གཞན་ཡང་གནས་དེ་ཉིད་དུ།རྗེ་རིན་པོ་ཆེ་རང་ཉིད་ཀྱིས་སྔར་གནམ་རྩེ་ལྟེང་དང་ལམ་པ་དགོན་པ་སོགས་སུ་སྨོན་འཇུག་གི་སྡོམ་པ་གནང་བ་འགའ་ཞིག་གི་གཙོས་ཐེག་པ་ཆེན་པོའི་ལམ་ལ་སློབ་པར་འདོད་པ་རྣམས་ལ་ཐུགས་བརྩེ་བས་དགོངས་ནས་བྱང་སའི་ཚུལ་ཁྲིམས་ལེའུའི་རྒྱ་ཆེར་འགྲེལ་ཡང་མཛད་ཅིང༌། དོན་གཉེར་ཅན་མང་པོས་གསོལ་བ་དྲག་ཏུ་བཏབ་པ་ལ་བརྟེན་ནས། རྩ་ལྟུང་དང་བླ་མ་ལྔ་བཅུ་པའི་རྣམ་བཤད་ཀྱང་མཛད་དོ། །དེ་ནས་ལོ་ཆེན་སྐྱབས་མཆོག་དཔལ་བཟང་པོ་བྱང་ཆུབ་ལམ་རིམ་གྱི་གླེགས་བམ་ཕྱག་ཏུ་བཞེས་ཤིང་ལེགས་བཤད་རིན་པོ་ཆེའི་སྐྱེས་ཀྱིས་ཐུགས་ཀྱི་བང་མཛོད་གཏམས་ཏེ་གཙང་ལ་ཕྱགས་བཏེག །རྗེ་རིན་པོ་ཆེས་དབྱར་དགུན་གཉིས་ཙམ་དེ་ཉིད་དུ་བཞུགས་ནས་ལམ་རིམ་ལ་སོགས་པ་ཆོས་མང་དུ་གསུངས། ཆོ་འཕྲུལ་ཆེན་པོའི་དུས་མཆོད་ལ་མཆོད་པ་དང་སྨོན་ལམ་ཤིན་ཏུ་རླབས་ཆེ་ཞིང་ངོ་མཚར་བ་མཛད་དོ། །དེ་ནས་རིམ་གྱིས་བྱོན་ནས་ལྷས་ཕུ་དགོན་གསར་དུ་ཕྱགས་ཕེབས། བློ་གྲོས་དང་ལྡན་པའི་སྡེ་སྣོད་འཛིན་པ་དུ་མ་ལ་ཚད་མ་རྣམ་འགྲེལ་གྱི་བརྗོད་བྱའི་གཙོ་བོ་མཐའ་དག་རིགས་པའི་ལམ་ནས་དྲངས་ཏེ་གཞུང་ལམ་གྱི་རིམ་པར་བསྒྲིགས་ནས་ཉམས་ལེན་ལ་སྦྱར་ཏེ་གསུངས་པས། སྡེ་སྣོད་འཛིན་པ་ཐམས་ཅད་སྔོན་ལན་ཅིག་ཀྱང་མ་མྱོང་བའི་ལེགས་པར་བཤད་པའི་བདུད་རྩིའི་རོ་ཕུལ་དུ་བྱུང་བ་མྱོང་བས་ཡིད་རང་དབང་མེད་པར་ཕྲོགས་ཏེ་ངོ་མཚར་བའི་གཏམ་གྱིས་དུས་འདའ་བར་བྱེད་ཅིང༌། དེ་ཕྱིན་ཆད་ཀྱང་སྐབས་སྐབས་སུ་གསུངས་པས། སྔོན་ཆད་གངས་རིའི་ཁྲོད་འདིར་ཚད་མ་ཚིག་གི་ན་ཡམ་མམ། ཕྱིའི་གོ་རྒྱ་གཅོད་པའི་ཚེ་བསྟན་བཅོས་གཞན་བལྟ་བ་ལ་ཅུང་ཟད་དྲག་ཏུ་འགྲོ་བའི་ཡན་ལག་ཙམ་དུ་ཉེ་བར་མཁོ་བར་ཟད་ཀྱི། འདི་ཉམས་ལེན་ལ་མཁོ་བའི་ཐེ་ཚོམ་ཙམ་ཡང་སུ་ལའང་མེད་པས། ཕལ་མོ་ཆེ་ཞིག་དོན་མ་ཡིན་པ་སྐྱེད་པར་བྱེད་པ་ལ། ད་ལྟ་བློ་གྲོས་དང་ལྡན་ཞིང་གཟུ་བོར་གནས་པ་དག་ལ། འདི་ཉིད་ཉམས་ལེན