སྔགས་ཀྱི་སྐོར་ལ་འཇུག་སྒོ་དབང་དང་དབང་དུས་སུ་ཁས་བླངས་པའི་དམ་ཚིག་དང་སྡོམ་པ་དག་པར་བྱེད་ཚུལ། དེ་ནས་ལམ་བགྲོད་ཚུལ་རྣམས་མཐའ་དག་པར་འདོམས་པ་ལ་རྗེ་རིན་པོ་ཆེ་འདི་གངས་རིའི་ཁྲོད་ན་མཚུངས་ཟླ་མེད་པ་ཞིག་སྟེ།དེ་ཡང་གསང་སྔགས་རྒྱུད་སྡེ་བཞི་ལ་འཇུག་སྒོ་དབང་བསྐུར་ཚུལ་མི་འདྲ་བ་དང༌། དེའི་དུས་སུ་ཐོབ་པའི་དམ་ཚིག་དང་སྡོམ་པ་བསྲུང་ཚུལ་ཐུན་མོང་མ་ཡིན་པའི་ཁྱད་པར་ཡོད་པ་རྣམས་དང༌། དེ་ནས་ལམ་བགྲོད་ཚུལ་ལ་རྒྱུད་སྡེ་འོག་མ་ལ་མཚན་བཅས་དང་མཚན་མེད་ཀྱི་རྣལ་འབྱོར། བླ་མེད་ལ་རིམ་གཉིས་ཀྱི་རྣལ་འབྱོར། དེ་ལའང་ཕ་རྒྱུད་མ་རྒྱུད་གཉིས་ཀྱི་ཐུན་མོང་མིན་པའི་ཁྱད་པར་མི་འདྲ་བ་མང་དུ་ཡོད་པ་རྣམས་རྗེ་རིན་པོ་ཆེ་འདིས་རྒྱལ་བ་རྡོ་རྗེ་འཆང་ཡང་ཕྱོགས་འདིར་དངོས་སུ་བྱོན་པ་ཇི་ལྟ་བར་རྡོ་རྗེ་འཆང་ཆེན་པོའི་ལམ་གྱི་རིམ་པ་གསང་བ་ཀུན་གྱི་གནད་རྣམ་པར་ཕྱེ་བ་ཞེས་བྱ་བ་སྔོན་མེད་པའི་ལེགས་པར་བཤད་པའི་གཏེར་ཆེན་པོ་འདི་མཛད་ཅིང༌། བྱེ་བྲག་ཏུ་ཕ་རྒྱུད་གསང་བ་འདུས་པའི་ལམ་གྱི་གནད་རྣམས་མཐའ་དག་པར་གཏན་ལ་འབེབས་པ་ལ་རྩ་རྒྱུད་ཀྱི་འགྲེལ་པ་སྒྲོན་མ་གསལ་བའི་མཆན་འགྲེལ། དཀའ་གནད་མཐའ་གཅོད།བསྡུས་དོན་བཅས་དང༌།རིམ་ལྔའི་ངོ་སྤྲོད་ཆེན་མོ་རིམ་ལྔ་གསལ་བའི་སྒྲོན་མེ་སོགས་སྔོན་མེད་པའི་ལེགས་བཤད་ཆེས་མང་བ་དང༌། མ་རྒྱུད་བདེ་མཆོག་ལཱུ་ཧི་པའི་སྒྲུབ་ཐབས་ཀྱི་རྣམ་བཤད་འདོད་འཇོ་དང༌། རྫོགས་རིམ་གྱི་ཁྲིད་ཡིག་ཆེ་ཆུང་དང་བདེ་མཆོག་རྩ་རྒྱུད་ཀྱི་ཊཱིཀྐ་ངོ་མཚར་རྨད་དུ་བྱུང་བ་སྔོན་མེད་པའི་ལེགས་བཤད་ཀྱི་གཏེར་ཆེན་པོ་འདི་སོགས་རྡོ་རྗེ་འཆང་དངོས་སུ་བྱོན་ཡང་དེ་ཕན་དུ་གསུངས་སུ་མེད་པའི་སྔགས་ཀྱི་བསྟན་བཅོས་མང་པོ་འོག་ཏུ་གསལ་བ་ལྟར་མཛད་དེ། རྗེ་འདིའི་མཛད་པ་ལྟ་བུ་གངས་རིའི་ཁྲོད་འདིར་སྔོན་ཆད་མ་བྱུང་བ་ཀུན་ལ་མངོན་སུམ་དུ་སྣང་བ་ལྟར་རོ། །

                    རྗེ་བཙུན་བླ་མ་འདིས་གངས་རིའི་ཁྲོད་འདིར་སངས་རྒྱས་ཀྱི་མཛད་པ་མཛད་པར་ཡིད་ཆེས་པའི་རྟགས་ཀྱིས་སྒྲུབ་པ་ནི། ལྷོ་བྲག་གྲུབ་ཆེན་ལ་གསང་བའི་བདག་པོས་རྗེ་འདིའི་མཛད་པ་རྣམ་ཐར་ཁྱད་པར་དུ་འཕགས་པ་འདི་ལྟར་གསུངས་པ་རྣམས་དང༌། རྗེ་བཙུན་འཇམ་པའི་དབྱངས་ཀྱིས་དབུ་མ་པ་དཔའ་བོ་རྡོ་རྗེ་ལ་གསུངས་པ་དང༌། ཡང་གྲུབ་ཆེན་འཇམ་དཔལ་རྒྱ་མཚོ་ལ་གསུངས་པ་དང༌། རྗེ་རིན་པོ་ཆེ་རང་ཉིད་ལ་སངས་རྒྱས་དང་བྱང་སེམས་མང་པོས་ཞལ་གཟིགས་ནས་ལུང་བསྟན་དང་དབུགས་དབྱུང་བ་མཛད་པ་སྔར་དྲངས་ཟིན་པ་ལྟར་ཤིན་ཏུ་ཡིད་ཆེས་པའི་གནས་སུ་ཡོད་མོད། འོན་ཀྱང་དེ་ཙམ་གྱི་ལུང་ལ་འཆེལ་བ་མིན་པར་དྲི་མ་མེད་པའི་རིགས་པའི་ལམ་སྲོལ་ཤེས་པའི་མཁས་པ་རྣམས་ལ་རྗེ་འདིས་སངས་རྒྱས་ཀྱི་མཛད་པ་མཛད་པར་ཡིད་ཆེས་པའི་རྟགས་སུ་མི་འགྱུར་བས་རྒྱལ་བ་ཉིད་ཀྱི་མདོ་སྡེ་དང་རྒྱུད་སྡེ་རྩོད་མེད་རྒྱ་བོད་གཉིས་ཀར་ཡོངས་སུ་གྲགས་པ་ཞིག་གི་སྟེང་ནས་སྒྲུབ་དགོས་ལ། དེ་ནི་སྔར་དྲངས་ཟིན་པ་ལྟར་ལངྐར་གཤེགས་པའི་མདོ་དང༌། མདོ་སྡེ་གདམས་ངག་འབོགས་པའི་རྒྱལ་པོ་དང༌། འཇམ་པའི་རྩ་རྒྱུད་རྣམས་ལས་སྒྲུབ་པ་ཡིན་ལ། དེའི་ནང་ནས་ཀྱང་འཇམ་དཔལ་རྩ་རྒྱུད་ལས། འཇིག་རྟེན་ང་ནི་མྱ་ངན་འདས། །ས་ཡི་སྟེང་འདི་སྟོང་པ་ན། ཁྱོད་ཉིད་བྱིས་པའི་གཟུགས་ཀྱིས་ནི། །སངས་རྒྱས་མཛད་པ་བྱེད་པར་འགྱུར། །ཞེས་སོགས་རྒྱལ་བ་མྱ་ངན་ལས་འདས་པའི་འོག་ཏུ་འཇིག་རྟེན་མགོན་མེད་འདྲེན་པ་མེད་པར་གྱུར་པ་ན་རྗེ་བཙུན་འཇམ་པའི་དབྱངས་ཐ་མལ་བའི་གཟུགས་བཟུང་སྟེ་བྱང་ཕྱོགས་ཁ་བ་ཅན་འདིར་སངས་རྒྱས་ཀྱི་མཛད་པ་མཛད་པ་དང༌། དེ་ལྟར་མཛད་པ་པོ་དེའི་མིང་ལ་བློ་བཟང་ཞེས་པ་དང་གྲགས་པ་ཞེས་པའི་མཚན་འབྱུང་བ་དང༌། དེའི་དགོན་གནས་ཀྱི་མིང་ལ་དགའ་ལྡན་ཞེས་འབྱུང་བ་གསལ་བར་ལུང་བསྟན་པ་འདིས་རྗེ་འདི་ཉིད་ཀྱིས་གངས་རིའི་ཁྲོད་འདིར་སངས་རྒྱས་དངོས་སུ་བྱོན་པ་ལྟ་བུའི་མཛད་པ་མཛད་པར་ཀུན་གྱིས་ཡིད་ཆེས་པར་གྲུབ་བོ། །

                    དེ་ལྟར་རྗེ་རིན་པོ་ཆེ་འདིས་སངས་རྒྱས་ཀྱི་མཛད་པའི་གཙོ་བོ་ཆོས་ཀྱི་འཁོར་ལོ་བསྐོར་བའི་མཛད་པ་ངོ་མཚར་རྨད་དུ་བྱུང་བ་ཞིག་འདིར་བྱོན་པ་ནས་མཐར་དགའ་ལྡན་ལ་བྱོན་པའི་བར་གོང་འཕེལ་དུ་མཛད་དེ་ཕྱི་རབས་ཀྱི་གདུལ་བྱ་རྣམས་ལ་ཐུགས་བརྩེ་བས་དགོངས་ཏེ་མདོ་སྔགས་ཀྱི་ལམ་བཟང་པོ་རྣམས་འདི་ལྟར་ཡོད་དོ་ཞེས་ཡི་གེར་འགོད་པར་མཛད་པ་ནི། དུས་གསུམ་གྱི་རྒྱལ་བ་ཐམས་ཅད་ཀྱི་བགྲོད་པ་གཅིག་པའི་ལམ་པོ་ཆེ་ཤིང་རྟ་ཆེན་པོ་ཀླུ་སྒྲུབ་དང་ཐོགས་མེད་གཉིས་ཀྱིས་རྒྱལ་བའི་དགོངས་པ་དྲི་མ་མེད་པའི་རིགས་ལམ་ནས་དྲངས་ཏེ་ཡོངས་སུ་རྫོགས་པ་བཀྲལ་བའི་ལམ་སྲོལ་སྐྱེས་བུ་ཆུང་འབྲིང་ཆེ་གསུམ་གྱིས་ཉམས་སུ་བླང་བའི་རིམ་པ་ཐམས་ཅད་མ་ཚང་བ་མེད་པར་སྟོན་པའི་མན་ངག་བྱང་ཆུབ་ལམ་རིམ་ཆེན་མོ། དེའི་སྙིང་པོའི་གནད་བསྡུས་པ་ལམ་རིམ་ཆུང་བ། བྱང་ཆུབ་ལམ་གྱི་རིམ་པའི་ཁྲིད་ཀྱི་ས་བཅད། ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་འགྲེལ་པ་དང་བཅས་པའི་རྒྱ་ཆེར་བཤད་པ་ལེགས་བཤད་གསེར་གྱི་ཕྲེང་བ། བྱང་ཆུབ་སེམས་དཔའི་ཚུལ་ཁྲིམས་ཀྱི་རྣམ་བཤད་བྱང་ཆུབ་གཞུང་ལམ། ཞི་ལྷག་གཉིས་ཀྱི་དཀའ་བའི་གནད་རྒྱལ་བའི་དགོངས་པ་ཕྱིན་ཅི་མ་ལོག་པར་བཤད་པ། དྲང་བ་དང་ངེས་པའི་དོན་རྣམ་པར་ཕྱེ་བའི་བསྟན་བཅོས་ལེགས་བཤད་སྙིང