དེ་ནས་གཉལ་སྟོད་རབ་ཀྲོང་དུ་བྱོན། དབྱར་བཞུགས་མཛད། གནས་དེར་སྲས་ཀྱི་ཐུ་བོ་རྗེ་དར་མ་རིན་ཆེན་གྱིས་མཇལ། རྣམ་འགྲེལ་གྱི་ལམ་ཁྲིད་གསན་པས་རྗེ་རིན་པོ་ཆེའི་གསུང་ལ་ཡིད་ཆེས་ཀྱི་དད་པ་བརྟན་པོ་རྙེད་ནས་དེ་ཕྱིན་རྗེའི་ཞབས་འབྲིང་དུ་བཞུགས་སོ། །དེ་ནས་གཉལ་ཕྱོགས་ཀྱི་སྡེ་སྣོད་འཛིན་པ་ཐམས་ཅད་འདུས་པ་ལ་ཆོས་འཁོར་རྒྱ་ཆེན་པོ་མཛད་དོ། །དབེན་གནས་ལྷ་ལྡིངས་སུ་ཟབ་མོ་དབུ་མའི་ལྟ་བ་གཟིགས་ཤིང་གྲུབ་པའི་གོ་འཕང་བརྙེས་པའི་ཚུལ་སོགས། དེ་ལྟར་གཉལ་ཕྱོགས་སུ་བསྟན་པ་དང་སེམས་ཅན་གྱི་དོན་རྨད་དུ་བྱུང་བ་རྣམས་ལེགས་པར་མཛད་ནས་སླར་ཡང་འོལ་ཁར་ཕེབས། དེ་ནས་འོ་དེ་གུང་རྒྱལ་གྱི་ལྷ་ཞོལ་དབེན་གནས་ལྷ་སྡིངས་སུ་ལོ་གཅིག་བཞུགས་ཆོས་མང་གསུངས་རྗེ་འདིས་ཐལ་རང་གི་ལྟ་བའི་གནད་རྣམས་ལ་བྱ་བྲལ་ལ་འབྱོན་པའི་གོང་ཉིད་ནས་དེ་བར་དུ་དཔྱད་པ་ནར་མར་མཛད་ནའང༌། མཐར་ཐུག་པའི་གནད་ལ་མི་བདེ་བ་གཏན་ནས་ལོག་པའི་ངེས་པ་འདྲེན་མ་ཐུབ་གསུངས་ཏེ། དེང་སང་གི་གདུལ་བྱ་མི་རྟག་པ་ཕྲ་མོའི་གནས་ཚུལ་ཙམ་ཡང་མ་རྟོགས་པར་ཟབ་མོ་དབུ་མའི་ལྟ་བ་རྟོགས་པར་ཁས་འཆེ་བ་དང་ལས་འབྲས་ལ་ཡིད་ཆེས་པའི་བསམ་པ་མེད་པར་དབུ་མའི་ལྟ་བ་རྟོགས་པར་ཁས་འཆེ་བ་རྣམས་ལ་ཐུགས་བརྩེ་བས་དགོངས་ཏེ་འདི་ལྟ་བུའི་ཚུལ་བསྟན་ཏེ་ཟབ་མོ་དབུ་མའི་ལྟ་བ་ཤིན་ཏུ་རྟོགས་དཀའ་བ་ནི་རྒྱལ་བ་ཉིད་ཀྱི་ཞལ་ནས། ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཤིག་ཁོ་བོས་རྙེད། །སུ་ལ་བསྟན་ཀྱང་གོ་བར་མི་ནུས་པས། །མི་སྨྲ་ནགས་ཀྱི་ཚལ་དུ་གནས་པར་བྱ། །ཞེས་ཆོས་ཐམས་ཅད་ཀྱི་གནས་ལུགས་སྤྲོས་པའི་མཐའ་ཐམས་ཅད་དང་བྲལ་བའི་སྟོང་པ་ཉིད་ནི་ཤིན་ཏུ་རྟོགས་དཀའ་བས་མཐའ་དག་པར་རྟོགས་པ་སྲིད་མཐའ་ཙམ་དུ་གསུངས་པ་དང༌། འཕགས་པ་ཀླུ་སྒྲུབ་ཀྱི་ཞལ་ནས། རེ་ཞིག་ལུས་འདི་མི་གཙང་ཉིད། །རགས་ཤིང་མངོན་སུམ་སྤྱོད་ཡུལ་བ། །རྟག་ཏུ་སྣང་བའང་གང་གི་ཚེ། །སེམས་ལ་གནས་པ་མ་ཡིན་པ། །