གཞན་ཡང་དེ་ལྟར་ཤེར་ཕྱིན་ཟབ་མོ་སྟོན་ནུས་པའི་སེམས་དཔའ་ཆེན་པོ་དེས་རྒྱལ་བ་རང་ཉིད་ཀྱི་སྤྱན་སྔར་སེམས་བསྐྱེད་ཅིང་ཤེར་ཕྱིན་ཟབ་མོ་འདིའི་དོན་རྒྱ་ཆེར་སྤེལ་བར་བྱའོ་ཞེས་དམ་བཅས་པ་ཡིན་པར་གསུངས་པ་དེས་ཀྱང་རྗེ་བླ་མ་འདི་ཉིད་ལུང་བསྟན་པ་ཡིན་པར་གསལ་བར་གྲུབ་སྟེ་རྗེ་འདིས་སྔོན་སྟོན་པ་ཐུབ་པའི་དབང་པོ་དང་ཐུགས་རྒྱུད་གཅིག་པའི་རྒྱལ་བ་དབང་པོའི་ཏོག་གི་སྤྱན་སྔར་སྙིགས་མའི་དུས་སུ་ཟབ་མོ་དབུ་མའི་ལྟ་བ་རྒྱ་ཆེར་སྤེལ་བར་དམ་བཅས་པ་དང༌། སྟོན་པ་རྡོ་རྗེ་གདན་དུ་བཞུགས་པའི་ཚེ་ཤེལ་དཀར་པོའི་ཕྲེང་བ་ཕུལ་ཏེ་ཟབ་མོ་དབུ་མའི་ལྟ་བ་སྤེལ་བར་ཐུགས་བསྐྱེད་ཅིང་དམ་བཅས་པ་སྔར་དྲངས་ཟིན་པ་ལྟར་རོ། །

              བདག་ཅག་གིས་རྗེ་བླ་མ་འདི་ལྟར་ལུང་བསྟན་ཏོ་ཞེས་བརྗོད་པ་འདི་ཡང་རྗེའི་རྗེས་འཇུག་ཡིན་པ་རྒྱུ་མཚན་དུ་བྱས་པའི་རྨོངས་ཞེན་དང་འདུ་ཤེས་བསྒྱུར་ཏེ་རབ་བརྟག་དང་ཟོལ་བསྟོད་བྱས་པ་མིན་གྱི་རྒྱལ་བའི་དགོངས་པ་འགྲེལ་པ་ལ་རྗེ་འདི་ཉིད་དང་མཚུངས་པ་གཞན་མེད་དོ་ཞེས་སྨྲས་པ་དེ་ནི་སྣང་རུང་མ་དམིགས་པའི་རྟགས་ཡང་དག་པས་གྲུབ་པ་ཡིན་ནོ། །གཞན་ཡང་ལྷོ་བྲག་གྲུབ་ཆེན་ལ་གསང་བདག་ཕྱག་ན་རྡོ་རྗེས་ལུང་བསྟན་བྱུང་བ་དང༌། བླ་མ་དབུ་མ་པ་ལ་རྗེ་བཙུན་འཇམ་པའི་དབྱངས་ཀྱིས་ལུང་བསྟན་བྱུང་བ་སོགས་ལྷག་པའི་ལྷ་རྣམས་ཀྱིས་ལུང་བསྟན་པའི་ཚུལ་མང་དུ་ཡོད་དེ་འོག་ཏུ་རིམ་བཞིན་འཆད་དོ། །སྐུ་བལྟམས་པའི་ཚུལ། དེ་ལྟར་མདོ་རྒྱུད་བསྟན་བཅོས་རྣམས་ནས་ལུང་བསྟན་པ་ལྟར། རྗེ་བླ་མ་འདི་ཉིད་གང་དུ་འཁྲུངས་པའི་ཡུལ་ནི་མདོ་ཁམས་སྨད་ཀྱི་སའི་ཆ་ཤར་ཙོང་ཁ་ཞེས་གྲགས་པ་དེ་ཡིན་ལ། དེར་ཇི་ལྟར་འཁྲུངས་པའི་ཚུལ་ནི། མེ་ཕོ་སྤྲེའུའི་ལོ་དགུན་གྱི་དུས་རྗེ་འདིའི་ཡབ་ཀྱི་མནལ་ལམ་དུ། རྒྱ་ནག་རི་བོ་རྩེ་ལྔ་ནས་འོང་ཟེར་བའི་བཙུན་པ་མེ་ཏོག་གི་ཕྲེང་བ་དུ་མ་སྦྲེལ་བའི་ཆོས་གོས་དང༌། སུམ་ཅུ་རྩ་གསུམ་གྱི་ཤིང་ལོ་ཡིན་ཟེར་བ་དར་སེར་པོ་འདྲ་བའི་ཤམ་ཐབས་ཅན་པོ་ཏི་ཁྱེར་བ་ཞིག་བྱུང་ནས། ང་ཁྱེད་ལ་གནས་ཤིག་གཡོར་བ་ཡིན་ཟེར་ནས་མཆོད་ཁང་ཞིག་ཡོད་པའི་ནང་དུ་སོང་བའི་སྣང་བ་བྱུང༌། ཡུམ་གྱི་མནལ་ལམ་དུ་ཡང་མེ་ཏོག་གི་ཐང་ཆེན་པོ་ཞིག་ཏུ་བུད་མེད་སྟོག་ཕྲག་ཙམ་གྲལ་བྱས་པའི་ནང་ནས་ཡུམ་རང་ཡང་བསྡད་པར་ཤར་ནས་ཁྱེའུ་དཀར་པོ་བུམ་པ་འཛིན་པ་ཞིག་དང༌། ནུབ་ནས་བུ་མོ་དམར་མོ་རྨ་བྱའི་སྒྲོ་མདོངས་སྡེར་མ་ཙམ་ཡོད་པ་ཞིག་ལག་པ་གཡས་ན་བཟུང༌། མེ་ལོང་ཆེན་པོ་ཞིག་གཡོན་ན་བཟུང་ནས་བྱུང་བས། དེ་གཉིས་གྲོས་བྱས་ཏེ་བུད་མེད་ཐམས་ཅད་ལ་འདིས་རུང་ངམ་འདིས་རུང་ངམ་ཞེས་ཁྱེའུ་དེས་བུ་མོ་དེ་ལ་འདྲི་ཞིང་བུ་མོ་དེས་གཞན་རྣམས་རེ་རེ་ལ་སྐྱོན་རེ་བཏགས། ཁྱེའུ་དེས་ཡུམ་ལ་མཛུབ་མོ་བཙུགས་ནས་འདིས་རུང་ངམ་ཞེས་འདྲི་བ་ལ། བུ་མོ་དེས་འཛུམ་བྱས་ནས་རུང་ཟེར།འོ་ན་འདི་ལ་ཁྲུས་ཀྱིས་ཟེར་ནས། ཇི་ལྟར་བལྟམས་པ་ཞེས་སོགས་དབྱངས་དང་བཅས་ཁྲུས་བྱས་པས་ལུས་ཀྱི་དྲི་མ་དག་ནས་བདེ་སངས་སངས་པའི་སྣང་བ་ཞིག་བྱུང་བ་དང༌། གཉིད་སད་ནས་ལུས་ཡངས་བ་དང་སེམས་བདེ་བ་ལ་སོགས་པའི་དགེ་མཚན་དུ་མ་བྱུང་ངོ༌། །

              དུས་དེ་ནས་བཟུང་སྟེ་ཁྱིམ་མཚེས་དང་ཡུལ་མི་རྣམས་ཀྱི་རྨི་ལམ་དུའང་དགེ་འདུན་མང་པོས་ཇོ་བོ་རིན་པོ་ཆེ་དབུས་ནས་གདན་དྲངས་བྱུང་བ་སོགས་རྨི་ལྟས་ངོ་མཚར་བ་མང་དུ་བྱུང་བ་དང༌། ཉི་ཟླ་སྐར་གསུམ་དུས་གཅིག་ལ་ཤར་བ་དང༌། མེ་ཏོག་གི་ཆར་ཡང་ཡང་འབབ་པ་དང་སྤོས་ཀྱི་དྲི་བཟང་པོ་བྲོ་བ་དང༌། ནམ་མཁའ་ལ་རོལ་མོའི་སྒྲ་གྲག་པ་དང༌། ས་གཡོ་བ་ལ་སོགས་པའི་ངོ་མཚར་བའི་ལྟས་ཡུལ་དེར་ཀུན་གྱི་མཐུན་སྣང་དུ་གྲུབ་པ་དུ་མ་བྱུང་ངོ༌། །དེ་ནས་བྱ་ལོ་ཟླ་བ་དང་པོའི་ཚེས་བཅུའི་ནུབ་མོ་ཡུམ་གྱི་མནལ་ལམ་དུ་དགེ་འདུན་བསམ་གྱིས་མི་ཁྱབ་པས་གདུགས་དང་རྒྱལ་མཚན་དང་རྔ་བོ་ཆེ་ལ་སོགས་པ་མཆོད་པའི་བྱེ་བྲག་མཐའ་ཡས་པ་བཟུང་སྟེ། སྤྱན་རས་གཟིགས་འབྱོན་པ་ལ་བསུ་བ་བྱེད་ཟེར་གྱིན་འདུག་པས་ཕྱོགས་ཀུན་ཏུ་བལྟས་ཀྱང་མ་མཐོང༌། རྗེས་ལ་བལྟས་པས་སྤྲིན་གྱི་ཐད་ཙམ་དུ་གསེར་སྐུ་རི་བོ་ཙམ་པ་འོད་ཟེར་ཉི་མ་ལྟར་ཕྱོགས་ཐམས་ཅད་དུ་འཕྲོ་བ་དང་ཆོས་ཀྱི་སྒྲ་དབྱངས་དང་བཅས་པ་ཞིག་ལྷའི་བུ་དང་བུ་མོ་ཡིན་ཟེར་བའི་ཆ་ལུགས་ཕུན་སུམ་ཚོགས་པ་དང་ལྡན་པ་དུ་མས་བསྐོར་བ་ཞིག་མར་མར་བབས་བྱུང་བས་གསེར་སྐུ་དེ་ཇེ་ཆུང་ཇེ་ཆུང་ལ་སོང༌། སྤྱི་གཙུག་གི་ཐད་ཙམ་དུ་སླེབས་པའི་ཚེ་མཐོ་གང་ཙམ་པ་ཤིན་ཏུ་མཛེས་པ་ཞིག་ཏུ་གྱུར་ནས་རང་ལ་ཐིམ། དེའི་འཁོར་རྣམས་དང་བསུ་མི་རྣམས་ཀྱང་རང་ལ་ཐིམ་པར་མཐོང་བས་རང་ལ་ཕྱག་དང་བསྐོར་བ་དང་མཆོད་པ་བྱེད་ཅིང་བཀྲ་ཤིས་བརྗོད་པ་སོགས་རྨིས་པས་ཕྱི་དེའི་ཉིན་པར་ནས་རིག་པ་གསལ་བ་སྐྱིད་སྣང་ཆེ་བ་བྱུང༌། དེ་ཕྱིན་མ་བརྟགས་མ་དཔྱད་པའི་དུས་ནའང་ངའི་ལུས་འདི་ལ་བརྙས་མི་རུང་སྙམ་ནས་གཅེས་སྤྲས་དང་གཙང་སྦྲ་ལ་བརྩོན་པ་སོགས་རང་ཤུགས་ཀྱིས་བྱུང༌། ཡབ་ཀྱི་མནལ་ལམ་དུ་ལྕང་ལོ་ཅན་ནས་ཕྱག་ན་རྡོ་རྗེས་འཕངས་སམ་སྙམ་པའི་གསེར་གྱི་རྡོ་རྗེ་འབར་བ་ཞིག་ཡུམ་ལ་ཐིམ་པ་རྨིས་པས་བུ་སྟོབས་ལྡན་ཞིག་སྐྱེ་བ་ཡིན་ནམ་ཞེས་གླེང་བ་བྱུང་ངོ༌། །

              སྐུ་བལྟམས་པའི་དུས་ལ་བབ་པའི་ཚེ་ཡུམ་གྱི་མནལ་ལམ་དུ། དགེ་འདུན་མང་པོ་དང་སྐྱེ་བོའི་ཁྲོམ་ཆེན་པོས་མཆོད་པ་རྣམ་ལྔ་ཁྱེར་ནས་མཆོད་ཁང་མཇལ་ཟེར། དེ་གང་ན་ཡོད་དྲིས་པས་སྔར་གྱི་ཁྱེའུ་དཀར་པོ་དེས་ཆུ་ཤེལ་གྱི་ལྡེ་མིག་ཞིག་བཟུང་ནས་འདི་ན་ཡོད་ཟེར་ཞིང་ཡུམ་རང་གི་བྲང་ན་སྒོ་ཆུང་སེར་པོ་ཞིག་འདུག་པ་བྱེ་བའི་ནང་ནས་སྔར་ལུས་ལ་ཐིམ་པའི་གསེར་སྐུ་དེ་བཏོན་ནས་དྲི་མས་ཅུང་ཟད་ནོགས་པ་ལ་སྔར་གྱི་བུ་མོ་དེ་བྱུང་ནས་དེ་ལ་བུམ་ཆུས་ཁྲུས་བྱས། རྨ་བྱའི་སྒྲོས་བྱབས་རྒྱ་གར་གྱི་སྐད་ཡིན་ནམ་སྙམ་པའི་དར་དིར་ཡང་མང་པོ་དབྱངས་སུ་ལེན་ཞིང་ལྷ་དེ་ལ་མཆོད་པ་འབུལ་གྱིན་འདུག་པའི་སྣང་བ་བྱུང༌། གཉིད་སད་ནས་ཐོ་རངས་སྐར་ཆེན་ཤར་བ་དང་སྟབས་གཅིག་པར་རབ་བྱུང་དྲུག་པའི་མེ་མོ་བྱའི་ལོ་ངོ་མཚར་བའི་ལྟས་མང་པོ་དང་བཅས་བདེ་བར་འཁྲུངས་སོ། །དེའི་ཚེ་ཚངས་པ་དང་བརྒྱ་བྱིན་ལ་སོགས་པའི་དཀར་ཕྱོགས་ཀྱི་ལྷ་རྣམས་ཀྱིས་ད་ནི་འགྲོ་བ་མགོན་དང་བཅས་སོ། །ཐུབ་པའི་བསྟན་པ་ཉམས་པ་གསོས་པར་འགྱུར་རོ། །བདུད་ཀྱི་སྡེ་ཕམ་མོ། །དཀར་ཕྱོགས་ཀྱི་ལྷ་རྣམས་རྒྱལ་ལོ་ཞེས་ཤིས་པ་བརྗོད་པའི་ཚིག་འཛམ་བུའི་གླིང་ནས་འོག་མིན་གྱི་བར་དུ་བསྒྲགས་ཤིང༌། ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་ཀྱིས་བདག་ཉིད་ཆེན་པོ་འདིའི་དོན་གྲུབ་པར་གྱུར་ཅིག་ཅེས་སྨོན་ལམ་མཛད་ཅིང་མེ་ཏོག་གཏོར།གསང་བའི་བདག་པོ་ཕྱག་ན་རྡོ་རྗེ་དང༌། རྒྱལ་པོ་ཆེན་པོ་རྣམ་ཐོས་སྲས་ལ་སོགས་པ་གཡེལ་བ་མེད་པར་རྗེས་སུ་འབྲངས་ཏེ་བར་ཆད་བསྲུང་བ་ལ་བརྩོན་པར་གྱུར་ཏོ། །

              རྒྱལ་བ་ཐམས་ཅད་ཀྱི་གདུང་འཚོབ་རྒྱལ་བའི་མྱུ་གུ་གངས་ཅན་གསེར་གྱི་ས་གཞིར་གསར་དུ་འཁྲུངས་པ་གཞོན་ནུའི་གཟུགས་ཅན་དེའི་དབུ་ནི་གདུགས་ལྟ་བུ་དང༌། དཔྲལ་བ་དབྱེས་ཆེ་ཞིང་སྨིན་མ་འབྱར་ལ་ཤངས་ཀྱི་གཟེངས་མཐོ་བ་དང༌། སྙན་ཤལ་རིང་དུ་འཕྱང་ཞིང་ཡན་ལག་དང་ཉིང་ལག་རྒྱས་ལ་དཀུ་སྐབས་ཕྱེད་པ་དང༌། དབང་པོ་ཡོངས་སུ་གསལ་ཞིང་པགས་པའི་མདོག་ནི་མེ་ཏོག་ཀུནྡ་ལྟར་དཀར་བ། ལྗགས་པདྨའི་འདབ་མ་ལྟར་འཇམ་ཞིང་མཉེན་ལ་རིང་བ། མཆུ་སྒྲོས་བིམ་པ་ལྟར་དམར་བ་སོགས་མཚན་བཟང་གིས་མཛེས་པ་འཇིག་རྟེན་ཀུན་གྱི་མིག་གི་བདུད་རྩི་ལྟ་བུ་ཞིག་བྱུང་བར་གྱུར་ཏོ། །ཡབ་ཡུམ་དེ་གཉིས་ཀྱང་ཐ་མལ་པ་མིན་པར་སྔོན་ཡུན་རིང་པོ་ནས་བདག་ཉིད་ཆེན་པོ་འདིས་བསྟན་འགྲོའི་དོན་རྒྱ་ཆེན་པོ་མཛད་པའི་ཚེ་མཐུན་པའི་རྐྱེན་སྒྲུབ་པར་སྨོན་ལམ་བཏབ་ནས་བསམ་བཞིན་དུ་བྱོན་པ་ཞིག་སྟེ། ཡབ་དེ་ནི་དཔའ་མཛངས་བརྟུལ་ཕོད་ཅན་འབྱོར་པ་དང་ལྡན་ཞིང་གཏོང་བ་ལ་དགའ་བ་རིགས་མཐོ་བ་མལ་གྱི་རིགས། རིགས་རུས་འབྱོར་པ་ཕུན་ཚོགས་དང་ལྡན་ཡང་ཁེངས་པ་མེད་པར་སློང་བ་རྣམས་ལ་བྱམས་པ། རྗེ་བཙུན་འཇམ་པའི་དབྱངས་ཀྱི་རྣལ་འབྱོར་དང་ལྡན་པ། རྒྱུན་དུ་འཇམ་དཔལ་མཚན་བརྗོད་ཁ་ཏོན་དུ་མཛད་པ་ཞིག་གོ །ཡུམ་དེ་ནི་གཟུགས་བཟང་ཞིང་མཛེས་ལ་གཡོ་སྒྱུ་ཆུང་བ། ཉམ་ཆུང་རྣམས་ལ་སྙིང་རྗེ་ཆེ།རྒྱལ་བ་བསྐྱེད་པའི་ཡུམ་དུ་འོས་པ་ཞིག་གོ །

