དེའི་ཚེ་ལྷོ་བྲག་མཁན་ཆེན་དང་རྗེ་རིན་པོ་ཆེ་གཉིས་ཀ་ལ་དག་པའི་གཟིགས་སྣང་ངོ་མཚར་བ་མང་དུ་བྱུང་བ་ནི་ལྷོ་བྲག་མཁན་ཆེན་གྱི་ཞལ་ནས་བདག་གིས་ལོ་བདུན་ཅུ་ལོན་དུས་ལྷ་མོ་དཀར་མོ་ཞིག་ན་རེ་བྱམས་པས་བྱིན་གྱིས་བརླབས་པའི་གང་ཟག་འཇམ་པའི་དབྱངས་དང་གཉིས་སུ་མེད་པ། ལྷ་མོ་དབྱངས་ཅན་མས་རིག་པ་སྟེར་བར་བྱེད་པ་ཕུན་སུམ་ཚོགས་པ་ཞིག་དང་སྐྱེ་བ་བཅོ་ལྔའི་གོང་ནས་འབྲེལ་བ་ཡོད་ཅིང༌། ཕན་ཚུན་དཔོན་སློབ་ཏུ་འབྲེལ་བ་ཞིག་འོང་བ་ཡོད་པས། དེ་ལ་ཆོས་བཀའ་ལ་བསྲིས་མ་འཇུག་པར་བྱིན། ཕར་ཡང་ཆོས་ཞུས་ཟེར་བ་ཞིག་བྱུང་བས་བདག་མོས་གུས་དཔག་ཏུ་མེད་པ་སྐྱེས་སོ། །ཡང་ལན་ཅིག་མགོན་པོ་བྱམས་པ་འབྱོན་གྱིན་ཡོད་ཟེར་བའི་སྐད་ལྷང་བ་ཞིག་བྱུང༌། དེ་དུས་ཆོས་རྗེ་དཀའ་བཞི་པ་རྒྱ་མོ་རི་འཕྲེད་ལ་ཕེབས་པའི་ཚོད་དུ་འདུག བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་བའི་དུས་དྲུག་པའི་ཚེས་བཞིའི་ཉིན་ལྷོ་བྲག་སྒྲོ་བ་དགོན་པར་ཕྱགས་ཕེབས་བྱོན་པ་བདག་གིས་བསུ་བ་ལ་ཕྱིན། རྗེ་བཙུན་འཇམ་དབྱངས་འོད་ཀྱི་དྲ་བས་མཛེས་པ་ཞིག་ཕེབས་བྱུང་བར་མཐོང༌། རྗེ་ཙོང་ཁ་པས་བདག་ཕྱག་ན་རྡོ་རྗེར་དངོས་སུ་གཟིགས་ཤིང༌། དེའི་གསུས་པའི་དཀྱིལ་འཁོར་ཤིན་ཏུ་ལྡིར་ཞིང་བཻ་ཌཱུརྱ་ལྟར་དྭངས་པ་སྦྲུལ་སྔོ་ཁྲས་སྤྲས་པ་གཟིགས་འདུག དེ་ནི་སྔར་ལས་ཀྱང་གདུལ་བྱ་འཕྲིན་ལས་རྒྱས་སུ་འགྲོ་བའི་བརྡ་ཡིན།

                    དེའི་ནུབ་མོ་རྗེ་ཙོང་ཁ་པས་བླ་མའི་རྣལ་འབྱོར་ཞིག་ཞུ་གསུངས། བདག་གིས་བླ་མའི་རྣལ་འབྱོར་ཞིག་ཕོག་པས།ཕྱག་ན་རྡོ་རྗེ་བྱོན་ནས་རྗེ་ཙོང་ཁ་པ་ལ་ཐིམ་སོང༌། ཡང་ཚེས་བཅོ་ལྔའི་ཐོ་རེངས་བྱམས་པ་ཉིད་ལ་བསླབ་བཏུས་ཞུས་ཟེར་བ་ཞིག་བྱུང༌། རྗེ་ཙོང་ཁ་པ་ལ་བསླབ་བཏུས་གསུངས་པར་ཞུ་ཞུས་པས། རྗེ་ཙོང་ཁ་པས་ཡི་དམ་ལྷ་དེ་སྐད་གསུངས་སམ་གསུངས། གསུང་ལགས་ཞུས་པས་བསླབ་བཏུས་གསུངས། ཆོས་ཉན་དུས་མཐོང་སྣང་ལ་རྗེ་ཙོང་ཁ་པའི་དབུའི་སྟེང་ན་རྗེ་བཙུན་བྱམས་པ་བཞུགས། དཔུང་པ་གཡས་ན་འཇམ་དབྱངས་དཀར་པོ། གཡོན་ན་ལྷ་མོ་དབྱངས་ཅན་བཞུགས་འདུག མགོན་པོ་ཕྱག་བཞི་པ་དང་ཕྱག་དྲུག་པས་གཙོ་བྱས་པའི་ཆོས་སྐྱོང་དང་མཁའ་འགྲོ་བསམ་གྱིས་མི་ཁྱབ་པས་བསྐོར་ནས་འདུག་གོ །གཞན་ཡང་དཀར་ཕྱོགས་ལ་དགའ་བའི་ལྷ་འདྲེའི་ཚོགས་མང་པོ་ཆོས་ཉན་ཞིང་འདུག་པས་མོས་གུས་ཐུན་མོང་མ་ཡིན་པ་སྐྱེས་སོ། །སོ་སོ་འབྲང་མའི་དབང་དང་སེམས་བསྐྱེད་ཀྱང་ཞུས་སོ། །རྗེ་ཙོང་ཁ་པས་བདག་ལ་ཚུར་ཆོས་ཞུས་པ་ལ་བྱང་ཆུབ་ལམ་གྱི་རིམ་པའི་བཀའ་བབས་གཉིས་ཀྱི་ཁྲིད། ཕྱག་ན་རྡོ་རྗེས་གསུངས་པའི་གསང་བ་བསམ་གྱིས་མི་ཁྱབ་པའི་ཁྲིད་ལུང་རྗེས་གནང༌། ཕྱག་རྡོར་སྐུ་ལྔའི་རྗེས་གནང༌། ཞུ་ལན་རྡོ་རྗེ་ཕྲེང་བ། ཞུ་ལན་གཅེས་ཕྲེང་གི་ལུང་རྗེས་གནང༌། ཕྱག་ན་རྡོ་རྗེ་ཁྱུང་ལྔའི་དབང་དང་རྗེས་གནང་དྲེགས་པ་ཀུན་འདུལ་གྱི་དབང༌། རྟ་མགྲིན་དཔའ་བོ་གཅིག་པ་ཞལ་གསུམ་ཕྱག་དྲུག་པའི་རྗེས་གནང་སོགས་བྱས་པའི་དུས། རྗེས་གནང་དང་དབང་གི་བྱ་བ་ཌཱ་ཀཱི་རྣམས་ཀྱིས་བྱེད་པ་དང༌། བདུད་རྩི་ཀཱ་པ་ལ་གང་རྗེ་ཙོང་ཁ་པ་ལ་ཕུལ་བས་དེར་ལྦུ་བ་ཤར་བའི་ནང་དུ་འཇམ་དབྱངས། ཛམ་ལྷ་རྣམ་སྲས་རྣམས་རེ་རེ་བཞུགས་པ་གཟིགས་ཤིང་རྟགས་ངོ་མཚར་ཅན་མང་ཞིག་བྱུང་སྟེ་བཤད་ཀྱིས་མི་ལང་ངོ་ཞེས་གསུངས། དེ་དུས་རྗེ་རིན་པོ་ཆེས་ལྷོ་བྲག་གྲུབ་ཆེན་ནམ་མཁའ་རྒྱལ་མཚན་ལ་དགེ་བའི་བཤེས་གཉེན་སྤྱན་སྔ་བ་ནས་བྱ་ཡུལ་བ་ལ་བརྒྱུད་པ་དང་དགོན་པ་བ་ནས་སྣེའུ་ཟུར་བ་ལ་བརྒྱུད་པའི་བཀའ་གདམས་གདམས་ངག་པའི་ལམ་རིམ་གྱི་ཁྲིད་རྒྱས་པར་གསན་ཏེ་ལྷོ་བྲག་མཁན་ཆེན་ལ། སྤྱན་སྔ་བ་ནས་བྱ་ཡུལ་བ་ལ་བརྒྱུད་པ་དང༌། དགེ་བཤེས་དགོན་པ་བ་ནས་སྣེའུ་ཟུར་བ་ལ་བརྒྱུད་པའི་ལམ་རིམ་གཉིས་ཀ་མངའོ། །

                   ལྷོ་བྲག་མཁན་ཆེན་པ་དེ་ནི་གསང་བའི་བདག་པོ་ཕྱག་ན་རྡོ་རྗེས་རྒྱུན་དུ་རྗེས་སུ་བཟུང་སྟེ་བྱ་བ་ཐམས་ཅད་གསང་བདག་ལ་ཞུས་ཏེ་བྱེད་པ་ཞིག་ཡིན་པས་ལྷོ་བྲག་གྲུབ་ཆེན་ཞེས་གྲགས་ཤིང༌། ལྷོ་བྲག་ཕྱག་རྡོར་བ་ཞེས་ཀྱང་གྲགས་སོ། །དེ་ལྟ་བུའི་བླ་མ་བདག་ཉིད་ཆེན་པོ་དེས་རྗེ་རིན་པོ་ཆེ་འདིའི་རྣམ་ཐར་ལ་ཡིད་ཆེས་ཀྱི་དད་པ་ཐོབ་སྟེ་བསླབ་པ་ཀུན་ལས་བཏུས་པ་ཞུ་བར་མཛད། བསླབ་བཏུས་ཞུ་བའི་ཚེ་ལྷོ་བྲག་མཁན་ཆེན་འཁོར་དགེ་འདུན་མང་པོ་དང་བཅས་ཞུས་ཤིང༌། ལྷོ་བྲག་མཁན་ཆེན་རང་ཉིད་གཅིག་པུས་གྲ་ལྔའི་དབང་དང་དབྱངས་ཅན་མའི་རྗེས་གནང་སོགས་ཟབ་ཆོས་མང་དུ་གསན། དེའི་ཚེ་རྗེ་རིན་པོ་ཆེ་ཟབ་མོ་དབུ་མའི་ལྟ་བ་མཐར་ཐུག་པ་དང༌། གསང་བ་འདུས་པའི་སྒྱུ་ལུས་སོགས་མདོ་སྔགས་གཉིས་ཀའི་ལམ་གྱི་དཀའ་གནད་མཐར་ཐུག་པ་འགའ་ཞིག་རྩད་དཔྱོད་ཕྱིར་རྒྱ་གར་དུ་སློབ་དཔོན་ཀླུའི་བྱང་ཆུབ་དང་གྲུབ་ཆེན་མི་ཏྲ་སོགས་མཇལ་བར་ཕེབས་བཞེད་ནས་དཔོན་སློབ་བཅུ་གསུམ་རྟེན་འབྲེལ་བསྒྲིགས་ཏེ་ཕེབས་རྩིས་མཛད་པ་ན་གསང་བདག་ཕྱག་ན་རྡོ་རྗེའི་གསུང་ལྟར་ལྷོ་བྲག་མཁན་ཆེན་ནམ་མཁའ་རྒྱལ་མཚན་གྱིས་རྗེ་རིན་པོ་ཆེ་རྒྱ་གར་དུ་ཕེབས་ན་སློབ་དཔོན་ཀླུའི་བྱང་ཆུབ་དང་གྲུབ་ཆེན་མི་ཏྲ་སོགས་དང་དངོས་སུ་མཇལ་ནས་ཡོན་ཏན་ཁྱད་པར་ཅན་བརྙེས་པ་དང༌། རྒྱ་གར་རྡོ་རྗེ་གདན་གྱི་མཁན་པོ་མཛད་ནས་སླར་བོད་དུ་འབྱོན་མི་ཐུབ་པ་དང༌། འཁོར་སེམས་དཔའ་ཆེན་པོ་འདི་དག་ཚད་པས་གུམ་པར་འགྱུར་བ་སོགས་དགག་བྱ་མང་པོ་མཆིས་པས་རྒྱ་གར་དུ་མི་འབྱོན་པར་བོད་རང་དུ་བཞུགས་པ་ཞིག་ཅིས་ཀྱང་མཁྱེན་ཞེས་ནན་ཆེན་པོས་གསོལ་བ་བཏབ་རྗེ་ཉིད་ཀྱིས་ཀྱང་དོན་དེ་ལྟར་དུ་དགོངས་ནས་རྒྱ་གར་དུ་ཕེབས་པ་ཤོལ་ཏེ་བོད་དུ་བཞུགས་པར་མཛད་པས་ན་ལྷོ་བྲག་མཁན་ཆེན་ནམ་མཁའ་རྒྱ་མཚན་པ་ནི་བྱང་ཕྱོགས་ཁ་བ་ཅན་གྱི་གདུལ་བྱ་རྣམས་ལ་བཀའ་དྲིན་མཚུངས་པ་མེད་པ་ཞིག་གོ །

                    རྗེ་རིན་པོ་ཆེ་རྒྱ་གར་ལ་འབྱོན་པར་ཆས་པའི་དུས་དེའི་ཚེ་རྗེ་བཙུན་འཇམ་པའི་དབྱངས་ཀྱིས་རྫིང་ཕྱིའི་ཇོ་བོ་ལ་དགེ་སྦྱོང་གི་རྟགས་ཚང་མའི་སྐྱེས་འབུལ་བ་དང་བཅས་པའི་བསྟོད་ཅིང་གསོལ་བ་འདེབས་པའི་ཚིག་ཚངས་པའི་ཅོད་པན་ཞེས་བྱ་བ་དོན་གྱི་རིམ་པ་འདི་ལྟར་གྱིས་ལ་རྩོམས་ལ་ཕུལ་ཞིག་དང༌། ཕྱིས་འདུལ་བའི་བསླབ་ཁྲིམས་རྣམ་པར་དག་པ་ལ་བརྟེན་ནས་བསྟན་པ་ལ་ཕན་པ་རྒྱ་ཆེན་པོ་འབྱུང་བའི་རྟེན་འབྲེལ་ཡོད་དོ། །ཞེས་གསུངས་པ་ལ་བརྟེན་ནས་དེ་ལྟར་དུ་བརྩམས་ཏེ་ཕུལ་ལོ། །ཕྱིས་ཀྱང་རྗེ་བཙུན་གྱི་གསུང་གིས་ནན་གྱིས་བསྐུལ་ཞིང༌། བསྟན་པའི་རྩ་བ་ཡིན་པའི་ཐུགས་ངེས་ཤུགས་དྲག་པོ་འཁྲུངས་པ་དང༌། བསྟན་པ་ཉམས་པ་ཐུགས་ཀྱིས་བསྲན་པར་མ་བཟོད་པའི་སྟོབས་ཀྱིས་འདུལ་བའི་ལག་ལེན་ཕྱིར་བཅོས་ཡན་ཆད་ཡོངས་སུ་རྫོགས་པ་སྔ་མའི་སྲོལ་ཀ་ཙམ་ལ་མ་ལྟོས་པར་ལེགས་པར་འཛུགས་པར་མཛད་དོ། །དོན་འདི་ལ་རྗེ་ཉིད་ཀྱི་ཞལ་ནས་བསྟན་པའི་ནང་མཛོད་འདུལ་བའི་བསླབ་ཁྲིམས་ཉམས་པ་སེམས་ཀྱིས་མ་བཟོད་ནས་རུང་ཆུ་གདབ་པ་ཡན་ཆད་འདུལ་བའི་བཅས་མཚམས་ཕྲ་རགས་ཐམས་ཅད་གསར་དུ་བཙུགས་པ་ཡིན་གྱི།གཞན་ལས་ཁྱད་པར་ཐོན་པ་ཞིག་དོན་དུ་གཉེར་ནས་བྱས་པ་ག་ལ་ཡིན་ཞེས་གསུངས་སོ། ། 

                                                                                                                                                    རྩོམ་སྒྲིག་པ། མང་ར་བ།
            གསལ་འདེབས། 
                   རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

                    དྲ་བའི་སྦྲེལ་ཐགhttp://www.tb1025.cn