ལམ་ཐུན་མོང་བ་ལ་ཁྲིད་ནས་མྱོང་བ་ཕུལ་ཕྱིན་འཁྲུངས་པ་ན་གསང་སྔགས་རྡོ་རྗེ་ཐེག་པའི་དབང་དང་མན་ངག་རྣམས་གནང་ཞིང༌། ལྷག་པར་མི་གཡོ་བ་ཡིད་དམ་དུ་ཟུངས་གསུངས་ནས་དེའི་དབང་དང་གདམས་པ་ལས་ཚོགས་དང་བཅས་པ་ཚང་བར་གནང༌། སྣེའུ་ཟུར་པས་ཀྱང་མི་གཡོ་བ་ལྷག་པའི་ལྷར་བཟུང་ནས་བསྙེན་པ་མཛད་པས་མི་གཡོ་བ་ཞལ་གཟིགས། ལས་ཚོགས་ལ་ནུས་པ་ཐོན་ཞེས་གྲགས་སོ། །དེ་ལྟར་སྣེའུ་ཟུར་བས་དགེ་བཤེས་དགོན་པ་བ་ཐོག་མར་མཇལ་བ་ནས་མཐར་ཞིང་གཤེགས་པའི་བར་འབྲལ་མེད་དུ་བསྟེན་ཅིང་བཀའ་བཞིན་དུ་བསྒྲུབས་པས་ཐུགས་སྲས་ཐུ་བོར་གྱུར། དགོན་པ་བ་གཤེགས་ནས་སྐུ་མཆེད་གསུམ་ག་ལ་ཆོས་འབྲེལ་མཛད། ཁྱད་པར་དུ་པོ་ཏོ་བའི་བླ་མཆོད་མཛད་ནས་ལོ་བཅུ་བཞིར་ཆོས་གསན། ལམ་གྱི་རིམ་པ་ཡང་དགོན་པ་བའི་དེ་གཞིར་མཛད། པོ་ཏོ་བའི་ལེགས་ལེགས་རྣམས་ཀྱང་བཏུས་པ་ཡིན་གསུངས། དེ་ནས་སྣེའུ་ཟུར་བའི་ཐུགས་དགོངས་ལ་འདི་ལྟར་ཤར་ཏེ། ད་ནི་དཔལ་ཨ་ཏི་ཤའི་མན་ངག་བྱང་ཆུབ་ལམ་གྱི་རིམ་པ་འདི་ལ་སྒྲུབ་པ་སྙིང་པོར་བྱ་བའི་ཕྱིར་རང་ཡུལ་ཉེ་དུ་གྲྭ་ས་གང་ལའང་མ་ཆགས་པར་ནམ་ཤི་བར་སྒྲུབ་པ་ལ་རྩེ་གཅིག་ཏུ་གནས་པར་བྱའོ་དགོངས་ནས་སྤྲས་ཐོང་པ་ན་སྔོན་གྱི་དུས་སུ་གཡོག་བྱས་པའི་ཡོན་བདག་གཅིག་གིས་ཞབས་ཏོག་བྱས་ནས་སྣེའུ་ཟུར་གྱི་དབེན་ཚ་གོག་པོ་དེ་ལ་བརྟེན་ཏེ་ཁང་ཆུང་ཞིག་བརྩིགས་ནས་ཐུགས་དམ་རྩེ་གཅིག་ཏུ་མཛད་པས། དགེ་སྦྱོར་ཤིན་ཏུ་འཕེལ་བས་འདི་བཞིན་བསྒོམས་ན་ནི་འཁོར་བ་འདི་ལ་འུར་བཟློག་སྟེར་འོང་བར་འདུག་དགོངས་པ་ཞིག་བྱུང་གསུངས།

              དགེ་བའི་བཤེས་གཉེན་པོ་ཏོ་བ་ཆེན་པོ་སྟག་ལུང་དུ་གྲྭ་ཚོགས་སྐྱོང་ཞིང་བཞུགས་པའི་ཚེ་དགེ་སློང་བཅུ་ལྷག་ཙམ་ལ་ཀླུ་ནད་བྱུང་བ་ལ་སྣེའུ་ཟུར་བ་ལ་ཁྱོད་ཀྱིས་ཀླུ་ནད་ཀྱིས་བཏབ་པ་འདི་དག་གསོས་གསུངས་པས་དགེ་བཤེས་པོ་ཏོ་བའི་བཀའ་བཞིན་དུ་སྣེའུ་ཟུར་བས་ནད་པ་དེ་དག་བཅོས་ཏེ་བདེ་བར་བྱས་པས་པོ་ཏོ་བ་ཐུགས་ཤིན་ཏུ་མཉེས་པ་བྱུང༌། ཕྱིས་པོ་ཏོ་བ་སྐུ་ཁམས་བསྙེལ་བའི་ཚེའང་། འཁོར་གྱིས་དགེ་བའི་བཤེས་གཉེན་འདི་དང་འདི་སྔས་