དེ་ནས་གཙང་ལ་སྟོད་ལྡོག་གི་ཚ་སྣ་བྱ་བར་དོ་ཧ་རྡོ་རྗེའི་མགུར་གསུངས་པས་འབྲོམ་རིན་པོ་ཆེས་བོད་དུ་འདི་མི་ལེགས། བསྐལ་པ་སྙིགས་པས་སྡོམ་པ་བསྲུང་བ་དང་ཚོགས་གསོག་པ་མི་མཆི། ལས་རྒྱུ་འབྲས་ལ་སོགས་པ་བསྟན་པ་སྤྱི་ལ་ཕན་པའི་ཆོས་གསུང་བར་ཞུས་པས། ཨ་ཏི་ཤ་ཡང་ཤིན་ཏུ་མཉེས་ཏེ། སེམས་ཅན་ཆེན་པོ་ཁྱེད་ལྟ་བུ་བོད་ན་བཞུགས་པ་བོད་བསོད་ནམས་ཆེ་ཡི། ཁོ་བོས་ཁྱོད་རྒྱ་གར་དུ་ཐོས་ན་བོད་དུ་འོང་མི་དགོས་པ་འདུག་པ་ལ་གསུངས། སྣེའུ་ཟུར་པའི་ཞལ་ནས།འུ་ཅག་ཡིན་ན་གཞན་སུ་ལའང་མེད་པའི་ཆོས་ཤིག་ཁོ་ན་ཞུ། དགེ་བཤེས་སྟོན་པ་དེ་ཐུགས་དགོངས་ཤིན་ཏུ་བཟང་པས་བོད་སྤྱི་ལ་ཕན་ཆེ་བའི་ཆོས་ཤིག་ཁོ་ན་ཞུ་བར་ལགས་པར་གདའ་གསུངས། དེ་ནས་གཙང་རོང་ན་མར་བྱོན་ཙ་ན་ཁང་པ་དོག་པས་གནས་ཁང་འདོད་རིགས་མ་རྙེད་པ་ལ་འབྲོམ་རིན་པོ་ཆེས་ཇོ་བོ་ཕྱིར་བཞུགས་སུ་བཅུག་ནས་དེའི་བར་དུ་ཁང་པའི་གད་བདར་བྱས། ཇོ་བོའི་དབུ་སྔས་སུ་མཎྜལ་ཞིག་ཀྱང་ཚང་པར་བྱས་འདུག་པས་ཇོ་བོའི་ཞལ་ནས། ང་ལ་སློབ་མ་ཁྱོད་འདྲ་བ་གཅིག་རྒྱ་གར་ནའང་ཡོད་གསུངས། པོ་ཏོ་བའི་ཞལ་ནས་དོན་ལ་མེད། ཡོད་ན་ཁ་སྐད་འདྲ་བ་འོང་ཐང་བ་ལ་གསུངས་སོ། །

