དེ་བཞིན་དུ་བྱུང་ཆུབ་སེམས་དཔའི་བསླབ་པའི་གནས་ལའང་དང་པོར་སྨོན་སེམས་དང་འཇུག་སྡོམ་ལེན་ལུགས། བླངས་ནས་སྨིན་པའི་བསླབ་བྱ་ཐུན་མོང་དང་ཐུན་མོང་མ་ཡིན་པ་རྣམས་དང༌། འཇུག་སྡོམ་གྱི་བསླབ་བྱར་རྩ་ལྟུང་དང་ཉེས་བྱས་བསྲུང་ཚུལ། འཇུག་སྡོམ་གྱི་སྒྲུབ་པའི་བསླབ་བྱ་ཚུལ་ཁྲིམས་རྣམ་པ་གསུམ་མམ་ཕྱིན་དྲུག་དང་བསྡུ་བཞི་ལ་སློབ་ཚུལ། དེ་དག་ཐམས་ཅད་ཐེག་ཆེན་གྱི་མདོ་གང་དང་གང་ནས་གསུངས་ཚུལ། མདོའི་དགོངས་པ་ཤིང་རྟ་ཆེན་པོས་བཀྲལ་ཚུལ། ཤིང་རྟ་ཆེན་པོའི་ལམ་སྲོལ་འཛིན་པའི་བླ་མ་གོང་མ་གཅིག་ནས་གཅིག་ཏུ་བརྒྱུད་པའི་ཕྱག་ལེན་ལ་སྲུང་ཐབས་ཇི་ལྟར་ཡོད་ཚུལ། དེ་དག་ལས་འདས་ན་བཤགས་པ་ཇི་ལྟར་བྱེད་ཚུལ། དེ་དག་ཐམས་ཅད་ཕྱག་ལེན་ལ་འདེབས་ཚུལ་རྣམས་མཐའ་དག་པར་ཐུགས་སྲས་སེམས་དཔའ་ཆེན་པོ་རྣམས་ལ་ཁྲིད་ཅིང་ཕྱི་རབས་ཀྱི་གདུལ་བྱ་རྣམས་ཀྱི་དོན་དུ་ཚུལ་ཁྲིམས་ལེའུའི་རྣམ་བཤད་བྱང་ཆུབ་གཞུང་ལམ་སོགས་སུ་མཐའ་དག་པར་གཏན་ལ་འབེབས་པར་མཛད་དེ། འདི་ལྟ་བུ་དང་མཚུངས་པ་གངས་རིའི་ཁྲོད་འདིར་སྔོན་མ་བྱུང་བ་ཀུན་ལ་གསལ་བ་ལྟར་རོ། །

                   ཐེག་པ་ཐུན་མོང་བའི་ལམ་གྱི་གནད་ཐམས་ཅད་ཉམས་ལེན་གྱི་རིམ་པར་བསྡུད་དེ་རྒྱལ་བའི་གསུང་རབ་དགོངས་འགྲེལ་དང་བཅས་པ་ལས་གེ་ན་གཅིག་ཀྱང་དོར་དུ་མེད་པར་གང་ཟག་གཅིག་ལས་དང་པོ་པའི་ས་ནས་སངས་རྒྱས་ཀྱི་སའི་བར་དུ་རིམ་གྱིས་འཁྲིད་པའི་ཉམས་ལེན་དུ་སྦྱར་ཏེ་གཏན་ལ་འབེབས་པ་བྱང་ཆུབ་ལམ་རིམ་ཆེ་ཆུང་དང༌། དེ་ཡང་ཤེར་ཕྱིན་གྱི་མདོ་སྡེ་རིན་པོ་ཆེའི་དོན་རྗེ་བཙུན་བྱམས་པས་གསུངས་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་དང་སྦྱར་ཏེ་མཐའ་དག་པར་གཏན་ལ་འབེབས་པའི་བསྟན་བཅོས་ལེགས་བཤད་གསེར་གྱི་ཕྲེང་བ་དང༌། འཕགས་པ་ཀླུ་སྒྲུབ་ཀྱི་དགོངས་པ་ལྟར་ཟབ་མོ་དབུ་མའི་ལྟ་བ་མཐའ་དག་པར་གཏན་ལ་འབེབས་པ་རྩ་ཤེའི་རྣམ་བཤད་ཆེན་མོ་རིགས་པའི་རྒྱ་མཚོ་དང༌། དབུ་མ་ལ་འཇུག་པའི་རྣམ་བཤད་དགོངས་པ་རབ་གསལ་དང༌། དྲང་བ་དང་ངེས་པའི་དོན་རྣམ་པར་འབྱེད་པ་ལེགས་བཤད་སྙིང་པོ་ཆེ་བ་དང༌། རྒྱལ་བའི་དགོངས་པ་འཕགས་པ་ཀླུ་སྒྲུབ་ཀྱིས་བཀྲལ་བའི་ངེས་དོན་མཐར་ཐུག་རྟེན་འབྲེལ་ཟབ་མོའི་ཚུལ་ཆེས་གསལ་བར་སྟོན་པ་ལེགས་བཤད་སྙིང་པོ་ཆུང་བ་སོགས་སྔོན་མེད་པའི་བསྟན་བཅོས་ཆེན་པོ་འདི་དག་མཛད་ཅིང༌། བསྟན་བཅོས་ཆེན་པོ་དེ་དག་གི་བཤད་རྒྱུན་ཡང་ད་ལྟའི་བར་དུ་མ་ཉམས་པར་བཞུགས་པས་འདི་ལྟ་བུའི་སངས་རྒྱས་ཀྱི་འཕྲིན་ལས་ལ་འགྲན་བཟོད་པ་སུ་ཡང་མེད་དོ། །

                    གངས་རིའི་ཁྲོད་ཀྱི་མཁས་པ་མཐའ་ཡས་པས་རྗེ་རིན་པོ་ཆེའི་གསང་གསུམ་མཛད་འཕྲིན་ལ་ཇི་ལྟར་བསྔགས་པའི་ཚུལ་སོགས། ཚུལ་འདི་དག་ལ་གཟུ་བོའི་བློས་དཔྱད་ན་དེ་དེ་བཞིན་ནོ་ཞེས་ཐལ་མོ་སྦྱོར་བ་ལས་འོས་མེད་དེ། སྔོན་དུས་གངས་རིའི་ཁྲོད་འདིར་རིག་གནས་མཐའ་དག་མཁས་པའི་དབང་པོར་གྲགས་པ་སྟག་ཚང་ལོ་ཙཱ་བས་ཀྱང་ཐོག་མར་ཁོང་རང་རྗེའི་རྗེས་འཇུག་མིན་གཤིས་བྲག་ཅའི་སྒྲ་བཞིན་གཞན་ཟེར་གྱི་རྗེས་སུ་འབྲངས་ཏེ་རྗེའི་གསུང་ལ་དགག་པ་ཅི་རིགས་མཛད་ཀྱང་རྗེས་སུ་ལེགས་བཤད་གསེར་ཕྲེང་སོགས་རྗེའི་གསུང་རྣམས་ལ་བལྟས་ཏེ་ལེགས་པར་བརྟགས་པ་ན་སྔར་བྱས་ལ་ནོར་ཞིང་འགྱོད་པ་དང༌། རྗེ་རིན་པོ་ཆེའི་བསྟན་པ་ལ་ཡིད་ཆེས་ཀྱི་དད་པ་གཏིང་ཚུགས་པ་སྐྱེས་ཏེ་བཤགས་པ་དང་སྨོན་ལམ་གྱི་ཚིག །བློ་ཆེན་རྒྱལ་བ་རྣམས་ཀྱི་སྤྱན་སྔ་རུ། །བཟང་པོའི་སྨོན་ལམ་རླབས་ཆེན་གྲུབ་པའི་མཐུས། །གྲགས་པའི་སྒྲ་ཆེན་ཐུབ་བསྟན་འགྲོ་བའི་དཔལ། །བློ་བཟང་གྲགས་པའི་དཔལ་ལ་གུས་ཕྱག་འཚལ། །ཞེས་སོགས་བཤགས་པ་དང་སྨོན་ལམ་མང་དུ་མཛད་ཅིང༌། དེའི་རྒྱུ་མཚན་ཡང༌། ཁྱོད་བློའི་ཉི་མ་གཞོན་ནུའི་དུས་ཀྱི་ཚེ། །མདོ་དང་རྒྱན་གྱི་པད་ཚལ་རྒྱས་མཐོང་ནས། །བདག་བློ་ཁེངས་པའི་ཀུ་མུད་ལྷག་པར་ཟུམ། །ཟབ་ཡངས་མཁྱེན་པའི་གཏེར་ལ་གསོལ་བ་འདེབས། །ཞེས་སོགས་རྗེའི་གསུང་རབ་རྣམས་ལ་གཟུ་བོའི་བློས་དཔྱད་ནས་ཡིད་ཆེས་སྐྱེས་པ་ཡིན་ཚུལ་གསལ་བར་གསུངས་འདུག་པ་དང༌།

                   དེ་བཞིན་དུ་ཀརྨ་པ་མི་བསྐྱོད་རྡོ་རྗེས་ཀྱང་ཕར་ཕྱིན་གྱི་ཊྭཱིཀྐ་སོགས་ཡིག་ཆ་འགའ་ཞིག་ཏུ་གཞན་གྱི་འདོད་ངོ་དང་བསྟུན་ནས་རྗེ་རིན་པོ་ཆེས་འཕགས་པ་ཀླུ་སྒྲུབ་ཀྱི་དགོངས་པ་ཐུན་མོང་མིན་པ་ཇི་བཞིན་བཀྲལ་བའི་ལྟ་བའི་གནད་རྣམས་ལ་དགག་པ་ཅུང་ཟད་མཛད་ཀྱང༌། རྗེས་སུ་ཁོང་རང་གིས་མཛད་པའི་ཕར་ཕྱིན་གྱི་ཊཱིཀྐ་དེ་རྒྱལ་བ་དགེ་འདུན་རྒྱ་མཚོ་ལ་ཕུལ་ནས་སེ་འབྲས་ཀྱི་ཆོས་རྗེ་རྣམས་ཀྱིས་འདི་ལ་གཟིགས་ནས་འཐད་མི་འཐད་ཀྱི་དཔྱད་པ་མཛོད་གསུངས་པ་ན། སེ་ར་རྗེ་བཙུན་པས་དཔལ་མགོན་འཕགས་པ་ཀླུ་སྒྲུབ་ཀྱི་དགོངས་པ་རྗེ་རིན་པོ་ཆེས་བཀྲལ་བ་དང་མི་མཐུན་པ་རྣམས་དྲི་མ་མེད་པའི་རིགས་པས་སུན་དབྱུང་སྟེ་མཐའ་ཆོད་པར་མཛད་པ་བཀའ་ལན་ཀླུ་སྒྲུབ་དགོངས་རྒྱན་མཛད་ནས། ཀརྨ་པ་མི་བསྐྱོད་རྡོ་རྗེ་ལ་ཕུལ་བ་ན། རྗེ་ཀརྨ་པ་ཤིན་ཏུ་མཉེས་ནས།སེ་ར་རྗེ་བཙུན་པ་ལ་ཞུ་ཡིག་གནང་བར་ཡང༌། དེང་སང་གི་སྐྱེ་བོ་བློ་ཆུང་འགའ་ཞི་རང་རང་གི་ལུགས་ལ་རྨོངས་ཞེན་གྱིས་འདི་ཁོ་ན་བདེན་གྱི་གཞན་ནི་གཏི་མུག་གོ་ཞེས་བརྗོད་པ་དག་གི་འདོད་པ་དང་བསྟུན་པའི་བརྗོད་ཚུལ་ཙམ་ལས་ངེད་རང་ནི་རྗེའི་གསུང་རབ་རྣམས་ལ་ཡིད་ཆེས་ཀྱི་དད་པ་གཏིང་ཚུགས་པར་ཡོད་ཅེས་གསུངས་འདུག་པ་དང༌། འབྲུག་པ་མི་ཕམ་པདྨ་དཀར་པོས་ཀྱང་སྐུ་ཚེའི་སྟོད་ལ་ཕྱོགས་སུ་ལྷུང་བའི་སྐྱེ་བོ་འགའ་ཞིག་གི་ཚིག་གི་རྗེས་སུ་ཞུགས་ཏེ་རྗེའི་གསུང་ལ་སྐྱོན་བརྗོད་ཅི་རིགས་ཤོར་ཡང་རྗེས་སུ་རྗེའི་གསུང་རབ་རྣམས་ལ་ཞིབ་ཏུ་གཟིགས་པ་ན་ཐུགས་འགྱོད་ཆེན་པོ་སྐྱེས་ཏེ་དགའ་ལྡན་དུ་ཕེབས་ནས་རྗེ་རིན་པོ་ཆེའི་སྐུ་གདུང་ལ་མཆོད་པ་ཚད་མེད་པ་ཕུལ་ཏེ་བཤགས་ཤིང་སྨོན་ལམ་འདེབས་པར་མཛད་པ་དང་རྗེ་ལ་བསྟོད་པ་མཛད་པའི་ཚིགས་བཅད་ལས་ཀྱང༌། ཆོས་ཀྱི་རྒྱལ་པོ་ཆེན་པོ་ཤར་ཙོང་ཁ་པ་བློ་བཟང་གྲགས་པའི་དཔལ་གྱི་ཞབས་ཀྱི་པདྨོ་དྲི་མ་མེད་པ་ལ་ཕྱག་འཚལ་ལོ། །དགེ་ལེགས་ཆུ་གཏེར་ཆེན་པོས་འཇིག་རྟེན་ལ། །བློ་བཟང་ཉིད་མོར་བྱེད་པ་ཁྱོད་སྦྱིན་ཚུན། །ས་འདི་རྨོངས་པའི་མུན་ལས་རྣམ་རྒྱལ་ཞེས། །གྲགས་པའི་གཞིར་གྱུར་དེ་ལ་ཕྱག་འཚལ་ལོ། །གང་དང་རྒྱལ་བ་ཀུན་གྱི་ཡོན་ཏན་ནི། །སྲང་ལ་གཞལ་བཞིན་ལྕེ་ཡང་མ་མཆིས་པས།།ལྔ་བརྒྱ་པ་ཡི་གཙུག་རྒྱན་དུ་འོས་པ། །ཐམས་ཅད་མཁྱེན་པ་ཁྱོད་ལ་ཕྱག་འཚལ་ལོ། །སེང་གེའི་ཁྲི་ལ་སེང་གེའི་སྒྲ་བསྒྲགས་པས། སྨྲ་བའི་གླང་ཆེན་ཐམས་ཅད་དངངས་གྱུར་ཕྱིར། །མཚུངས་བྲལ་ཁྱོད་ནི་སེང་གེའི་ང་རོའི་མཚན། །བསྐལ་བཟང་སྒྲོན་མར་གྱུར་ལ་ཕྱག་འཚལ་ལོ། །ལྷག་པའི་ཚུལ་ཁྲིམས་ཧ་རི་ཙན་དན་བསུང༌། ཁྱོད་དྲིན་དྲི་བཞོན་གྱིས་འདིར་ཁྱོངས་པས་སུ། །འཁོར་བའི་ཚ་གདུང་མིང་ཙམ་ལྷག་གྱུར་པས། །སློབ་མར་བཅས་པ་བསྔགས་འོས་དེར་ཕྱག་འཚལ། །ཞེས་སོགས་བསྔགས་པའི་ཚིགས་བཅད་མང་དུ་འབྱུང་བ་ལྟར་རོ། །

                                                                                                                                          རྩོམ་སྒྲིག་པ། མང་ར་བ།
            གསལ་འདེབས། 
                   རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                    དྲ་བའི་སྦྲེལ་ཐགhttp://www.tb1025.cn