དེ་ཚེ་དམ་ཆོས་གནད་མེད་པ། །ཕྲ་རབ་མངོན་སུམ་མ་ཡིན་པ། །ཟབ་མོ་དེ་ཀོ་ཇི་ལྟ་བུར། །སེམས་ལ་བདེ་བླག་འཇུག་པར་འགྱུར། །ཆོས་འདི་ཟབ་ཕྱིར་སྐྱེ་བོ་ཡིས། །ཤེས་པར་དཀའ་བ་ཐུགས་ཆུད་དེ། །དེས་ན་ཐུབ་པ་སངས་རྒྱས་ནས། །ཆོས་བསྟན་པ་ལས་ལོག་པར་གྱུར། །ཅེས་མི་རྟག་པ་ལ་ངེས་ཤེས་མ་འདྲོངས་པར་དབུ་མའི་ལྟ་བ་རྟོགས་པ་མི་སྲིད་པར་གསུངས་པ་ལྟར་རོ། །

                    རྗེ་རིན་པོ་ཆེས་གནས་དེར་བླ་མ་དང་རྗེ་བཙུན་འཇམ་པའི་དབྱངས་ཐ་མི་དད་དུ་བྱས་པ་ལ་གསོལ་བ་དྲག་ཏུ་འདེབས་པ་དང༌། རིགས་པའི་དཔྱད་པ་ཞིབ་པར་མཛད་པས་བྱིན་གྱིས་བརླབས་པའི་མཚན་མ་ཁྱད་པར་ཅན་བྱུང༌། སློབ་དཔོན་སངས་རྒྱས་བསྐྱངས་ཀྱི་འགྲེལ་པ་བུདྡྷ་པཱ་ལི་ཏ་ལ་ལེགས་པར་གཟིགས་པས་ཀྱང་མཚམས་སྦྱར་ཏེ། མགོན་པོ་ཀླུ་སྒྲུབ་ཡབ་སྲས་ཀྱི་ལྟ་བའི་གནད་མཐར་ཐུག་པ་དང༌། དགག་བྱའི་མཚམས་འཛིན་སོགས་ལ་སྔར་དང་མི་འདྲ་བའི་ངེས་པ་གཏིང་ཚུགས་པ་འཁྲུངས་ཤིང་འཛིན་གྱི་དམིགས་གཏད་ཐམས་ཅད་ཞིག དེ་ཁོ་ན་ཉིད་ཀྱི་དོན་ལ་མཐའ་གཞན་དུ་དོགས་པའི་སྒྲོ་འདོགས་ལྷག་མ་མེད་པར་དྲུངས་ཕྱུང་བར་གྱུར་ཏེ། སྟོན་པ་ལ་ཤེས་ནས་དད་པ་ཐོབ་པའི་ཤུགས་ཀྱིས་དྲངས་པ་ཟབ་མོ་རྟེན་ཅིང་འབྲེལ་པར་འབྱུང་བ་གསུངས་པའི་སྒོ་ནས་བསྟོད་པ་ལེགས་པར་བཤད་པའི་སྙིང་པོ་ཞེས་བྱ་བ་མཛད་དོ། །རྗེ་རིན་པོ་ཆེའི་མཛད་པ་རྣམ་ཐར་འདི་དག་ལ་བློ་གྲོས་ཅན་རྣམས་ཀྱིས་ལེགས་པར་དཔྱོད་ཤེས་ན་བྱང་ཆུབ་ལམ་གྱི་རིམ་པའི་གོ་རིམ་ལ་ངེས་པ་ཕུལ་ཕྱིན་སྟེར་ཞིང་བྱང་ཆུབ་ལམ་རིམ་གྱི་རྩ་བའི་གདམས་ངག་གི་གཞུང་མངོན་རྟོགས་རྒྱན་དུ། སངས་རྒྱས་རྣམས་ལྷག་པར་བྱས། །དེ་ལ་དགེ་བའི་རྩ་བ་བསྐྲུན། །དགེ་བའི་བཤེས་ཀྱི་མགོན་བཅས་པ། །འདི་མཉན་པ་ཡི་སྣོད་ཡིན་ནོ། །ཞེས་གསུངས་པའི་དོན་ལ་ངེས་པ་ཆེན་པོ་སྐྱེའོ། །