              ཡང་ལན་ཅིག་གི་ཚེ་ཇོ་བོས་བྱིས་པ་ལྟར་མཛད་ནས་ནང་གི་གནས་རྣམས་ཕྱི་ས་ཆུང་ངུ་རེས་བཀང་བས་དེ་རྣམས་འབྲོམ་རིན་པོ་ཆེས་ལེགས་པར་ཕྱགས། སྐུའི་སྤྱོད་པ་ལ་མ་དད་པ་མ་སྐྱེས་པས་བྱ་རྒོད་ཀྱི་ཉིན་ལམ་བཅོ་བརྒྱད་ཀྱི་བར་གྱི་གཞན་གྱི་སེམས་ཤེས་པའི་མངོན་པར་ཤེས་པ་སྐྱེས་གསུངས། དེ་ནས་ཇོ་བོ་རྗེ་ཁུ་སྟོན་གྱིས་ཡར་ཀླུངས་སུ་སྤྱན་དྲངས་ཏེ་ཐང་པོ་ཆེར་ཕེབས། འབྲོམ་རིན་པོ་ཆེས་ཐང་པོ་ཆེར་མ་ཕེབས་པར་སྙེ་ཐང་དུ་ཕེབས་ནས་བང་སྟོན་སར་བྱོན་ཏེ་ད་ལྟ་ནི་ཇོ་བོ་ཁུས་སྤྱན་དྲངས་ནས་ཕེབས་ཁུས་ཞབས་ཏོག་འོ་མི་བརྒྱལ་བ་མི་འོང༌། དེ་ཙ་ན་ཇོ་བོའི་བཞུགས་ས་ཞིག་དགོས་པས་ཁྱེད་ཀྱིས་སྙེ་ཐང་འདིར་བཞུགས་ས་བྱེད། ངས་ཐབས་མཁས་ཀྱིས་ཇོ་བོ་བསམ་ཡས་སུ་གདན་དྲངས་ཀྱིས། དེ་ཙ་ན་ཁྱེད་ཀྱིས་རྟ་པ་ཉིས་བརྒྱའི་ཞལ་མཐོང་དང་བཅས་པའི་བསུ་བ་གྱིས་ཤིག་གསུངས་པས་ཁོང་གིས་གྱིས་བཞེས་སོ། །དེ་ནས་འབྲོམ་རིན་པོ་ཆེས་ཇོ་བོའི་སྤྱན་སྔར་འགྲོ་དགོངས་ནས་ཡར་ཀླུངས་ནས་ཡར་བྱོན་པ་དང་ཐང་པོ་ཆེ་བའི་མི་ཞིག་ན་རེ། ཁྱོད་གར་འགྲོ་ཟེར། ཐང་པོ་ཆེར་འགྲོ་གསུངས་པས། སྨ་ཕབ་པར་འོང་ཟེར། ཇོ་བོ་དང་མཇལ་ན་སྨ་ཕབ་ནའང་ཕབ་སྙམ་པ་ཞིག་བྱུང་གསུངས། དེ་ནས་བནྡེ་ཞིག་ལ་ཇོ་བོའི་གཟིམ་ཁང་ག་ན་ཡོད་དྲིས་པས།སྟོན་དུ་མ་བཏུབ་པ་ལ་ཇོ་བོའི་སློབ་མ་ཨ་ཙ་ར་ཞིག་བྱུང་བས་ངོ་ཤེས་ནས་འབྲོམ་རིན་པོ་ཆེའི་རྩར་རྒྱུགས་བྱུང༌། དེས་ནང་དུ་ཁྲིད་ནས་ཇོ་བོ་དང་མཇལ་བས་ཡུན་ཟླ་བ་གཅིག་ལས་མ་ལོན་པ་ལ་འོ་ཤིན་ཏུ་བརྒྱལ་བར་བྱས་ནས་གདའ། དེར་ཇོ་བོའི་ཞལ་ནས།ཨུ་པ་སི་ཀ་ཆེན་པོ། ང་རང་དང་པོ་གང་ནས་འོངས་པའི་སར་སྐྱོལ། བཀའ་འཁོར་འདི་ཀུན་ཡང་འོ་བརྒྱལ། རྟ་ཁལ་འདི་ཀུན་ཀྱང་མ་རྒན་ཡིན། ཁུ་སྟོན་ནི་འཁོར་ལོས་བསྒྱུར་བའི་རྒྱལ་པོ་ལྟ་བུ། ཁོ་བོ་ནི་དམངས་ཕལ་པ་ལྟ་བུ། ཁུ་སྟོན་ནི་སུམ་ཅུ་རྩ་གསུམ་གྱི་ལོངས་སྤྱོད་དང་ལྡན་པ་ལྟ་བུ། ཁོ་བོ་ནི་པྲེ་ཏ་བུ་རིའི་གྲོང་ཁྱེར་ན་གནས་པ་ལྟ་བུ་བྱུང་གསུངས་པ་ལ། འབྲོམ་རིན་པོ་ཆེས་བདག་གིས་ཇོ་བོའི་བཞུགས་གནས་སྙེ་ཐང་ཟེར་བ། དབྱར་བསིལ་ལ་དགུན་དྲོ་བ། ནགས་ཚལ་དང་ནེའུ་གསིང་ཡོད་པ། དགུན་ཡང་མེ་ཏོག་སྐྱེ་བ་ཞིག་བཙལ་བདོག་ཞུས་པས། ཨུ་པ་སི་ཀ་ད་ལྟ་རང་གཤེགས་གསུངས་པ་ལ། ཁུ་ཡང་དབང་ཆེ་བས་ཁད་ལ་ཐབས་མཁས་བྱེད་དགོས་ཞུས་པས། ཁུ་སྟོན་གྱིས་མི་ཚོར་བའི་ཐབས་ང་རང་གི་བྱེད་གསུངས་ནས། དེའི་ནུབ་མོ་གྲུ་བསྡོགས་བྱས་ཏེ་ནམ་ལངས་པ་དང་ལམ་དུ་ཆུད་པར་བྱས་ནས་གཤེགས་པ་བནྡེ་མོ་ཞིག་གིས་མཐོང་ནས་ཁུ་སྟོན་ལ་བྱ་གཏོང་དུ་ཕྱིན།

              དེ་ནས་ཇོ་བོ་དཔོན་གཡོག་གིས་མྱང་པོའི་གྲུ་ལ་བྱོན། འབྲོམ་རིན་པོ་ཆེའི་ཞལ་ནས་མཉན་པ་ལ་སྔོན་ལ་ང་སྒྲོལ་ཅིག་ད་ལྟ་རང་རྡུང་གཏག་ཐམས་ཅད་ང་ལ་འོང་གསུངས་པས་མཉན་པས་སྔོན་ལ་བསྒྲལ། དེའི་ནུབ་མོ་འབྲོམ་རིན་པོ་ཆེ་དཔོན་གཡོག་གིས་འོན་དུ་མ་བཞུགས་པར་ཀ་ཆུར་ཕེབས། ཇོ་བོ་དཔོན་གཡོག་སྒྲོལ་གྱིན་ཡོད་ཙ་ན་དགེ་བཤེས་ཁུ་ཨ་ཏི་ཤ་ཟེར་ཅིང་རྒྱུགས་བྱུང་བ་གཟིགས་པས་ཇོ་བོའི་ཞལ་ནས་མཁས་པ་ཆེན་པོ་བྱོན། གྲུ་ཕྱིར་ཐེན་ཅིག་གསུངས་ནས་བཞུགས་པ་དང་ཁུ་ཡུས་ཆེ་བས་ཆིབས་པ་ཐལ་ནས་ཆུ་ནང་དུ་དེའུ་གྲོངས་བྱུང༌། དེར་ཁུ་སྟོན་གྱིས་ཇོ་བོ་ལ་ལྡོག་པར་ཞུ་བ་ཕུལ་ཡང་མ་གནང་བར་དབུ་ཞྭ་ཕྱིར་འཕངས་ཏེ་བྱིན་རླབས་ཀྱི་རྟེན་དུ་གནང༌།

                                                                                                                                    རྩོམ་སྒྲིག་པ། མང་ར་བ།
             གསལ་འདེབས། 
                       རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                        དྲ་བའི་སྦྲེལ་ཐགhttp://www.tb1025.cn