              རྒྱལ་སྲས་གཞོན་ནུ་དེ་འཁྲུངས་པའི་སང་ཉིན་ཡུལ་དེའི་ཕུ་ན་རྡོ་རྗེ་འཇིགས་བྱེད་ཀྱི་གྲུབ་ཐོབ་ཏུ་གྲགས་པའི་བདག་ཉིད་ཆེན་པོ་ཆོས་རྗེ་དོན་གྲུབ་རིན་ཆེན་ཞེས་བྱ་བ་བཞུགས་ཡོད་པ་དེས་ཡབ་ཡུམ་གཉིས་ལ་ལེགས་སོའི་བསྔགས་པ་དང་གནང་སྦྱིན། རྒྱལ་སྲས་གཞོན་ནུ་དེ་ལ་བཞེས་རྒྱུའི་བདུད་རྩི་རིལ་བུ་སྐུ་ལ་བཅང་རྒྱུའི་སྲུང་མདུད། རྟེན་འབྲེལ་བསྒྲིག་པར་དགོངས་ཏེ་རྡོ་རྗེ་འཇིགས་བྱེད་ཀྱི་བྲིས་སྐུ་བྱིན་རླབས་ཅན་གཅིག་དང༌། བུ་ཆུང་སྐྱོང་ལུགས་ཀྱི་ཡེ་གེ་ལ་སོགས་པ་ཉེ་གནས་ཚུལ་ཁྲིམས་དང་ལྡན་པ་ཞིག་ལ་བསྐུར་ནས་བྱུང་སྟེ་བླ་མ་དེས་ཐུགས་མཁྱེན་གྱིས་མཁྱེན་པར་འདུག ཕྱིས་རྒྱུ་མཚན་ཞུས་པས། ངས་རྨི་ལམ་དུ་རྡོ་རྗེ་འཇིགས་བྱེད་དང་འཇལ་བས་གསོལ་བ་བཏབ། ཁྱད་པར་དུ་ཞལ་ཡང་ཡང་བསྟན་དུ་གསོལ་ཞེས་ཞུས་པས། སང་ཕོད་ད་ཙམ་ལུང་པ་འདིའི་མདའ་རུ་ཡོང༌། དེ་བར་དུ་བདེ་བར་གྱིས་གསུངས་པས།དེ་གང་ཡིན་དཔྱད་པའི་ཕྱིར་ཏིང་ངེ་འཛིན་ལ་མཉམ་པར་བཞག་པས་ཁྱེད་ཀྱི་བུར་འདུག་པ་ཐིགས་པ་ཡིན་གསུངས་པ་ལ་སོགས་པའི་གསང་བའི་གནས་དུ་མ་གསུངས་ནས། ཕྱིས་ཀྱང་བུ་ཆུང་བསྐྱེད་བསྲིང་བ་དང༌། འཇམ་པའི་དབྱངས་དང་དབྱངས་ཅན་མ་ལ་སོགས་པའི་སྒོ་ནས་ཤེས་རབ་འཕེལ་བའི་ཐབས་དུ་མའང་མཛད་དོ། །

                                                                                                                             རྩོམ་སྒྲིག་པ། མང་ར་བ།
              གསལ་འདེབས། 
                      རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                       དྲ་བའི་སྦྲེལ་ཐགhttp://www.tb1025.cn