སྲུང་དུ་གདན་དྲངས་ན་ཞུས་དུས་དེ་གསན་དུ་མ་བཞེད། སྣེའུ་ཟུར་བ་སྤྱན་དྲང་ངམ་ཞུས་པས། ཞལ་ནས། དེ་བྱུང་ན་དེ་ཀ་རང་གིས་ཆོག་སྟེ་གསུངས་བས་སྔས་བསྲུངས་ཀྱང་མཛད། དེར་ཐུགས་དམ་མཛད་པས་ནམ་མཁའ་ལ་མཐོ་བར་འཕགས་པའི་སྣང་བ་བྱུང་ཞུས་པས། པོ་ཏོ་བའི་ཞལ་ནས། ཨེ་འདི་ངའི་དོན་བྱེད་སྙམ་ཙ་ན་ཁོ་རང་གི་དོན་བྱས་ནས་འདུག་གསུངས། སྣེའུ་ཟུང་བའི་ཞལ་ནས། ང་ཡང་རྣལ་འབྱོར་པ་འབྲིང་པོ་ཞིག་ཡིན། སྡེ་དཔོན་དང་མི་ནག་པའི་ཐེམ་པ་འགོམ་མ་མྱོང་ནས་ལོ་བཞི་བཅུ་སོང་བ་ཡིན་གསུངས། རྣལ་འབྱོར་པ་འབྲིང་པོས་མི་ཚད་བོད་དུ་བྱོན་པའི་བཀའ་གདམས་པ་གཅིག་ལ་ཁོང་ལས་ཚུགས་ཐུབ་པ་མ་བྱུང་བ་ཡིན་ཞེས་དབོན་སྟོན་རིན་པོ་ཆེ་གསུངས་སོ། །དེ་ལྟར་དགེ་བཤེས་སྣེའུ་ཟུར་བས་དགེ་བཤེས་དགོན་པ་དང༌། དགེ་བཤེས་པོ་ཏོ་བ་གཉིས་ཀ་ལ་ལམ་རིམ་གྱི་ཁྲིད་གསན་ནས་སྒྲུབ་པ་དར་དྲག་ལ་རྒྱུན་རིང་བ་མཛད་པས་རྟོགས་པ་མཆོག་ཐོབ་སྟེ།དེ་ཡང་བཅས་པ་དང་རང་བཞིན་གྱི་ཁ་ན་མ་ཐོ་བ་ཕྲ་མོ་ཙམ་གྱིས་ཀྱང་མ་གོས་པའི་ཚུལ་ཁྲིམས་རྣམ་པར་དག་པ་དང༌། ཚེ་འདིའི་བྱ་བ་གང་གིའང་དབང་དུ་མ་བཏང་བར་ད་ལྟ་རང་འཆི་བ་ལྟ་བུའི་བརྩོན་པ་ཤུགས་དྲག་པོས་མཚན་མོ་གཉིད་ཀྱང་ཡེ་མི་ཡོང་བར་ཉིན་མཚན་ཁོར་ཡུག་ཏུ་དགེ་སྦྱོར་ལ་ཆིག་སྒྲིལ་མཛད་དེ་གཞན་གྱིས་མདང་སང་རྨི་ལམ་འདྲ་ཅི་གདའ་ཞུས་པས་ཨ་འདི་ཅི་ཟེར། གཉིད་མེད་པར་རྨི་ལམ་ག་ན་འོང་གསུངས། དེ་ལྟར་མཛད་པས་ཏིང་ངེ་འཛིན་ཕུལ་ཕྱིན་ཐོབ་སྟེ་འབྲེ་ཆུང་བས་དགེ་བཤེས་ལ་ཏིང་ངེ་འཛིན་ཚད་ཇི་ཙམ་མངའ་ཞུས་པས། ངས་ཏིང་ངེ་འཛིན་གཅིག་ལ་མཉམ་པར་གཞག་ན་ཉིན་ཞག་བཅུ་བཞི་ཙམ་གནས་ཐུབ་པར་འདུག་གསུངས།སྤྱན་སྔའི་ཞལ་ནས། ངེད་རྭ་སྒྲེང་པ་རྣམས་ལ་ཏིང་ངེ་འཛིན་གྱི་ཚན་ཀ་དེ་ཞང་སྒོམ་ཁོ་ན་ཆེ་བ་ཡིན་གསུངས། ཏིང་ངེ་འཛིན་ཤིན་ཏུ་བརྟན་ཅིང་དབེན་པར་དགེ་སྦྱོར་ལ་ཆིག་སྒྲིལ་མཛད་པས་རྗེ་བཙུན་མི་ལ་དང་དངོས་སུ་མ་མཇལ་ཡང་ཐུགས་མཐུན་པའི་གྲོགས་སུ་མཛད།

              ལན་ཅིག་གཡོག་པོ་དར་ཚུལ་བྱ་བས། ཐུགས་དམ་གཏོར་མ་ཚར་ནས་གཟིམ་མལ་དུ་སྐྱིལ་ཀྲུང་ལམ་གྱི་བཅས་ནས་ན་བཟའ་གསོལ། དེའི་སྟེང་ན་ཕར་ལ་རེ་ཁ་ཐེན་ནས་བཞག་སྟེ་ནང་པར་བལྟས་ཙ་ན་སྤུ་གས་ཙམ་ཡང་མི་ཡོང་བ་ཡིན། མཉམ་བཞག་བྱ་བ་དེ་འདྲ་བ་དགོས་པ་ཡིན། རྒྱུ་མཚན་འདི་དག་ལ་དགོངས་ནས་རྗེ་བདག་ཉིད་ཆེན་པོས། ཟབ་མོའི་ཏིང་འཛིན་བརྟན་པའི་སྣེའུ་ཟུར་བ་ཞེས་བསྟོད་པ་མཛད་དོ། །བདག་ཉིད་ཆེན་པོ་འདི་སེམས་ལ་དབང་ཐོབ་པ་ཞིག་སྟེ། སྣེའུ་ཟུར་བ་ཉིད་ཀྱི་ཞལ་ནས། ངའི་སེམས་འདི་ང་རང་གིས་ཁ་ལོ་སྒྱུར་བཏུབ་པ་ཞིག་བྱུང་གསུངས། ཡང་ཞལ་ནས། སྔོན་གྱི་དུས་སུ་ང་རང་གི་སེམས་འདི་ཁ་ལོ་སྒྱུར་དུ་བཏུབ། མིས་ནི་མི་ཚོར། ད་ཡོང་འཁོར་བ་འདི་ལ་འུར་བཟློག་སྟེ་འོང་བར་འདུག་སྙམ་ཙ་ན། ཕྱིས་ལྷ་ཡིན་ཀླུ་ཡིན་ཟེར་ནས་གཅིག་འཚོགས་གཉིས་འཚོགས་མེ་ཏོག་ཤྭ་ཤྭ་བྱས་ནས་རང་གི་དགེ་སྦྱོར་བཅག་མི་ལ་འདི་གྱིས་བྱས་པས་ནི་ཉན་དུ་མ་འདོད་གསུངས་ཏེ། ཁོང་རང་གར་འདོད་དུ་བཀོལ་དུ་བཏུབ་པ་ཞིག་སྣང་ངོ་གསུངས། བྱང་ཆུབ་ལམ་རིམ་ལ་མྱོང་བ་ཕུལ་ཕྱིན་ཐོན་པའི་རྟགས་སུ་ཐུགས་རྗེ་ཤིན་ཏུ་ཆེ་བས་ལོང་བ་དང་སྤྲང་པོ་ལ་སོགས་པ་དམན་པ་རྣམས་ལ་ཤིན་ཏུ་བྱམས་པར་མཛད།

          ལན་ཅིག་གཡོར་པོ་གཅིག་གིས་འཇམ་ཕྲུག་གིས་ན་བཟའ་སྦྱར་མ་ཞིག་ཕུལ་བས། ཕ་ཚད་ན་མཛེ་པོ་གཅིག་དགེ་བའི་བཤེས་གཉེན་གོས་གཅིག་ཞུ་འཚལ་ཟེར་བས། འདི་ཁྱེར་གསུངས་ནས་ཕྲུག་སྦྱར་མ་དེ་གནང༌། གཡོར་པོ་དེ་ན་རེ།དེ་ལ་དགེ་བཤེས་པའི་ན་བཟའ་བགྱི་བསམས་ནས་དཀའ་ལས་ཅི་ཡང་བགྱིས་པ་ལགས། ཞག་གཅིག་མི་གསོལ་བ་ཟེར་བས་ཅི་ཟེར་ཁྱོད་རང་གི་མ་ལ་བྱིན་པ་ཡང་མི་དགའ་འམ་གསུངས། ངས་ཚེ་འདི་ལ་གསེར་སྲང་བདུན་སྟོང་སྦྱིན་པར་ཐོངས་གསུངས།

                                                                                                                                        རྩོམ་སྒྲིག་པ། མང་ར་བ།
            གསལ་འདེབས། 
                     རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                     དྲ་བའི་སྦྲེལ་ཐགhttp://www.tb1025.cn