དེའི་དུས་སུ་རྣལ་འབྱོར་པ་ཕྱག་ཁྲི་མཆོག་གིས་བལ་ཡུལ་དུ་དངུལ་འདོན་དུ་ཕྱིན་ནས་ཕྱིར་ཕེབས་པ་རྒྱ་གར་གྱི་ལྷ་བཟོ་མཁས་པ་ཨ་ཙ་ར་མ་ནུ་བྱ་བ་ལ་ཇོ་བོའི་གདུང་ཁང་དུ་དངུལ་གྱི་མཆོད་རྟེན་ནང་དཀྱིལ་འཁོར་གྱི་ལྷ་ཚོགས། ཕྱི་མཆོད་རྟེན་གྱི་རྣམ་པར་བཞེངས་སུ་གསོལ། ནང་རྫོངས་ཀྱི་གཟུངས་རྣམས་དངུལ་གྱི་ལྗང་པ་ལ་ཡི་གེ་བརྐོས་མ་བྲིས་ནས་བཞུགས། རི་རབ་ནི་ཐེག་པ་ཆེན་པོ་ཕ་རོལ་ཏུ་ཕྱིན་པའི་ལུགས་སུ་བགྱིས་ཏེ་མདུན་དུ་ཞལ་གཟིགས་པ་ཐུབ་པ་གཙོ་འཁོར་གསུམ། ནུབ་ཏུ་ཞལ་གཟིགས་པ་དམ་ཚིག་གསུམ་བཀོད་པ་གཙོ་འཁོར་གསུམ། བྱང་དུ་ཞལ་གཟིགས་པ་བྱམས་པ་མངོན་པར་བྱང་ཆུབ་པ་གཙོ་འཁོར་གསུམ། ཤར་དུ་ཞལ་གཟིགས་པ་སྨན་བླ་གཙོ་འཁོར་གསུམ། བུམ་པ་ནི་ཐེག་པ་ཆེན་པོ་གསང་སྔགས་ཀྱི་ལུགས་སུ་བགྱིས་ཏེ། དཔལ་གསང་བ་འདུས་པ་ལྷ་བཅུ་དགུ་ཕྱི་ནང་དུ་འབུར་དུ་དོད་པ་ལ་ཕྱོགས་བཞི་ན་ཡབ་བཞི། མཚམས་བཞི་ན་ཡུམ་བཞི། གཙོ་བོ་འཇམ་དཔལ་རྡོ་རྗེ་བྲེའི་མགུལ་ན་བཞུགས། ལྷ་མོ་དྲུག་ནང་དུ་འབུར་དོད་དུ་བཞུགས། ཁྲོ་བོ་བཞི་ནས་ཙམ་རེ་ཟུར་གྱི་མཆོད་རྟེན་གྱི་ནང་ན་བཞུགས་པ་གཅིག་བཞེངས་སུ་གསོལ་ཏེ། འབྲོམ་རིན་པོ་ཆེས་རྣལ་འབྱོར་པ་རྣམས་དང་བཀའ་བགྲོས་མཛད་ནས་བྱ་ལོ་ལ་གདུང་ཁང་དང་གཙུག་ལག་ཁང་ཁྱུང་མགོ་ཅན་གྱི་རྔ་ཁང་ཡན་ཆོད་ཚར་བར་མཛད་ནས་ད་འདི་མན་ཆད་ལ་བྱེད་པ་པོ་ཞིག་འོག་གི་གསུངས་ཏེ། འཛིན་རྡོ་ཡོན་ཏན་འབར་བྱ་བ་ལ་བོད་པ་མཛད་ནས་ཁྱོད་འཇིག་རྟེན་གྱི་ཤེས་ཆེ་བ་ཡིན་པས་ཤེས་གྱིས་དང་ཁོ་བོས་འཇིག་རྟེན་གྱི་རྣམ་པར་རྟོག་པ་སྤོང་བློ་ཞིག་བགྱི་གསུངས་ནས་ཁྱུང་མགོ་ཅན་ལ་བསྐོར་བ་མཛད་དེ་ཤངས་སྣབས་ཀྱིས་ཀྱང་ལྐོག་མ་ན་མར་སླེབ་པར་བྱས་ནས། འཇིག་རྟེན་མཁྱེན་པ་རྙེད་དང་མ་རྙེད་དང༌། །ཞེས་བྱ་བའི་ཚིགས་བཅད་དེ་འདོན་ཞིང་ཆོས་བརྒྱད་པོ་དེ་ལ་བཏང་སྙོམས་སུ་མཛད་ཅིང་བཞུགས་པ་ལགས། དེ་ལྟར་འབྲོམ་སྟོན་པ་རྒྱལ་བའི་འབྱུང་གནས་ཐུགས་ཟབ་ལ་དཀྱེལ་ཆེ་བ་མཁྱེན་པའི་ཚད་རྒྱ་མཚོ་ཆེན་པོ་དང་མཚུངས་པ་དེས་རྭ་སྒྲེང་དུ་ཇོ་བོའི་སྲོལ་བཟང་གིས་བཙུགས་ནས་ཡོད་པའི་དུས་སུ། ཐུགས་ཀྱི་སྲས་སྐུ་མཆེད་གསུམ་རིམ་པར་བྱོན་པ་ཡིན་ཏེ། བུ་ཆུང་བས་ནི་སྙེ་ཐང་ཉིད་ནས་ཕྱགས་ཕྱི་མཛད། སྤྱན་སྔས་མེ་མོ་བྱའི་ལོ་ལ་རྭ་སྒྲེང་དུ་བྱོན།

