དེ་ནས་དགུང་ལོ་བཅུ་དྲུག་ལ་བབ་པའི་ཚེ་ཆོས་རྗེ་དོན་གྲུབ་རིན་ཆེན་པས་ཀྱང་བསྐུལ་ཞིང་བདག་ཉིད་ཀྱང་སྤྲོ་བ་ཤུགས་དྲག་པོས་སྔོན་གྱི་ཆོས་རྒྱལ་ལོ་པཎ་རྣམས་ཀྱི་བཀའ་དྲིན་ལས་རྒྱལ་བསྟན་ཡོངས་སུ་རྫོགས་པ་གང་དུ་དར་བའི་ས་དབུས་གཙང་གི་ལྗོངས་སུ་འབྱོན་པར་བཞེད་པ་ན། ཆོས་རྗེ་དོན་གྲུབ་རིན་ཆེན་པས་དབུས་གཙང་གི་ལྗོངས་སུ་བྱོན་ནས་ཐོས་བསམ་སྒོམ་གསུམ་འདི་ལྟར་བྱ་དགོས་སོ་ཞེས་ཞལ་གདམས་རྒྱས་པར་གནང་ནས་དོན་དེ་ཉིད་ཐུགས་ལ་བཟུང་བདེ་བའི་ཕྱིར་ཚིགས་སུ་བཅད་པའི་སྒོ་ནས་ཀྱང་གདམས་པ་ནི།

              གཞོན་ནུ་བློ་བཟང་གྲགས་པ་ཁྱོད། །སྔོན་སྦྱངས་དགེ་བའི་ལས་འཕྲོ་ཅན། །སྔོན་ཚེ་དམ་ཆོས་བདུད་རྩིའི་རོ། །འཐུངས་པའི་བག་ཆགས་ཡོད་པར་ངེས། །ཞེས་པ་དང༌། ཡུམ་ཆེན་རྒྱས་འབྲིང་བསྡུས་གསུམ་གྱི། །རྒྱན་དུ་གྱུར་པའི་མངོན་རྟོགས་རྒྱན། །ཐོག་མར་བསླབ་ཅིང་ནན་ཏན་བྱ། །དེ་ལ་མཁས་པར་གྱུར་པ་ན། །ལུང་ཆོས་ཀུན་ལ་འཕྲིག་ཚུད་འགྱུར། །དེ་ཡང་སེམས་ཀྱི་ཟུར་ལ་ཞོག །དེ་ནས་བྱང་ཆུབ་སེམས་དཔའ་ཡི། །ལམ་དང་སྤྱོད་པའི་རྣམ་གཞག་དག །སྟོན་པར་བྱེད་པའི་སྡེ་རྒྱན། །མཁས་པའི་ཡན་ལག་དག་ཏུ་བསླབ། །འཁོར་བ་མྱ་ངན་འདས་ཡི། །རྟེན་དུ་སྟོན་པའི་ཆོས་དང་ནི། །ཆོས་ཉིད་རྣམ་འབྱེད་བསྟན་བཅོས་དང༌། །ཐོག་མ་མཐའ་མ་རྣམ་སྤངས་པའི། །དབུ་མའི་ལམ་ནི་སྟོན་པས་ན། །དབུས་དང་མཐའ་ནི་རྣམ་འབྱེད་དང༌། །སེམས་ཀྱི་ཆོས་ཉིད་དག་པ་ནི། །སེམས་ཅན་ཀུན་ལ་ཡོད་པ་སྟེ། །དེ་ཉིད་བདེ་གཤེགས་སྙིང་པོར་ནི། །སྟོན་བྱེད་ཐེག་ཆེན་རྒྱུད་བླ་མ། །བྱམས་ཆོས་ལྔ་པོ་དེ་དག་ལ། །མཁས་པར་བྱེད་པའི་གོ་ཆ་གྱིས། །རྒྱས་པའི་བསྟན་བཅོས་རྣམ་འགྲེལ་དང༌། །འབྲིང་དུ་སྟོན་པའི་རྣམ་ངེས་དང༌། །ཤིན་ཏུ་བསྡུས་པ་རིགས་ཐིགས་ཏེ། །ལུས་དང་འདྲ་བའི་བསྟན་བཅོས་གསུམ། །གཏན་ཚིགས་ཐིགས་པ་འབྲེལ་བརྟག་དང༌། །རྒྱུད་གཞན་སྒྲུབ་པ་རྩོད་རིག་སྟེ། །འཕྲོས་པ་ཡན་ལག་ལྟ་བུ་ཟེར། །ཆོས་ཀྱི་གྲགས་པ་ལས་བྱུང་བའི། །ཚད་མ་སྡེ་བདུན་འཛམ་གླིང་ན། །སངས་རྒྱས་བསྟན་པ་གསལ་བྱེད་པ། །ཉི་མ་ཟླ་བ་ལྟ་བུར་གྲགས། །འདི་ཡི་འོག་ཏུ་དེ་རྣམས་སློབས། ཞེས་སོགས་དང༌། བློ་གྲོས་བཟང་ལྡན་ཁྱོད་ཀྱིས་ནི། །མཐའ་བྲལ་ཆེན་པོའི་ལྟ་བ་ལ། །གལ་ཏེ་མོས་པ་ཡོད་གྱུར་ན། །འཕགས་པ་ཀླུ་སྒྲུབ་ཀྱིས་མཛད་པའི། །དབུ་མ་རིགས་པའི་ཚོགས་རྣམས་དང༌། །ཞེས་སོགས། ཤིང་རྟ་ཆེན་པོ་གཉིས་རྗེས་འབྲང་དང་བཅས་པའི་གཞུང་རྣམས་ལ་ཐོས་པ་ཕུ་ཐག་ཆོད་པ་ཞིག་བྱ་དགོས་པ་དང༌། ཐོས་པའི་དོན་ལ་ཉམས་ལེན་སྙིང་པོར་མཛད་དེ་གདེང་ཐོབ་པ་ཞིག་བྱ་དགོས་པ་དང༌། རང་གིས་ཇི་ལྟར་དགོངས་པ་ལྟར་སྐལ་བ་དང་ལྡན་པ་གཞན་དག་ལའང་སྤེལ་ཏེ་རྒྱལ་བསྟན་ཡོངས་སུ་རྫོགས་པ་འཛིན་ཅིང་སྤེལ་ཐུབ་པ་ཞིག་ཅི་ནས་ཀྱང་བྱ་དགོས་སོ་ཞེས་ནན་ཏན་དུ་གདམས་ཤིང༌། ཚེ་རབས་གཏན་གྱི་ལྷག་པའི་ལྷ་ཡི་དམ་རྡོ་རྗེ་འཇིགས་བྱེད་དང༌། བར་ཆད་སྲུང་བའི་ལྷ་ཕྱག་རྡོར་འཁོར་ཆེན་དང༌། ཤེས་རབ་བསྐྱེད་པའི་ལྷ་འཇམ་དཔལ་ཨ་ར་པ་ཙ་ན་དང༌། ཚེ་བསྲིང་བའི་ལྷ་ཚེ་དཔག་མེད་དང༌། མཐུན་རྐྱེན་སྒྲུབ་པའི་ལྷ་རྣམ་ཐོས་སྲས་དང༌། འགལ་རྐྱེན་སེལ་ཞིང་མཐུན་རྐྱེན་སྒྲུབ་པའི་ལྷ་ཡེ་ཤེས་ཀྱི་མགོན་པོ་ཕྱག་དྲུག་པ་དང་དམ་ཅན་ཆོས་རྒྱལ་རྣམས་ངེད་ཀྱིས་བྱིན་པ་ལྟར་བསྟེན་ལ་བསྙེན་སྒྲུབ་དང་མཆོད་གཏོར་མ་འཆག་པར་གྱིས་ཞེས་གདམས་སོ། །

              དེ་ནས་རྗེ་འདི་པས་ཆོས་རྗེ་གྲུབ་རིན་ཆེན་ལ་བཀའ་བཞིན་བགྱིའོ་ཞེས་ཞུས་ཤིང་ཕྱག་བཙལ་ཏེ་བྱིན་རླབས་ཞུས་ནས་འབྲི་ཁུང་མཐེལ་པའི་འབུལ་དཔོན་ལྡན་མ་རིན་ཆེན་དཔལ་གྱིས་གདན་དྲངས་ནས་འཕྲིན་ལས་པ་དང་འགྲོགས་ཏེ་བྱོན། གླང་ལོའི་སྟོན་གྱི་དུས་སུ་འབྲི་ཁུང་དཔལ་གྱི་ནགས་ཁྲོད་དུ་ཕེབས། དེའི་ཚེ་འབྲི་ཁུང་གི་སྤྱན་སྔ་རིན་པོ་ཆེ་ཆོས་ཀྱི་རྒྱལ་པོ་བཞུགས་པས་ཁོང་གི་སྤྱན་སྔར་མཇལ། ཐེག་ཆེན་སེམས་བསྐྱེད་ཀྱི་ཆོ་ག་དང་ཕྱག་ཆེན་ལྔ་ལྡན་ལ་སོགས་པ་ཟན་ཁྲིད་མང་དུ་གསན། དེ་ནས་སློབ་གཉེར་ཞིག་ལ་འབྱོན་པར་བཞེད་པ་ལ་གྲོགས་འགའ་ཞིག་གི་དབང་གིས་ཚལ་པའི་སྨན་པ་མཁས་པ་དཔོན་དཀོན་མཆོག་སྐྱབས་ཞེས་པའི་གམ་དུ་བྱོན་ནས་གསོ་དཔྱད་ཀྱི་གཞུང་ལ་སྦྱངས་ཤིང༌། ཡན་ལག་བརྒྱད་པ་ཐུགས་ལ་བཟུང་སྟེ་གསོ་དཔྱད་ཀྱི་སྐོར་རྣམས་བསླབས་པས་གཞུང་མན་ངག་ལག་ལེན་དང་བཅས་པ་ལ་ཤིན་ཏུ་མཁས་པར་གྱུར་ཏེ། ཕྱིས་བསྙུང་དུས་སུ་སྨན་པ་ བདུན་བཅོ་བརྒྱད་ཙམ་འཚོགས་པའི་དུས་སུའང་ནད་གང་ལ་སྨན་གང་འཇུག་པ་དང༌། སྨན་གྱི་སྦྱོར་སྡེ། བསིལ་དྲོད་ལ་སོགས་པའི་ཁྱད་པར་ཐམས་ཅད་དྲུང་དུ་ཞུས་ནས་ལག་ལེན་བདག་ཅག་རྣམས་ཀྱིས་བྱེད་པ་ཡིན་ཟེར་བ་དང༌། སྨན་པ་མཁས་པར་གྲགས་པ་ཐམས་ཅད་ཀྱང་ད་ལྟ་ཁ་བ་ཅན་ན་ཆོས་རྗེ་རིན་པོ་ཆེ་ལས་སྨན་པ་མཁས་པ་མི་འདུག་པའི་གནད་ཀྱིས་བདག་ཅག་རྣམས་ཀྱང་དྲུང་དུ་སྨན་སྦྱོར་ལ་ཕྱིན་པས་སྨན་གྱི་རྣམ་དབྱེ་མང་དུ་གསུངས་པ་ཐོས་པ་ལ་བརྟེན་ནས། སྔར་ལོ་མང་དུ་བསླབས་པ་བས་བློ་བསྐྱེད་ཆེ་བར་བྱུང་ཞེས་གླེང་ངོ༌། །

              དེར་ཡུན་ཧ་ཅང་མི་རིང་བ་ཞིག་བཞུགས་ནས། ཆོས་གྲྭ་ཆེན་པོ་བདེ་བ་ཅན་དུ་བྱོན། བདེ་བ་ཅན་པའི་རིན་པོ་ཆེ་སྙེ་ཐང་པ་བཀྲ་ཤིས་སེང་གེ་དང༌། གདན་ས་བ་དགེ་བསྐོང་བ་གཉིས་ལ་ཆོས་འབྲེལ་གསན། ཀློག་པའི་སློབ་དཔོན་ཏན་རྒྱ་མཚོ་དང༌། ཞར་ཆོས་པ་སློབ་དཔོན་ཨུ་རྒྱན་པས་མཛད་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་རྩ་འགྲེལ་ལ་ལེགས་པར་ཐུགས་སྦྱོངས་མཛད། ཞག་བཅོ་བརྒྱད་ཙམ་གྱིས་གཞུང་གི་ཚིག་མཐའ་དག་ཤིན་ཏུ་བྱང་བར་ཐུགས་སུ་ཆུད་དེ། འཇམ་སྐྱའི་ཊཱིཀྐའི་སྟེང་ནས་ཆོས་གསན་ཞིང་དོན་ཀུན་ཆུབ་པར་མཛད་དེ། སྦྱོར་བ་བརྩི་བ་སོགས་ཀྱི་ཐུགས་བརྩོན་ཆེར་མ་མཛད་ཀྱང