ཟབ་མོའི་ཏིང་འཛིན་བརྟན་པའི་སྣེའུ་ཟུར་བ། ཞེས་བསྔགས་པ། དགེ་བའི་བཤེས་གཉེན་སྣེའུ་ཟུར་བ་ནི། སྤྲས་སྣེའུ་ཟུར་གྱི་ས་སྐོར་ཐོང་པ་ཞེས་བྱ་བར། ཡབ་ཞང་སྟག་པོ་ཞེས་པའི་སྲས་སུ་ཆུ་ཕོ་སྟག་ལ་སྐུ་འཁྲུངས། སྐུ་ཚེ་སྔ་མ་རྣམས་སུ་བསམ་གཏན་བསྒོམས་པའི་བག་ཆགས་མཐུ་བརྟས་པས་བྱིས་པའི་དུས་ཉིད་ནས་སྐྱེ་བས་ཐོབ་པའི་ཏིང་ངེ་འཛིན་བརྟན་པོ་མངའ་བ་ཞིག་བྱུང་ཞིང༌། ཁྱིམ་གྱི་འདུ་འཛི་ལ་ཆགས་པ་མེད་པར་གཞན་གྱི་ལད་མོ་དང་གཞན་གྱིས་དབང་མེད་དུ་བསྐུལ་བ་ཙམ་མིན་པར་ངེས་འབྱུང་ཤུགས་དྲག་པོས་གཞོན་ནུ་ནས་བྲག་རྒྱབ་ཏུ་རབ་ཏུ་བྱུང༌། མཚན་ཡེ་ཤེས་འབར་ཞེས་བཏགས། ལོ་ལོན་ནས་བསྙེན་པར་རྫོགས། འདུལ་བ་ནས་གསུངས་པའི་དགག་སྒྲུབ་གནང་གསུམ་གྱི་བཅས་མཚམས་རྣམས་མིག་གི་འབྲས་བུ་ལྟར་བསྲུངས་ཏེ་ཚུལ་ཁྲིམས་རྣམ་པར་དག་པ་ལ་གནས་ནས་སྡེ་སྣོད་གསུམ་ལ་མང་དུ་ཐོས་པ་བཙལ། དགེ་འདུན་སྤྱིའི་ལས་གང་ལ་ཡང་སྐྱོ་ངལ་མེད་པར་བྱས་ཏེ་བྲག་རྒྱབ་ཀྱི་གཉེར་ཡང་ལོ་གཅིག་མཛད།

              དེར་བཞུགས་དུས་བྲག་རྒྱབ་པའི་སྟོན་པ་ཤཱཀ་ཚུལ་ཞེས་བྱ་བ་ཞིག་རྭ་སྒྲེང་དུ་དགོན་པ་བའི་སྤྱན་སྔར་བྱོན་པས། དེར་ཁོང་གིས་ངེད་ཀྱི་དེ་ན་བཙུན་ཆུང་སྐྱེས་ཐོབ་ཀྱི་ཏིང་ངེ་འཛིན་མངའ་བ་འདི་ལྟ་བུ་ཞིག་བདོག་ཞུས་པས་དགོན་པ་བ་སྐུ་ལུས་སྒྱེད་མཛད་ནས། ཨ་ཧ་ཧ་ཨ་རེ་སྐྱིད་ཨ་རེ་སྐྱིད། ཡང་ན་ཁོའི་དེ་ལ་བླ་མ་མི་དགོས་པར་ཏལ་གྱིས་འགྲོ་བའང་སྲིད། ཡང་ན་བླ་མ་ཞིག་དགོས་པའང་སྲིད་གསུངས་ནས་ཐུགས་དགྱེས་པའི་མཚན་མ་མཛད། དེར་སྟོན་པ་ཤཱཀ་ཚུལ་གྱིས་བྲག་རྒྱབ་ཏུ་འོངས་ནས་ཁྱེད་འདིར་མ་སྡོད་པར་རྭ་སྒྲེང་དུ་སོངས། དགོན་པ་གོང་མ་བས་ཐུགས་ལ་འདོགས་པར་འདུག་བྱས་པས། དགེ་བཤེས་དགོན་པ་བའི་མཚན་ཐོས་པ་ཙམ་གྱི་སྣང་བ་འགྱུར་ཏེ་ལུས་ཀྱི་སྤུ་ཟིང་ཞེས་བྱེད་ཅིང་ཇོ་བོ་ཡབ་སྲས་གཉིས་ཀའི་མན་ངག་མངའ་བ་དགེ་བའི་བཤེས་གཉེན་དེ་ལྟ་བུ་ཞིག་དང་མཇལ་ནས་བྱང་ཆུབ་ལམ་གྱི་རིམ་པའི་མན་ངག་ཡོངས་སུ་རྫོགས་པ་ཞིག་ཐོབ་ན་ཅི་མ་རུང་སྙམ་དུ་སྨོན་པས་རྭ་སྒྲེང་དུ་བྱོན་ཏེ་དགེ་བཤེས་དགོན་པ་བ་མཇལ་བར་ཞུས་པས། སྐུ་མཚམས་དམ་པས་མཇལ་ས་མེད་ཟེར་བས་གཟིམ་ཁང་དེ་ལ་བསྐོར་བ་ལན་གསུམ་བྱས། བྱང་ཕྱོགས་ཀྱི་ཆུ་མིག་གི་ཁ་དེ་ནས་ཕྱག་ལན་གསུམ་མཛད་དེ་སྐྱེ་བ་འདི་ལ་སྐྱེས་བུ་དམ་པ་ཁྱོད་ཀྱི་གདུལ་བྱར་མ་གྱུར་ཀྱང་མ་འོངས་པ་ན་སྐྱེས་བུ་དམ་པ་ཁྱོད་ཀྱི་གདུལ་བྱར་གྱུར་ཅིག་བྱས་ནས་སྨོན་ལམ་བཏབ། སྤོས་རེང་བུ་གཅིག་ཀྱང་བསྲེགས་ནས་ཕུལ། ཆུ་མིག་ཁ་དེར་དྲོ་བཏབ། རྣལ་འབྱོར་པ་ཆེན་པོ་ལ་ཆོས་ཅི་རིགས་གསན་ཞིང་བཞུགས་པ་ན་དགེ་བཤེས་དགོན་པ་བས་མངོན་པར་ཤེས་པས་མཁྱེན་ཏེ་ཉེ་གནས་བཏང་ནས་ཤོག་གསུངས།

