དེའི་ཕྱི་ལོའི་སོས་ཀ་དགའ་བ་གདོང་དུ་བྱོན། ཐེག་པ་ཆེན་པོར་འཇུག་པ་རྣམས་ཀྱིས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དཔང་པོར་བྱས་ཏེ་ཁས་བླངས་པའི་སེམས་བསྐྱེད་བསླབ་བྱ་རྣམས་ལ་ཇི་ལྟར་བསླབ་ཚུལ་མཐའ་དག་པར་ཤེས་ནས་ཚུལ་བཞིན་དུ་སློབ་པ་ཞིག་མ་བྱུང་ན་དེའི་ཐེག་པ་ཆེན་པོ་བ་མིང་ཙམ་དུ་འགྱུར་བར་དགོངས་ཤིང༌། གསང་སྔགས་རྡོ་རྗེ་ཐེག་པ་ལ་འཇུག་པར་འདོད་ན་ལམ་ཐུན་མོང་བ་ལ་ལེགས་པར་བློ་སྦྱངས་པའི་སྟེང་དུ་བླ་མ་བསྟེན་ཚུལ་ཐེག་ཆེན་ཐུན་མོང་བའི་སྐབས་སུ་བསྟན་པ་ལས་ཀྱང་ཆེས་ཁྱད་པར་དུ་གྱུར་པ་ཞིག་གི་སྒོ་ནས་དབང་བསྐུར་རྒྱུད་སྡེ་དང་མཐུན་པ་ཞིག་བླ་མ་མཚན་ཉིད་དང་ལྡན་པ་ལས་མནོས་ཏེ། དེའི་དུས་སུ་ཁས་བླངས་པའི་དམ་ཚིག་དང་སྡོམ་པ་རྣམས་མིག་གི་འབྲས་བུ་ལྟར་གཅེས་པར་འཛིན་ཅིང༌། ཁྱད་པར་རྩ་ལྟུང་ལ་སྲོག་བསྡོས་བྱས་ནས་ལེགས་པར་སྡོམ་པ་ཞིག་མ་བྱུང་ན་ཁས་བླངས་པའི་དམ་ཚིག་ཡལ་བར་དོར་ནས་སྔགས་ཀྱི་ལམ་ལ་སློབ་པ་སྐད་བྱས་ཀྱང་ངན་འགྲོ་མི་བཟད་པའི་སྒོ་འབྱེད་པར་དགོངས་ནས།ཨེ་མ་ཐེག་པ་ཆེན་པོ་སྤྱི་དང་ཁྱད་པར་བ་ལ་སློབ་པར་འདོད་པ་དག་ཚུལ་འདི་ལྟ་བུས་སྤྱོད་པར་གྱུར་ན་ཅི་མ་རུང་སྙམ་དུ་སྙིང་ནས་ཤས་མ་བཟོད་པའི་ཐུགས་བརྩེ་བ་ཆེན་པོས་ཀུན་ནས་བསླངས་ཏེ་གདུལ་བྱ་རྣམས་ལའང་ཚུལ་དེ་ཉིད་འདོམས་པར་མཛད་དོ། །

                     དེར་ཡང་བྱང་སའི་ཚུལ་ཁྲིམས་ལེའུ།བླ་མ་ལྔ་བཅུ་པ། རྩ་ལྟུང་བཅུ་བཞི་པ་རྣམས་ཀྱི་བཤད་པ་ཤིན་ཏུ་ཞིབ་པར་གསུངས། དེའི་ཆོས་མཇུག་ལ་བླ་མ་རྗེ་བཙུན་རེད་མདའ་བ་ཆེན་པོའི་ཞལ་སྔ་ནས་མངའ་རིས་ནས་བྱོན། དབྱར་གནས་སྟག་ཚང་དུ་མཛད་དེ་དབུས་སུ་བྱོན་ནས་དགའ་བ་གདོང་དུ་ཕྱག་ཕེབས། བསུ་བ་དང༌། བསྙེན་བཀུར་དང༌། ཞབས་ཏོག་རྨད་དུ་བྱུང་བ་མཛད་ནས་དཔོན་སློབ་གཉིས་ཀས་ཆོས་མང་དུ་གསུངས། བཀའ་གདམས་བསྟན་པའི་གདན་ས་རྭ་སྒྲེང་དུ་བྱོན་པ་དང་། བྱང་ཆུབ་ལམ་རིམ་བཀའ་རྩོམ་མཛད་པ་སོགས། དེ་ནས་ཡབ་སྲས་གཉིས་ཀའང་དབེན་པ་ལ་དགྱེས་ཤིང༌། བྱང་རྭ་སྒྲེང་གི་དབེན་པའི་གནས་ཀྱི་བསྔགས་པ་གཏམ་དུ་བརྗོད་པ་སྙན་དུ་སོན་པས་ཀྱང་ཐུགས་གཡོས་པར་གྱུར་ལ་དཔལ་ལྡན་ཨ་ཏི་ཤས་ལུང་བསྟན་པའི་གནས། སྟོན་པ་རིན་པོ་ཆེ་ཡབ་སྲས་ཀྱི་གདན་ས། བཀའ་གདམས་པའི་དམ་པའི་ཆོས་ཀྱི་ཆུ་བོ་ཐམས་ཅད་ཀྱི་འབྱུང་ཁུངས་སུ་གྱུར་པས་ཀྱང་གཟིགས་པར་བཞེད་དེ་ཡབ་སྲས་གཉིས་ཀྱིས་ཐོག་མ་མཛད་པའི་དགེ་འདུན་སྡེ་སྣོད་འཛིན་པ་མང་པོའི་ཚོགས་དང་བཅས་པ་རྭ་སྒྲེང་ལ་ཕྱགས་བཏེག་དགུན་བཞུགས་རྭ་སྒྲེང་དུ་མཛད། བླ་མ་རྗེ་བཙུན་ཆེན་པོས་རིགས་པ་དྲུག་ཅུ་པ་དང་གསང་འདུས་རིམ་ལྔ་སོགས་གསུངས། རྗེ་རིན་པོ་ཆེས་ཐེག་པ་ཆེན་པོ་མདོ་སྡེ་རྒྱན་དང༌། དབུས་མཐའ་དང༌། ཀུན་ལས་བཏུས་དང༌། ཉན་ས་ལ་སོགས་པ་ཐམས་ཅད་གུང་ལེགས་པར་བསྒྲིགས་ཏེ་ཞི་གནས་ཀྱི་བཤད་པ་མཐའ་དག་པར་གསུངས་ཤིང༌། སྒོམ་དུ་བཅུག་པས་འགའ་ཞིག་གི་རྒྱུད་ལ་གསུང་རབ་དང་མཐུན་པའི་ཞི་གནས་ཀྱི་མྱོང་བ་ཁྱད་པར་ཅན་འཁྲུངས།ཡབ་སྲས་གཉིས་ཀྱིས་སྔགས་དང་མཚན་ཉིད་ཀྱི་ལམ་གྱི་གནད་དུ་མ་ལ་འབེལ་བའི་གཏམ་གྱི་བཀའ་མཆིད་ཤིན་ཏུ་ཞིབ་པར་མཛད།

                    དེ་ནས་ཆོས་རྗེ་ལོ་ཙཱ་བ་དང༌། འབྲི་ཁུང་ཆོས་རྗེ་གཉིས་ཀས་ཞལ་འཛོམ་པར་ཞུ་བའི་ཕོ་ཉ་དང་གསུང་འཕྲིན་ནར་མར་བྱུང་བས།རྗེ་རིན་པོ་ཆེས་དཔྱིད་འགོ་འབྲི་ཁུང་དུ་བྱོན། ཆོས་མང་དུ་གསུངས། སྤྱན་སྔ་རིན་པོ་ཆེ་ཆོས་ཀྱི་རྒྱལ་པོ་ལ་ནཱ་རོ་ཆོས་དྲུག་དང༌། ཕྱག་ཆེན་ལྷན་ཅིག་སྐྱེས་སྦྱོར་ལ་སོགས་པ་གསན། དེ་ནས་རྗེ་རིན་པོ་ཆེ་དང་རྗེ་རེད་མདའ་བ་དང་ཆོས་རྗེ་ལོ་ཙཱ་བ་སྐྱབས་མཆོག་དཔལ་བཟང་གསུམ་ག་གནམ་ཙེང་ལྟེང་དུ་ཨར་ཆེན་པོ་བྱང་ཆུབ་ཡེ་ཤེས་ཀྱི་གཙུག་ལག་ཁང་དུ་ཞལ་མངོན་པར་འཛོམ་ཞིང༌། དཔོན་ཡོན་ཏན་རྒྱ་མཚོ་བས་དད་པ་དང་གཏོང་བ་ཤིན་ཏུ་ཡངས་པའི་བསམ་པ་རྒྱ་ཆེན་པོས་ཞབས་ཏོག་བྱས་ཏེ་སྡེ་སྣོད་གསུམ་འཛིན་པའི་མཁས་པའི་དབང་པོ་དུ་མས་ཐོག་དྲངས་པའི་དགེ་འདུན་དྲུག་བརྒྱ་ལྷག་ཙམ་གྱིས་དབྱར་གནས་པར་ཞལ་གྱིས་བཞེས་ནས་ཆོས་རྗེ་གསུམ་གས་ཀྱང་བསྟན་པ་རིན་པོ་ཆེའི་དག་ཐེར་རྣམ་པར་དག་པ་ཞིག་མཛད་པར་དགོངས་ཤིང༌། དེ་ཡང་ཇི་སྲིད་དུ་རྒྱལ་བའི་བསྟན་པའི་ནང་མཛོད་འདུལ་བ་རྫོགས་པར་ཡོད་པ་དེ་སྲིད་སངས་རྒྱས་ཀྱི་བསྟན་པ་ཡོད་ལ། དེ་མེད་ན་མེད་པར་གསུངས་པ་དེ་ཉིད་ཐུགས་ལ་ལྕི་བར་གྱུར་ནས་བསྟན་པ་འབའ་ཞིག་ལ་དགོངས་པའི་ཐུགས་ཀྱིས་འདུལ་བ་མདོ་རྩ་བའི་བཤད་པ་རྒྱས་པ་རེ་གསུངས་ཤིང་དེའི་དུས་སུ་གཞི་བཅུ་བདུན་ནས་གསུངས་པའི་བཅས་པ་ཕྲ་མོ་ཞིག་ཡན་ཆད་ད་ལྟའི་གང་ཟག་གིས་ཉམས་སུ་བླངས་ནུས་རྣམས་དང༌། རྣམ་འབྱེད་ནས་འབྱུང་བའི་བཅས་པ་རྣམས་ལས་འདས་པའི་ལྟུང་བ་ཐམས་ཅད་རང་རང་གི་མིང་རིགས་ཀྱིས་ཕྱིར་འཆོས་པའི་ཆོ་ག་ཇི་ལྟར་བཤད་པ་བཞིན་གྱི་ཕྱག་ལེན་རྣམ་པར་དག་པའི་སྲོལ་ལེགས་པར་བཙུགས་ཏེ། དེའི་ཚེ་འདུལ་བ་གསན་པ་ཕལ་ཆེ་བས་ཀྱང་རང་རང་གི་རྒྱུད་ལ་བརྟགས་ནས་ལྟུང་བ་ཕྲ་རགས་ཐམས་ཅད་བཤགས་ཡུལ་མང་ཉུང་གི་བྱེ་བྲག་དང༌། དངོས་པོ་སྤངས་པའི་ཆེད་ལས་སྔོན་ཏུ་གཏོང་བ་སོགས་ཇི་ལྟར་བཤད་པ་བཞིན་དུ་ཕྱག་ལེན་ལ་བཏབ་ནས་ཕྱིར་བཅོས་མཛད་དེ། དེ་ཕྱིན་ཆད་ཕྱག་ཕྱི་ལ་གཉུག་མར་གནས་པ་ཕལ་ཆེ་བས་ཉིན་རེ་བཞིན་རང་རང་གི་རྒྱུད་ལ་བརྟགས་ནས་ལྟུང་བ་ངང་ཡུན་དུ་མི་འགྲོགས་པར་ཕྱིར་འཆོས་པ་དང༌། ཡོ་བྱད་བྱིན་རླབས།རུང་ཁང་གཅོད་པ། ནུབ་ལྷག་ཉལ་བསྲུང་སོགས་ཀྱི་ཕྱག་ལེན་དག་ལའང་ཆེས་བརྩོན་པར་མཛད་ན་དེ་ཙམ་དུ་བསྒྲུབ་མི་དཀའ་བ་རྣམས་ལ་ནི་ལྟ་སྨོས་ཀྱང་ཅི་དགོས། དེ་བས་ན་སངས་རྒྱས་ཀྱི་བསྟན་པའི་རྩ་བ་སོ་སོར་ཐར་པའི་རྨང་རྫོགས་པར་གསོས་པས་བསྟན་པ་ལ་བྱ་བ་མཛད་པ་ཞིག་ལ་འདི་ཡ་མཚན་པ་ཡིན་ནོ། །ཞེས་མཁས་གྲུབ་ཐམས་ཅད་མཁྱེན་པས་གསུངས་ཏེ། གངས་རིའི་ཁྲོད་འདིར་འདུལ་བ་ལུང་སྡེ་བཞིའི་དོན་སློབ་དཔོན་ཡོན་ཏན་འོད་ཀྱིས་བཀྲལ་བ་ལྟར་དགག་སྒྲུབ་གནང་གསུམ་གྱི་བཅས་མཚམས་མཐའ་དག་རྒྱལ་བ་རང་ཉིད་ཀྱི་དགོངས་པ་ཇི་ལྟ་བ་བཞིན་དུ་འཆད་ཤེས་པ་དང༌། བཤད་པ་ལྟར་དུ་བཅས་མཚམས་མཐའ་དག་ཏུ་ལོངས་པ་དང༌། དེ་ཡང་བྱང་ཆུབ་ལམ་གྱི་རིམ་པ་དང་སྦྱར་ཏེ་ཐེག་པ་ཆེ་ཆུང་གཉིས་ཀའི་ལམ་གྱི་གཞི་རྟེན་དུ་འགྱུར་བ་དང༌། རྒྱལ་སྲས་ཀྱི་སྤྱོད་པ་ལ་སློབ་པའི་ཚེ་འབྲས་བུ་གཟུགས་སྐུ་བསྒྲུབ་པའི་ཐབས་སུ་འགྱུར་བར་བྱེད་པ་སོགས་རྒྱལ་བ་དགྱེས་པའི་ལམ་ལ་སློབ་པར་འདོད་པ་རྣམས་ལ་བཀའ་དྲིན་ཟླ་མེད་དུ་མཛད་དོ། །

                    གཞན་ཡང་གནས་དེར་དབུ་མ་དང་ཚད་མ་རྣམ་འགྲེལ་ལ་སོགས་པའི་ཆོས་ཀྱི་འཁོར་ལོ་མང་དུ་བསྐོར། དགག་དབྱེ་ཐོན་ནས་རྗེ་བཙུན་རེད་མདའ་བ་གཙང་ལ་ཕེབས་རྗེ་རིན་པོ་ཆེ་དང་ལོ་ཆེན་སྐྱབས་མཆོག་དཔལ་བཟང་གཉིས་འཁོར་དང་བཅས་པ་སླར་རྭ་སྒྲེང་དུ་བྱོན་ནས་བྲག་སེང་གེའི་ཞོལ་དུ་རྗེ་རིན་པོ་ཆེའི་བཞུགས་གནས་བཏབ་སྟེ་ཇོ་བོའི་སྐུ་འདྲ་དབུ་ཡོན་མར་གྲགས་པ་སྤྱན་དྲངས་རྗེ་རིན་པོ་ཆེས་སྐུ་མཚམས་མཛད་དེ་ཇོ་བོའི་སྤྱན་སྔར་མཆོད་པ་རྒྱ་ཆེན་པོ་བཤམས་ནས་གསོལ་བ་ཤུགས་དྲག་ལ་རྒྱུན་རིང་བར་འདེབས་པར་མཛད་པས་སྟོན་པ་ཐུབ་པའི་དབང་པོ་ནས་ལྷོ་བྲག་གྲུབ་ཆེན་དང་གྲྭ་སྐོར་མཁན་ཆེན་གྱི་བར་ལམ་རིམ་བརྒྱུད་པའི་བླ་མ་རྣམས་ཞལ་གཟིགས། དེའི་ཚེ་ལམ་རིམ་བླ་མ་བརྒྱུད་པའི་གསོལ་འདེབས་ལམ་མཆོག་སྒོ་འབྱེད་གསུང་རྩོམ་མཛད་དེ། དེའི་སྒོ་ནས་གསོལ་བ་ཤུགས་དྲག་ལ་རྒྱུན་རིང་བ་འདེབས་པར་མཛད་པས་བྱིན་གྱིས་བརླབས་པའི་མཚན་མ་ཁྱད་པར་ཅན་མང་དུ་བྱུང་ཞིང་གདམས་པ་དང་རྗེས་སུ་བསྟན་པའང་མང་དུ་གསུངས། མཐར་ལམ་རིམ་བརྒྱུད་པའི་བླ་མ་རྣམས་རིམ་གྱིས་ཐིམ་སྟེ་ཇོ་བོ་རྗེ་དང༌། པོ་ཏོ་བ། ཤ་ར་བ་རྣམས་ཡུན་རིང་དུ་ཞལ་གཟིགས། མཐར་པོ་ཏོ་བ་དང་ཤ་ར་བ་ཡང་ཇོ་བོ་ལ་ཐིམ། ཇོ་བོ་རྗེས་རྗེ་རིན་པོ་ཆེའི་དབུ་ཐོག་ཏུ་ཕྱག་བཞག་སྟེ་བསྟན་པ་ལ་བྱ་བ་རྒྱ་ཆེན་པོ་གྱིས།བྱང་ཆུབ་བསྒྲུབ་པ་དང་སེམས་ཅན་གྱི་དོན་བྱེད་པའི་གྲོགས་བདག་གིས་བགྱི་གསུངས་ནས་མི་སྣང་བར་གྱུར། དེ་ནས་རྗེ་རིན་པོ་ཆེས་རྒྱལ་བའི་བསྟན་པ་ལ་བྱ་བ་བྱེད་པའི་མཆོག་ནི་གསུང་རབ་དགོངས་འགྲེལ་དང་བཅས་པ་མཐའ་དག་གི་དོན་གང་ཟག་གཅིག་གི་ཉམས་ལེན་གྱི་རིམ་པར་བསྡུས་ཏེ་ཕྱི་རབས་ཀྱི་གདུལ་བྱ་རྣམས་ཀྱིས་ཉམས་སུ་བླང་བདེ་བ་ཞིག་རྩོམ་པར་བཞེད་པ་འཁྲུངས་ཤིང༌། ལོ་ཆེན་སྐྱབས་མཆོག་དཔལ་བཟང་པོ་སོགས་མང་པོས་ཀྱང་བྱང་ཆུབ་ལམ་གྱི་རིམ་པའི་ཁྲིད་ཡིག་རྒྱས་པ་ཞིག་ཅི་ནས་ཀྱང་མཛད་དུ་གསོལ་ཞེས་གསོལ་བ་ཤུགས་དྲག་ཏུ་བཏབ། ཕྱོགས་བཅུའི་རྒྱལ་བ་སྲས་བཅས་ཐམས་ཅད་ཀྱིས་ཀྱང་ཐུགས་རྗེ་བསྐུལ་བར་མཛད། དཀར་ཕྱོགས་ཀྱི་ལྷ་དང་སྲུང་མ་མང་པོས་མཐུན་པའི་རྐྱེན་སྦྱར་ཏེ་རྒྱལ་བའི་གསུང་རབ་མཐའ་དག་གི་གནད་བསྡུས་པ། ཤིང་རྟ་ཆེན་པོ་ཀླུ་སྒྲུབ་དང་ཐོགས་མེད་གཉིས་ཀྱི་ལམ་སྲོལ། བྱང་ཆུབ་ལམ་གྱི་རིམ་པའི་སྒོ་ནས་སྐལ་བ་དང་ལྡན་པ་སངས་རྒྱས་ཀྱི་སར་འཁྲིད་པའི་ཚུལ་རྒྱས་པར་སྟོན་པ་ལམ་རིམ་ཆེན་མོ་རྩོམ་པ་མཛད།