་རིང་པོ་མ་པར་ཤེས་རབ་ཀྱི་ཕ་རོལ་དུ་ཕྱིན་པའི་ཚིག་དོན་ལ་ཤིན་ཏུ་མཁས་པར་གྱུར་ནས། སློབ་དཔོན་དང་གྲོགས་མཆེད་ཐམས་ཅད་ཀྱང་རྗེ་འདིའི་བློ་གྲོས་ཀྱི་རྩལ་དཔག་པར་དཀའ་བ་ལ་ཆེས་ཆེར་ངོ་མཚར་བའི་གནས་སུ་འཛིན་ལ། ཐེག་པ་ཆེན་པོ་མདོ་སྡེའི་རྒྱན་ནི།སྔར་མདོ་སྨད་དུ་བཞུགས་པའི་དུས་ནས་ཐུགས་ལ་ཆུད་ཅིང༌། བཤད་གསར་དང་འཆད་པ་སོགས་མཛད་ཀྱང་བདེ་བ་ཅན་པའི་བླ་མ་འཇམ་རིན་པ་ཞེས་གྲགས་པའི་དགེ་བཤེས་ཆེན་པོ་དེ་བྱམས་ཆོས་ལ་ཤིན་ཏུ་མཁས་པར་བྱེད་ཀྱིན་འདུག་པས།མདོ་སྡེ་རྒྱན་ལ་སོགས་པའི་བྱམས་ཆོས་རྣམས་ལེགས་པར་གསན་ཞིང་ཐུགས་སུ་ཆུད་པར་མཛད། བདེ་བ་ཅན་དུ་ཐུགས་སྦྱོངས་ལ་བཞུགས་པའི་ཚེ་སྐབས་ཤིག་ཏུ་རྗེ་བཙུན་འཇམ་པའི་དབྱངས་ཀྱི་རྣམ་འཕྲུལ་ས་སྐྱོང་མིའི་དབང་པོའི་ཅོད་པན་དཔལ་ལྡན་བླ་མ་དམ་པ་བསོད་ནམས་རྒྱལ་མཚན་པ་དབེན་གནས་ཆོས་རྫོང་དུ་ཕྱགས་ཕེབས་པའི་སྤྱན་སྔར་མཇལ། འཇམ་དབྱངས་ཨ་ར་པ་ཙ་ནའི་རྗེས་གནང༌། བདེ་མཆོག་དྲིལ་བུ་པའི་ལུས་དཀྱིལ་གྱི་དབང༌། གུར་གྱི་མགོན་པོའི་རྗེས་གནང་རྣམས་གསན་ནོ། །

              དེ་ལྟར་ལོ་གཉིས་ཙམ་ལ་ཕར་ཕྱིན་གྱི་ཚིག་དོན་ལ་ཤིན་ཏུ་མཁས་པར་གྱུར་ནས་དགུང་ལོ་བཅུ་དགུའི་སྟེང་དུ་གསང་ཕུ་དང་བདེ་བ་ཅན་ལ་སོགས་པ་རྣམས་སུ་གྲྭ་སྐོར་ལ་བྱོན། བློ་གྲོས་དང་ཆོས་སྐད་ཕུན་སུམ་ཚོགས་སྙན་པ་རིང་དུ་སོང་ཞིང༌། བཤེས་གཉེན་མཁས་པ་དག་གི་ཡིད་ཀྱི་དབང་པོ་རྣམ་པར་དཔྱོད་པའི་ལྕགས་ཀྱུས་དྲངས་པར་གྱུར་ཏོ། །

                                                                                                         རྩོམ་སྒྲིག་པ། མང་ར་བ།
            གསལ་འདེབས།
                   རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                    དྲ་བའི་སྦྲེལ་ཐགhttp://www.tb1025.cn