་པོ། རྗེ་བཙུན་འཇམ་པའི་དབྱངས་ཀྱིས་རྗེ་ལ་གནང་བའི་ལྟ་བའི་གནད་འགག་རྗེ་རེད་མདའ་བར་ཕུལ་བ། དབུ་མའི་ལྟ་ཁྲིད། ཚིག་སྦྱོར་ཕུན་སུམ་ཚོགས་པའི་སྙན་ངག་གི་ལམ་ནས་དྲངས་པའི་བློ་སྦྱོང༌། དབུ་མ་རྒྱན་གྱི་ཟིན་བྲིས་རྗེ་རང་གིས་གནང་བ། ཡིད་དང་ཀུན་གཞིའི་དཀའ་བའི་གནས་རྒྱ་ཆེར་འགྲེལ། སྡེ་བདུན་ལ་འཇུག་པའི་སྒོ་དོན་གཉེར་ཡིད་ཀྱི་མུན་སེལ། བསམ་གཟུགས་ཟིན་བྲིས།དབུ་མའི་ལྟ་ཁྲིད་བསྡུས་པ། དགེ་འདུན་ཉི་ཤུ་བསྡུས་པ་དང་ཞུགས་གནས་སྐྱེས་བུ་ཆེན་པོའི་དཀའ་གནད།

                    དབུ་མ་རྩ་ཤེའི་རྣམ་བཤད་རིགས་པའི་རྒྱ་མཚོ། བསྟན་བཅོས་ཆེན་པོ་དབུ་མ་ལ་འཇུག་པའི་རྣམ་བཤད་དགོངས་པ་རབ་གསལ། རྒྱལ་བ་ཁྱབ་བདག་རྡོ་རྗེ་འཆང་ཆེན་པོའི་ལམ་གྱི་རིམ་པ་གསང་བ་ཀུན་གྱི་གནད་རྣམ་པར་ཕྱེ་བ་ཞེས་བྱ་བ། རྒྱུད་ཀྱི་རྒྱལ་པོ་དཔལ་གསང་བ་འདུས་པའི་མན་ངག་རིམ་པ་ལྔ་གསལ་བའི་སྒྲོན་མེ། རྣམ་གཞག་རིམ་པའི་རྣམ་བཤད་དཔལ་གསང་བ་འདུས་པའི་གནད་དོན་གསལ་བ། རྒྱུད་ཀྱི་རྒྱལ་པོ་དཔལ་གསང་བ་འདུས་པའི་རྫོགས་རིམ་རིམ་ལྔ་གདན་རྫོགས་ཀྱི་དམར་ཁྲིད། འདུས་པའི་བཤད་རྒྱུད་ལྷ་མོ་བཞི་ཞུས་ཀྱི་རྒྱ་ཆེར་བཤད་པ་སྲོག་རྩོལ་གྱི་དེ་ཁོ་ན་ཉིད་གསལ་བ་དཔལ་གསང་བ་འདུས་པའི་བཤད་རྒྱུད་ཡེ་ཤེས་རྡོ་རྗེ་ཀུན་ལས་བཏུས་པའི་ཊཱིཀྐ བཤད་རྒྱུད་རྡོ་རྗེ་ཕྲེང་བའི་ཟིན་བྲིས། རྒྱུད་ཀྱི་རྒྱལ་པོ་དཔལ་གསང་བ་འདུས་པའི་རྩ་བའི་རྒྱུད་སྒྲོན་མ་རབ་ཏུ་གསལ་བར་བྱེད་པའི་རྒྱ་ཆེར་བཤད་པ་འཆད་པའི་ས་བཅད་བསྡུས་དོན། དཔལ་གསང་བ་འདུས་པའི་དཀའ་བའི་གནད་ཀྱི་མཐའ་གཅོད་རིན་པོ་ཆེའི་མྱུ་གུ། རྒྱུད་ཐམས་ཅད་ཀྱི་རྒྱལ་པོ་དཔལ་གསང་བ་འདུས་པའི་རྒྱ་ཆེར་བཤད་པ་སྒྲོན་མ་གསལ་བའི་ཚིག་དོན་ཇི་བཞིན་འབྱེད་པའི་མཆན་གྱི་ཡང་འགྲེལ། རྗེ་བཙུན་འཇམ་པའི་དབྱངས་ཀྱི་གསུང་ཐུན་མོང་མ་ཡིན་པ་རྗེ་རེད་མདའ་བར་ཕུལ་བ། དཔལ་གསང་བ་འདུས་པའི་སྒྲུབ་ཐབས་ཀྱི་ལྷན་ཐབས། དཔལ་གསང་བ་འདུས་པའི་མངོན་རྟོགས་དང་བསམ་གཏན་གྱི་སྒྲུབ་མཆོད་ངག་ཏུ་འདོན་པའི་ལྷན་ཐབས།དཔལ་གསང་བ་འདུས་པའི་སྒྲུབ་ཐབས་རྣལ་འབྱོར་དག་པའི་རིམ་པ། བཞི་བརྒྱ་ལྔ་བཅུ་པའི་སྐོར་གྱི་ཟིན་བྲིས།དཔལ་གསང་བ་འདུས་པ་མི་བསྐྱོད་རྡོ་རྗེའི་དཀྱིལ་འཁོར་གྱི་ཆོ་ག་དབང་གི་དོན་གྱི་དེ་ཉིད་རབ་ཏུ་གསལ་བ། རྡོ་རྗེ་བཟླས་པའི་རིམ་པའི་ཟིན་བྲིས། དགོངས་པ་བླ་ན་མེད་པའི་རིམ་པའི་ཟིན་བྲིས། མན་ངག་མཐར་ཐུག་བདག་བྱིན་རླབས། མན་ངག་གི་མཐར་ཐུག་མངོན་པར་བྱང་ཆུབ་པའི་རིམ་པའི་བཤད་པ། རིམ་ལྔ་བསྡུས་པའི་ཟིན་བྲིས། རྣལ་འབྱོར་བཞི་རིམ། རྣལ་འབྱོར་བཞིའི་རིམ་པའི་ཊཱིཀྐ། འདུས་པའི་དཀའ་གནད་ཀྱི་ཟིན་བྲིས། རྒྱལ་བས་བྱིན་དང་ཤཱནྟི་པའི་གསང་འདུས་ཀྱི་འགྲེལ་པ་དང་དུལ་བས་བྱིན་གྱིས་སྒྲུ་འཕྲུལ་དཀྱིལ་ཆོག་གི་ཟིན་བྲིས། ཁྲོ་བཅུའི་ཟིན་བྲིས། ལྷག་པ་ཡི་ནི་ལྷ་གཅིག་ཉིད་ཅེས་པའི་དོན་བཤད་པ། བསམ་གཏན་ཕྱི་མ། གསང་བ་ཁྱད་གཞི། གྲུབ་ཆེན་བརྒྱད་ཀྱི་བཞུགས་ཚུལ། འཇམ་དཔལ་གསང་ལྡན་གྱི་དཔྱད་པ་ཡོངས་སུ་རྫོགས་ནས་ཟིན་བྲིས་སུ་གནང་བ། ཞེ་དགུ་མའི་ཟིན་བྲིས།འཇམ་དཔལ་ཞི་དྲག་གི་བསྲུང་བ། འཇིགས་བྱེད་ཀྱི་ཕྱག་མཚན་སོགས་ཀྱི་བཤད་པའི་ཟིན་བྲིས།

                    རྡོ་རྗེ་འཇིགས་བྱེད་ལྷ་བཅུ་གསུམ་མའི་སྒྲུབ་ཐབས་རིན་པོ་ཆེའི་ཟ་མ་ཏོག