དེ་ནས་འབྲོམ་རིན་པོ་ཆེས་ཇོ་བོའི་ཕྱག་ཕྱིར་ལྷ་སར་ཕེབས། དེའི་དུས་སུ་ཇོ་བོས་ཆང་གི་ཉེས་དམིགས་ལ་སོགས་པ་ཆོས་མང་དུ་གསུངས་ནས་ངས་ཕལ་ཆེན་སྡེ་པ་འཛུགས་གསུངས་པ་ལ། འབྲོམ་རིན་པོ་ཆེས། ཨ་ཏི་ཤ དེ་མི་མཛད་པར་ཞུ། བོད་དུ་འདི་མི་ལེགས་ཞེས་ཞུས་སོ། །དེའི་རྒྱུ་མཚན་ཡང་སྔོན་དུས་ཆོས་རྒྱལ་ཁྲི་སྲོང་ལྡེའུ་བཙན་གྱིས་མཁན་ཆེན་བོ་དྷི་ས་ཏྭ་བོད་དུ་སྤྱན་དྲངས་ནས་རྒྱལ་བའི་བསྟན་པ་འཛུགས་པར་གསོལ་བ་བཏབ་པ་ན། མཁན་ཆེན་བོ་དྷི་ས་ཏྭས་སྦ་ཡེ་ཤེས་དབང་པོ་སོགས་མི་བདུན་རབ་ཏུ་བྱུང་ཞིང་སོ་ཐར་གྱི་བསླབ་ཁྲིམས་ལ་བཀོད་པས་དེ་དག་རབ་ཏུ་བྱུང་མ་ཐག་མངོན་ཤེས་དང་རྫུ་འཕྲུལ་ཐོབ་ཅིང་སྡེ་སྣོད་གསུམ་ལ་མཁས་པར་གྱུར། དེ་ནས་རིམ་གྱིས་དགེ་འདུན་གྱི་སྡེ་རྒྱ་ཆེར་འཕེལ། མཁན་རྒྱུད་འདི་ནི་གཞི་ཐམས་ཅད་ཡོད་པར་སྨྲ་བའི་སྡེ་པའི་བརྒྱུད་པ་ཡིན་པས་ཆོས་རྒྱལ་ཁྲི་སྲོང་ལྡེ་བཙན་གྱིས་ད་ཕྱིན་ཆད་བོད་འདིར་མཁན་ཆེན་བོ་དྷི་ས་ཏྭའི་ལུགས་ལྟར་ཐམས་ཅད་ཡོད་སྨྲ་བའི་སྡེ་པ་ལས་སྡེ་པ་གཞན་མི་བྱ་བ་དང༌། འཕགས་པ་ཀླུ་སྒྲུབ་ཡབ་སྲས་ཀྱི་ལྟ་བ་ལས་ལྟ་བ་གཞན་མི་འཛིན་པར་བཀའ་བཅད་མཛད་པ་དེ་དང་མཐུན་པར་མཛད་བཞེད་པ་དང༌། བོད་ཀྱི་གདུལ་བྱ་ཡོངས་ཀྱི་ཁམས་དང་བསམ་པ་ལ་གཟིགས་ནས་ཕལ་ཆེན་སྡེ་པའི་ལུགས་ཀྱི་བཅས་པ་འགའ་ཞིག་བོད་ཀྱི་གདུལ་བྱས་བསྲུང་དཀའ་བ་སོགས་ལ་གཟིགས་ནས་ཇོ་བོ་རྗེ་ལ་དེ་ལྟར་ཞུས་སོ། །

              དེ་ནས་རྔོག་ལེགས་པའི་ཤེས་རབ་ཀྱིས་ཇོ་བོ་དཔོན་གཡོག་ཡེར་པར་སྤྱན་དྲངས་པའི་དུས་སུ་དགེ་བཤེས་སྟོན་པས་བྱང་དུ་མི་ཆོས་ལ་གསེར་སློང་མཛད་དུ་བྱོན། མི་ཆོས་རྣམས་ཀྱིས་འབྲོམ་རིན་པོ་ཆེ་མཇལ་བའི་གྲབས་བྱས་ནས་ཚུར་འོང་ཁ་མ་དང་ཐུག དེའི་བར་དུ་ཡབ་གྲོངས་འདུག་པས་མི་ཆོས་རྣམས་ཀྱིས་འབྲོམ་རིན་པོ་ཆེ་ལ་མ་ལེགས་བྱ་སྙམ་ཙ་ན་འབྲོམ་རིན་པོ་ཆེས་སྔོན་ལ་ཚུར་མཛད། དེ་ཀུན་ཡང་ཕྱི་རབས་ལ་དགོངས་པ་ཡིན་གསུངས། དེ་ནས་གསེར་སློང་མཛད་དེ་ཚུར་ཕེབས་ནས་ལྷ་རི་སྙིང་པོའི་མགུལ་དུ་འབུལ་བ་མཛད་དོ། །འབྲོམ་རིན་ཆེའི་ཞལ་ནས་བླ་མ་རྗེ་བཙུན་ཆེན་པོ་ཟང་ཟིང་ལ་མཉེས་པ་མ་ལགས་ཏེ།ཁོ་བོ་ཚོགས་གསོག་པའི་ཆེད་དུ་ཟང་ཟིང་གི་མཆོད་པ་ཅུང་ཟད་བགྱིད་གསུངས་ནས། གསེར་ཞོ་དགུ་དགུ་ལ་སྲང་རེར་བརྩིས་པའི་གསེར་སྲང་བརྒྱ་རྩ་བརྒྱད། རྟ་ཉི་ཤུ་རྩ་གཅིག འབྲི་བཅུ་གཅིག བེར་གཉིས། དབྱི་སྤྱང་གི་པགས་པ་བཞི། ཁྲབ་བཞི། དངུལ་སྐྱོགས་གཉིས་གླ་གོར་གྱི་ཡོལ་གོ་གཅིག དེ་ལ་སོགས་པའི་ནོར་སྣ་བརྒྱ་རྩ་བརྒྱད་ཕུལ། དེའི་ཚེ་ཇོ་བོ་རྗེ་མཉེས་ནས་འབྲོམ་རིན་པོ་ཆེ་ལ་ཐུགས་མཉེས་པའི་བཀའ་ལུང་མང་དུ་གསུངས་ཤིང༌། ཇོ་བོ་ཉིད་ཀྱིས་ཆོས་ལ་དཀའ་བ་སྤྱད་ལུགས། སྒྲུབ་པ་ཉམས་སུ་བླངས་ལུགས་ཡམ་མེ་བ་ཞིག་གསུངས་ནས་ཁྱོད་ཀྱིས་དཀའ་བའི་ལས་མ་བགྱིས་པར་སྙིང་པོའི་དོན་རྙེད་པ་བསོད་ནམས་ཤིན་ཏུ་ཆེ། ད་ལེགས་པར་ནན་ཏན་དུ་གྱིས་ཤིག་གསུངས།