                     དབུ་མའི་ལྟ་བ་འཁྲུལ་མེད་རྙེད་པའི་སྣང་བ་ཇི་ལྟར་འཆར་བ་ནི་རྗེ་ཉིད་ཀྱི་ཞལ་ནས་ད་ལྟ་ལེགས་པར་གོམས་པས་རྗེས་ཐོབ་ཏུའང་སྣ་ཚོགས་པའི་སྣང་བ་འདི་ཐམས་ཅད་སྟོང་བཞིན་དུ་སྣང་བའི་སྒྱུ་མ་ལྟར་འཆར་གྱི། སྟོང་པ་ཉིད་ཀྱི་རྒྱས་མ་ཐེབས་པའི་སྣང་བ་རང་དགའ་བ་ཆེར་མི་འཆར་བར་འདུག ཅེས་གསུངས་སོ། །རྗེ་བླ་མ་འདིས་བྱང་ཆུབ་ལམ་གྱི་རིམ་པ་ལ་མྱོང་བ་ཐོབ་པར་བྱེད་པ་ལ་ཚུལ་འདི་ལྟར་བྱ་དགོས་སོ་ཞེས་གདུལ་བྱ་རྣམས་ལ་འདོམས་པའི་ཕྱིར་བླ་མ་དང་ཡི་དམ་ཐ་མི་དད་དུ་བྱས་ནས་གསོལ་བ་འདེབས་པ་དང༌། བསག་སྦྱང་ལ་རྩེ་གཅིག་ཏུ་བརྩོན་པར་མཛད་ཅིང༌། སྐྱེ་བོ་ཕལ་པ་རྣམས་ཀྱི་བློ་ཡུལ་དུ་ཤོང་དཀའ་བའི་བསྙེན་སྒྲུབ་ལ་རྒྱུན་མི་འཆད་དུ་བརྩོན་པར་མཛད་པས་ལྷག་པའི་ལྷ་དུ་མས་བྱིན་གྱིས་བརླབས་པའི་ཚུལ་དཔག་པར་དཀའ་བ་ཡོད་ལ། ཁྱད་པར་རྒྱལ་བ་ཀུན་གྱི་ཡབ་གཅིག་རྗེ་བཙུན་འཇམ་པའི་དབྱངས་ཀྱི་ཞལ་མངོན་སུམ་དུ་གཟིགས་ཤིང་དུ་དགེ་བའི་བཤེས་གཉེན་མཛད་པའི་སྟོབས་ཀྱིས་གསུང་རབ་མཐའ་དག་གི་དོན་ལ་འཁྲུལ་པ་མི་མངའ་བར་གྱུར་པ་ཡིན་ལ། གསུང་རབ་ཀྱི་དོན་ཅི་འདྲ་བའི་རྟོགས་དཀའ་བ་ཞིག་ཡིན་ནའང༌། ཐོག་མར་རིགས་པས་ཞིབ་ཏུ་དཔྱད་པས་ཕལ་ཆེར་དགོངས་འོང༌། དེ་ལྟར་མཛད་ཀྱང་ཐུགས་ངེས་མཐའ་ཆོད་པ་འདྲེན་མ་ཐུབ་པ་རྣམས་ལ། བླ་མ་དང་རྗེ་བཙུན་འཇམ་པའི་དབྱངས་ཐ་མི་དད་ལ་གསོལ་བ་དྲག་ཏུ་བཏབ་ཅིང་མཎྜལ་ཕུལ་བས། དེ་མ་ཐག་འབད་མེད་དུ་དཔྱིས་ཕྱིན་པར་དགོངས་ནས་འོང་བ་ནི་རྗེ་ཉིད་ཀྱི་ཐུགས་སྲས་ཐམས་ཅད་ལ་མཐུན་སྣང་དུ་ཡོད་པར་གསུངས། གཞན་ཡང་རྗེ་བཙུན་འཇམ་པའི་དབྱངས་ཀྱི་སྐུ་དང་གསུང་གི་སྣང་བ་ཇི་ལྟར་བྱུང་བ་སོགས་དག་པའི་གཟིགས་སྣང་མཐའ་ཡས་པའི་རྣམ་པར་ཐར་པ་ནི་རྒྱལ་བ་ནང་ཕན་ཚུན་གྱི་སྤྱོད་ཡུལ་ཡིན་པས་མཐའ་དག་བརྗོད་པར་ག་ལ་ནུས། རྗེ་བཙུན་འཇམ་པའི་དབྱངས་ཀྱིས་རྒྱུན་དུ་ཞལ་བསྟན་ནས་བྱ་བ་ཐམས་ཅད་རྗེ་བཙུན་འཇམ་པའི་དབྱངས་ལ་ཞུས་ནས་མཛད་པ་ནི། རྗེ་ཉིད་ཀྱི་ཞལ་ནས་གསུང་རབ་ཀྱི་དོན་ལ་ཚུལ་ཇི་ལྟར་དཔྱོད། དཔྱད་པ་རྫོགས་མ་རྫོགས་ཉམས་ལེན་གྱི