གཞན་ཡང་བྱ་ཡུལ།ཀླུངས་ཤོད། མལ་གྲོ་གསུམ་དུ་དུས་གཅིག་ལ་གྲལ་དབུ་མཛད་པ་དང༌། མདོ་སྨད་དུ་ངང་ཚང་བའི་གཙུག་ལག་ཁང་གི་རབ་གནས་དང༌། དྭངས་པོ་ཤ་བ་གླིང་པའི་མཆོད་རྟེན་གྱི་རབ་གནས་ཞུས་པས། དུས་ཚོད་ཚེས་གྲངས་འདི་ལ་མཆོད་པ་རྒྱ་ཆེན་པོ་ཤོམས། གསོལ་བ་ཐོབ། ངས་གཟིམ་ཆུང་འདིའི་སྟེང་ནས་རབ་གནས་བྱེད་པ་ཡིན་གསུངས་ཏེ། ཀུན་གྱིས་མཐོང་སར་གཙུག་ལག་ཁང་དང་མཆོད་རྟེན་གྱི་སྟེང་དུ་ཕྱག་ནས་བབས་པས། དེ་ནས་སྤྲུལ་པའི་སྐུར་གྲགས། མི་མ་ཡིན་མང་པོ་ལ་ཆོས་གསུངས་པ་དང༌། བསྐྱེད་རྫོགས་ཀྱི་ཏིང་ངེ་འཛིན་བརྟན་པོ་དང་ལྡན་ཞིང་མངོན་པར་ཤེས་པ་རྒྱ་ཆེན་པོ་མངའ་བའི་ལོ་རྒྱུས་མང་དུ་སྣང་ངོ༌། །དེ་ལྟར་བདག་ཉིད་ཆེན་པོ་འདིས་འགྲོ་བའི་དོན་ཡུན་རིང་དུ་མཛད་དེ། དགུང་ལོ་དྲུག་ཅུ་རྩ་བཞི་པ་ས་ཕོ་རྟའི་སྨིན་དྲུག་ཟླ་བའི་ཚེས་བཅོ་བརྒྱད་ལ་གཤེགས་པའི་ཚུལ་བསྟན་གཤེགས་ཁར་ཇོ་བོ་པ་ཚན་ཞིག་གིས་ངེད་རྣམས་ཇི་ལྟར་བྱ་ཞུས་པས། ཁྱེད་ཐམས་ཅད་བསྲུང་སྡོམ་དག་ཏུ་གྱིས། ང་ལ་དད་པ་དང་གུས་པ་སྒོམས། ངའི་རུས་བུ་འདི་སྲེགས་ཤིག་གསུངས།

              དེ་ནས་འུ་ཅག་གི་དགེ་བཤེས་འུ་ཅག་གི་དགེ་བཤེས་གསུངས་ནས། བླ་མ་རྡོ་རྗེ་གདན་དུ་ཡུན་རིང་ཨང་གསུངས། དེ་ནས་ཞལ་བསིལ་ནས་འཇུག་པའི་ཆོ་ག་ཞིག་མཛད། འཆི་བ་བྱ་བ་མེད་མྱ་ངན་བྱ་མི་དགོས་གསུངས་ནས། སྐྱིལ་མོ་ཀླུང་བཅས་ནས་ཐུགས་དམ་མཛད། དེ་ནས་སྒོམ་པ་བྱང་བླ་ལ་མཉེས་མཉེས་ཙམ་མཛད། སེང་གེའི་ཉལ་སྟབས་བྱ་གསུངས་ནས་སྤྱི་བོ་ནས་ཡར་རླངས་པ་ཆེན་པོ་ཞིག་ཕྱུར་གྱིས་བྱུང་ནས། དབུ་ཟིལ་པ་ཕྲོམ་མེ་བ་ལ་མྱ་ངན་ལས་འདའ་བའི་ཚུལ་བསྟན། དགུང་ལོ་དྲུག་ཅུ་རྩ་བཞི་པ་སྨིན་དྲུག་ཟླ་བའི་ཚེས་བཅོ་བརྒྱད་ལ་གཤེགས་པའི་ཕྱི་དེ་ཉིན་པར་ནམ་མཁའ་ལ་འཇའ་ཚོན་དཔག་ཏུ་མེད་པ་བྱུང༌། དེ་ནས་སྤུར་དབོན་ཤེས་རབ་ལ་སོགས་པའི་གནས་བརྟན་རྣམས་ཀྱིས་བདག་བྱས་ནས་གྲྭ་པ་ཉིས་སྟོང་ལ་དབང་མ་བྱུང་བ་ལ། དགེ་བཤེས་ཤ་ར་བས། བྱང་ཆུབ་སེམས་དཔའ་ཆེན་པོ་དེའི་སྤུར་རུལ་དུ་བཅུག་ན་དྲི་མི་ཞིམ་པར་ཚོར་བ་ཐམས་ཅད་དམྱལ་བར་འགྲོ་བས་སྤུར་སྦྱོངས་གསུངས་པ་ལ་བརྟེན་ནས། སྐུ་སྟོད་རྡོ་རྒྱུས་ཀྱི་སྤང་ཁེབས་ཀྱིས་དྲིལ་ནས་སྐུ་སྨད་བཞུ་བར་གནས་བརྟན་རྣམས་ཀྱིས་གནང་ནས་སྦྱངས་པས། དུ་བས་གར་ཁྱབ་ཏུ་རིང་བསྲེལ་བྱུང་བ་དང༌། དུང་གཡས་འཁྱིལ། རྣམ་རྒྱལ་མཆོད་རྟེན། སྒྲོལ་མ་རྣམས་བྱོན། རྒྱ་སྟོན་གྱིས་རིང་བསྲེལ་ཉིས་བརྒྱ་ལྔ་བཅུ་རྩ་བདུན། སྒོམ་པ་བརྩོན་འགྲུས་རྒྱལ་མཚན་གྱིས་བརྒྱ་ཉི་ཤུ་རྩ་བདུན། མང་ར་གཞོན་ནུ་གཡུང་དྲུང་ལ་དྲུག་ཅུ། གད་ཤགས་ལ་ཕྱེད་དང་ཉིས་བརྒྱ། ཡར་ཀླུངས་པ་སྨོན་སྟོན་ལ་ཉིས་བརྒྱ། ཉང་པོ་གཞོན་ཤའི་རིང་བསྲེལ་གཅིག་ལ་དགུར་འཕེལ། རྟ་ཤ་སྐྱོན་གུ་ལ་སུམ་བརྒྱ། གོལ་གོ་ལུང་གི་དངུལ་གྱི་གདུང་རྟེན་ན་རིང་བསྲེལ་བརྒྱ་རྩ་བརྒྱད། ཇོ་བཙུན་བྱམས་པ་ལ་སུམ་ཅུ། ལྷ་བཟོ་སྒོག་སྐྱ་ལ་སུམ་ཅུ། ངར་པ་ལ་བཅོ་ལྔ། གདུང་སོལ་ཁྱོར་གང་གི་ནང་དུ་རིང་བསྲེལ་བདུན་ཅུ་རྣམས་བྱོན་པས་གདུལ་བྱ་རྣམས་ཚིམས་པར་བྱས་སོ། །དགེ་བཤེས་བྱ་ཡུལ་བའི་སློབ་མ་རྗེ་སྒམ་པོ་པ། བདག་ཉིད་ཆེན་པོ་དེ་ལ་ཚོགས་པ་ཉིས་སྟོང་ལྔ་བརྒྱ་ཙམ་འདུས་པའི་ནང་ནས་བྱང་ཆུབ་ལམ་གྱི་རིམ་པའི་ཁྲིད་རྒྱ་ཆེར་སྤེལ་བའི་རྒྱུད་འཛིན་ཆེན་པོ་ནི་སྒྱེར་སྒོམ་པ་ཆེན་པོ་ཡིན་ལ།གཞན་ཡང་རྗེ་སྒམ་པོ་པ་སོགས་བསྟན་འཛིན་དམ་པ་མང་དུ་བྱོན་ནོ དགྱེར་སྒོམ་པ་ཆེན་པོའི་རྣམ་ཐར་ནི་འཆད་པར་འགྱུར་ལ། རྗེ་སྒམ་པོ་པ་ནི། གཉལ་སྟོད་བོད་སྙིར་ཡབ་དབུ་གཙོ་རྒྱལ་འབར་དང༌། ཡུམ་ཤོ་རོམ་བཟའི་སྲས་སུ་ས་མོ་ལུག་ལ་འཁྲུངས། དགུང་ལོ་ཉི་ཤུ་རྩ་དྲུག་ལ་དྭགས་པོ་རོང་ཁར་མར་ཡུལ་བློ་ལྡན་གྱིས་མཁན་པོ་དང༌། ཤ་བ་གླིང་པ་ལ་སློབ་དཔོན་ཞུས་ཏེ་ཚིག་རྫོགས་མཛད། མཚན་བློ་གྲོས་གྲགས་སུ་བཏགས་ཤིང༌། ཡོངས་ལ་བསོད་ནམས་རིན་ཆེན་ཞེས་གྲགས་སོ། །རྗེ་སྒམ་པོ་པས་དགེ་བའི་བཤེས་གཉེན་བྱ་ཡུལ་བ་ཆེན་པོ། ཤ་བ་གླིང་པ། རྒྱ་ཡོན་བདགདགེ་བཤེས་སྒྲེ་པ། སྨྱུག་རུམ་པ་ཆེན་པོ། རྒྱ་ལྕགས་རི་གོང་ཁ་བ་ཆེན་པོ་རྣམས་བསྟེན་ནས་བཀའ་གདམས་ཀྱི་གདམས་པ་མ་ལུས་པ་གསན་ཏེ་བསྒྲུབ་པ་བྱ་དགོངས་ནས། ཡབ་མེས་ཀྱིས་བརྩིགས་པའི་གསེར་ཁ་བྱ་བའི་གནས་གཞིར་བྲང་ཁང་བརྩིགས། ཕ་ཞིང་གིས་མཐུན་རྐྱེན་བྱས་ནས་སྒྲུབ་པ་ཡུན་རིང་དུ་མཛད་པས་བྱང་ཆུབ་ལམ་གྱི་རིམ་པ་ལ་མྱོང་བ་ཐོན་ཏེ། སྲིད་པ་མཐའ་དག་ལ་ཞེན་པ་ལོག་པའི་ངེས་འབྱུང་དང་བྱམས་སྙིང་རྗེ་བྱང་ཆུབ་ཀྱི་སེམས་བཅོས་མ་མ་ཡིན་པ་དང༌། གནས་ལུགས་རྟོགས་པའི་ལྟ་བ་རྣམས་རྒྱུད་ལ་སྐྱེས་ཤིང༌། ཉིན་ཞག་མང་པོའི་བར་དུ་ཏིང་ངེ་འཛིན་རེའི་ནང་དུ་གནས་ནུས་པ་བྱུང༌། དེ་ནས་རྒྱ་ལྕགས་རིར་ཞབས་བསྐོར་མཛད་པའི་ཚེ་སྤྲང་པོ་གསུམ་ལས་རྗེ་བཙུན་མི་ལའི་སྙན་པ་གསན་པས། དད་པའི་རྐྱེན་བྱས་ཏེ་ཕ་ཞིང་གསེར་དུ་བཙོངས། བཀའ་གདམས་ཀྱི་བླ་མ་རྣམས་ལ་ཕྱི་ཕྱག་མཛད།

              དེ་ནས་རྗེ་བཙུན་མི་ལའི་སྤྱན་སྔར་བྱོན་ཏེ་བླ་མེད་ཀྱི་རྒྱུད་སྡེ་མཐའ་དག་གི་སྙིང་པོའི་བཅུད་བསྡུས་པ་ནཱ་རོའི་ཆོས་དྲུག་དང༌། ཡན་ལག་གི་གདམས་པ་རྣམས་ལེགས་པར་གསན་ནས་ཐུགས་ཉམས་སུ་བཞེས་རྟོགས་པ་ཐོབ་ནས་གདུལ་བྱ་འདུལ་བའི་དུས་ལ་བབ་པ་ན་དྭགས་ལྷ་སྒམ་པོ་བཏབ་སྟེ་འགྲོ་དོན་བསྐྱངས་པས། བཀའ་ཕྱག་ཆུ་བོ་གཉིས་འདྲེས་པར་གྲགས་ཤིང༌། སློབ་མའང་མཁས་ཤིང་གྲུབ་པ་བརྙེས་པ་མང་དུ་བྱོན་ནོ། །ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་དགེ་བའི་བཤེས་གཉེན་བྱ་ཡུལ་བ་ཆེན་པོ་ལ་གསོལ་བ་འདེབས་ཤིང་བདག་ཉིད་ཆེན་པོ་འདིའི་རྣམ་ཐར་ལྟར་ལེགས་ཚོགས་ཐམས་ཅད་ཀྱི་རྩ་བ་བཤེས་གཉེན་དམ་པ་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ཏེ་སྐྱེས་བུ་གསུམ་གྱི་རིམ་པ་ཉམས་སུ་ལེན་པ་ལ་སྐྱེས་བུའི་རྩལ་ཅི་ཡོད་ཀྱིས་འབད་པར་བྱའོ།། །།

                                                                                                                                  རྩོམ་སྒྲིག་པ། མང་ར་བ།
             གསལ་འདེབས། 
                         རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                         དྲ་བའི་སྦྲེལ་ཐགhttp://www.tb1025.cn