                    དེ་ལྟར་རྭ་སྒྲེང་གི་བྲག་སེང་གེའི་ཞོལ་དུ་བྱང་ཆུབ་ལམ་རིམ་ཆེན་མོ་རྩོམ་པ་མཛད་པའི་ཚེ་ཕྱོགས་བཅུའི་རྒྱལ་བ་སྲས་བཅས་ཐམས་ཅད་ཀྱིས་བྱིན་གྱིས་བརླབ་པ་དང༌། རྨ་ཆེན་སྦོམ་ར་དང་གཉན་ཆེན་ཐང་ལྷ་སོགས་བོད་ཀྱི་གཞི་བདག་ལྷ་ཆེན་རྣམས་ཀྱིས་ཀྱང་མཐུན་པའི་རྐྱེན་སྦྱར་ཞིང་བདག་ཅག་རྣམས་ལའང་སྨོན་པའི་ཚིག་སྦྱར་བ་ཞིག་དགོས་ཞེས་ཞུས་པ་ལྟར་རྗེ་རིན་པོ་ཆེས་ལམ་རིམ་ཆེན་མོའི་མཇུག་ཏུ། སྲས་བཅས་རྒྱལ་བའི་རྨད་བྱུང་འཕྲིན་ལས་ལས། །ལེགས་གྲུབ་བྱང་ཆུབ་ལམ་གྱི་རིམ་པས་ཀྱང༌། །ཐར་འདོད་རྣམས་ཀྱི་ཡིད་ལ་དཔལ་སྟེར་ཞིང༌། །རྒྱལ་བའི་མཛད་པ་རིང་དུ་སྐྱོང་གྱུར་ཅིག །ལམ་བཟང་སྒྲིག་པའི་མཐུན་རྐྱེན་སྒྲུབ་བྱེད་ཅིང༌། །འགལ་རྐྱེན་སེལ་བྱེད་མི་དང་མི་མིན་ཀུན། །ཚེ་རབས་ཀུན་ཏུ་རྒྱལ་བས་བསྔགས་པ་ཡི། །རྣམ་དག་ལམ་དང་འབྲལ་བར་མ་གྱུར་ཅིག །ཅེས་སྨོན་ལམ་མཛད་པ་ཡིན་ཞེས་ལམ་རིམ་ཆེན་མོའི་བཤད་ལུང་གི་སྐབས་བླ་མ་གོང་མ་གཅིག་ནས་གཅིག་ཏུ་བརྒྱུད་པའི་གསུང་རྒྱུན་ལས་འབྱུང་ངོ༌། །དེ་ལྟར་ལམ་རིམ་ཆེན་མོའི་རྩོམ་པ་གྲུབ་ནས་འཁོར་རྣམས་ལ་འདི་ལྟར་བཀའ་སྩལ་ཏེ། ད་ཕྱིན་ཆད་སྔགས་ཀྱི་ཆོས་ཐན་ཐུན་འཆད་འདོད་པས། ཁྱེད་དྲག་པ་འགའ་རེས་ཆོས་རྗེ་ལོ་ཙཱ་བ་ལ་གསང་བ་འདུས་པ་མི་བསྐྱོད་པའི་དབང་ཞུས་ལ་སྔགས་ཀྱི་སྡོམ་པ་གསོར་ཆུག་གསུངས། དེ་ནས་བླ་མ་འཇམ་དཀར་བ་དང༌། འདུལ་འཛིན་གྲགས་པ་རྒྱལ་མཚན་གཉིས་ཀྱིས་གཙོ་མཛད། ཉི་ཤུ་རྩ་ལྔས་དབང་ཞུས། དེ་ཡང་རྗེ་རིན་པོ་ཆེ་རང་གིས་སྨོན་འཇུག་གི་སྡོམ་པ་ཕོག་པ་འགའ་ཞིག་མ་གཏོགས་གཞན་རྣམས་ལ་ཆོས་རྗེ་ལོ་ཙཱ་བས་སྨོན་འཇུག་གི་སྡོམ་པ་ཕོག་ཅིང༌། དེ་ནས་དབང་བསྐུར་བར་མཛད་དོ། །