དེ་ནས་ཇོ་བོ་དཔོན་གཡོག་གིས་འོན་དུ་ཟླ་བ་གཅིག་བཞུགས་ནས་བསམ་ཡས་སུ་ཕེབས།དེའི་དུས་སུ་ཞང་འཕྲང་ཁ་བེར་ཆུང་གིས་འབྲོམ་རིན་པོ་ཆེ་སྤྱན་འདྲེན་པའི་མི་གཉིས་བཏང་ནས་ཡང་ཡང་བསྐུལ་བ་ལ་འབྲོམ་རིན་པོ་ཆེའི་ཞལ་ནས། ང་ད་ལྟ་འོང་མི་ཁོམ། ཇོ་བོ་སྐུ་ན་མཐོ་ལ་སྐུ་གཅོང་མང་བས་ཞབས་ཏོག་གལ་ཆེ། དེའི་བར་དུ་ཐུགས་མི་ཆད་པར་ཆོས་འདི་ཚོལ་དགོངས་པར་ཞུ་གསུངས་ནས་འཕྲིན་ཡིག་བསྐུར་བ།

              ཡབ་མེས་ཆོ་རིགས་བཟང་པོའི་རྗེས་འབྲངས་ཤིང༌། །དགེ་བའི་བློ་མངའ་དལ་འབྱོར་ལྡན་རྣམས་ལ། །ཕན་པར་དགོངས་པའི་སེམས་ཀྱིས་ཀུན་བསླངས་ན། །བདུད་རྩི་འདྲ་བའི་གྲོས་ཤིག་ཡོངས་ལ་འདེབས། །སྙོམས་པར་འཆར་བའི་ཉི་མའི་འོད་ཟེར་བཞིན། །སངས་རྒྱས་བསྟན་པས་ཀུན་ལ་ཡོངས་ཁྱབ་ཀྱང༌། །བྱང་དུ་བལྟས་པའི་བྲག་ཕུག་ཇི་བཞིན་དུ། །དམ་པའི་ལྷ་ཆོས་མི་མཛད་བློ་རེ་རྨོངས། །འོ་སྐོལ་དལ་འབྱོར་མི་ལུས་ཐོབ་པ་ཡང༌། །ད་ལྟ་ཉིད་ཀྱི་སྐུ་སྤྱོད་མ་ལགས་ཏེ། །ཡབ་ཡུམ་ལས་འཕྲོ་མཐུན་པའི་འདུ་འཕྲོད་དང༌། །ཚེ་སྔོན་བསོད་ནམས་བསགས་པའི་རྒྱུ་ལས་གྲུབ། །དེ་ལྟར་རྙེད་དཀའི་མི་ལུས་ཐོབ་ཙ་ན། །སྡིག་པ་སྤངས་ཏེ་དགེ་བ་མ་སྤྱད་ན། །མཐོན་པོའི་རི་ལ་ཕྱིན་ནས་སླར་ལྷུང་བཞིན། །མི་ལུས་ཐོབ་པ་དོན་མེད་ཆུད་མ་གཟོན། །འོ་སྐོལ་སྟོན་པ་སངས་རྒྱས་བྱོན་ནས་ཀྱང༌། །དམ་ཆོས་བདུད་རྩི་ཇི་སྙེད་གསུངས་པ་དག །རྟག་པའི་དོན་དུ་གསུངས་པ་མ་ཡིན་ཏེ། །མི་རྟག་ངེས་ནས་གསུངས་པ་མ་ཡིན་ནམ། །རྟག་གམ་མི་རྟག་དཔེར་ན་འདི་འདྲ་སྟེ། །འོ་སྐོལ་ཡབ་མེས་སྔ་རབས་འདས་པ་དག །ད་ལྟ་མིང་ཙམ་ལུས་ནས་མ་སོང་ངམ། །རྟག་པ་ལགས་ན་ད་ལྟ་གང་ན་གདའ། །འོ་སྐོལ་ཉིད་ཀྱི་སྐུ་རིང་འདི་ལ་ཡང༌། །ན་ཚོད་མཐུན་པའི་རྒན་གཞོན་མཐོ་དམན་སོགས། །ཇི་སྙེད་གུམ་པ་ཐུགས་མཚོར་མི་མངའ་ཡང༌། །སྙན་གྱིས་གསན་པ་དེ་བས་ཤིན་ཏུ་མང༌། །ན་ནིང་དིང་སང་དོ་ཚིགས་བར་ལ་ཡང༌། །འདས་པའི་མི་དང་ཡུལ་མི་ཁྱིམ་མཚེས་ལས། །མཚོན་གྱིས་རྨས་དང་དེ་བཞིན་བྲོ་འཚལ་ནས། །གྲངས་ཀྱིས་གུམ་པ་སྤྱན་གྱིས་མ་གཟིགས་སམ། །ཀུན་ཀྱང་ཆོས་ཉིད་འདི་ལས་མ་འདས་ཏེ། །འཆི་བའི་རེ་མོས་འོ་སྐོལ་ཀུན་ལ་འོང༌། །དེ་རིང་སང་གི་དབང་ཡང་མ་མཆིས་ཏེ། །ཐམས་ཅད་མི་རྟག་འཇའ་ཚོན་རི་མོ་འདྲ། །གཟུགས་ནི་ལྷོ་སྤྲིན་འདྲ་སྟེ་ཁད་ཀྱིས་འཇིག །སྲོག་ནི་བ་ཐག་འདྲ་སྟེ་གྱི་ན་ཙམ། །དབུགས་ནི་ན་བུན་འདྲ་སྟེ་ཡོད་ལ་མེད། །ཚེ་ནི་གློག་དང་འདྲ་སྟེ་སྐད་ཅིག་མ། །འོ་སྐོལ་ཕུང་པོ་འདི་ལ་ཕངས་མཛད་ཀྱང༌། །ཁྲེལ་མེད་སླེས་ལ་བོར་བ་མཐོང་བཞིན་དུ། །སྒྱུ་མ་རྟག་ཏུ་རེ་བ་བློ་རེ་རྨོངས། །སྟོང་པ་དངོས་པོར་ལྟ་བ་བློ་རེ་འཁྲུལ། །ཇི་ལྟར་བགྱིས་ཀྱང་རང་དང་ཕུང་པོ་འདི། །འབྲལ་བར་མི་འདོད་འགྲོགས་པར་རེ་འདོད་ཀྱང༌། །གོས་རྙིང་བརྗེ་བ་བཞིན་དུ་ཕྱིར་ལུས་ནས། །ལུས་སེམས་སོ་སོར་ཆ་བ་མ་དགོངས་སམ། །བསོད་ནམས་ལས་གྲུབ་འབྱུང་བཞི་འདུས་བསྐྱེད་པའི། །པདྨ་ལྟ་བུར་རྒྱས་པའི་ལུས་འདི་ལ། །དགྲ་སྡང་རྣམ་ཤེས་བརྒྱད་ནི་དུག་སྦྱོར་ན། །སྒྱུ་མའི་ཕུང་པོ་ད་ལྟ་ཇི་སྙམ་མཛད། །དེ་ལ་སྐྱེས་བུ་དམ་པའི་སྨན་པ་ཡིས། །རྣམ་ཐར་བརྒྱད་ཀྱི་སྨན་གྱིས་མ་བཅོས་ན། །འཆི་བདག་བདུད་ཀྱི་བགེགས་ནི་གདོན་ངོ་མཐོ། །མ་རིག་དུག་གསུམ་གཏན་གྱི་ནད་གཞི་ཆེ། །མི་རྟག་འཆི་བའི་ནད་ཀྱིས་ཟིན་པ་ལ། །འཚོ་བྱེད་གཞོན་ནུའི་སྨན་གྱིས་ཅང་ཕན་ནམ། །བདུད་ཀྱི་ཞགས་པ་ནག་པོས་ཟིན་པ་ལ། །མོ་བོན་ལྟོ་དཔྱད་རིམ་གྲོས་ཅང་ཕན་ནམ། །དབང་མེད་དུས་ཀྱིས་རྒྱས་འདེབས་བྱེད་པ་ལ། །གཉེན་བཤེས་ཉེ་དུས་བསྐོར་བས་ཅང་ཕན་ནམ། །རྟག་པ་མ་ལགས་ཀུན་ཀྱང་མི་རྟག་སྟེ། །རྟག་ཏུ་བཏུབ་ན་སངས་རྒྱས་སྐུ་འདི་དག །ཡོད་པ་མ་ལགས་ཀུན་ཀྱང་མེད་པ་སྟེ། །ཡོད་དུ་བཏུབ་ན་རྣམ་ཤེས་སེམས་འདི་ཡོད། །བདེན་པ་མ་ལགས་ཀུན་ཀྱང་བརྫུན་པ་སྟེ། །བདེན་དུ་བཏུབ་ན་དམ་པའི་ཆོས་འདི་བདེན། །ངེས་པ་མ་ལགས་ཀུན་ཀྱང་མ་ངེས་ཏེ། །ངེས་སུ་བཏུབ་ན་དགེ་སྡིག་རྒྱུ་འབྲས་ངེས། །འདོད་ཆགས་ཞེ་སྡང་མ་རིག་དེ་དག་ལས། །མི་ཤེས་གཏི་མུག་གཉིད་ནི་མ་ཆེ་བར། །དགེ་བ་བཅུ་ཡི་མེལ་ཚེ་འབད་ལ་མཛོད། །མ་རིག་གཉིད་ལས་སངས་པའི་དུས་བྱུང་ན། །ཡང་དག་བདེན་པའི་ནམ་ཞིག་ལངས་ཙ་ན། །མཐོ་དམན་མཁའ་ལ་ཉི་ཤར་ཇི་བཞིན་དུ། །འགྲོ་མགོན་སངས་རྒྱས་དེ་དང་ཕྲད་པར་མཛོད། །ཅེས་བྱ་བའི་ཚིགས་སུ་བཅད་པ་བཅོ་བརྒྱད་དང༌། གང་གི་དྲིན་གྱིས་བདག་བློ་རྒྱས་མཛད་པའི། །བླ་མ་དམ་པ་རྣམས་ཀྱི་ཞབས་ལ་འདུད། །གཏིང་མཐའ་མེད་པའི་འཁོར་བའི་རྒྱ་མཚོ་འདིར། །དེ་སྔ་ཕན་ཆད་ཇི་ཙམ་པ་ཞིག་འཁྱམས། །ད་ཡང་ཇི་ཙམ་པ་ཞིག་འཁྱམ་དགོས་པས། །བླ་མ་དམ་པའི་གདམས་ངག་ཐོས་བསམ་བྱ། །དེ་ལས་ཐར་པའི་དུས་ནི་ད་རེས་ཡིན། །གློ་བུར་བར་དུ་གཅོད་པ་མ་བྱུང་ཡང༌། །ཚེ་ལ་ལོང་མེད་ཡུན་རིང་མི་སྡོད་ངེས། །འཇིག་རྟེན་འདི་ཡི་བྱ་བ་རྒྱབ་ཏུ་བོར། །འདི་དང་ཕྱི་མ་གཉིས་ཀ་མི་འགྲུབ་ཀྱི། །ཕྱི་མ་གལ་ཆེ་ཆོས་ལ་འབད་པ་སྐྱེད། །གཉིད་དང་སྙོམ་ལས་དབང་དུ་མ་གཏང་བར། །སྟོང་པ་སྙིང་རྗེས་ཟིན་པ་རྩེ་གཅིག་སྒོམས། །ཚེ་ལ་ལོང་མིན་འཆི་བདག་ཕོ་ཉས་སླེབ། །བྱ་བ་ཐམས་ཅད་བྱེད་འཕྲོ་བཏང་ནས་ནི། །རང་བཞིན་མཉམ་པ་ཉིད་ལ་བློ་བཞག་ནས། །ཆོས་ཉིད་རྣམ་དག་འདི་ལ་ལྟ་བ་བྱ། །མི་རྟོག་བདེ་གསལ་འདི་ལ་བསྒོམ་པ་བྱ། །མ་བཅོས་རང་བཞིན་འདི་ལ་སྤྱོད་པ་བྱ། །སྐུ་བཞི་ཡེ་ཤེས་ལྔ་ལ་འབྲས་བུ་བྱ། །ལྟ་སྒོམ་སྤྱོད་པ་འབྲས་བུ་རྣམ་པ་བཞི། །སོ་སོ་ཐ་དད་མེད་པའི་ལམ་དུ་སེམས། །ལྟ་བ་སྟོང་ཉིད་སྒོམ་ཞེས་ཁས་བླངས་ནས། །སྤྱོད་པ་དངོས་པོར་འཛིན་ལས་མ་གྲོལ་ན། །ལྟ་སྤྱོད་འཛོལ་ཏེ་ལོག་པའི་ལམ་དུ་འགྲོ། །རང་གི་རང་བསླུས་གཞན་གྱིས་ཞེ་ཡང་ཁྲེལ། །ཆགས་སྡང་སྐྱེ་བའི་གྲོགས་ངན་ཐབས་ཀྱིས་སྤོངས། །དེར་ཡང་ཀུན་དང་འདྲིས་པར་མི་བྱའོ། །ཆགས་ན་ལྷ་ལ་ཆགས་ཀྱང་མི་གྲོལ་ཏེ།།ཞེན་ན་ཆོས་ལ་ཞེན་ཡང་འཆང་བའི་རྒྱུ། །ཕྱུག་པོ་གསེར་སྲང་སྟོང་ལ་ཆགས་པ་དང༌། །དབུལ་པོ་ཁབ་སྐུད་ཙམ་ལ་ཆགས་པ་གཉིས། །ཐར་པའི་བར་དུ་གཅོད་ལ་ཁྱད་པར་མེད། །དེས་ན་ཅི་ལའང་ཞེན་ཆགས་མེད་པར་བྱ། །འཁྲུལ་པའི་རྟོག་པ་མ་ཞིག་བར་དུ་ནི། །དད་པས་བླ་མ་དག་དང་དཀོན་མཆོག་མཆོད། །ཡི་དམ་ལྷ་ལ་གསོལ་བ་རྒྱུན་དུ་ཐོབ། །ལུས་ངག་ཡིད་གསུམ་དགེ་བ་ནུས་ཚད་ཀྱིས། །བསམ་དུ་མེད་པའི་ཆོས་ཉིད་དོན་བསྒོམས་ལ། །འགྲོ་བ་རྣམས་ལ་སྙིང་རྗེ་རྒྱུན་དུ་སྐྱེད། །སྟོང་པ་ཉིད་དང་སྙིང་རྗེ་དབྱེར་མེད་པ། །སྒོམ་པ་གོལ་ས་མེད་པའི་ལམ་ཡིན་གསུངས། །ཚེ་ལ་ལོང་མེད་ཡུན་རིང་མི་སྡོད་ངེས། །འཇིག་རྟེན་ལྟོ་རྒྱབ་འགྲངས་ཀྱང་ཕྱིད་དེ་མཆིས། །ཆོས་དང་མཐུན་ན་ལྟོགས་རིར་ཤི་དོགས་མེད། །འཇིག་རྟེན་འདི་ཡི་བྱ་བ་རྒྱབ་ཏུ་བོར། །འདི་དང་ཕྱི་མ་གཉིས་ཀ་མི་འགྲུབ་ཀྱི། །ཕྱི་མ་གལ་ཆེ་ཆོས་ལ་འབད་པ་ཐོན། །གཉིད་དང་སྙོམ་ལས་དབང་དུ་མ་བཏང་བར། །སྟོང་པ་སྙིང་རྗེའི་སྙིང་པོ་རྩེ་གཅིག་སྒོམས། །ཕུང་པོ་ཉམས་པས་ལུས་ངག་མཐུ་ཉམས་ཀྱང༌། །ཡིད་ལ་ཅིས་ཀྱང་གདུང་བར་མི་བྱ་འོ། །ད་ནི་ལེ་ལོའི་གླགས་མེད་རིང་མི་སྡོད། །ཉིན་མཚན་གཉིས་ཀྱིས་ཚེ་འཛད་དགེ་མྱུར་མཛད༌། །འཆི་ཁར་འགྱོད་པས་མི་ཕན་ད་ལྟ་འབད། །དངོས་པོ་ཅིས་ཀྱང་བྱར་མེད་གདམས་ངག་སྒོམས། །དྲན་སྣང་ཐམས་ཅད་སྐྱེ་མེད་རྒྱས་བཏབ་ཅིང༌། །བྱེད་སྤྱོད་ཐམས་ཅད་སྒྱུ་མ་ལྟ་བུར་བྱ། །བདེ་སྡུག་ཐམས་ཅད་མཉམ་པ་ཉིད་དུ་བསླབ། །ཉེས་ལྟུང་ཕྲ་མོ་ཙམ་ཡང་ཕྱིར་བཅོལ་བྱ། །དེང་ནས་སྐྱེ་བ་འདི་ཡི་འོག་རོལ་ཏུ། །སྡོམ་པ་གསུམ་དང་ལྡན་པའི་རྟེན་ཞིག་གིས། །ཕྱག་རྒྱ་ཆེན་པོའི་དངོས་གྲུབ་ཐོབ་འགྱུར་བར། །སྨོན་ལམ་གདབ་ཅིག་དེ་ཡི་རྒྱུ་ལ་འབད། །ལུས་ངག་བྱ་བྱེད་མང་ན་སེམས་རྗེས་འབྲང༌། །གཉུག་མའི་སེམས་འདི་བཅོས་མས་མི་བསླད་ཅིང༌། །སྡིག་དང་སྡུག་བསྔལ་འཕེལ་བའི་ལམ་བོར་ལ། །མཁའ་ལ་བྱ་སོང་བཞིན་དུ་རྗེས་མེད་བྱ། །ཅི་འདྲས་མི་སྡུག་བྱས་པའི་ལན་མི་བླན། །ཤེས་མཐུན་རྟོག་པ་བསྡུར་ན་དྲང་པོར་སྨྲ། །མདོར་ན་ཆོས་ཉིད་རྟོགས་པའི་ཕྱི་རྟགས་སུ། །བརྙས་པ་བྱུང་ཡང་ཀོ་ལོང་མི་བྱ་ཞིང༌། །ཚིག་ངན་སྨྲས་ཀྱང་ཁྲོ་བར་མི་བྱ་ལ། །ཁྱད་གསོད་བྱས་ཀྱང་ང་རྒྱལ་མི་སྐྱེད་དོ། །འགལ་བ་ཇི་ལྟར་བྱུང་ཡང་འདི་བསམ་སྟེ། །འཁྲུལ་པས་བཅིངས་པའི་སེམས་ཅན་སྙིང་རེ་རྗེ། །སྐྱེ་མེད་ཆོས་ལ་བདག་དང་གཞན་བཟུང་བ། །འདི་ལ་དངོས་པོ་ཅི་ཡང་མེད་དོ་ཞེས། །ཆོས་དབྱིངས་ཉིད་དུ་ངེས་པར་བསམ་པར་བྱ། །དེ་ལྟར་ད་ལྟ་ཉིད་ནས་གོམས་བྱས་ན། །ཀློང་དུ་གྱུར་ཚེ་ཅིས་ཀྱང་གནོད་མི་ནུས། །རྫས་དང་ལོངས་སྤྱོད་ཆེ་ཆུང་ཅི་ཡོད་ཀྱང༌། །རང་དབང་ཡོད་ཚེ་ཕྲལ་བསྔོ་ཕྲལ་སྤྱད་བྱ། །ཁ་ཅི་ན་རེ་འཆི་ཁར་དགོས་ཟེར་ཏེ། །འཆི་དུས་འབྱུང་བའི་ནད་ཀྱིས་བཏབ་པ་ལ། །ནད་གཡོག་མང་བས་སྡུག་བསྔལ་བགོ་ཐབས་མེད། །གཡོག་མེད་སྡུག་བསྔལ་འགྲོགས་ནས་ཁྱེར་བ་མེད། །དེས་ན་ནད་གཡོག་ཡོད་མེད་གཉིས་ཀ་འདྲ། །ཤི་བའི་རོ་དེ་ཙན་དན་མེར་བསྲེགས་སམ། །ཆུ་བོར་དོང་བསྐྱུར་བྱ་ཁྱིས་ཟོས་པར་མཉམ། །ཤུལ་དུ་གཏམ་སྙན་གཏམ་ངན་ཅི་བྱུང་ཡང༌། །བདག་གི་རྗེས་སུ་འབྲངས་ནས་མི་འོང་སྟེ། །གསོན་ཚེ་དགེ་སྡིག་གཉིས་པོ་གང་བྱས་པའི། །འབྲས་བུ་དེ་ཡི་དུས་སུ་འབྱུང་བར་འགྱུར། །རྣལ་འབྱོར་པ་ཡི་འཆི་ལུགས་རྣམ་པ་གསུམ། །སྨྱོན་པ་ལྟ་བུར་ཤི་བ་རབ་ཡིན་ཏེ། །རི་དྭགས་ལྟ་བུར་ཤི་བ་འབྲིང་ཡིན་ནོ །།རྒྱལ་པོ་ལྟ་བུར་ཤི་བ་ཐ་མ་ཡིན། །དེས་ན་ཤུལ་དུ་ལུས་པ་མེད་པར་བྱ། །འདོད་ཆུང་ཆོག་ཤེས་ང་རྒྱལ་མེད་པ་དང༌། །གཞན་དང་འབྲེལ་བསྐྱུངས་རང་ལ་ངན་ཤོས་བྱ། །དམན་ས་བཟུང་ན་སླར་ཡང་གཞན་དག་དང༌། །རང་ཡང་ཉོན་མོངས་མི་གསོག་དགེ་སྦྱོར་འཕེལ། །དེས་ན་ཅི་ལའང་ཁེང་དྲེགས་མི་བྱ་འོ། །དེ་ཕྱིར་བྱང་ཆུབ་སེམས་ནི་རྟག་ཏུ་སྦྱོངས། །ཆོས་ཀྱི་དབྱིངས་ནི་གཉིས་མེད་རྣམ་དག་ལས། །བྱང་ཆུབ་ཅེས་ནི་དེ་ལ་བརྗོད་པ་ཡིན། །དེ་དོན་སེམས་པར་བྱེད་པའི་སེམས་དཔའ་ནི། །དེ་ནི་བྱང་ཆུབ་སེམས་དཔའ་ཞེས་བྱ་སྟེ། །བྱང་ཆུབ་དང་ནི་སེམས་ལ་གཉིས་མེད་སྤྱོད། །གང་ཞིག་དེ་རྟོགས་འདོད་པའི་སྐྱེས་བུ་ནི། །དེ་ནི་བྱང་ཆུབ་སེམས་དཔའ་ཞེས་བྱ་འོ། །དེས་ན་དམ་པ་རྣམས་ཀྱི་རྗེས་སུ་བསླབ། །མར་མེ་ཆུང་ངུ་རླུང་གིས་གསོད་པར་བྱེད། །ནགས་ཚལ་མེ་ལ་རླུང་གིས་གྲོགས་ཀྱང་བྱེད། །དེ་ཕྱིར་དང་པོར་རྐྱེན་ངན་དག་ལ་བྱོལ། །བརྟན་པ་ཐོབ་ནས་ཐམས་ཅད་གྲོགས་སུ་འགྱུར། །ཉམ་ཆུང་རྣམས་ལ་རྐྱེན་ངན་གནོད་པ་ཆེ། །དེ་ལ་གཅིག་པུར་གནས་ཤིང་འདུ་འཛི་སྤང༌། །ཚེ་འདིའི་ལྟོ་རྒྱབ་ཇི་ལྟར་བྱས་ཀྱང་ཕྱིད། །ཚེ་རབས་ཕྱི་མ་ཆོས་དང་ཕྲད་པར་དཀའ། །དེ་བས་ཚེ་འདིར་ཆོས་ལ་འབད་པར་གྱིས། །ད་ལྟ་དགེ་བའི་ལས་ལ་མ་འབད་ན། །ཕྱི་མར་སྡུག་བསྔལ་མྱོང་བར་འགྱུར་ཏ་རེ། །བླ་མ་དམ་པ་རྣམས་ཀྱི་མན་ངག་གིས། །གཞུང་ལུགས་རྣམས་ནི་ཉམས་སུ་བླང་བར་བྱ། །

              ཞེས་བྱ་བའི་བར་གྱི་ཚིགས་སུ་བཅད་པའི་གདམས་པ་དང༌། ཁོ་འགྱུར་གྱི་དོགས་ནས་ཐུགས་དམ་འཇམ་པའི་རྡོ་རྗེ་ཡང་དེའི་དུས་སུ་བསྐུར་ནས་ང་ཇོ་བོ་དང་ཤི་འབྲེལ་བྱེད། དེ་ནས་ཚེ་ལ་བར་ཆད་མ་བྱུང་ན་ཁྱོད་ཀྱི་མཆོད་གནས་ངས་བྱེད་པ་ཡིན་བྱ་བའི་ཞལ་འཕྲིན་ཡང་བསྐུར་བར་མཛད།

                                                                                                                         རྩོམ་སྒྲིག་པ། མང་ར་བ།
            གསལ་འདེབས། 
                        རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                        དྲ་བའི་སྦྲེལ་ཐགhttp://www.tb1025.cn