རྒྱལ་སྲས་གཞོན་ནུ་དེ་ཡུམ་གྱི་མངལ་ནས་འཁྲུངས་མ་ཐག་ལྟེ་བ་བཅད་པའི་མཚལ་ཁྲག་ས་ལ་ལྷུང་བ་ལས་ཙནྡན་དཀར་པོའི་སྡོང་པོ་ཞིག་གསར་དུ་སྐྱེས་པ་དེ་ལ་ཡལ་ག་མང་དུ་གྱེས་ཤིང་ལོ་མ་འབུམ་ཡོད་པ། ལོ་མ་རེ་རེ་ལ་དེ་བཞིན་གཤེགས་པ་སེང་གེའི་ང་རོའི་སྐུ་རེ་རེ་ཡོད་པ་ཞིག་བྱུང་བས་སྐུ་འབུམ་ཞེས་གྲགས། དུས་ཕྱིས་རྒྱལ་བ་བསོད་ནམས་རྒྱ་མཚོ་གནས་དེར་བྱོན་ནས་གུས་པ་ཆེན་པོས་མཆོད་པ་རྒྱ་ཆེན་པོ་མཛད་ཅིང༌། ཤིང་འདི་འདྲ་ལས་ལྷག་པའི་བྱིན་རླབས་ཅན་དཀོན་ཞེས་ཤིང་དེའི་ཕྱི་དངུལ་གྱིས་བསྟུམས་ཏེ་བྱང་ཆུབ་མཆོད་རྟེན་གྱི་རྣམ་པར་བྱས། གནས་དེར་རྗེ་བླ་མའི་མདོ་སྔགས་ཀྱི་བསྟན་པ་ཡོངས་སུ་རྫོགས་པ་ལ་བཤད་སྒྲུབ་བྱེད་པའི་དགེ་འདུན་གྱི་སྡེ་ཞིག་གསར་དུ་འཛུགས་པར་བཞེད་དེ་ཞལ་བཀོད་གནང་བ་ཐུགས་བཞེད་ལྟར་གྲུབ་ནས་སྐུ་འབུམ་བྱམས་པ་གླིང་ཞེས་བཏགས།

              མཆོད་རྫོང་དེའི་ཕྱི་རོལ་ཏུ་ཙན་དན་གྱི་སྡོང་པོ་གསར་པ་ཞིག་ཐོན་པ་དེ་ལ་ཡང་ཡལ་ག་དང་ལོ་མ་རྣམས་ལ་ཨ་ར་པ་ཙ་ན་དང༌། དྷིཿདང་ཧཱཾ་ལ་སོགས་པ་ཡི་གེའི་གཟུགས་རང་བྱོན་དུ་འབྱུང་བ་དང༌། དེའི་ཡལ་ག་དང་ལོ་མ་ཟོས་ན་ཤེས་རབ་སྐྱེ་ཞིང་རིམས་ནད་སོགས་ཞི་བ་ཀུན་གྱི་མཐུན་སྣང་དུ་ཡོད་དོ། །དེ་ལྟ་བུའི་རྒྱལ་སྲས་གཞོན་ནུ་དེ་ཉིད་སྙིགས་མའི་དུས་འདིར་བྱོན་ཡང་འདམ་གྱི་དབུས་སུ་སྐྱེས་པའི་པདྨ་འདམ་གྱིས་མི་གོས་པ་ལྟར་སྙིགས་མའི་སྐྱོན་གང་གིས་ཀྱང་མ་གོས་ཤིང་བྱིས་པའི་ཚུལ་བཟུང་ཡང་བྱིས་པའི་རྒུད་པ་ཐམས་ཅད་ལས་ཡང་དག་པར་འདས། བག་མེད་པར་བརྩེ་བ་མཐའ་དག་ལས་ནི་ངང་གིས་ལོག ཉེས་པར་སྤྱོད་པ་རྣམས་ནི་རང་བཞིན་གྱིས་བསྡམས། ཀུན་ལ་སྙན་པར་སྨྲ་ཞིང་ཁྲོ་བ་སྤངས་པ་དང༌། འགྲོགས་ན་བདེ་ཞིང་སློང་བའི་སྐྱེ་བོ་དག་ལ་གཏོང་བའི་ལག་བརྐྱངས་པ་དང༌། མགོན་མེད་པ་དག་ལ་སྙིང་བརྩེ་ཞིང་བདེན་པར་སྨྲ་བ་དང༌། བློ་གྲོས་དཔག་པར་དཀའ་ཞིང་ཆོས་འཚོལ་བ་ལ་ངང་གིས་ཞུགས་པ་ལ་སོགས་པ་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་དག་ནི་བྱིས་པ་གཞན་དག་སྐྱེས་ཙམ་ཉིད་ནས་ནུ་ཞོ་ལེན་པའི་ཀུན་ཏུ་སྤྱོད་པ་དག་ཆེད་དུ་བསླབ་པར་བྱ་མི་དགོས་པ་ཇི་ལྟ་བ་དེ་བཞིན་དུ་གྱུར་ཏོ། །

              གཞོན་ནུ་ཉིད་ནས་བསྟན་པའི་སྒོར་ཞུགས་ཚུལ། རྒྱལ་སྲས་གཞོན་ནུ་དེ་དགུང་ལོ་གསུམ་པ་ལ་བབ་པ་ན་ཆོས་རྗེ་ཀརྨ་པ་རོལ་བའི་རྡོ་རྗེ་ལས་དགེ་བསྙེན་གྱི་སྡོམ་པ་ཡོངས་སུ་རྫོགས་པར་མནོས་ཏེ། མཚན་ཡང་ཀུན་དགའ་སྙིང་པོ་ཞེས་བཏགས་སོ། །ལོ་དེ་ལ་ཆོས་རྗེ་དོན་གྲུབ་རིན་ཆེན་པ་དེ་ཉིད་རྗེ་འདིའི་ཡབ་ཀྱིས་གདན་དྲངས་པ་ཞིག་གི་དུས་ན་ཆོས་རྗེ་དོན་གྲུབ་རིན་ཆེན་པས་ཡབ་ཡུམ་གཉིས་ལ་རྟ་དང་ལུག་ལ་སོགས་པ་ཟང་ཟིང་གི་གནང་སྦྱིན་དཔག་ཏུ་མེད་པ་མཛད་ནས་ཁྱེད་ཀྱི་བུ་འདི་ང་ལ་ཕུལ་ཞིག་ཅེས་བཀའ་གནང་བ་ཡབ་ཡུམ་གཉིས་ཀྱིས་ཀྱང་དང་དུ་བླངས་ཏེ་སྤྲོ་དགའ་དང་བཅས་པས་ཕུལ།དེ་ནས་དགུང་ལོ་བདུན་པ་ལ་ཉེ་བར་བབ་པ་ན་རྗེ་འདིས་ཆོས་རྗེ་དེའི་ཞབས་དྲུང་དུ་ཕེབས་པར་མཛད་དེ། རབ་ཏུ་མ་བྱུང་བའི་སྔ་རོལ་ཉིད་དུ་ཆོས་རྗེ་དེས་རྗེ་འདི་པ་དཔལ་རྡོ་རྗེ་འཇིགས་བྱེད་ལྷ་བཅུ་གསུམ་མའི་དཀྱིལ་འཁོར་དུ་བཅུག་ནས་དབང་བསྐུར་ཏེ་གསང་སྔགས་རྡོ་རྗེ་ཐེག་པའི་སྒོར་སྨིན་པར་མཛད་ཅིང༌། དེ་ནས་བཅོམ་ལྡན་འདས་འཁོར་ལོ་བདེ་མཆོག་དྲིལ་བུ་པ་དང༌། ཀྱཻ་རྡོ་རྗེ་དང་ཕྱག་ན་རྡོ་རྗེ་ལ་སོགས་པའི་དཀྱིལ་འཁོར་དུ་བཅུག་ཅིང་དབང་བསྐུར། གསང་མཚན་དོན་ཡོད་རྡོ་རྗེ་ཞེས་བཏགས། རྗེ་འདི་པས་རིག་པ་འཛིན་པའི་སྡོམ་པ་དང་དམ་ཚིག་ཡོངས་སུ་རྫོགས་པར་མནོས་ཏེ་དབང་དུས་སུ་ཇི་ལྟར་ཞལ་གྱིས་བཞེས་པ་ལྟར་མིག་གི་འབྲས་བུ་ལྟར་གཅེས་པར་སྲུང་བར་མཛད་དོ། །

              ཆོས་རྗེ་དེའི་དྲུང་དུ་ཐོག་མར་ཕེབས་མ་ཁད་ནས་གསུང་རབ་ཀློག་པ་པོ་མང་དུ་འདུག་པ་རྣམས་ལ་གཟིགས་ཤིང་ཐུགས་ཀྱིས་དཔྱད་པས་དེ་ཙམ་གྱིས་ཀློག་རང་ཉིད་ཀྱིས་ཐོགས་མེད་དུ་འདོན་པར་ནུས་པ་བྱུང་ཞིང་ཆེད་དུ་གཏད་ནས་བསླབ་དགོས་པ་མ་བྱུང༌། དབང་ཐོབ་ནས་རབ་ཏུ་མ་བྱུང་བའི་གོང་དགུང་ལོ་བདུན་དུ་ཉེ་བ་ཙམ་གྱི་དུས་ཉིད་དུའང༌། བདེ་མཆོག་དགྱེས་རྡོར་ཀུན་རིག་གཤིན་རྗེ་གཤེད་ལ་སོགས་པའི་མངོན་རྟོགས་དང་དཀྱིལ་ཆོག་མང་པོ་ཐུགས་ལ་བཟུང༌། གཤིན་རྗེའི་གཤེད་དང་བདེ་མཆོག་གི་བསྙེན་པ་ཡང་མཛད་ནས་བདེ་མཆོག་དྲིལ་བུ་བའི་བདག་འཇུག་ཀྱང་ལན་མང་དུ་མཛད་ཅིང༌། ལྷའི་རྣལ་འབྱོར་དང་བཟླས་པའི་རིམ་པ་ལ་སོགས་པ་ལ་གཅིག་ཏུ་གཞོལ་བར་མཛད་དོ། །དེའི་ཚེ་ན་རྗེ་འདི་ལ་བཅོམ་ལྡན་འདས་ཕྱག་ན་རྡོ་རྗེ་གཏུམ་པོ་ཕྱག་གཉིས་པའི་རྣམ་པ་ཞིག་ཡུན་རིང་པོའི་བར་དུ་ནུབ་རེ་བཞིན་མནལ་ལམ་དུ་གསལ་བར་འཆར་བ་དང༌། གཞན་ཡང་སངས་རྒྱས་དང་བྱང་སེམས་མང་པོའི་སྣང་བ་ཤར་ཞིང་ཁྱད་པར་ཇོ་བོ་ཆེན་པོ་དཔལ་ལྡན་ཨ་ཏི་ཤ་མནལ་ལམ་དུ་ནར་མར་འོང་བ་ཞིག་བྱུང༌། ཕྱིས་དབུས་སུ་ཕེབས་དུས་སྐུ་འདྲ་གཟིགས་པ་ན། སྔར་མནལ་ལམ་དུ་གཟིགས་པ་དེའི་རྣམ་པ་ཇི་ལྟ་བར་འདུག་ཅེས་གསུངས་ཏེ། དེ་ནི་ཇོ་བོ་ཉིད་ཁ་བ་ཅན་འདིར་བསྟན་པ་ཉམས་པ་གསོ་བའི་སླད་དུ་བྱོན་པ་ལྟར། མདོ་སྔགས་ཀྱི་ལམ་གྱི་རིམ་པ་ཡོངས་སུ་རྫོགས་པས་གདུལ་བྱ་རྣམས་སྨིན་ཅིང་གྲོལ་བར་མཛད་དེ་བསྟན་པ་རིན་པོ་ཆེ་མི་ནུབ་པའི་རྒྱལ་མཚན་འཛིན་པ་རྣམས་ཀྱི་གཙུག་གི་ནོར་བུར་འགྱུར་བ་འདི་ཉིད་ཀྱི་སྔ་ལྟས་སོ། །དེ་ལྟར་རྗེ་འདི་པ་དེའི་ཚེ་རྒྱལ་སྲས་གཞོན་ནུའི་ཚུལ་བཟུང་བ་དེ་དགུང་ལོ་བདུན་ལ་བབ་པའི་ཚེ། ཁྱིམ་ནས་ཁྱིམ་མེད་པར་རབ་ཏུ་འབྱུང་བར་མཛད་དེ། ངུར་སྨྲིག་གི་རྒྱལ་མཚན་ཡང་དག་པར་བཞེས་སོ། །

              དེ་ཡང་རང་དང་གཞན་གྱི་གྲུབ་པའི་མཐའ་རྒྱལ་མཚན་ལྟ་བུའི་ཕ་རོལ་ཏུ་སོན་ཞིང་ལུང་དང་རྟོགས་པའི་ཡོན་ཏན་གྱི་ཚོགས་ཀྱིས་མངོན་པར་མཐོ་བའི་བླ་མ་དོན་གྲུབ་རིན་ཆེན་པས་མཁན་པོ་མཛད་དབུས་གཙང་དང་བལ་པོ་སོགས་སུ་མཁས་གྲུབ་དང་པཎྜི་ཏ་དུ་མ་ལ་གཏུགས་ནས་མདོ་སྔགས་མང་པོ་ལ་སྦྱངས་པའི་བཤེས་གཉེན་ཆེན་པོ་ཏ་དབེན་གཞོན་ནུ་སེང་གེ་ཞེས་གྲགས་པའི་སློབ་མ་གཞོན་ནུ་བྱང་ཆུབ་ཅེས་བྱ་བས་སློབ་དཔོན་མཛད་དེ་ཚིགས་སྔ་མ་དགེ་ཚུལ་གྱིས་སྡོམ་པ་ཡང་དག་པར་མནོས་ཤིང༌། མཚན་ཡང་བློ་བཟང་གྲགས་པའི་དཔལ་ཞེས་བྱ་བར་གསོལ་ཏོ། །རྗེ་འདི་ཆོས་རྗེ་དོན་གྲུབ་རིན་ཆེན་པ་འདིས་བྱིས་པ་ཉིད་ནས་བདག་གིར་མཛད་དེ་བསྟན་པ་རིན་པོ་ཆེའི་བདག་པོ་ཆོས་ཀྱི་རྒྱལ་པོར་འགྱུར་བར་དགོངས་ནས་ཐུགས་ཀྱི་ཡུལ་དུ་ཤིན་ཏུ་གཅེས་པར་བཟུང་སྟེ། སྨན་གྱི་ཤིང་ལྗོན་པ་ཆེན་པོའི་མྱུ་གུ་ལྟར་ལེགས་པར་བསྐྱངས། རབ་ཏུ་བྱུང་ཞིང་རྡོ་རྗེ་ཐེག་པའི་སྒོར་སྨིན་པར་མཛད་དེ་དབུས་གཙང་དུ་འབྱོན་པའི་ཆ་རྐྱེན་དང་བསྐུལ་མ་ཡང་དག་མཛད་པས་བཀའ་དྲིན་ཟླ་མེད་དུ་འཛིན་པར་མཛད་དེ། རྗེ་འདིས་ཆོས་རྗེ་དོན་གྲུབ་རིན་ཆེན་གྱི་མཚན་ཐོས་པ་ན་ཕྱག་ཐལ་མོ་སྦྱོར་ཞིང་ཆོས་རྗེ་དེ་ཉིད་ཀྱི་དུས་མཆོད་ཀྱང་འཆག་མེད་མཛད་དོ། །

              དབུས་འགྱུར་ཆོས་ཀྱི་ཞིང་དུ་བྱོན་ཏེ་གཙོ་བོར་ཕར་ཕྱིན་ཐེག་པར་ཐོས་པ་རྒྱ་ཆེར་བཙལ་བའི་ཚུལ་སོགས། དེ་ནས་དེའི་ཚེ་རྗེ་འདིའི་ཐུགས་ལ་འདི་ལྟ་བུ་དག་འཁྲུངས་པར་ངེས་ཏེ། རྒྱལ་བའི་བསྟན་པ་ལ་རབ་ཏུ་བྱུང་བ་རྣམས་ཀྱི་བྱ་བ་ནི་གཉིས་ཏེ། ཀློག་པ་ཐོས་བསམ་དང་སྤོང་བ་བསམ་གཏན་ནོ། །དེ་ལ་བདག་གིས་ཀྱང་འདི་གཉིས་ཀ་བྱ་སྟེ་རྒྱལ་བའི་དགོངས་པ་ཤིང་རྟ་ཆེན་པོ་རྣམས་ཀྱིས་བཀྲལ་བའི་གཞུང་ལུགས་ཆེན་མོ་རྣམས་ལ་ཐོས་བསམ་ཕུ་ཐག་ཆོད་པ་ཞིག་བྱས་ལ་གཞུང་དོན་གདམས་པར་འཆར་བའི་ཉམས་ལེན་ལ་འབད་དེ་རྒྱལ་བསྟན་ཡོངས་སུ་རྫོགས་པ་རང་གི་རྒྱུད་ལ་འཛིན་ཅིང་སྐལ་བ་དང་ལྡན་པ་གཞན་དག་ལའང་རྒྱ་ཆེར་སྤེལ་ཏེ་རྒྱལ་བའི་བསྟན་པ་རིན་པོ་ཆེ་འཇིག་རྟེན་འདིར་དར་ཞིང་རྒྱས་པ་ཞིག་ཅི་ནས་བྱའོ་སྙམ་དུ་ཐུགས་བསམ་རླབས་པོ་ཆེ་དེ་ལྟ་བུ་འཁྲུངས་པར་གྱུར་ཏོ། །

                                                                                                                 རྩོམ་སྒྲིག་པ། མང་ར་བ།
            གསལ་འདེབས། 
                   རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                   དྲ་བའི་སྦྲེལ་ཐགhttp://www.tb1025.cn