་སྟོན་པའི་བསྟན་བཅོས་ཤིག་ལ་རྨད་དུ་བྱུང་བའི་ཕྱོགས་མཐོང་ཙམ་ཡོད་པ་འདི་ནི་རྗེ་རིན་པོ་ཆེ་འདི་འབའ་ཞིག་གི་ཐུགས་རྗེ་ལ་བརྟེན་པ་ཡིན་ཏེ། འདི་ཙམ་བཀའ་དྲིན་ཡང་གངས་ཅན་པ་ཡོངས་ཀྱིས་གསབ་པར་སླ་བ་མ་ཡིན་ནོ། །དེ་དུས་རྗེ་རིན་པོ་ཆེས་ཚད་མའི་ལམ་བསྒྲིགས་གསུངས་པ་རྣམས་རྗེ་དར་མ་རིན་ཆེན་གྱིས་ཟིན་བྲིས་སུ་བཏབ་སྟེ་དེང་སང་ཚད་མའི་བརྗེད་བྱང་དུ་གྲགས་པ་འདི་ཡིན་ནོ། །དེ་ནས་མིའི་དབང་པོ་གྲགས་པ་རྒྱལ་མཚན་པས་ནན་ཆེར་གསོལ་བ་བཏབ་པ་ལ་བརྟེན་ནས་འོ་ན་བདེ་ཆེན་སྟེང་དུ་ཕེབས། སྡེ་སྣོད་འཛིན་པ་བརྒྱ་ཕྲག་དུ་མ་འདུས་པ་རྣམས་ཀྱིས་དེ་ཉིད་དུ་དབྱར་གནས་པར་ཞལ་གྱིས་བཞེས་ཏེ། རྒྱལ་བཟང་སྨོན་མཁར་ནས་ཞབས་ཏོག་བསམ་གྱིས་མི་ཁྱབ་བསྒྲུབས། བྱང་ཆུབ་ལམ་གྱི་རིམ་པའི་ཁྲིད་དང༌། དབུ་ཚད་ཀྱི་དཀའ་བའི་གནད་འགྲོལ་བའི་ཆོས་མང་དུ་གསུངས། དེ་ནས་འོ་དེ་གུང་རྒྱལ་གྱི་ལྷ་ཞོལ་འོལ་ཁའི་བྱམས་པ་གླིང་དུ་ཕྱགས་ཕེབས་དོན་གཉེར་ཅན་རྣམས་ལ་ལམ་རིམ་དང་བསྐྱེད་རྫོགས་ཀྱི་ཆོས་མང་དུ་གསུངས། དེ་ནས་རྗེ་རིན་པོ་ཆེ་སྐུ་མཚམས་ཤིན་ཏུ་དམ་པ་ལ་བཞུགས་ཏེ་བླ་མ་དང་རྗེ་བཙུན་འཇམ་པའི་དབྱངས་དབྱེར་མ་མཆིས་པ་ལ་གསོལ་བ་ཤུགས་དྲག་ཏུ་འདེབས་པར་མཛད་པས། རྗེ་བཙུན་འཇམ་པའི་དབྱངས་ཀྱིས་སློབ་དཔོན་ཀླུའི་བྱང་ཆུབ་ཀྱིས་མཛད་པའི་གསང་བ་འདུས་པའི་མན་ངག་རྣམ་གཞག་རིམ་པའི་ཊཱིཀྐ་ཞིག་བྱས་ན་བསྟན་པར་ཕན་ཆེ་ཞེས་གསུངས་པ་ལྟར་རྣམ་གཞག་རིམ་པའི་ཊཱིཀྐ་མཛད་དེ་དོན་གཉེར་ཅན་རྣམས་ལ་ཞིབ་པར་གསུངས། དེ་ཡང་སྤྱིར་རིམ་ལྔའི་དོན་དང༌། ཁྱད་པར་རིམ་པ་གསུམ་པའི་སྒྱུ་ལུས་ཀྱི་སྒྲུབ་ཚུལ་སོགས་དཔལ་གསང་བ་འདུས་པའི་རྩ་བཤད་ཀྱི་རྒྱུད་དང༌།འཕགས་པ་ཡབ་སྲས་ལྔའི་གཞུང་ནས་འབྱུང་བའི་དོན་ཐུན་མོང་མ་ཡིན་པར་རགས་པ་རྣམས་དཔྱིས་ཕྱིན་པ་ཞིག་ལེགས་པར་གོ་ནས་དེ་དུས་ལོ་བཅུ་ལྷག་སོང་བ་ལ་དེ་བར་དུ་སྨྲ་མ་ནུས། དེ་ནས་དེ་དུས་ཟུར་ཙམ་སྨྲས་པ་ཡིན་ཞེས་གསུངས་སོ། །

                    དེ་ནས་ལོ་ཆེན་སྐྱབས་མཆོག་དཔལ་བཟང་པོ་དང༌། སྤྱན་སྔ་བ་བསོད་ནམས་བཟང་པོ་སོགས་དམ་པ་མང་པོས་གསོལ་བ་བཏབ་པ་ལ་བརྟེན་ནས།རྒྱུད་སྡེ་བཞིའི་ལམ་གྱི་ལུས་ཡོངས་སུ་རྫོགས་པ་སྟོན་པའི་བསྟན་བཅོས་ཆེན་པོ་གསང་ཆེན་ལམ་གྱི་རིམ་པ་མཛད་དེ་གངས་རིའི་ཁྲོད་འདིར་གསང་སྔགས་རྒྱུད་སྡེ་བཞིའི་ལམ་གྱི་རིམ་པ་ལ་སྔོན་མེད་པའི་ཤིང་རྟའི་ལམ་སྲོལ་ཕྱེ་བར་མཛད་དོ། །དེ་ནས་སྡེ་སྣོད་འཛིན་པ་དུ་མ་ལ་གསང་སྔགས་ལམ་རིམ་གསུངས། དེའི་ཚེ་བར་ཆད་ཀྱི་ལྟས་ཤིན་ཏུ་རྩུབ་པ་ཅི་རིགས་པ་བྱུང༌། དགེ་བཤེས་གཅིག་གཉིས་ཀྱང་འདས་པ་ལ། དཔོན་སློབ་རྣམས་ཀྱིས་སྐུ་མཚམས་དམ་པར་མཛད་དེ་ཐུགས་དམ་དང་ཟློག་པ་སོགས་ལ་ཤིན་ཏུ་འགྲུས་པར་མཛད་པས་ཚེགས་མེད་པར་བཟློག དེའི་ཚེ་བཅོམ་ལྡན་འདས་རྡོ་རྗེ་འཇིགས་བྱེད་ཀྱི་སྒྲུབ་ཐབས་བདུད་ཐམས་ཅད་ལས་རྣམ་པར་རྒྱལ་བ་དང་སྦྱིན་སྲེག་གི་ཆོ་ག་རྒྱས་པའི་རྩོམ་པ་ཡང་མཛད་དོ། །རྗེ་རིན་པོ་ཆེ་འདི་ཉིད་ཐུགས་དམ་སྒོམ་བཟླས་སོགས་མཛད་པའི་སྐབས་སུ་སྐུ་མདུན་ན་ཡོད་པ་རྣམས་ཀྱིས་སྒོ་གསུམ་གྱི་སྤྱོད་པ་ཅི་བྱས་ཀྱང་ཆེད་དུ་གཏད་ནས་ཐུགས་བཅུག་ན་མ་གཏོགས་ཐུགས་ཀྱིས་དེ་རྣམས་ཅི་ཡང་མི་ངེས་པ་ཞིག་ཡོད་པར་གསུངས། དེ་དུས་ཐུགས་སྲས་རྣམས་ཀྱིས་ཐུགས་དམ་རྐྱེན་གང་གིས་ཀྱང་མི་གཡེང་བ་འདི་དུས་ཇི་ཙམ་ནས་ལགས་ཞུས་པས། དགེ་སྦྱོར་གྱི་དུས་སུ་དེ་ལྟར་འོང་བ་བྱམས་པ་གླིང་ནས་ཡིན།ལྟ་རྟོག་དང་དཔྱད་པ་ཞིབ་པོ་བྱེད་པའི་སྐབས་སུ་དེ་ལྟར་འོང་བ་སྔ་མོ་ནས་ཡོད་ཅེས་གསུངས་སོ། །གནས་དེར་ལོ་གཉིས་བཞུགས། དེ་ནས་བྱང་ཆུབ་ལུང་དུ་དགུན་བཞུགས་མཛད། སྔགས་མཚན་ཉིད་ཀྱི་སྡེ་སྣོད་འཛིན་པ་བརྒྱ་ཕྲག་དུ་མ་ལ་གསང་སྔགས་ལམ་རིམ་གསུངས། སོས་ཀ་སྐྱིད་ཤོད་དུ་བྱོན། སྣེའུ་ནས་དད་པ་དྲག་པོས་ཞབས་ཏོག་ཚད་མེད་པ་ནར་མར་མཛད་དེ་དབྱར་གནས་སེ་ར་ཆོས་སྡིངས་སུ་བཞུགས། སྐུ་མཚམས་ཤིན་ཏུ་དམ་པར་མཛད། གསང་འདུས་རིམ་ལྔ་དང༌། དཔྱིད་ཐིག་སོགས་མ་རྒྱུད་ཀྱི་རྫོགས་རིམ་འགའ་ཞིག་གསུངས། གནས་དེར་མཁས་གྲུབ་བསྟན་པའི་ཉི་མ་དགེ་ལེགས་དཔལ་བཟང་པོས་ཀྱང་མཇལ། དེར་གསོལ་བ་འདེབས་པ་མང་པོའི་ངོར་དབུ་མ་རྩ་ཤེའི་རྒྱ་ཆེར་འགྲེལ་མཛད་པར་བཞེད་ནས་གཞུང་གི་རིགས་པའི་དཀའ་གནད་ཕྲ་མོ་རྣམས་ལ་དཔྱད་པ་ཞིབ་ཏུ་མཛད་པས། རིགས་པ་ཕྲ་མོ་འགའ་ཞིག་ལ་དོགས་པ་ཅུང་ཟད་དཔྱད་དཀའ་བ་བྱུང་ནས། བླ་མ་དང་རྗེ་བཙུན་འཇམ་པའི་དབྱངས་ལ་གསོལ་བ་དྲག་ཏུ་བཏབ་པས། སྐབས་ཤིག་ན། ཤེས་རབ་ཀྱི་ཕ་རོལ་ཏུ་ཕྱིན་པའི་མདོའི་སྟོང་ཉིད་ཉི་ཤུའི་འགྲེས་རྐང་རྣམས་གསེར་བཙོ་མ་ཡི་གེར་བཀོད་པའི་རྣམ་པས་བར་སྣང་ཁྲིག་གིས་གང་བར་གཟིགས་པ་ཡང་ཡང་བྱུང་བས། རྩ་ཤེའི་རིགས་པ་ཤིན་ཏུ་ཕྲ་བ་རྣམས་ལའང་དོགས་པ་ལྷག་མ་མེད་པར་འབད་མེད་དུ་ཆོད་སོང་གསུངས་སོ། །དེ་ནས་ར་ཁ་བྲག་ཏུ་ཕེབས་ནས་དྲང་བ་དང་ངེས་པའི་དོན་རྣམ་པར་འབྱེད་པའི་བསྟན་བཅོས་ལེགས་བཤད་སྙིང་པོ་མཛད། སེ་ར་ཆོས་སྡིངས་སུ་རྩ་ཤེའི་རྣམ་བཤད་ཆེན་མོ་མཛད།

                   དེའི་ཚེ་རྒྱ་ནག་གི་རྒྱལ་པོ་ཆེན་པོ་ཏ་མིང་གིས་རྗེ་རིན་པོ་ཆེ་འདི་ལ་དད་པ་ཆེན་པོས་ལུང་དང་གནང་སྦྱིན་དཔག་ཏུ་མེད་པའི་འབུལ་སྐྱེལ་དང༌། རྒྱ་ཡུལ་དུ་བསོད་ནམས་ཀྱི་ཞིང་དང༌། སྐྱེ་བོ་མཐའ་དག་ལ་དམ་པའི་ཆོས་ཀྱི་བཀའ་དྲིན་མཛད་པའི་སླད་དུ་སྤྱན་འདྲེན་པའི་གསོལ་བ་ནན་ཆེན་འདེབས་པ་ལ་གསེར་ཡིག་པ་ཏཱ་ཞིང་བཞིས་འགོ་བྱས་བརྒྱ་ཕྲག་མང་པོ་མངགས་བྱུང་བ་ལ། དང་པོར་ཅུང་ཟད་དབེན་པ་འདྲར་མངོན་ཆུང་བར་བཞུགས་ཏེ་གསེར་ཡིག་པ་རྣམས་མཇལ་དུ་མ་གནང༌། རྗེས་སུ་མི་དབང་གྲགས་པ་རྒྱལ་མཚན་པས་གཙོ་མཛད། དཔོན་ནམ་མཁའ་བཟང་པོ་བ་དང་བཅས་པ་ངོ་ཆེན་ལ་སྦྲན་ནས་གསེར་ཡིག་པ་རྣམས་ཀྱིས་མཆི་མ་ཕྱུང་ཞིང་ཞུ་བ་ནན་གྱིས་ཕུལ་བས་རྗེ་རིན་པོ་ཆེས་སེ་རར་ཕེབས།མཇལ་ཁ་གནང༌། འབུལ་བ་རྣམས་བཞེས། རྒྱ་ཡུལ་ལ་འབྱོན་པ་དགག་བྱ་ཆེ་ཞིང་དགོས་པ་ཆུང་བའི་རྒྱུ་མཚན་དང་བཅས་པའི་ཞལ་ཏ་ནན་ཅན་ཞིབ་པར་བྱོན་ནས་བྱམས་ཆེན་ཆོས་རྗེ་སྐུ་ཚབ་ཏུ་མངགས་ཏེ་གོང་མའི་གསེར་ཡིག་པ་རྣམས་ཕྱིར་སློག