ངེས་པ་དོན་དུ་དེ་ལྟར་ཡིན་མོད། ཐ་མལ་པའི་སྣང་ངོར་ཡང་ཇོ་བོ་རྗེས་འབྲོམ་རིན་པོ་ཆེ་ལ་མདོ་སྔགས་ཀྱི་མན་ངག་ཡོངས་སུ་རྫོགས་པ་གནང་ངོ་ཞེས་སྐྱེ་བོ་ཀུན་གྱིས་གོ་བའི་ཆེད་དུ་ཇོ་བོའི་ཞལ་ནས་ངས་ཁྱོད་ལ་འདི་མ་བཤད་དམ་གསུངས་ནས་ཆོས་རེ་རེ་ལ་ལན་རེ་རེ་བསྐྱར་ཞིང་གསུངས། དེ་ལྟར་ཐུགས་ལ་འདོགས་པས་ཇོ་བོའི་ཡོན་ཏན་སྣོད་གཅིག་ནས་ཐམས་ཅད་སྣོད་གཅིག་ཏུ་བྱོ་བ་ལྟ་བུ་འབྲོམ་རིན་པོ་ཆེ་ཡིན་གསུངས། འབྲོམ་རིན་པོ་ཆེས་ཇོ་བོའི་ཆོས་མང་དུ་མཁྱེན་ཅིང༌། ཁྱད་པར་སྐྱེས་བུ་གསུམ་གྱི་ལམ་གྱི་རིམ་པ་ལ་རྩལ་ཐོན། ཡི་དམ་གྱི་ལྷ་དཔག་ཏུ་མེད་པའི་ཞལ་གཟིགས། ཁྱ་པར་བླ་མ་ལ་གསོལ་བ་ཐེབས་པས་རྭ་སྒྲེང་དུ་བཞུགས་དུས་ཇོ་བོ་དངོས་སུ་བྱོན། སླར་ཡང་གསོལ་བ་བཏབ་པས་བཅོམ་ལྡན་འདས་ཤཱཀྱ་ཐུབ་པའི་ཞལ་མངོན་སུམ་དུ་གཟིགས་སོ། །ཇོ་བོ་རྗེ་ཞིང་གཤེགས་སུ་ཉེ་བ་ན་ཡང་འབྲོམ་རིན་པོ་ཆེ་ལ་ཇོ་བོ་རང་ཉིད་ཀྱི་འབྲལ་སྤང་ཨུ་རྒྱན་ནས་འོངས་པའི་རུས་རྒྱན་དང༌། འོད་མའི་ཚལ་གྱི་ཤིང་ལ་བསིལ་བའི་ཚལ་གྱི་མི་ལྤགས་ཀྱི་གཡོགས་ཅན་གྱི་ཌཱ་མ་རུ་དང༌། རིགས་ལྔའི་དབུ་རྒྱན་དང༌། རྡོ་རྗེ་དྲིལ་བུ་དང་བཅས་པ་སྨྱུག་དོང་མཐོ་གང་པ་གཅིག་ཏུ་ཤོང་བར་མཛད་དེ་ཕྱག་ཏུ་གཏད་པ་དང༌། ཇོ་བོའི་སློབ་མ་རྣམས་ཀྱིས་ཇོ་བོ་རྗེ་ཞིང་གཤེགས་ན་གདན་ས་སུས་འཛིན་རྒྱལ་ཚབ་སུས་བྱེད་ཅེས་ཞུས་པ་ན་ཇོ་བོ་རྗེས་ད་ཕྱིན་ཆད་ཐམས་ཅད་ཀྱིས་འབྲོམ་ལ་བརྟེན་གསུངས། དེ་ལ་དགེ་བཤེས་དགོན་པ་བས་དེ་གང་ཡིན་ཞེས་ཞུས་པས། ཁོ་ངས་བྱིན་གྱིས་བརླབས་པ་ཡིན་ཞེས་གསུངས་པ་སོགས་བཀའ་གདམས་གླེགས་བམ་ན་ཇོ་བོ་རྗེས་འབྲོམ་རིན་པོ་ཆེ་བསྟན་པའི་བདག་པོར་མངའ་གསོལ་བ་དང་བརྒྱུད་པ་གསུམ་ལྡན་གྱི་བླ་མ་ཐམས་ཅད་དང་རྗེ་བཙུན་མ་སྒྲོལ་མ་སོགས་ལྷག་པའི་ལྷ་རྣམས་དང༌།སྒྲོལ་མ་བཅུ་གཉིས་སོགས་མཁའ་འགྲོ་ཆོས་སྐྱོང་རྣམས་ཀྱིས་ཀྱང་འབྲོམ་རིན་པོ་ཆེ་ཇོ་བོའི་ཆོས་རྒྱུད་འཛིན་པའི་བདག་པོར་མངའ་གསོལ་བ་ལྟར་རོ། །