              རྟག་ཏུ་ངུ་དང་ཆོས་འཕགས་དང་ནོར་བཟང་གི་གཏམ་རྒྱུད་གསུངས་ནས་བླ་མའི་ཞབས་ཏོག་བྱེད་པ་འདི་ལ། བླ་མ་དེ་ལ་འདོད་པ་མི་མངའ་ཡང་རྟེན་ཅིང་འབྲེལ་བར་འབྱུང་བའི་ཆེ་བས་བྱ་དགོས་པ་ཡིན་གསུངས༌། འབྲོམ་རིན་པོ་ཆེས་གསེར་སློང་ལ་བྱོན་དུས་ཀྱི་ཟླ་བ་གཅིག་དང༌། ཁུ་སྟོན་གྱིས་སྤྱན་དྲངས་དུས་ཟླ་བ་གཅིག་སྟེ། ཟླ་བ་གཉིས་མ་གཏོགས་པ་དང་པོར་ཇོ་བོ་དང་མཇལ་ནས་ཞི་བར་མ་གཤེགས་ཀྱི་བར་སྐད་ཅིག་ཀྱང་འབྲལ་མ་མྱོང་བ་ཡིན་གསུངས། ཡང་ཇོ་བོའི་ཞལ་ནས། ཨུ་པ་སི་ཀའི་རིགས་ཅི་ཡིན་གསུངས། རྗེའུའི་རིགས་ལགས་ཞུས་པས། རྗེའུའི་རིགས་ཀྱི་ང་རྒྱལ་མ་མཛད་གསུངས། ཡེ་མ་མཆིས་ཞུས་པས། བག་ཙམ་བདོག་སྟེ་མཆི།ཡེ་མི་རུང་གསུངས། འབྲོམ་རིན་པོ་ཆེ་ལ་ཁེངས་པ་དང་ཆེ་འགྱིངས་མི་མངའ་བས་བེར་ཆུང་གིས་ཕྱག་གིས་ཟེར་བ་ལའང་དེ་བཞིན་དུ་མཛད་པ་དང༌། སྙེ་ཐང་དུ་ཁུ་སྟོན་བྱོན་པ་ལའང་ཕྱག་མཛད་ཅིང༌། འབྲོམ་རིན་པོ་ཆེ་ལན་པ་སྤྱིལ་བུར་སྤྱན་དྲངས་དུས་ལམ་དུ་སྔགས་པ་གཅིག་དང་འཕྲད་པས་ཁ་ཆང་དྲི་ཆིལ་ལེ་བྱས་ནས་ཁོ་ན་རེ། དགེ་བསྙེན་འདི་ཡ་ཚད་ཁུར་ཟེར་ནས་ལྷམ་ཁྲེས་ཞིག་དང་གལ་ཏ་བསྐུར་བས་བགྱིའོ་གསུངས་ནས་ཁུར་བྱོན་པས་སྤྱིལ་བུའི་དགེ་འདུན་རྣམས་ཀྱིས་བསུ་བའི་སེར་སྦྲེངས་བྱས་པ་སྔགས་པས་མཐོང་ནས་དགེ་བསྙེན་འདི་ཅི་ཡིན་ཟེར་བ་ལ། ཁོ་བོ་ལ་བསུ་བ་བྱེད་པའི་བཞེད་དུ་གདའ་གསུངས་པས། ཁོ་སྐྱེངས་ཏེ་བྲོས་པ་ལ་སོགས་པའི་གཏམ་རྒྱུད་གཞན་ཡང་མང་ངོ༌། །

                                                                                                                                      རྩོམ་སྒྲིག་པ། མང་ར་བ།
             གསལ་འདེབས། 
                         རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                        དྲ་བའི་སྦྲེལ་ཐགhttp://www.tb1025.cn