དེ་ནས་སེ་ར་ཆོས་སྡིངས་སུ་སྡེ་སྣོད་འཛིན་པ་བརྒྱ་ཕྲག་མང་པོ་ཚོགས་པ་ལ་རྩ་ཤེ དྲང་ངེས་རྣམ་འབྱེད།བཞི་བརྒྱ་པ། གསང་སྔགས་ལམ་རིམ། རྩ་ལྟུང་དང་བླ་མ་ལྔ་བཅུ་པ་ལ་སོགས་པའི་བཤད་པ་ཞིབ་པར་གསུངས་ཤིང་བྱང་ཆུབ་ལམ་གྱི་རིམ་པའི་ཁྲིད་ཀྱང་གནང༌། དེ་ནས་གསང་ཕུ། བདེ་བ་ཅན། དགའ་སྐྱོར་ཟུལ་གསུམ་བཅས་ཀྱི་གདན་ས་བ།ཐང་སག་པའི་གདན་ཟུར་ལ་སོགས་པ་དགེ་བའི་བཤེས་གཉེན་སྡེ་སྣོད་འཛིན་པ་དྲུག་བརྒྱ་ཙམ་འདུས་པ་ལ་སྣེའུ་ནས་དབྱར་གནས་ཀྱི་བདག་རྐྱེན་དང༌།དཔོན་སློབ་རྣམས་ཀྱི་སྤྱི་སྒོས་ཞབས་ཏོག་ཕུན་སུམ་ཚོགས་པ་མཛད། དེ་ལྟར་སེ་ར་ཆོས་སྡེངས་སུ་ལོ་གཉིས་ཙམ་བཞུགས་ནས་དགག་དབྱེ་ཐོན་པ་དང༌། མི་དབང་གྲགས་པ་རྒྱལ་མཚན་པས་གསོལ་བ་བཏབ་པ་ལ་བརྟེན་ནས་སྐྱིད་སྨད་གྲུམ་བུ་ལུང་དུ་ཕྱགས་བཏེག ཕྱག་ཕྱིར་བྱོན་པའི་བཤེས་གཉེན་ལྔ་བརྒྱ་ཙམ་ལ་ཕོགས་དང་ཞབས་ཏོག་ཕུལ་དུ་བྱུང་བ་མཛད་ཅིང༌། གཞན་ཡང་ཕྱོགས་མཐའ་དག་ནས་དམ་པའི་ཆོས་གསུང་གི་བདུད་རྩི་ལེན་པ་ལ་འདུས་པ་དང་བཅས་དགེ་འདུན་སྟོང་ལོངས་པ་ཙམ་འཚོགས་ཤིང༌། དགུན་བཞུགས་དེར་མཛད་ལམ་རིམ་དང་བདེ་མཆོག་ལཱུ་ཧི་པའི་སྒྲུབ་ཐབས་དང༌། མ་རྒྱུད་ཀྱི་རྫོགས་རིམ་སོགས་རྒྱས་པར་གསུངས་སོ། །   

                                                                                                                                                རྩོམ་སྒྲིག་པ། མང་ར་བ།

            གསལ་འདེབས། 
                   རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                    དྲ་བའི་སྦྲེལ་ཐགhttp://www.tb1025.cn