་གནད། གདུལ་བྱ་ཇི་ལྟར་བཀྲི། འཁོར་ཇི་ལྟ་བུ་བསྟེན། གནས་ཇི་ལྟ་བུར་སྡོད་པ་སོགས་ཕལ་ཆེར་རང་བཟོས་ཞུགས་པ་མ་བྱས་ཞེས་གསུངས་སོ། །དེ་ནས་སྟོན་འོལ་ཁར་བྱོན། དགུན་དཔྱིད་འགར་ཕུག་ཏུ་བཞུགས་ནས་འོལ་ཁའི་དགེ་འདུན་རྣམས་ལ་ཆོས་མང་དུ་གསུངས་སོ། །དེ་ནས་ཨེའི་ཏེའུ་རར་བྱོན། དབྱར་བཞུགས་མཛད། ཨེ་པའི་དགེ་འདུན་རྣམས་ལ་ཆོས་མང་དུ་གསུངས་ཤིང་སྐྱེ་བོ་ཐམས་ཅད་དགེ་བའི་ལམ་ལ་བཀོད། དེ་ནས་འོལ་ཁའི་བྲག་གདོང་དུ་བྱོན། དགུན་བཞུགས་མཛད། དེ་ནས་རྫིང་ཕྱིར་ཇོ་བོ་བྱམས་པའི་དྲུང་དུ་ཞག་བཅོ་ལྔའི་རིང་ལ་མཆོད་པ་རྒྱ་ཆེ་ཞིང་བཀོད་པ་ཡིད་འཕྲོག་པ་རྒྱུན་མི་འཆད་པར་མཛད་དེ་བསྟན་པ་དང་སེམས་ཅན་འབའ་ཞིག་ལ་དགོངས་ནས་འཕྲལ་དང་ཡུན་དུ་ཕན་བདེ་རྒྱས་པའི་སྨོན་ལམ་རླབས་ཆེ་བ་མཛད་དོ། །

                    དེ་ནས་སྨན་ལུང་གི་རྒྱ་སོགས་ཕུར་ཆོ་འཕྲུལ་ཆེན་པོའི་དུས་མཆོད་ཞག་བཅོ་ལྔའི་རིང་ལ་མཆོད་པ་རྒྱ་ཆེ་ཞིང་བཀོད་པ་ཕུན་སུམ་ཚོགས་པ་བཤམས་ཏེ་ཏིང་ངེ་འཛིན་གྱིས་བྱིན་གྱིས་བརླབས་ནས་མཆོད་ཡུལ་ཐམས་ཅད་མཉེས་པར་བྱེད་པའི་མཆོད་པའི་ཆོ་ག་དང༌། འཕྲལ་དང་ཡུན་གྱི་ཕན་བདེ་རྒྱས་པའི་སྨོན་ལམ་དཔག་ཏུ་མེད་པ་མཛད་པའི་སྐབས་སུ། མཆོད་པའི་ཞིང་ཕྱོགས་བཅུའི་དེ་བཞིན་གཤེགས་པ་རྣམས་སྤྱན་འདྲེན་པའི་ཐུགས་ཀྱི་འདུན་པ་ཤུག་དྲགས་པོ་མཛད་པ་ན། ཤར་ཕྱོགས་ཀྱི་དེ་བཞིན་གཤེགས་པ་ཐམས་ཅད་སྐུ་མདོག་དཀར་པོ་རྣམ་སྣང་གི་རྣམ་པས་ཤར་ཕྱོགས་ཀྱི་ནམ་མཁའི་ཁྱོན་ཐམས་ཅད་གང་བར་འཁྲིགས་པ་དང༌། དེ་བཞིན་དུ་ལྷོ་ཕྱོགས་དང་ནུབ་དང་བྱང་དང་དབུས་སམ་སྟེང་གི་ནམ་མཁའི་ཁྱོན་ཐམས་ཅད་རིམ་པ་བཞིན་དུ། རིན་འབྱུང༌། འོད་དཔག་མེད། དོན་གྲུབ། མི་བསྐྱོད་པའི་རྣམ་པ་ཅན་གྱི་དེ་བཞིན་གཤེགས་པས་ཁྱབ་ཅིང༌། བཀོད་པ་དེ་འདྲ་བའི་སྒོ་ནས་སྟེང་དང་ལོགས་ཀྱི་ནམ་མཁའི་ཁམས་ཐམས་ཅད་བར་མཚམས་མེད་པར་དེ་བཞིན་གཤེགས་པའི་སྐུར་གུར་ཕུབ་པ་ལྟར་གྱུར་ཏེ་མཆོད་པ་བདག་