རྗེས་སུ་མལ་གྲོར་བྱོན་ནས་མཆད་ཀ་རྙིང་མའི་དགོན་པ་བཏབ། དེར་འགྲོ་དོན་ལོ་བཅུ་གཅིག་བསྐྱངས། ཚོགས་པ་དགུ་བརྒྱ་ཙམ་འདུས། སེ་སྤྱིལ་བུ་བ་ལ་མཆད་ཀ་གསར་མ་འདེབས་པའི་ལུང་བསྟན་མཛད། བྱ་རྒན་གྱི་མི་ཚེ་མཐའ་རུ་སྐྱེལ་གསུངས་ནས་མཐའ་ཕུར་བྱོན། མཐར་ཐུག་གསུམ་གྱི་གདམས་པ་ལ་སོགས་པ་མཛད། བློ་རྒོད་གར་སྐྱེས་སུ་སྐྱེས་འགོ་སྒྱུར། །རྟོག་དཔྱོད་ཀུན་ཇི་ལྟར་དགྱེས་དགྱེས་མཛོད། །བསོད་སྙོམས་བྱེད་ཅིང་རི་ཁྲོད་འགྲིམ། །སྡེ་དགོན་ཀུན་ཇི་ལྟར་དགྱེས་དགྱེས་མཛོད། །ལྷ་དང་བླ་མ་ལ་གསོལ་བ་འདེབས། །ཡོན་བདག་ཀུན་ཇི་ལྟར་དགྱེས་དགྱེས་མཛོད། །བྲག་ཕུག་ཏུ་ཚེམ་བེར་གྱོན་ནས་འདུག །ཕྲུག་ཆུང་ཀུན་ཇི་ལྟར་དགྱེས་དགྱེས་མཛོད། །མ་རྒན་ལྷ་ཀླུ་ལ་ཁ་ཏོན་བསྔོ། །ཆོས་བཤད་ཀུན་ཇི་ལྟར་དགྱེས་དགྱེས་མཛོད། །གཅིག་པུར་ཆུ་ཐུག་གི་མི་ཚེ་སྐྱེལ། །སྒྱེད་ཁ་ཀུན་ཇི་ལྟར་དགྱེས་དགྱེས་མཛོད། །གཅིག་པུར་དགེ་ཆོས་སྤེལ་བར་བྱེད། །བཀའ་འཁོར་ཀུན་ཇི་ལྟར་དགྱེས་དགྱེས་མཛོད། །ཅེས་སོགས་དང༌། ལྟོ་རྒྱབ་གཉིས་ལ་གྱོང་བསྐུར་ནས། །རི་དྭགས་རྨས་མའི་བརྟུལ་ཞུགས་སྤྱད། །རང་གི་འདོད་པ་ཁྱད་བསད་ནས། །བླ་མའི་བཀའ་སྩལ་གཞུང་བཞིན་བསྒྲུབས། །དེ་ནི་ཤི་ཡང་མི་འགྱོད་དོ། །ཞེས་གསུངས།

              འདའ་ཁ་ཙ་ན་ཡང་འཇིག་རྟེན་ན་སྒྲ་གཅིག་ཐོས་པ་ལ་བློ་སྦྱོང་གི་སྒྲ་ལས་སྙན་པ་མེད་པས།ཁྱོད་ཀྱིས་ངའི་རྣ་བར་སྒྲོགས་ཤིག་ཅེས་པ་དང༌། ད་རེས་ནི་འདོད་པ་ཙུག་ཁ་ནའང་མ་བྱུང༌། སེམས་ཅན་གྱི་དོན་དུ་དམྱལ་བར་འགྲོ་འདོད་པ་ཁོ་ན་ཡིན་པ་ལ། ད་ནི་བདེ་བ་ཅན་གྱི་སྣང་བ་ཞིག་ཁོ་ན་བྱུང་གསུངས། གཅུང་པོས་སྐུ་ཁམས་ཞན་པར་གདའ། ཐུགས་དམ་མཛོད་ཅིག་ཞུས་པས། བློ་སྦྱོང་གི་ཚིག་ཁ་ཡར་གསུངས་ནས། ཁམས་གཞན་ཡང་དེ་ལྟ་བུ་ཞིག་མིན་པ་གནས་པ་ཚམ་ཚོམ་གྱིས་ས་ཕྱོད་པར་མ་མཐོང་གསུངས། དེ་ནས་མཐའ་ཕུར་ཟླ་བ་བརྒྱད་བཞུགས་ནས་རང་ལོ་དོན་ལྔ་པ་ཤིང་མོ་ལུག་གི་སྨལ་པོ་ཟླ་བའི་ཚེས་ལྔའི་སྲོད་ལ་གནས་དེ་ཉིད་དུ་མྱ་ངན་འདས། སྤུར་སྦྱངས་པས་ཐུགས་ལྗགས་སྤྱན་གསུམ་དང་མེ་ཏོག་གི་ཆར་ལ་སོགས་པ་ངོ་མཚར་ཅན་མང་དུ་བྱུང་ངོ༌། །སེམས་དཔའ་ཆེན་པོ་མཆད་ཀ་པ་འདི་བཀའ་གདམས་གླེགས་བམ་ལས་ལུང་བསྟན་ཏེ། བཀའ་གདམས་གླེགས་བམ་གྱི་བཀའ་གདམས་བསྟན་འཛིན་རྣམས་ལུང་བསྟན་པའི་ཐད་ལས། ཁྱད་པར་དུ་ཐེག་པ་ཆེན་པོ་ལ་བློ་སྦྱོང་བ་བོད་ཀྱི་བྱང་ཆུབ་སེམས་དཔའི་ཡབ་གཅིག་གི་ཡུལ་མལ་གྲོའི་ནང་དུ་བྱོན་ཏེ་མཆད་པ་ཆེན་པོ་ཞིག་གི་སྟེང་དུ་བློ་སྦྱོང་སྒོམ་ཞེས་སོགས་གསལ་པར་ལུང་བསྟན་ཏོ། །

              མཆད་ཀ་པ་ཡེ་ཤེས་རྡོ་རྗེ་ཞེས་གྲགས་པའི་བདག་ཉིད་ཆེན་པོ་འདིས་ཕྱི་མའི་སྐྱེ་བོ་རྣམས་ཀྱི་དོན་དུ་ཇོ་བོ་ཡབ་སྲས་ཀྱི་དགོངས་པ་གསལ་བར་བྱེད་པའི་བསྟན་བཅོས་མང་དུ་མཛད་དོ། །བདག་ཉིད་ཆེན་པོ་འདི་ལ་གསུང་ལས་སྐྱེས་པའི་སྲས་མང་དུ་བྱོན་ཞིང་མན་ངག་ཐམས་ཅད་བུམ་པ་གང་བྱོར་ཡོད་པའི་བསྟན་འཛིན་ཆེན་པོ་ནི་སེ་སྤྱིལ་བུ་བའོ། །དེས་ན་བྱང་ཆུབ་ལམ་རིམ་ལ་བློ་སྦྱོང་བར་འདོད་པའི་གདུལ་བྱ་རྣམས་ཀྱིས་སེམས་དཔའ་ཆེན་པོ་མཆད་ཀ་པ་ལ་གསོལ་བ་འདེབས་ཤིང༌། བདག་ཉིད་ཆེན་པོ་འདིའི་མཛད་པ་རྣམ་ཐར་རྣམས་དྲན་པར་བྱས་ལ་ཐེག་པ་ཆེན་པོའི་ལམ་གྱི་འཇུག་སྒོ་དང༌། གཞུང་ཤིང་དང་སྙིང་པོ་བྱང་ཆུབ་ཀྱི་སེམས་རིན་པོ་ཆེ་མ་སྐྱེས་པ་བསྐྱེད་པ་དང༌། སྐྱེས་ཟིན་གོང་ནས་གོང་དུ་སྤེལ་བ་དང༌། མཐར་འབྲས་བུ་གྲུབ་ནས་སེམས་ཅན་གྱི་དོན་བྱ་བའི་བར་གྱི་ལམ་གྱི་གནད་ལ་ངེས་པ་གཏིང་ཚུགས་པ་བསྐྱེད་ནས་ས་ལམ་འབྲས་བུ་དང་བཅས་པ་ཐམས་ཅད་བྱང་ཆུབ་ཀྱི་སེམས་རིན་པོ་ཆེའི་ཁོངས་སུ་འདུ་བར་པར་བྱས་ནས་བྱང་ཆུབ་ཀྱི་སེམས་རིན་པོ་ཆེ་སྒོམ་པ་ལ་སྐྱེས་བུའི་རྩལ་ཅི་ཡོད་ཀྱིས་འབད་པར་བྱའོ།། །།

                                                                                                                                     རྩོམ་སྒྲིག་པ། མང་ར་བ།
            གསལ་འདེབས། 
                          རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                          དྲ་བའི་སྦྲེལ་ཐགhttp://www.tb1025.cn