              པོ་ཏོ་བས་དེའི་ཕྱི་ལོ་ལ་རྭ་སྒྲེང་དུ་བྱོན། དེ་ལྟར་ཞབས་དྲུང་དུ་བསྙེན་པའི་སློབ་མ་རྣམས་འཇིག་རྟེན་ལ་ཞེན་པ་བཟློག་ཏུ་བཅུག་ནས་ཆོས་ཁོ་ན་སེམས་སུ་བཅུག་པ་ལ་འབྲོམ་རིན་པོ་ཆེའི་དུས་ན་དགེ་འདུན་ལྔ་བཅུ་ཙམ་ལས་མེད་དེ། དེ་རྣམས་ཀྱི་དབང་དུ་བྱས་ན། ཏིང་ངེ་འཛིན་བཟང་པོ་ཐུགས་རྒྱུད་ལ་འཁྲུངས་ཤིང་ཚུལ་ཁྲིམས་རྣམ་པར་དག་པ། ཡི་དམ་གྱི་ལྷའི་ཞལ་གཟིགས་པ། མངོན་པར་ཤེས་པ་རྒྱ་ཆེན་པོ་དང་ལྡན་པ། ཆོས་རྣམས་ཀྱི་རང་དང་སྤྱིའི་མཚན་ཉིད་རིག་པའི་ཤེས་རབ་ཕུན་སུམ་ཚོགས་པ་མངའ་བ། ནུབ་ཕྱོགས་ཨོ་རྒྱན་དང་འདྲ་བ་གྲུབ་ཐོབ་དུ་སྤུང་ངེ་བ་གཅིག་བྱོན་ཏེ། མཚོ་ལ་པདྨས་བརྒྱན་པ་འདྲ་བའི་འཁོར་སྐད་པ་དེ་དགེ་བཤེས་སྟོན་པའི་འཁོར་དེ་ཀུན་ལ་ཟེར་བ་ཡིན། དེ་བས་ན་མང་ཁ་ན་མེད་གྲུང་གཙོ་བ་ཡིན་གསུངས། དགེ་བཤེས་པོ་ཏོ་བས་ཀྱང༌། ངའི་དོན་གྱི་མཁན་པོ་དེ་རྭ་སྒྲེང་གི་དགེ་བསྙེན་རྒན་པོ་དེར་སྣང་གསུངས་ནས། འབྲོམ་རིན་པོ་ཆེའི་གདམས་པ་ཐུགས་ཉམས་སུ་བཞེས་པས་ངེས་འབྱུང་གི་བསམ་པ་མ་བཅོས་པ་ཐུགས་ལ་འཁྲུངས་པ་ན་སྔར་གྱི་སོ་སོ་ཐར་པའི་སྡོམ་པ་ངེས་འབྱུང་གི་སྡོམ་པར་སོང་གསུངས་པ་ལགས། དེ་ལ་སྤྱིར་ཇོ་བོ་བོད་དུ་ཕེབས་ནས་བདག་གཉེར་འབྲོམ་རིན་པོ་ཆེས་མཛད།ཇོ་བོ་རྗེ་ཉིད་ཀྱང་འབྲོམ་རིན་པོ་ཆེ་ཁོ་ན་ལ་ཐུགས་གཏོད་པར་མཛད།

              བསམ་ཡས་སུ་བཞུགས་པའི་ཚེ་ཇོ་བོ་རྗེས་འབྲོམ་རིན་པོ་ཆེ་ལ་གསང་སྔགས་ཀྱི་སྤྱོད་པའི་ཐབས་མང་པོ་དང༌། མཆིམས་ཕུར་དོ་ཧ་ལ་སོགས་པའི་གདམས་པ་ཟབ་མོ་རྣམས་གནང་ཞིང་ནང་དུ་ཐུགས་ཉམས་སུ་བཞེས་པར་མཛད་ཀྱང་གསང་སྔགས་སྒྲ་ཇི་བཞིན་པར་སྤྱོད་པའི་རྩིང་སྤྱོད་རྣམས་ཇོ་བོའི་དྲིན་ལས་མེད་པ་ཞིག་བྱུང་ན་དགོངས་པས་གསང་སྔགས་ཟབ་མོ་རྣམས་གསན་པ་སྐད་དུ་ཡེ་མི་མཛད་པར་ཐེག་པ་ཆེན་པོའི་བླ་མ་བྱ་བ་བཤད་པ་ན་འབྱམས་ཀླས་པར་གོ་བ་བསྐྱེད་ལ། ལག་ཏུ་ལེན་པ་ན་བསྟན་པའི་ཐ་མ་ལ་གང་ཕན་དང༌། ཐད་ཀར་དོན་དུ་གང་འགྱུར་སྟོན་པ་ཞིག་དགོས་གསུངས་ཞིང་འབྲོམ་རིན་པོ་ཆེ་ཉིད་ཀྱང་དེ་ལྟར་དུ་འདོམས་པར་མཛད། འབྲོམ་རིན་པོ་ཆེས་ཞང་ཆོས་ཀྱི་རྒྱལ་པོ།ཇོ་བོ་ལེགས། ཡོངས་རྫོགས་རྣལ་འབྱོར་པ། སྤྱན་སྔ་དང་བཞི་མིན་པ་ལ་སྔགས་ཀྱི་དབང་བསྐུར་མ་གནང་བ་ཡིན་གསུངས། པོ་ཏོ་བས་འབྲོམ་རིན་པོ་ཆེའི་སྤྱན་སྔར་ལོ་ངོ་བདུན་བཞུགས་པ་ལ་བུམ་པ་འཆའ་བ་ལན་ཅིག་ལས་མ་གཟིགས་གསུངས། སྔོན་རྣལ་འབྱོར་པ་ཆེན་པོས་འབྲོམ་རིན་པོ་ཆེ་ལ་བསྲུང་སྡོམ་རྣམ་པར་དག་པའི་སྟངས་ཕུལ།ཏིང་ངེ་འཛིན་ཕུན་སུམ་ཚོགས་པའི་རྟོགས་པ་ཕུལ་བས།འབྲོམ་རིན་པོ་ཆེའི་ཞལ་ནས། ཁྱོད་བསྲུང་སྡོམ་རྣམ་པར་དག་སྟེ་བསྡམ་པར་བྱ་བའི་ཉེས་བྱས་ཕྲ་མོས་ཀྱང་མ་གོས། ཏིང་ངེ་འཛིན་བཟུང་སྟེ་རྣ་རྩར་རྔ་བོ་ཆེ་བརྡུངས་ཀྱང་མི་ཚོར་བ་ཡོད་ཀྱང་དེ་བས་ངའི་བྱམས་པ་སྙིང་རྗེ་བྱང་ཆུབ་ཀྱི་སེམས་མེད་ན་ཉིན་མཚན་དུ་བཤགས་པ་བྱ་དགོས་པའི་སར་སྐྱེས་དོགས་ཡོད་དོ་གསུངས་སོ། །ཡང་ལན་ཅིག་མུ་གེ་ཞིག་བྱུང་བའི་དུས་སུ་འབྲོམ་ཟ་ལོ་མཚོ་མ་བྱ་བ་ཞིག་གིས་ནས་མི་ཁུར་ལྔ་བཅུ་ཕུལ་ནས་དེའི་མིང་པོ་འབྲོམ་ཚིག་པ་ད་རེ་བྱ་བས་གཏམ་བཏང་བ།ཇོ་བོ་ལྷ་ཅིག་འཛམ་བུ་གླིང་གི་རྒྱན་དམ་པ་ཡིན།

              དེའི་མན་ངག་བུམ་པ་གང་བྱོའི་ཚུལ་དུ་མངའ་བ་དགེ་བའི་བཤེས་གཉེན་སྟོན་པ་ཁྱེད་ཡིན། ཕྱོགས་ཕྱོགས་ནས་བྱོན་པའི་གྲྭ་པ་ཀུན་ཡང་མན་ངག་འདོད་པ་ཡིན་པས་དེ་རིང་ཇོ་བོའི་མན་ངག་གསུངས་པར་ཞུ་ཞུས་པས། འབྲོམ་རིན་པོ་ཆེའི་ཞལ་ནས་བྱ་བྱ་གསུངས་ནས་འཆི་བ་མི་རྟག་པ་དང་ལས་དང་འབྲས་བུ་མང་དུ་བསམས་ལ། ཁས་བླངས་པའི་སྡོམ་པ་དག་པར་བྱ། བྱམས་པ་དང་སྙིང་རྗེ་མང་དུ་སྒོམས་ལ་བྱང་ཆུབ་ཀྱི་སེམས་བརྟན་པར་བྱ། དེས་འཕངས་ནས་ཚོགས་སྒོ་སྣ་ཚོགས་ནས་གསོག་ཅིང་སྡིག་པ་སྒོ་སྣ་ཚོགས་ནས་སྦྱོང་བ་དེ་བླ་མའི་མན་ངག་ཡིན་པས། སང་ཙ་ན་ཇོ་བོ་རྗེ་ལྷ་ཅིག་དང་མ་ཕྲད་སྙམ་ནའང་དེ་ལས་མེད་དོ། །

                                                                                                                                  རྩོམ་སྒྲིག་པ། མང་ར་བ།
            གསལ་འདེབས། 
                     རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                    དྲ་བའི་སྦྲེལ་ཐགhttp://www.tb1025.cn