དེ་ནས་ཇོ་བོ་དཔོན་གཡོག་སྙེ་ཐང་དུ་སྤྱན་དྲངས་ནས་བཞུགས་པའི་དུས་སུ་ཇོ་བོའི་ཞལ་ནས། ཨུ་པ་སི་ཀ་ཁྱོད་ན་རེ་དགུན་ཡང་མེ་ཏོག་འཆར་བ་ཞིག་ཡོད་ཟེར་བ་མེ་ཏོག་ག་རེ་གསུངས་པས། འབྲོམ་རིན་པོ་ཆེས་སྙེའི་ན་མོ་ཆེར་ཇོ་བོ་རྗེ་གདན་དྲངས་ནས་གསིང་མའི་མེ་ཏོག་གཟིགས་ཕུལ་བས། ཇོ་བོའི་ཞལ་ནས་བརྫུན་མ་བཏང་ཙམ་འདུག་གསུངས། ངས་ས་ཕྱོགས་འདིར་མེ་ཏོག་མང་པོ་འཆར་བར་བྱིན་གྱིས་རླབས་ཀྱིས་གསུངས། ཇོ་བོའི་བྱིན་རླབས་ཀྱིས་སྙེ་ཐང་གི་ས་སྐོར་ན་མེ་ཏོག་གི་རིགས་གཞན་ན་མེད་པ་མང་པོ་ཡོད། ཇོ་བོའི་ཞལ་ནས། དུག་གི་མེ་ཏོག་དཀོན་མཆོག་ལ་དབུལ་མི་རུང༌། སྤང་རྒྱན་འདི་ཨུཏྤ་ལའི་རྒྱུ་རུ་འདུག་པ་ལ་བོད་གྲང་བས་ཁ་མ་བྱེ་བར་འདུག མེ་ཏོག་ཤང་ཤང་ནི་རྒྱ་གར་ན་ཡང་མེད། ཡོད་ན་ངས་གསེར་འཇལ་ནུས་གསུངས། དེའི་ཚེ་འབྲོམ་རིན་པོ་ཆེས་ལྗགས་ཀྱི་སྟེང་དུ་མེ་ཏོག་ངོ་མཚར་བ་ཞིག་སྤྲུལ་པ་སོགས་རྫུ་འཕྲུལ་གྱི་བཀོད་པ་སྣ་ཚོགས་བསྟན་པ་བཀའ་གདམས་གླེགས་བམ་ལས་འབྱུང་བ་ནི།

              ཇོ་བོ་རྗེས། ཀྱེ་མ་ཆུང་ཆུང་འབྲོམ་རྗེ་གཟིགས། །འོལ་ལེ་འདབ་མའང་སྐྱེས་ཏེ་གདའ། །དོད་དོད་བརྫུན་བུག་མ་རྡིབ་ཙམ། །གསུང་བའི་ལྗགས་དེ་ང་ལ་སྟོན། །དེ་ནས་འབྲོམ་རྗེས་ལྗགས་བརྐྱངས་པ། །གཟིགས་པས་དེ་ལའང་མེ་ཏོག་གཅིག །སྐྱེས་པ་གཟིགས་ནས་ཇོ་བོ་མཉེས། །ཀྱེ་མའོ་ཡ་མཚན་དེ་ན་འདུག །འབྲོམ་གྱི་ལྕེ་ནི་ནེའུ་ཐང་འདྲ། །བུང་བ་ཞལ་དུ་མི་འཚང་ཙམ། །འོ་ནའང་དངར་རྩི་མེད་དམ་ཅི། །སླར་ཡང་འབྲོམ་རྗེས་ལྗགས་བརྐྱངས་པའི། །མེ་ཏོག་སྟེང་ནའང་ཇོ་བོ་གདའ། །ཇོ་བོས་གཟིགས་ནས་འདི་སྐད་གསུང༌། །ཨ་རེ་ཅི་ཡང་དགོད་རེ་བྲོ། །བདག་ལ་འབྲོམ་གྱིས་བུང་བ་བྱས། །ཁོ་བོ་རེ་ཆུང་ནས་རྡོག་ཙམ། །རེ་དོད་གསུང་ཞིང་ཕྱག་གིས་རེག །པདྨའི་སྟེང་གི་ཇོ་བོ་བཞད། །དེ་ནས་ཇོ་བོའི་བཞད་སྲིན་ལངས། །ཡང་དང་ཡང་དུ་བཞད་པར་གྱུར། །དེ་ནས་འབྲོམ་གྱིས་འདི་སྐད་སྨྲས། །དགུན་དུས་འཁྲུངས་པའི་མེ་ཏོག་དཀར་འབུར་བ། །ཁོ་བོ་ཟོག་མར་མ་བཏང་དྲིན་ཆེའོ། །སྤྱིར་ཡང་མཐའ་འཁོབ་གནས་འདིར་གངས་གཞི་ཆེ། །ཁྱད་པར་དབུ་རུ་ཆུ་འཁྲིས་ས་འཁྱགས་མང༌། །དེང་སང་དགུན་དུས་མེ་ཏོག་འདབ་ལྔ་པ། །ས་ལ་སྐྱེས་པས་ཇོ་བོ་མཉེས་གྱུར་ན། །ཁྱད་པར་རྫུན་མེད་འབྲོམ་གྱི་ལྕེ་ལ་འཁྲུངས། །བུང་བ་དྲིས་པས་བདེ་གཤེགས་སྐུ་གཟུགས་བྱོན། །བཞད་པར་རབ་བཞད་བདེ་གཤེགས་འདི་འདྲར་བཞད། །མཚར་མོས་རང་གི་བྱད་མཐོང་བཞིན་དུ་བཞད། །ལྷ་མོ་རང་གཟུགས་སྟོན་པ་བཞིན་དུ་བཞད། །བཀྲ་ཤིས་བླ་མ་མཉེས་པའི་བཀྲ་ཤིས་ཤོག །སླར་ཡང་བླ་མ་རྗེ་བཙུན་འདི་སྐད་གསུངས། །འབྲོམ་རྗེ་ད་དུང་ལྗགས་ཀྱི་མེ་ཏོག་སྟོན། །སླར་ཡང་ལྗགས་བརྐྱང་གཟིགས་སུ་ཕུལ་བ་ཡི། །བླ་མའི་མདུན་ནའང་འབྲོམ་ཆུང་ཆུང་ཆུང་གཅིག །འཛུམ་འཛུམ་བླ་མའི་ཞལ་ལ་རབ་བལྟ་ཞིང༌། །བུ་ཆུང་སྐད་འདྲ་སྙན་པའི་སྒྲ་འབྱིན་གསན། །གཟིགས་མ་ཐག་ཏུ་ཤིན་ཏུ་དགྱེས་གྱུར་ནས། །མེ་ཏོག་འདི་འདྲ་རྒྱ་གར་ཡུལ་ནའང་མེད། །ཟབ་མོའི་ཡབ་སྲས་ལྗགས་ཀྱི་སྟེང་ནའང་གདའ། །ངོ་མཚར་ཆེའོ་ནང་གི་ཡ་གི་གཉིས། །འབྲོམ་རྗེ་ལྗགས་དེ་གུལ་གུལ་མ་མཛད་ཅིག །སྐུ་ཁམས་གསོ་ཕྱིར་འབྲོམ་གྱིས་རབ་གཡོས་པས། །ལེགས་ལེགས་ལྡེག་ལྡེག་འབྲུལ་ལ་ཁད་དེ་གདའ། །རབ་ཏུ་བཞད་ཅིང་འབྲོམ་རྗེ་ག་ལེ་མཛོད། །ཁྱེའུ་གཞོན་ནུ་སྲན་རྡོག་ཟ་དང་མཚུངས། །ལྕེ་ཡི་སྟེང་ན་རལ་རིལ་ལྟད་མོར་ཆེ། །བདེ་གཤེགས་ལྗགས་ཀྱི་པདྨོ་ལས་འཁྲུངས་པའི། །དང་པོར་བཞུགས་པའི་གཟུགས་ཅན་ཡ་གི་གཉིས། །མར་བྱོན་བདག་ཅག་གཉིས་ནི་ནང་དུ་འགྲོ། །འབྲོམ་རྗེའི་ཞལ་ནས་ལན་དུ་འདི་སྐད་ཞུས། །འཇིག་རྟེན་སྒྲོན་མ་ཡར་ལ་གཤེགས་སུ་གསོལ། །ཁོ་བོས་ཕྱིན་པས་ཁོང་གཉིས་མི་ལུས་མཆི། །དེ་ནས་རྒྱལ་བ་སྲས་བཅས་མཉེས་བཞིན་དུ། །གཟིམ་ཁང་ནང་དུ་གཤེགས་ཏེ་བྱོན་པའི་ཚེ། །ལྷ་ཡི་ཚོགས་ཀྱིས་མེ་ཏོག་དཔག་མེད་གཏོར། །དེ་ནས་ཇོ་བོའི་ཞལ་ནས་འདི་སྐད་གསུངས། །འབྲོམ་རྗེ་མེ་ཏོག་མཆོག་ལ་མཉེས་གྱུར་ན། །ཁོ་བོས་ས་ཕྱོགས་འདི་དག་བྱིན་བརླབས་ལ། །རིན་ཆེན་ལྔ་ཡི་མེ་ཏོག་བྱུང་བར་བྱ། །ལན་དུ་འབྲོམ་རྗེས་ཐུགས་ལ་ཐོགས་ཞུས་པས། །གསེར་དངུལ་ལ་སོགས་མེ་ཏོག་བཟང་པོ་ཡིས། །སྙེ་ཐང་ཁོངས་རྣམས་རབ་ཏུ་གང་བར་གྱུར། །དེ་ནས་ཇོ་བོའི་ཞལ་ནས་འདི་སྐད་གསུངས། །བླ་མས་བྱིན་བརླབས་མར་མེ་མཛད་དཔལ་ངས། །བྱིན་གྱིས་བརླབས་པའི་མེ་ཏོག་འདི་བསྐྲུན་པས། །འབྲོམ་གྱི་རྗེས་འབྲང་མཆོད་ཚོགས་འཕེལ་བར་ཤོག །ཅེས་བཀའ་གདམས་གླེགས་བམ་ལས་འབྱུང་ངོ༌། །ཇོ་བོ་རྗེས་འབྲོམ་རིན་པོ་ཆེ་ཇོ་བོ་རང་ཉིད་དང་མཉམ་པ་འགྲན་ཟླ་མེད་པར་བསྔགས་ཏེ། འབྲོམ་རིན་པོ་ཆེས་ཇོ་བོ་ལ། ཁོ་བོ་ཟབ་མོ་དབུ་མའི་ལྟ་བ་འདི་ལྟར་འཛིན་ཞེས་སློབ་དཔོན་ཟླ་བ་གྲགས་པའི་ལུགས་ཀྱི་ལྟ་བའི་རྟོགས་པ་ཕུལ་བས། ཇོ་བོས་ཕྱག་ཐལ་མོ་ཤར་ཕྱོགས་སུ་སྦྱར་ནས་ད་ལྟ་རྒྱ་གར་ཤར་ཕྱོགས་ནའང་ལྟ་བ་འདི་ཁོ་ན་འཛིན་པ་ཡིན། ཁྱོད་ལྟ་བུའི་སེམས་དཔའ་ཆེན་པོ་བོད་ན་འདུག་པ་བོད་བསོད་ནམས་མི་ཆུང་གི ཁོ་བོ་བོད་དུ་འོང་མི་དགོས་པ་འདུག་པ་ལ་གསུངས་ནས་གདམས་པ་ཤས་ཤིག་གནང་ངོ༌། །དེ་ལྟར་འབྲོམ་རིན་པོ་ཆེས་ཇོ་བོ་རྗེ་མཉེས་པ་གསུམ་གྱི་སྒོ་ནས་མཉེས་པར་མཛད་ཅིང༌།

              ལྷག་པར་ཡེར་པ་ལྷ་རི་སྙིང་པོའི་མགུལ་དུ་ལོ་གསུམ་གྱི་རིང་ལ་ཇོ་བོ་རྗེ་རྙེད་པ་དང་བཀུར་སྟི་ཚད་མེད་པས་མཆོད་ཅིང༌། སྡིག་པ་ཅན་གྱི་སྐྱེ་བོས་དབེན་པར་བྱས་ཏེ་བྱང་ཆུབ་ལམ་གྱི་རིམ་པའི་འགོ་བཤེས་གཉེན་བསྟེན་ཚུལ་ནས་མཐར་འབྲས་བུ་མི་སློབ་པའི་ཟུང་འཇུག་འགྲུབ་པའི་བར་ལམ་སོ་སོའི་ངོ་བོ་གང་ཡིན་པ་དང༌། ལམ་དེ་དང་དེ་རྒྱུད་ལ་བསྐྱེད་པ་ལ་རྒྱུ་ཚོགས་གང་དང་གང་ཞིག་དགོས་པ་དང༌། དང་པོར་གང་ཉམས་སུ་བླང་བར་བྱ་བ་དེ་ནས་རིམ་གྱིས་རིམ་གྱིས་བསྒྲུབ་དགོས་པའི་གོ་རིམ་ངེས་པ་དང༌། ལམ་དེ་དང་དེ་དག་སྒྲུབ་པ་ལ་གེགས་ཇི་ལྟ་བུ་འབྱུང་བ་དང༌། ལམ་དེ་དང་དེ་དག་སྟོན་པའི་བླ་མ་དང་སློབ་མ་ཇི་ལྟ་བུ་ཞིག་དགོས་པ་དང༌། ཡི་དམ་གང་ལ་བྱ་དགོས་པ་སོགས་མཐའ་དག་པར་ཞུས་ཤིང་ཉིན་རེ་བཞིན་དུ་དྲི་གཏུགས་དང་བརྒལ་བརྟག་མང་དུ་མཛད་དེ་གཏན་ལ་ཕབ།

                                                                                                                                       རྩོམ་སྒྲིག་པ། མང་ར་བ།
           གསལ་འདེབས། 
                       རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                      དྲ་བའི་སྦྲེལ་ཐགhttp://www.tb1025.cn