གིར་མཛད་པའི་གཟིགས་སྣང་དངོས་སུ་འཆར་བ་ཡང་ཡང་བྱུང༌། ཕྱིས་ལྷ་སར་ཆོ་འཕྲུལ་ཆེན་པོའི་མཆོད་པ་རྒྱ་ཆེན་པོ་བསམ་གྱི་མི་ཁྱབ་པ་སྨོན་ལམ་ཆེན་མོར་གྲགས་པ་མཛད་པའི་དུས་སུའང་གཟིགས་སྣང་དེ་འདྲ་བ་ནར་མར་བྱུང་སྟེ། དེ་དུས་མཆོད་ཡུལ་དང་མཆོད་པ་ཐམས་ཅད་ལ་བདེ་སྟོང་གི་རྒྱས་བཏབ་ཅིང་མཆོད་པ་ཕུལ་བས་དེ་ཐམས་ཅད་བདེ་སྟོང་གི་རྣམ་རོལ་དུ་འཆར་བ་བྱུང་གསུངས་སོ། །

                   དེ་ནས་དཔྱིད་རྗེ་དར་མ་རིན་ཆེན་གྱི་ཞལ་སྔ་ནས་གཙོ་མཛད། སྡེ་སྣོད་འཛིན་པ་ཉིས་བརྒྱ་ལྷག་ཙམ་ལ་ཆོས་མང་དུ་གསུངས། དེ་ནས་ཉང་པོ་ཕྱོགས་ནས་དད་པ་ཆེན་པོས་གསོལ་བ་བཏབ་པ་ལ་བརྟེན་ནས་ཉང་པོ་མདང་མདོའི་དགོན་པར་བྱོན། དབྱར་བཞུགས་མཛད། ཉང་པོ་ཕྱོགས་ཀྱི་དགེ་འདུན་རྣམས་ལ་ཆོས་མང་དུ་གསུངས་ཤིང་སྐྱེ་བོའི་ཚོགས་ལ་ཕན་པ་རྒྱ་ཆེན་པོ་མཛད། དེའི་སྐབས་སུ་དབོན་ནམ་མཁའ་བཟང་པོ་བས་རྔོག་ལོ་ཆེན་པོའི་གདན་ས་པ་སློབ་དཔོན་ཆེན་པོ་དཀོན་མཆོག་ཚུལ་ཁྲིམས་པ་ངོ་ཆེན་ལ་སྦྲན་ཏེ་སྐྱིད་ཤོད་ཕྱོགས་སུ་ཕེབས་པར་ཞུ་བའི་གསོལ་བ་འདེབས་པ་སྔ་མོ་ནས་ནར་མར་ཡོད་པའི་གཏིང་བསྐུལ་གྱི་གསོལ་འདེབས་པས་སླེབ་པ་དང༌། ཇོ་བོ་རིན་པོ་ཆེ་མཇལ་བར་བཞེད་པས་ཀྱང་ཐུགས་དྲངས་ཏེ་སྟོན་སྐྱིད་ཤོད་དུ་ཕེབས། པོ་ཏ་ལར་བཞུགས་ནས་གསང་བདེ་གུང་གསུམ། དགའ་སྐྱོར་ཟུལ་གསུམ་གྱི་གདན་ས་བ་རྣམས་ཀྱིས་ཐོག་དྲངས་པའི་སྡེ་སྣོད་འཛིན་པ་བརྒྱ་ཕྲག་དུ་མ་ལ་དབུ་མ་སྣང་བ། འདུལ་བ། ལམ་རིམ་ལ་སོགས་པའི་ཆོས་མང་དུ་གསུངས། 

                                                                                                                                             རྩོམ་སྒྲིག་པ། མང་ར་བ།
            གསལ་འདེབས། 
                   རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                    དྲ་བའི་སྦྲེལ་ཐགhttp://www.tb1025.cn