བསྒྲུབ་པར་བྱ་བའམ་བླང་བར་བྱ་བ་ནི། མདོ་རྒྱུད་གསུང་རབ་ཀུན་གྱི་སྙིང་པོ་སྐྱེས་བུ་གསུམ་གྱི་ལམ་གྱི་རིམ་པའི་ཉམས་ལེན་རྣམ་པར་ཐར་པ་དུ་མའི་རྒྱན་གྱིས་སྤྲས་པའི་ལམ་གྱི་ཆ་ལག་དང་བཅས་པ་རྣམས་སོ། །ཉམས་སུ་བླང་བར་བྱ་བ་ལ་བླ་མ་བསྟེན་ཚུལ་གྱི་ཁྱད་པར་ནི། བླ་མ་ཐ་དད་སྣ་ཚོགས་མི་འཚོལ་ཞིང༌། །མཚན་ཉིད་ལྡན་པ་གཅིག་ལ་ལེགས་བརྟེན་ནས། །དེ་ཡི་དམ་ཚིག་སྲོག་པས་གཅེས་པར་བྱེད། །རྣམ་ཐར་ཐམས་ཅད་དེ་ཡི་རྗེས་སུ་སློབ། །ཅེས་དང༌། སྡོམ་ཁྲིམས་ཀྱི་ཁྱད་པར་ནི། རྒྱུད་དང་འཚམ་པའི་སྡོམ་ཁྲིམས་ལེགས་པར་བླངས། །དེ་ཡི་བསླབ་བྱ་དེ་ཉིད་གཞུང་བཞིན་སློབ། །ཅེས་དང༌། བློ་སྦྱོང་ཚུལ་ནི། བློ་སྦྱོང་བློ་སྣ་མས་རིམ་བཞིན་དུ་སྦྱོང༌། །མཉམ་བཞག་རྟོགས་པ་རྗེས་ཀྱིས་གཏན་ལ་འབེབས། །ཞེས་སོ། །

             ཤེས་བྱ་ཤེས་པའི་ཁྱད་པར་ནི། མན་ངག་རིགས་པ་སྣ་ཚོགས་མི་འཚོལ་ཞིང༌། །བསླབ་འོས་ཤེས་བྱ་ཀུན་ལ་བློ་གྲོས་སྦྱངས། །ཞེས་དང༌། མན་ངག་གི་ཁྱད་པར་ནི། ཁ་ཕོ་ཅན་གྱི་མན་ངག་མི་འཚོལ་ལ། །མན་ངག་དམ་པ་སྡེ་སྣོད་གསུམ་ལ་བྱེད། །ཅེས་སོ། །ཚེ་འདིའི་འཁྲི་བ་གཅོད་ཚུལ་གྱི་ཁྱད་པར། སྐྱེས་པའི་ཡུལ་སྤངས་ཉེ་དུའི་འབྲེལ་ཐག་བཅད། །སྡེ་དང་ཡོན་བདག་ཕྱོགས་འཛིན་ཀུན་ལས་གྲོལ། །དུད་འགྲོའི་གཡོག་དང་ཞིང་ལས་མ་ཟིན་དང༌། །མི་སེམས་འཛིན་སོགས་སྡུག་བསྔལ་ཀུན་དང་བྲལ། །ཞེས་དང༌། བྱ་བའི་ཁྱད་པར་ནི། བློ་སྦྱོང་དགེ་སྦྱོར་ལ་སོགས་བྱ་བ་ཀུན། །མངོན་ཚན་ཆུང་ལ་དོན་གྱིས་ས་ཕྱོད་ཆེ། །ལག་རྗེས་དག་ལ་གཙོ་བོར་མི་མཛད་ཅིང༌། །ཐོས་བསམ་སྒོམ་གསུམ་སྟན་ཐོག་གཅིག་ཏུ་མཛད། །ཅེས་དང༌། ཐོ་ཅོ་མི་མཛད་པ་ནི། འདོད་པ་ཕུགས་བཅུག་ཆགས་མེད་ལྟར་སྟོན་དང༌། །རང་དོན་ཕུགས་བཅུག་གཞན་ཕན་ལྟར་བྱེད་དང༌། །ཚེ་འདིར་མངོན་ཞེན་རྟོག་ལྡན་ལ་སོགས་པ། །བརྫུན་དང་འདྲེས་པའི་ཐོ་ཅོ་མི་མཛད་ཅིང༌། །ཞེས་དང༌། མཁས་པའི་ཁྱད་པར་ནི། རྣམ་དག་སྡེ་སྣོད་གསལ་བའི་མེ་ལོང་ལ། །ཆོས་དང་ཆོས་མིན་གནས་ལུགས་ལེགས་མཐོང་བའི། །འཇིག་རྟེན་ལེགས་པའི་ལམ་ལ་མི་བརྟེན་པར། །མཁས་རྣམས་ཞུགས་པའི་ལམ་ལ་རྗེས་སུ་འཇུག །ཅེས་དང༌། ལྟ་སྤྱོད་དག་པའི་ཁྱད་པར་ནི། ལུས་ངག་ཀུན་སྤྱོད་ཆོས་འདུལ་ཇི་བཞིན་ལ། །བརྩེ་སྟོང་དབྱེར་མེད་ཐེག་པ་མཆོག་སེམས་བརྟན། །བླང་དོར་གཉིས་མེད་གནས་ལུགས་དོན་ཤེས་ཀྱང༌། རྣམ་རྟོག་མ་ཟད་ཟད་ཚུལ་སྟོན་མི་བྱེད། །ཅེས་དང༌། བརྟན་པའི་ཁྱད་པར་ནི། འཁོར་བའི་རང་བཞིན་ཇི་བཞིན་རྟོགས་གྱུར་པའི། །སྐྱིད་སྡུག་ཀུན་གྱིས་སྤྱོད་པ་མི་འགྱུར་ཞིང༌། །ལེགས་ཉེས་རྐྱེན་གྱིས་ཆོས་ལས་མི་བསྐྱོད་ལ། །སྐྱོ་བའི་སེམས་ཀྱིས་ཐར་ལམ་དགེ་ལ་འདྲེན། །ཞེས་དང༌། ཆོས་བརྒྱད་སྤང་བའི་ཁྱད་པར་ནི། གང་ལ་ཞེན་པས་སྡུག་བསྔལ་ཀུན་འབྱུང་ཞིང༌། །ཅི་བྱས་ཆོས་ཀུན་ལྟར་སྣང་ཉིད་འགྱུར་བ། །འཇིག་རྟེན་ཀུན་གྱིས་བསྒྲུབ་བྱ་འཇིག་རྟེན་གྱི། །ཆོས་བརྒྱད་སྤངས་ཀྱང་སྤང་བ་ལྟར་མི་མངོན། །ཞེས་སོ། །ཐུགས་རྗེའི་ཁྱད་པར་ནི། མར་གྱུར་འགྲོ་བའི་སྡུག་བསྔལ་མ་བཟོད་པས། །གཞན་དོན་མིན་པ་ཡིད་ལ་མི་དྲན་ཡང༌། །ཐུགས་རྗེ་ཅན་དུ་མངོན་མངོན་མི་མཛད་ཅིང༌། །ཅི་བྱེད་ཐམས་ཅད་གཞན་དོན་ཉིད་དུ་མཛད། །ཅེས་དང༌། ཤེས་རབ་ཀྱི་ཁྱད་པར་ནི། ཆོས་རྣམས་ཐམས་ཅད་སྣང་ལ་རང་བཞིན་མེད། །སྒྱུ་མ་ནམ་མཁའི་ངོ་བོར་ཤེས་གྱུར་ཀྱང༌། །དཀར་ནག་ལས་དང་ལས་ཀྱི་རྣམ་སྨིན་ལ། །ཡིད་ཆེས་དད་པས་ཤིན་ཏུ་གུས་པ་ཡིན། །ཞེས་སོ། །

              རྒྱལ་སྲས་ཀྱི་སྤྱོད་པ་ལ་སློབ་པའི་ཚེ་ཕར་ཕྱིན་དྲུག་གི་མི་མཐུན་ཕྱོགས་སྤོང་ཚུལ་ནི། གཞན་ལས་བསྡུས་ནས་གཞན་ལ་འགྱེད་པ་དང༌། །སྙན་གྲགས་འདོད་དང་རྙེད་པ་འདོད་པ་དང༌། །ཐོས་བསམ་ཀུན་དོར་ཉེས་ལྟུང་ཁྱད་དུ་བསད། །མ་དག་སྦྱིན་པ་ཆོས་སུ་མི་མཛད་ཅིང༌། །རབ་བྱུང་མཁན་སློབ་བྱས་ཀྱང་བསྟན་པ་ལ། །རྨ་བྱེད་རེ་ལས་བསྐྱངས་འདོད་མི་འོང་ཞེས། །སྤྱིར་ཡང་མཁན་སློབ་མི་མཛད་ཁྱད་པར་དུ། །བན་མོ་སྐྱར་ཆོག་བར་ཆད་ཅན་གྱི་མིན། །མ་ཤི་ཙམ་གྱི་ཟས་གོས་ངན་ལ་བརྟེན། །ཆོས་ཀྱི་དོན་དུ་སྲོག་ཀྱང་འདོར་ནུས་པ། །གཞན་དང་འཐབ་རྩོད་དོ་ཟླ་མི་བྱེད་པར། །གང་དུ་མ་བདེ་ས་དེ་ཉིད་ནས་འགྲོ། །རྙེད་དང་སྙན་གྲགས་དོན་དུ་མི་གཉེར་བས། །འཇིག་རྟེན་ལེགས་པ་ཅི་ཡང་མི་སྒྲུབ་ཅིང༌། །བྱ་ངན་ལས་ཀུན་ངན་སྐྱུགས་དགྲ་བཞིན་དོར། །དུས་བཞི་ཀུན་ཏུ་ཆོས་སྤྱོད་བཅུ་ལ་འབད། །འདོད་དང་མི་དགེ་སྤོང་བྱེད་མངོན་ཤེས་སོགས། །ཡོན་ཏན་འབྱུང་བྱེད་བསམ་གཏན་མ་གཏོགས་པ། །གནས་པ་ཚམ་ཚོམ་སྒོམ་དུ་མི་འཚལ་ཞིང༌། །སྒོ་གསུམ་དགེ་ལ་རྩེ་གཅིག་ཉམས་པ་མེད། །དྲི་མེད་སྡེ་སྣོད་མིག་དང་སྒྲོན་མེ་དང༌། །སྨན་གྱུར་མང་དུ་ཐོས་པས་མི་ངོམས་ཤིང༌། །ཐོས་པ་ཀུན་ཀྱང་ཉི་མ་དེ་རིང་ནས། །དངོས་དང་མོས་པས་ཉམས་སུ་བླང་བྱར་ཉན། །བརྒལ་ལན་སུན་འབྱིན་ཆོས་དམག་ཟེར་མཆུ་ཉུང༌། །དབང་ཟ་རང་གཟོ་བསྡུས་དོན་མི་མཛད་ཅིང༌། །དོན་གྱི་མཐའ་ཆོས་ཚིག་ཉུང་དོན་ཀུན་གོ །མང་ཐོས་ལུང་ལྡན་དོན་གྱི་ས་མཚམས་ཕྱེད། །གྲུབ་མཐའ་མ་འདྲེས་ཆོས་སྐད་བཟང་ལ་བརྟེན། །ཅི་བཤད་སྒོམ་དོན་བློ་སྣ་སྒྱུར་ལ་མཁས། །ཉམས་པ་ཟུར་གསོ་ཚིག་འབྲུ་དམ་པ་བཀྲོལ། །འཁྲུགས་པ་ཀུན་བསྡེབས་འབྱམས་པ་ངག་ཏུ་འདྲིལ། །བཀའ་ཆད་འགྱུར་འཁྲུགས་འགྱུར་མང་དགེ་ལ་བལྟ། །མཁས་པའི་རྩོམ་ལུགས་འགྲེལ་ཊཱིཀ་དུ་མ་དང༌། །བླ་མའི་མན་ངག་རང་གི་བློ་གྲོས་ལ། །བརྟེན་ནས་རྣམ་དག་ཆོས་བཤད་དེ་ལྟར་མཛད། །ལྔ་བརྒྱ་ཐ་མར་རང་ཉིད་མི་ཉམས་ཤིང༌། །སྒྲུབ་པ་ཚུལ་བཞིན་ཞེ་ནས་བྱེད་གྱུར་ན། །ཆོས་ཀྱི་དཔོན་དང་སྒྲུབ་གཡོག་ལ་སོགས་པ། །ཚད་ལྡན་དོན་མཐུན་འགའ་ཞིག་མ་གཏོགས་པ། །གཞན་གྱི་དཔོན་དང་གཡོག་པོ་མི་བྱེད་ཅིང༌། །བླ་མ་གྲུབ་གཡོག་ལ་སོགས་མ་གཏོགས་པ། །གཞན་སེམས་མི་གཟུང་ཀུན་གྱི་སེམས་མི་དཀྲུག །ལྟོགས་འཇེན་འབྲེལ་འདྲིས་ལ་སོགས་བྱ་བ་སྤང༌། །གྱོང་ཞིང་འགྲོགས་དཀའ་རྣམ་ཐར་གཙང་བ་དང༌། །དམན་པའི་ས་བཟུང་ཟས་གོས་ངན་ལ་བརྟེན། །དད་བརྩོན་བློ་དང་སྙིང་རྗེ་ཆེ་བསྐྱེད་ལ། །མི་རྗེས་མི་སྙེག་ཆོས་དང་གང་མཐུན་བྱ། །དབེན་ཞིང་ཉམས་དགའ་འཚོ་བ་འབད་རྩོལ་ཆུང༌། །གནོད་ཚེ་ཀུན་བྲལ་དེ་ནི་བསྒྲུབ་པའི་གནས། །བག་ཡངས་སོས་དལ་ཉིད་དུ་མ་སོང་བར། །ཆུ་བོའི་རྒྱུན་ལྟར་རྒྱུན་ཆད་མེད་པར་སྒྲུབས། །ཚེ་འདིར་མ་ཆགས་བྱ་རྒྱུ་ཆོས་ལས་མེད། ཁས་བླངས་གཙང་ཞིང་ལས་འབྲས་སྲོག་ལྟར་འཛིན། །འཁོར་བས་ཡིད་འབྱུང་མར་གྱུར་འགྲོ་ལ་བརྩེ། །བདག་འཛིན་དགྲ་ཐུལ་མ་ནོར་རྫོགས་པར་འདོད། །ཅེས་གསུངས་པ་རྣམས་ཏེ་རྒྱས་པར་ནི་མཛེས་པའི་པདྨོ་རྩ་འགྲེལ་གཉིས་ལས་ཤེས་པར་བྱའོ། །

              དགེ་བཤེས་པོ་ཏོ་བ་དེ་འབྲོམ་རིན་པོ་ཆེ་ལ་གསང་སྔགས་ཀྱི་མན་ངག་རྣམས་མཐིལ་ཕྱིན་པར་ཞུས་ནས་བླ་མེད་ཀྱིས་ལམ་རིམ་གཉིས་ཀྱི་ཉམས་ལེན་མཐར་ཕྱིན་པར་མཛད་པ་ཞིག་ཡིན་ཡང་གསང་སྔགས་ཤིན་ཏུ་གསང་བར་མཛད་ནས་རྒྱུན་གྱི་དམ་ཚིག་གི་རྡོར་དྲིལ་ཉེ་གནས་ཀྱིས་ཀྱང་ཞིང་གཤེགས་ནས་མ་གཏོགས་མ་མཐོང༌། གསང་སྔགས་ཀྱི་བཟླས་བརྗོད་མཐར་ཕྱིན་པས་ཆོས་སྲུང་རྣམས་ཀྱང་བྲན་དུ་ཁོལ་བ་ཞིག་སྟེ་འོལ་པ་སྟོན་ཆུང་གིས་དཔལ་ལྷ་མོ་སྦལ་པས་དགེ་བཤེས་མཁར་པུ་བ་འདས། འཁོར་རྗེས་ན་འདུག་པ་ལ་ཡང་གནོད་པས་དགེ་བཤེས་པོ་ཏོ་བས་དཔལ་ལྷ་མོ་ལ་འདི་ལྟར་བཀའ་བཀྱོན་ཏེ། ཁྱོད་སངས་རྒྱས་ལ་ཆོས་དངོས་སུ་ཉན་པས་ཀྱང་འདི་ལྟར་བྱེད་ན། ངེད་ལུང་ལ་བརྟེན་པས་ཇི་ལྟར་བྱེད་གསུངས་པས། ནུབ་གཅིག་མནལ་ལམ་ན་བུ་མོ་གཞོན་ནུ་མ་གཅིག་གིས་གཡག་རྒོད་གཉིས་གཉའ་བཅག་ནས་དེད་སོང༌། ཕ་ཚད་སོང་བ་དང་དེ་ཐམས་ཅད་ནམ་མཁའ་ལ་འཕུར་ནས་སོང་བ་ཞིག་རྨིས། དེ་ནས་ཕྱིས་གནོད་པ་ཡེ་མ་བྱུང་གསུངས།

                                                                                                                                      རྩོམ་སྒྲིག་པ། མང་ར་བ།
           གསལ་འདེབས།
                    རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                    དྲ་བའི་སྦྲེལ་ཐགhttp://www.tb1025.cn