              དེ་ནས་ཤིང་ཕོ་རྟའི་ལོ་དབྱུག་པ་ཟླ་བའི་ཚེས་བཅོ་བརྒྱད་ལ་ཇོ་བོ་རྗེ་སྐུ་གཤེགས་པ་ན་ཇོ་བོའི་སློབ་མ་རྣམས་འདུས་ཏེ་གསོལ་བ་འདེབས་པའི་ཚེ་འབྲོམ་རིན་པོ་ཆེས་ལྡེ་མིག་རྣམས་དགེ་བཤེས་ཀ་བའི་ཕྱག་ཏུ་ཕུལ། ཀ་བས་ཀྱང་འབྲོམ་རིན་པོ་ཆེ་ཇི་ལྟར་བཞེད་པ་བཞིན་དུ་མཛད་དེ། ཇོ་བོའི་གདུང་དང་རྒྱ་དཔེ། གསེར་གླིང་པའི་དངུལ་གདུགས་ཅན་ལ་སོགས་པ་རྟེན་གཙིགས་ཆེ་ཤོས་རྣམས་འབྲོམ་རིན་པོ་ཆེ་ལ་གཏད། བུ་ཆེན་གཞན་རྣམས་ལའང་རྟེན་སྐལ་རེ་མཛད།དེ་ནས་ལུག་གི་ལོ་ལ་ཇོ་བོའི་འདས་མཆོད་ཆེན་མོ་མཛད། དེའི་ཚེ་དགེ་བཤེས་ཀ་བས་ཚོགས་སུ་གཏམ་བཏང་བ་གཞན་རྣམས་ཅི་ཙུག་བྱས་ཀྱང་ང་ཕ་རྦ་རག་གི་བུ་ཚོ་རྣམས་ཀྱིས་འབུལ་བ་འདིར་ཞོག་ཅིག ཇོ་བོའི་གདན་སར་ལྷ་ཁང་བྲེ་ཙམ་ཞིག་བཞེངས་དགོས་བྱས་པས་ཐམས་ཅད་ཀྱིས་འབུལ་བ་མ་ཁྱེར་བར་བཞག་སྟེ་འོར་གྱི་གཙུག་ལག་ཁང་བཞེངས། དེའི་དུས་སུ་འབྲོམ་རིན་པོ་ཆེའི་ཞལ་ནས། ད་ཇོ་བོའི་གདུང་འདི་རྣམས་དགེ་བསྙེན་དང་དགེ་ཚུལ་ལ་ཡང་མི་བསྐུར། ཁང་ནག་དུ་བ་ཅན་དུ་ཡང་མི་བཞུགས་གསུངས་ནས་དགེ་སློང་ཚུལ་ཁྲིམས་རྣམ་པར་དག་པ་གཉིས་སྤྱན་འདྲེན་དུ་བཅུག་སྟེ། སྟོད་ལུང་ཞོང་པའི་ན་ལ་སྦྲ་དཀར་ནག་གཉིས་ཕུབ་ནས་དཀར་པོའི་ནང་དུ་གདུང་བཞུགས་ཏེ་མཆོད་པ་མཛད། ནག་པོའི་ནང་དུ་གཡོས་མཛད། དེར་དགུང་གཅིག་བཞུགས། ས་ར་ལྷབ་ཀྱི་ན་ལ་དགུང་གཅིག ཡས་ས་སྦུབ་ཀྱི་ན་ལ་དགུང་གཅིག །ལམ་པ་གསེར་ཕུག་གི་ན་ལ་དགུང་གཅིག །དེ་ནས་གནམ་གྱི་བྱེ་མ་ལུང་དུ་བྱོན། དེ་ནས་འཕྲང་ཁ་བེར་ཆུང་གིས་ཞུ་བ་བསྐྱར་ནས་འབུལ་དུ་བཏང་བྱུང་བས་འབྲོམ་རིན་པོ་ཆེའི་ཞལ་ནས། འུ་ཅག་རྣམས་ལ་སྤྱན་འདྲེན་མཁན་གདའ་ན་འགྲོ་འམ་མི་འགྲོ་གསུངས་པས། དགོན་པ་བའི་ཞལ་ནས་ཁོང་གི་མི་སྐྱིན་ལ་འགྲོ་མི་དགོས་སམ་གསུངས། དེར་ཁོང་ཡུས་ཆེ་བས་འབྲོམ་རིན་པོ་ཆེས་ཞལ་གྱིས་བཞེས་ནས་སྔོན་ལ་ཡི་དམ་དངུལ་གདུགས་ཅན་བསྐུར། དེའི་རྗེས་ལ་རྭ་སྒྲེང་དུ་བྱོན་ཏེ། མེ་ཕོ་སྤྲེའུའི་ལོ་གསར་མཚམས་ལ་ཕྱགས་ཕེབས་ནས་རྭ་སྒྲེང་གི་དགོན་པ་གཟིགས་པས། རྒྱབ་ན་བྲག་རྡོ་རྗེ་འདྲ་བ་འདུག མདུན་ན་མཚོ་གཡུང་དྲུང་འཁྱིལ་བ་འདྲ་བ་འདུག གཡོན་གྱི་རི་རྒྱལ་སྲིད་རིན་པོ་ཆེ་སྣ་བདུན་འདྲ་བ་འདུག ཕ་བོང་ཐང་འཁོར་ལོ་རྩིབས་བརྒྱད་འདྲ་བ་འདུག ཤུག་པ་ར་ཙམ་ལུག་ཙམ་པ་ལ་གསེར་ལོ་གཡུ་ལོ་གཉིས་ལ་ཀ་བ་ཕེར་བ་འདུག ཆུ་མིག་བརྒྱ་རྩ་བརྒྱད་འདུག བྱ་རྣམ་པ་སྣ་ཚོགས་ཀུ་དི་རེ་བ་འདུག  