རྡོ་རྗེ་འཇིགས་བྱེད་ཆེན་པོའི་སྒྲུབ་ཐབས་བདུད་ཐམས་ཅད་ལས་རྣམ་པར་རྒྱལ་བ། གཤིན་རྗེ་དགྲ་ནག་གི་སྒྲུབ་པའི་ཐབས་རིན་པོ་ཆེ་འབར་བ། གཤིན་རྗེ་གཤེད་ལྷ་བཅུ་གསུམ་མ་རྣམས་ཀྱི་དཀྱིལ་འཁོར་དུ་དབང་བསྐུར་བའི་ཆོ་ག་རིན་པོ་ཆེའི་ཕྲེང་བ། འཇམ་དབྱངས་ཞི་ཁྲོ་སྦྲགས་སྒྲུབ་ཐུན་མོང་མ་ཡིན་པ། རྡོ་རྗེ་འཇིགས་བྱེད་སེར་པོ་ལ་བརྟེན་པའི་ཤིན་ཏུ་ཟབ་པའི་མན་ངག ཡི་གེ་བཞི་པའི་བསྲུང་བ་མན་ངག་རྩ་གསུམ་དང་གཤིན་རྗེ་སྦྱོར་ཚུལ་རྣམས་དང་རྩ་དང་གཤིན་རྗེ་སྦྱོར་ཚུལ། འཇིགས་བྱེད་ཀྱི་དག་སྦྱོར། རྡོ་རྗེ་འཇིགས་བྱེད་ཀྱི་འཕྲིན་ལས་བཞིའི་སྦྱིན་སྲེག་དངོས་གྲུབ་རྒྱ་མཚོ། བླ་མ་ལྔ་བཅུ་པའི་རྣམ་བཤད་སློབ་མའི་རེ་བ་ཀུན་སྐོང༌། བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ། བཅོམ་ལྡན་འདས་དཔལ་འཁོར་ལོ་བདེ་མཆོག་གི་མངོན་པར་རྟོགས་པའི་རྒྱ་ཆེར་བཤད་པ་འདོད་པ་འཇོ་བ། རྣལ་འབྱོར་གྱི་དབང་ཕྱུག་ལཱུ་ཧི་པའི་ལུགས་ཀྱི་བཅོམ་ལྡན་འདས་འཁོར་ལོ་སྡོམ་པའི་སྒྲུབ་པའི་ཐབས་བདེ་ཆེན་གསལ་བ། རྣལ་འབྱོར་གྱི་དབང་ཕྱུག་ལཱུ་ཧི་པའི་ལུགས་ཀྱི་བདེ་མཆོག་གི་རྫོགས་རིམ་གྱི་རྣམ་བཤད་དངོས་གྲུབ་སྙེ་མ། རྣལ་འབྱོར་གྱི་དབང་ཕྱུག་ལཱུ་ཧི་པའི་ལུགས་ཀྱི་བདེ་མཆོག་གི་རྫོགས་རིམ་རྣལ་འབྱོར་ཆེན་པོའི་ཁྲིད་ཀྱི་རིམ་པ་མདོར་བསྡུས་པ། དཔལ་མངོན་པར་རྟོགས་པའི་འགྲེལ་པ་ཁྱད་པར་གསལ་བྱེད་ལས་ཟུར་དུ་ཕྱུང་བ། མཁའ་འགྲོ་རྒྱ་མཚོའི་སྐོར་གྱི་ཟིན་བྲིས།གསང་སྔགས་ཀྱི་ཚུལ་ཁྲིམས་ཀྱི་རྣམ་བཤད་དངོས་གྲུབ་ཀྱི་སྙེ་མ། རྗེ་བཙུན་འཇམ་དཔལ་རྡོ་རྗེའི་སྒྲུབ་ཐབས་འཇམ་པའི་དབྱངས་ཀྱི་དགོངས་པ་གསལ་བ། ཆོ་ག་ཉི་ཤུའི་ཁུངས་དགོད་པ། རྣལ་འབྱོར་གྱི་དབང་ཕྱུག་དྲིལ་བུ་ལུགས་བདེ་མཆོག་ལུས་དཀྱིལ་གྱི་མངོན་རྟོགས་དགོངས་པ་རབ་གསལ།རྣལ་འབྱོར་གྱི་དབང་ཕྱུག་དྲིལ་བུ་ལུགས་བདེ་མཆོག་ལུས་དཀྱིལ་གྱི་དབང་ཆོག་རིན་པོ་ཆེའི་བང་མཛོད།