          དགེ་བཤེས་དགོན་པ་བའི་ཞབས་དྲུང་དུ་བྱོན་ནས་མཇལ་ཏེ་ཆོས་ཀྱི་གསོལ་བ་བཏབ་པ་ན་དགེ་བཤེས་དགོན་པ་བའི་ཞལ་ནས། ཨ་ཏི་ཤས་ང་ལ་དང་པོར་མཇལ་མ་ཐག་ཆོས་འདི་གནང་བ་ཡིན་གསུངས་ནས་བསྟན་པ་ལ་འཇུག་པའི་སྒོ་དམ་པ་སྐྱབས་འགྲོའི་ཁྲིད་དང་གཏོར་མའི་ཁྲིད་གཉིས་གནང་སྟེ། འོ། མ་བསམས་པའི་ཆོས་ཀྱིས་ཕན་མེད་པས་ཟླ་བ་ཕྱེད་ཕྱེད་སོགས་ལ་ཤོག་གསུངས། དགོན་པ་བ་ཆེན་པོས་ཇི་ལྟར་གསུངས་པ་ལྟར། སྣེའུ་ཟུར་པས་རང་གི་སྤྱིལ་བུར་སྐྱབས་འགྲོ་དང་གཏོར་མ་གཉིས་ལ་ཟླ་བ་ཕྱེད་ཕྱེད་བླ་མས་ཇི་ལྟར་གསུངས་པ་ལྟར་བསྐྱངས་ཏེ་མྱོང་བ་ཐོན་པ་བྱས། དེ་ནས་ཟང་ཟིང་གི་ཡོ་བྱད་རྒྱ་ཆེན་པོ་མེད་ཀྱང་སྤོས་རེང་བུ་རེ་བསྣམས་ཏེ་རང་གིས་ཇི་ལྟར་བསྐྱངས་པ་རྣམས་ཞུས། དགོན་པ་བ་ཆེན་པོས་ཀྱང་དགྱེས་བཞིན་དུ་སྔར་བསྐྱངས་པ་རྣམས་ལ་གེགས་སེལ་བོགས་འདོན་དང༌། གསར་དུ་སྐྱོང་དགོས་རྣམས་མགོན་པོ་ཨ་ཏི་ཤའི་མན་ངག་ལྟར་སྐྱེས་བུ་གསུམ་གྱི་ལམ་ལ་རིམ་གྱིས་ཁྲིད་དེ་ཕས་བུ་ལ་སློབ་པ་ལྟར་མཛད། ལན་ཅིག་སྤྱན་སྔ་ན་མི་ཁ་ཅིག་འདུག་པ་ལ། ཁོ་ཁ་སང་ནས་མ་འོངས་པ་ཡིན་པས་སྔོན་ལ་ཐོངས་གསུངས་ནས་གང་དང་མི་སྙོམས་པར་མཛད།

              དགེ་བཤེས་དགོན་པ་བས་སྣེའུ་ཟུར་པ་ལ་ཆོས་གསུངས་པའི་དུས་སུ་ཨ་ཏི་ཤ་འདི་གསུངས། ཨ་ཏི་ཤ་འདི་གསུང་གསུངས་ནས་ཆོས་མི་མང་ཙམ་རེ་གསུངས། ད་དུང་ཞིག་གསུངས་ན་ཉུང་སམ་སྙམ་ཙ་ན་ཚིག་མང་ཁ་ན་མེད། དོན་སེམས་པ་གལ་ཆེ་བ་ཡིན་གསུངས་དེ་ཀ་ལ་འཕྲོ་བཅད་ནས་མི་གསུངས། དེ་ལྟ་བུའི་ཚུལ་གྱིས་གདམས་ངག་རྣམས་ཚང་བར་ཐུགས་ལ་བཏགས། རེས་འགའ་ཕྱག་ཕུལ་ཏེ་ད་ལན་ཞབས་ཀྱིས་བྱིན་རླབས་གནང་བ་བྱུང་ན་བསམས་པ་ན་དགོན་པ་བས་ཞབས་ནར་གྱིས་བརྐྱངས་ནས་འོང༌། དགོན་པ་བ་ཆེན་པོ་སྣེའུ་ཟུར་པ་ལ་ཐུགས་ཤིན་ཏུ་མཉེས་པས་ལན་ཅིག་ཕྱག་སོར་གསུམ་གྱིས་མགོ་ལ་བྱིན་རླབས་མཛད་པས། དབུ་ལ་ཕྱག་སོར་གསུམ་པོ་ཐིམ་པའི་ཤུལ་སྐྱོང་ལོག་གེ་བ་ཇི་སྲིད་འཚོའི་བར་དུ་ཡོད་གསུངས་སོ། །

                                                                                                                         རྩོམ་སྒྲིག་པ། མང་ར་བ།
             གསལ་འདེབས། 
                        རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                        དྲ་བའི་སྦྲེལ་ཐགhttp://www.tb1025.cn