དགེ་བཤེས་དགོན་པ་བའི་ཐུགས་སྲས་རྒྱ་ལྕགས་རི་བ་དེ་ནི། སྐྱེས་བུ་གསུམ་གྱི་ལམ་གྱི་རིམ་པ་ལ་རྩལ་ཐོན། ཡི་དམ་ལྷའི་ཞལ་གཟིགས། མངོན་པར་ཤེས་པ་རྒྱ་ཆེན་པོ་དང་ལྡན་པ་ཞིག་བྱུང་སྟེ། ལམ་གྱི་རིམ་པ་རྒྱ་ཆེར་སྤེལ་བར་མཛད། དྭགས་པོ་ལྷ་རྗེ་ཡང་དགེ་བཤེས་རྒྱ་ལྕགས་རི་བ་འདིའི་སར་བྱོན་ནས་བྱང་ཆུབ་ལམ་གྱི་རིམ་པའི་མན་ངག་རྫོགས་པར་གསན་ནས་ཉམས་བཞེས་མཐར་ཕྱིན་པར་མཛད་ཅིང༌། རྗེ་མི་ལའི་ཞབས་དྲུང་ནས་ནཱ་རོ་ཆོས་དྲུག་དང་ཕྱག་ཆེན་གསན་ནས་ཉམས་རྟོགས་ཕུལ་ཕྱིན་འཁྲུངས་ཏེ་སྐལ་བ་དང་ལྡན་པ་མཐའ་ཡས་པ་ལ་ཇོ་བོ་རྗེའི་མན་ངག་བྱང་ཆུབ་ལམ་རིམ་དང༌། རྗེ་མི་ལ་ནས་བརྒྱུད་པའི་མན་ངག་རྣམས་ཟུང་འབྲེལ་དུ་འདོམས་པར་མཛད་པས་སྒམ་པོ་བ་ལ་བཀའ་ཕྱག་ཆུ་བོ་གཉིས་འདྲེས་ཞེས་གྲགས་པའང་རྒྱུ་མཚན་དེ་ལྟར་ཡིན་ནོ། །དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་དགེ་བའི་བཤེས་གཉེན་དགོན་པ་བ་ལ་གསོལ་བ་འདེབས་ཤིང་བདག་ཉིད་ཆེན་པོ་འདིའི་མཛད་པ་རྣམ་ཐར་ལྟར་བྱང་ཆུབ་ལམ་གྱི་རིམ་པ་ལ་སྒྲུབ་པ་མཐའ་ཕྱིན་པ་ཞིག་བྱའོ།། །།

                                                              རྩོམ་སྒྲིག་པ། མང་ར་བ།
        གསལ་འདེབས།
              རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
              དྲ་བའི་སྦྲེལ་ཐགhttp://www.tb1025.cn