                    དཔལ་འཁོར་ལོ་བདེ་མཆོག་རིམ་ལྔའི་རྣམ་བཤད་སྦས་དོན་ལྟ་བའི་མིག་རྣམ་པར་འབྱེད་པ། མཁའ་སྤྱོད་མ་དམར་མོའི་སྒྲུབ་ཐབས། རྡོ་རྗེ་མཁའ་འགྲོའི་འགྲེལ་པའི་ཟིན་བྲིས། རྡོ་རྗེ་རྣལ་འབྱོར་མའི་འགྲེལ་པ་ཚེས་བཅུའི་མཆོད་པའི་རྟོག་པའི་ཆོ་ག་གྲུབ་ཆེན་དཱ་རི་ཀ་པས་མཛད་པའི་ཟིན་བྲིས། མན་ངག་སྙེ་མའི་ཟིན་བྲིས། དཔལ་འཁོར་ལོ་སྡོམ་པའི་ཕྱི་རོལ་མཆོད་པའི་ཆོ་ག་ལག་མཆོད་དང་དཔྱིད་ཀྱི་རྒྱལ་པོའི་གླུ། རྫོགས་རིམ་དཔྱིད་ཀྱི་ཐིག་ལེ། ཟབ་ལམ་ནཱ་རོའི་ཆོས་དྲུག་གི་སྒོ་ནས་ཁྲིད་པའི་རིམ་པ་ཡིད་ཆེས་གསུམ་ལྡན།  རྒྱུད་བརྟག་པ་གཉིས་པའི་ཟིན་བྲིས། ཀྱཻ་རྡོ་རྗེའི་རྒྱུད་ཀྱི་ཟིན་བྲིས་དང༌། ཀྱཻ་རྡོ་རྗེའི་ཟིན་བྲིས། རྗེ་བཙུན་མ་བདག་མེད་མའི་དཀྱིལ་འཁོར་གྱི་སྒྲུབ་ཐབས་ཟིན་བྲིས། དཔལ་མཆོག་གི་ཟིན་བྲིས། སངས་རྒྱས་ཐོད་པའི་མི་འཇིགས་གཞུང་འགྲེལ་སོགས་ཀྱི་ཟིན་བྲིས། ཀུན་རིག་ཆོ་གའི་ཟིན་བྲིས། མདོར་བསྡུས་དང་པོ་ལ་ཨ་ཙ་ལ་གརྦས་དོན་ཚན་བདུན་དུ་བྱེད་པ། འཕོ་ཁྲིད་ཀྱི་རྩ་ཚིག་བརྟག་པ་བརྒྱད་པའི་རབ་ཏུ་བྱེད་པ་གསུམ་པ། རྣམ་ཤེས་གོང་དུ་འཕོ་བའི་རྒྱ་ཆེར་བཤད་པ་གསེར་གྱི་སྒོ་འབྱེད། སྤྲིན་བྲལ་བའི་མན་ངག་དང་རྟ་མགྲིན་ཤྭ་ན་བཞི་བསྐོར། རི་ཁྲོད་ལོ་མ་ཅན་གྱི་སྒྲུབ་ཐབས། ལྷ་མོ་དབྱངས་ཅན་མའི་སྒྲུབ་ཐབས། དབྱངས་ཅན་མའི་སྒྲུབ་ཐབས། བཅོམ་ལྡན་འདས་རྨེ་བརྩེགས་ཀྱི་སྒྲུབ་ཐབས། དེ་ཉིད་བསྡུས་པའི་འགྲེལ་པའི་ཟིན་བྲིས། རྡོ་རྗེ་དབྱིངས་ཀྱི་ས་ཆོག་གི་ཟིན་བྲིས། རྡོ་རྗེ་དབྱིངས་ཀྱི་འཁོར་བསྒྱུར་གྱི་བསྙེན་པའི་རིམ་པ་སོགས་ཀྱི་ཟིན་བྲིས། སྦྱོར་དྲུག་གི་རྡོ་རྗེའི་ཚིགས་བཅད། དེའི་བཤད་པ། དུས་འཁོར་གྱི་མངོན་རྟོགས་དང་དབང་གི་ཟིན་བྲིས། སྦྱོར་དྲུག་ཉེར་མཁོའི་ཟིན་བྲིས། འཆི་ཞག་དང་ཚེ་ལྷག་ཇི་ཙམ་ཡོད་དཔྱད་པ་རྡོ་རྗེ་རྩེ་མོའི་ཟིན་བྲིས། ཡེ་ཤེས་མཁའ་འགྲོའི་སྒྲུབ་ཐབས། འཕོ་བ། བཀའ་བསྒོ་བྱ་ཚུལ།སྒྲ་མི་སྙན་གྱི་ཚེ་སྒྲུབ། འདུལ་བ་མདོ་རྩ་བའི་ཟིན་བྲིས། གཞི་ནས་འབྱུང་བའི་བསླབ་བྱའི་ཟིན་བྲིས། ཞུགས་པ་དང་གནས་པའི་སྐྱེས་བུ་ཆེན་པོ་རྣམས་ཀྱིས་རྣམ་པར་བཞག་པ་བློ་གསལ་བགྲོད་པའི་ཐེམ་སྐས། གཟུགས་ཀྱི་ཆུང་མཐའ་དང་དུས་ཀྱི་ཐུང་མཐའ་སོགས་ལས་བརྩམས་པའི་དྲིས་ལན། བླ་མའི་རྣལ་འབྱོར་ཟབ་ཁྱད་ཅན་མཁས་གྲུབ་རྗེ་ལ་གནང་བ། བ་སོ་ཆོས་རྗེ་ལ་གཅིག་བརྒྱུད་ཀྱི་ཚུལ་དུ་གནང་བའི་བླ་མའི་རྣལ་འབྱོར། ཞུ་ལན་སྨན་མཆོག་བདུད་རྩིའི་ཕྲེང་བ། སྡོམ་པ་གོང་མ་གཉིས་ཀྱི་ཕྱིར་བཅོས། གཏོར་མ་བརྒྱ་རྩའི་རིམ་པ། རྗེ་རང་ཉིད་ཀྱི་གསན་ཡིག བྱང་ཆུབ་ལམ་གྱི་རིམ་པའི་བླ་མ་བརྒྱུད་པ་ལ་གསོལ་བ་འདེབས་པའི་ཚུལ་ལམ་མཆོག་སྒོ་འབྱེད་སོགས་བསྟོད་ཚོགས་དང་ཆབ་ཤོག་དྲིས་ལན་སོགས་གསུང་ཐོར་བུ་བ། རྗེ་རིན་པོ་ཆེ་རང་ཉིད་ཀྱིས་ཇི་ལྟར་ཐུགས་ཉམས་སུ་བཞེས་པ་ལྟར་མདོ་སྔགས་གཉིས་ཀའི་ལམ་གྱི་ལུས་ཡོངས་སུ་རྫོགས་པའི་ཉམས་ལེན་འདི་ལྟར་བྱ་དགོས་སོ་ཞེས་འདོམས་པའི་ཉམས་མགུར་ལམ་རིམ་བསྡུས་དོན་དུ་གྲགས་པ་རྣམས་མཛད།

                                                                                                                                     རྩོམ་སྒྲིག་པ། མང་ར་བ།
            གསལ་འདེབས། 
                   རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                    དྲ་བའི་སྦྲེལ་ཐགhttp://www.tb1025.cn