མི་མ་ཡིན་རྗེས་པོ་ཆེ་བྱ་བ་དཀར་ཕྱོགས་ལ་དགའ་བ་དང༌། སྡོང་པོ་ཀུས་འདེབས་བྱ་བ་ནག་པོ་ལ་དགའ་བ་གཅིག་དང་གཉིས་འདུག དགོན་པ་ལ་ཐུགས་མཉེས་ནས་དེའི་ནུབ་མོ་སེང་གེའི་བྲག་ཕུག་ཏུ་བཞུགས་ཏེ་རྨི་ལམ་བརྟགས་པས། དབུ་རྩེ་རྙིང་མའི་ཤུལ་ན་གསེར་གྱི་མཆོད་རྟེན་གཅིག་འདུག་པ་ལས་འོད་ཟེར་འཕྲོས་པས། དེའི་སྣེ་ལ་དབུ་རྩེ་གཎ་ཇི་ར་མང་པོ་བྱུང་ནས་བོད་ཀྱི་ཡུལ་ཐམས་ཅད་ཁྱབ་པར་བྱས་ཚུར་འདུས་པས་རྭ་སྒྲེང་གི་ཤུག་པའི་གསེབ་ཐམས་ཅད་དུ་དབུ་རྩེ་གཎ་ཇི་ར་བཙུགས་པས་གང་བ་ད་ལྟ་ཡོད་པ་བཞིན་རྨིས།

              གཞན་ཡང་ཕ་བོང་ཐང་གི་རྡོ་རིན་པོ་ཆེའི་ཕུང་པོར་སོང་བ་དང་རྩེ་འཕྱིང་དཀར་མར་གྱི་ཕུང་པོར་སོང་བ་རྨིས།ནང་པར་སུམ་པ་མཐུ་ཆེན་དང༌། རྣལ་འབྱོར་པ་ཆེན་པོ་དང༌། དགོན་པ་བ་གསུམ་བྱོན་ནས་རྟགས་བཟང་ངམ་ཞུས་པས། བཟང་བར་གདའ་གསུངས། དེ་ནས་དགོན་པ་འདེབས་པར་ཐུགས་ཐག་བཅད་ནས་ས་འདུལ་ལ་བརྒྱད་སྟོང་འགྲེལ་ཆེན་གསུངས།ས་ཆོག་པཎྜི་ཏ་ཤྲཱི་སྠ་ར་ལ་ཞུས་པས་མ་གནང༌། དགོན་པ་བ་ལ་ཞུས་པས་ཀྱང་མ་གནང་བ་ལ། ད་གསང་ཕུ་བ་ལ་ཞུ་སྙམ་པ་ལ་རྣལ་འབྱོར་པའི་ཞལ་ནས། སྟོན་པ་ལ་མི་ཀུན་ཇོ་བོའི་ཡོན་ཏན་ཁྱེད་ལ་ཡོད་པར་བྱེད་ཁྱེད་འདི་འདྲ་བ་ཟེར་བས།འབྲོམ་གྱི་ཞལ་ནས།ངས་ཤེས་པ་ཡིན་ཏེ་གཅིག་ཏུ་རྟེན་དམན། གཉིས་སུ་ཁྱེད་གོང་མ་རྣམས་ཀྱིས་ཁྲེལ་གྱི་དོགས། གསུམ་དུ་མི་མ་ཡིན་ལ་འཚེར་བས་ལན། ད་འདི་བཞིན་དུ་བྱེད་པ་ཡིན་གསུངས་ནས་སྔོན་ལ་ཇོ་བོའི་སྐུ་འབག་དང་འཇམ་དཔལ་རྡོ་རྗེ་གཉིས་སྤྱན་དྲངས། གསོལ་བ་བཏབ་ནས་ཆུ་མིག་བསུབས། སྐྱེར་ཕུང་རྩ་བ་ནས་བཏོན་པ་ལ་སྦྲུལ་མྱོག་ཆེར་བྱུང་བས་ཇི་སྙམ་དུ་ཡང་མ་བསམས། དེ་ནས་ཁྲི་བརྩིགས།ཐིག་བཏབ་སྦྲ་ཕུབ་ནས་འདིར་ཇོ་བོའི་གདུང་བཞུགས་པས་ཁྱེད་རྣམས་ཀྱིས་ཀྱང་མཆིལ་སྣབས་ལ་སོགས་པ་མ་འདོར་ཞིག་གསུངས་སོ། །

                                                                                                                                              རྩོམ་སྒྲིག་པ། མང་ར་བ།
            གསལ་འདེབས། 
                      རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                      དྲ་བའི་སྦྲེལ་ཐགhttp://www.tb1025.cn