྟན་པ་དང་གདུལ་བྱའི་དོན་རྨད་དུ་བྱུང་བ་རྒྱ་ཆེར་མཛད་པས་གངས་རིའི་ཁྲོད་ཀྱི་སྐལ་བ་དང་ལྡན་པ་སྐུ་དངོས་ཀྱི་གདུལ་བྱ་དག་གི་དོན་ཕལ་ཆེར་མཛད་ཟིན་པ་ན་སྟོན་པ་མྱ་ངན་ལས་འདའ་ཁར་གྲོང་ཁྱེར་རྩ་ཅན་དུ་བྱོན་ནས་ཀུན་ཏུ་རྒྱུ་རབ་བཟང་དང་དྲི་ཟའི་རྒྱལ་པོ་རབ་དགའ་འདུལ་བར་མཛད་པ་ཇི་ལྟ་བ་སྐུ་ཚེ་འདིའི་དངོས་ཀྱི་གདུལ་བྱའི་ཐ་མ་འགའ་ཞིག་གི་དོན་བྱ་བར་དགོངས་པ་དང༌། གངས་རིའི་ལྗོངས་འདིར་རྒྱུད་ཀྱི་འཆད་ཉན་རྐང་ཚུགས་པའི་གྲྭ་ཚང་ཞིག་ངེས་པར་འཛུགས་བཞེད་པ་དང༌།གངས་ཅན་སྐྱེ་འགྲོ་ཡོངས་ཀྱི་ཕན་བདེའི་རྩ་ལག་ལྷ་ལྡན་སྤྲུལ་པའི་གཙུག་ལག་ཁང་གི་རྟེན་རྣམས་ལ་མཆོད་པ་རྒྱ་ཆེན་པོ་ཕུལ་ཏེ་རྒྱལ་བའི་བསྟན་པ་ཡུན་རིང་གནས་པའི་ཐུགས་སྨོན་མཛད་པ་སོགས་དགོས་པ་མང་པོ་ཞིག་གི་ཕྱིར་སྟོད་ལུང་གི་ཆུ་ཚན་ལ་འབྱོན་བཞེད་པ་ལྟར་བྱས་ཏེ་རི་བོ་དགའ་ལྡན་ནས་ཕྱགས་བཏེག་སྟེ་ལྷ་སར་མཆོད་པ་དང་སྨོན་ལམ་རྣམ་པར་དག་པ་མཛད་ནས་སྟོད་ལུང་གི་ཆབ་ཚན་ཁར་བྱོན།

                    འོན་ཀྱང་ཆབ་ཚན་གྱིས་ནི་ཞབས་ལ་ཅུང་ཟད་ཙམ་བདུག་པ་ལས་མ་མཛད། གཙོ་བོར་སྟོད་ལུང་ཕུ་མདའི་སྐྱེ་བོའི་ཚོགས་མཐའ་ཡས་པ་དག་ཆོས་དང་བྱིན་རླབས་ཀྱི་སྐྱེས་གནང་ཞིང༌། དད་ལྡན་སོ་སོས་བསྙེན་བཀུར་བ་དང་ཟང་ཟིང་གི་དངོས་པོ་ཕུལ་བ་རྣམས་དད་པ་ཅན་དེ་དང་དེ་དག་གི་དགེ་རྩ་བསྐྱེད་པའི་ཕྱིར་བཞེས། ཞལ་མཐོང་ཞིང་གསུང་ཐོས་པ་ཙམ་གྱིས་ཀྱང་དོན་དང་ལྡན་པར་མཛད་དེ། སླར་འབྲས་སྤུངས་སུ་བྱོན་པའི་ཚེ་འཇམ་དབྱངས་ཆོས་རྗེ་བཀྲ་ཤིས་དཔལ་ལྡན་པས་གཙོས་འབྲས་སྤུངས་ཀྱི་ཀྱི་དགེ་འདུན་ཐམས་ཅད་ཀྱིས་མཆོད་པའི་བྱེ་བྲག་སྣ་ཚོགས་པ་ཐོགས། གསོལ་བ་འདེབས་པའི་དབྱངས་ཀྱི་ང་རོ་དང་བཅས་བསུས། འདུ་ལི་ལ་གདན་དྲངས་པའི་འདུ་ལིའི་སྣེ་ལ་འཇའ་ཚོན་ཁ་དོག་ལྔ་པ་ཀུན་ནས་བཀྲ་བ་ཐལ་བྱུང་དུ་ཟུག་པ་དང༌། འབྲས་སྤུངས་སུ་ཕེབས་ནས་ཀྱང་ཆོས་གསུངས་པའི་ཚེ་ཆོས་གྲྭའི་དབུས་སུ་འཇའ་ཚོན་སྣ་ལྔ་པ་ནམ་མཁའི་དབྱིངས་ནས་ཀ་བ་བཙུགས་པ་ལྟར་ཆེས་གསལ་བར་ཟུག་པ་སོགས་རྗེ་རིན་པོ་ཆེའི་སྐུ་ཚེ་འདིའི་མཛད་པ་ཕལ་ཆེར་རྫོགས་ནས་ཞིང་ཁམས་གཞན་དུ་འབྱོན་པར་བཞེད་པ་ན་དཀར་ཕྱོགས་ཀྱི་ལྷ་རྣམས་ཀྱིས་བསུ་བའི་བཀོད་པ་བཤམས་པ་དང༌། ལྷག་པའི་ནམ་མཁའི་དབྱིངས་ནས་འཇའ་ཀ་བ་བཙུགས་པ་ལྟར་བྱུང་བ་ནི་དགའ་ལྡན་གྱི་ལྷ་རྣམས་ཀྱིས་རྗེ་རིན་པོ་ཆེ་དགའ་ལྡན་དུ་འབྱོན་པ་ལ་བསུ་བའི་བཀོད་པ་བཤམས་པ་ཡིན་པར་ངེས་པ་དེ་ལྟ་བུའི་ལྟས་མངོན་སུམ་དུ་བབས་པར་གྱུར་ལ། གཞན་ཡང་འབྲས་སྤུངས་སུ་བཞུགས་རིང་ལ་དགེ་བའི་བཤེས་གཉེན་སྡེ་སྣོད་འཛིན་པ་སྟོང་ཕྲག་གཉིས་ཙམ་འདུས་ཤིང༌། སྣེའུ་ནས་ཞབས་ཏོག་དང་ཅི་དགོས་ཀྱི་ཕོགས་བསྙེན་བཀུར་འབུལ་ནོད་སོགས་བསམ་གྱིས་མི་ཁྱབ་པ་མཛད་ལ། དེའི་ཚེ་ལམ་རིམ་གྱི་ཁྲིད། ནཱ་རོ་ཆོས་དྲུག དབུ་མ་ལ་འཇུག་པ། གསང་བ་འདུས་པའི་རྒྱུད་ལ་སོགས་པ་གསུངས་ཤིང༌། དེ་ཡང་སྔོན་ཆད་གྲོང་པའི་སྐྱེ་བོ་ཕོ་མོ་དུ་མ་ལ་ཁྲིད་ཆེར་མི་གནང༌། ཁྱད་པར་ལམ་རིམ་གྱི་ཁྲིད་ལའང་འཚོག་ཏུ་མི་རུང་བ་ལ་སོགས་པའི་དམ་བཞག་ཆེ་བར་ཡོད་པ་ལ་དེ་དུས་གྲོང་པའི་སྐྱེ་བོ་ཇི་ཙམ་ཞིག་འོངས་པ་དང༌། དུས་ནམ་འོངས་ཐམས་ཅད་ལ་ཁྱད་པར་མེད་པར་ཐ་ན་སྤྲང་པོའི་ཚོགས་དུ་མ་འདུས་པ་ཡན་ཆད་ཐམས་ཅད་ལ་ལམ་རིམ་དང་དབུ་མ་ལ་སོགས་པའང་བཀག་པ་མེད་པར་གནང༌། འབྲས་སྤུངས་སུ་སྐབས་ཤིག་ནས་གཞན་ཕལ་མོ་ཆེ་ལ་ལྐོག་ཏུ་གྱུར་པའི་མངོན་ཆུང་བར་གྱིས་གསུངས་ནས་ལྷ་བཟོ་བ་ལ་དམ་བཞག་ཆེ་བར་མཛད་དེ་བཅོམ་ལྡན་འདས་རྣམ་པར་སྣང་མཛད་ཀྱི་དངུལ་སྐུ་ཆེན་པོ་ཞིག་བཞེངས་པའི་ཞལ་ཏ་མཛད།

                   དེ་ལྟར་ཆོས་ཀྱི་འཁོར་ལོ་རྒྱ་ཆེར་བསྐོར་ནས། སྔོན་ཆད་དུས་འཁོར་མ་གཏོགས་པའི་རྒྱུད་ལ་ལེའུ་མཚམས་མཛད་པའི་ལུགས་མེད་པ་ལ་དེའི་ཚེ་གསང་འདུས་ཀྱི་ལེའུ་དགུ་པའི་མི་བསྐྱོད་སངས་རྒྱས་ཞིང་དག་ཏུ། །རྒྱལ་བའི་སྲས་སུ་སྐྱེ་བར་འགྱུར། །ཞེས་པའི་མཚམས་སུ་ཆོས་མཚམས་མཛད་ནས། མྱུར་དུ་འབྲོག་རི་བོ་ཆེ་དགའ་ལྡན་རྣམ་པར་རྒྱལ་བའི་གླིང་ཉིད་དུ་འབྱོན་བཞེད་པའི་ཞལ་ཏ་གནང༌། དེ་ལ་སྦྱིན་བདག་དང༌། ཆོས་གསན་པ་རྣམས་ཀྱིས་ད་དུང་ཟླ་བ་གཅིག་གམ་ཟླ་ཕྱེད་ཙམ་དུའང་བཞུགས་ནས་ཆོས་འཕྲོ་རྫོགས་པར་གསུངས་པ་ཞིག་ཐུགས་རྗེས་གཟུང་འཚལ། ཐ་ན་རྒྱུད་ཀྱི་འཕྲོ་རྣམས་བཀླགས་ལུང་མཛད་པ་ཙམ་ཞིག་ཀྱང་གནང་འཚལ་ཞེས་གསོལ་བ་ནན་ཆེར་བཏབ་ཀྱང་གསན་དུ་མ་བཞེངས་ནས། ད་ལན་མྱུར་དུ་བཏེག་པ་ཐམས་ཅད་ལ་དགའ་བས་འདེགས། རྒྱུད་དང་ལམ་རིམ་འཕྲོ་ལ་འཇོག་པའི་འདུན་པ་ཁ་སིང་དུ་བཏང་ཚར་གསུངས་ནས་ཆོས་མཚམས་མཛད་དེ། དེ་ཡང་ད་དུང་དུ་སྔགས་དང་མཚན་ཉིད་ཀྱི་གསུང་སྒྲོས་ཀྱི་བཤད་རྒྱུན་རྫོགས་པ་མེད་པར་འཕྲོ་རིང་དུ་གནས་པའི་རྟེན་འབྲེལ་བསྒྲིག་པའི་དགོངས་པ་མཛད། 

                                                                                                                                      རྩོམ་སྒྲིག་པ། མང་ར་བ།
            གསལ་འདེབས། 
                   རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                    དྲ་བའི་སྦྲེལ་ཐགhttp://www.tb1025.cn