གཞན་ཡང་བདག་གིས་དགྲར་རྟེན་སྔགས་དང་འཁྲུལ་པའི་རྒྱུ་གཞན་གྱིས། །ཚུལ་ཁྲིམས་ཉམས་སོགས་ཉེས་མཐོང་དེའི་ཕྱིར་བདག་གི་ཕན་བསམ་སྤྲིངས། །མོས་པ་སྣ་ཚོགས་མཆིས་པས་འདི་ལ་མི་དགེ་གང༌། །རང་འདོད་གཙོ་བོར་མ་འཛིན་ཐུགས་གཞིགས་གཟོད་པར་མཛོད། །དོན་ལྡན་ཡོན་ཏན་བརྗོད་པའི་མཚན་གྱི་སྔོན་འགྲོ་བ། །ཤཱཀྱའི་དགེ་སློང་དགེ་འདུན་རྣམས་ཀྱི་སྤྱན་ལམ་དུ། །ཀུན་ལ་ཕན་བསམ་དགེ་བས་ཡི་གེ་འདི་བསྡེབས་པའི། །དགེ་བས་དགོངས་གྲུབ་ལེགས་པའི་དཔལ་འབྱུང་དོན་ལྡན་ཆེར་རྒྱས་སྨོན། །བྱ་བའི་ཆབ་ཤོག་དབང་ཕྱུག་མགོན་ལ་བརྫངས་ནས་དགེ་བཤེས་ཀ་བའི་ཕྱག་ཏུ་གཏད་དོ། །དེ་ནས་འབྲོམ་རིན་པོ་ཆེས་དཔོན་གཡོག་གཤེགས་པའི་ཕྱག་ཕྱིར་བྱོན་ཏེ་བོད་སྟོན་རྣམས་འབྱོན་དུ་རེ་ནས་ཅི་འགོར་མཛད། ལོ་ཙཱ་བས་ཕར་ལ་ཅི་མགྱོགས་མཛད་དོ། །དེར་བོད་སྟོན་རྣམས་མ་སླེབ་པར་ཇོ་བོ་དཔོན་གཡོག་མང་ཡུལ་སྐྱིད་གྲོང་དུ་ཕེབས། དེ་ནས་བལ་པོ་རྫོང་རྒྱུད་དེ་རྒྱ་གར་དུ་ཕེབས་པར་ཆས་པ་ལྟར་མཛད་པ་ན་ས་མན་སྡེ་གསུམ་བྱ་བའི་འཁྲུག་པ་ལངས་ནས་བལ་པོ་རྫོང་འགགས་པས་མ་ཐོན། དེ་བོད་ཀྱི་བསོད་ནམས་སུ་བྱུང་བ་ལགས། དེར་དགེ་བཤེས་ལོ་ཙཱ་བ་དེ་ཐུགས་ཤིན་ཏུ་མ་བདེ་བ་ཇོ་བོའི་ཞལ་ནས། ཁྱོད་བློ་མི་བདེ་བ་མི་དགོས། སྒྲུབ་པར་མ་ནུས་པ་ལ་ཉེས་པ་གཏན་མེད་པ་ཡིན་གསུངས། དེར་ལོ་ཙཱ་དགྱེས་ཏེ་ད་འོ་ན་བོད་དུ་འབྱོན་པར་ཞུ་ཟེར་ནས་བོད་དུ་སྤྱན་དྲངས་སོ། །

              དེའི་དུས་སུ་གསེར་ཀོ་གཏུམ་ཞིག་དང་ལམ་སྒྲོན་ཇོ་བོའི་ཕྱག་བྲིས་ཡིན་པ་ཞིག་པུ་རངས་པའི་བནྡེ་གཉིས་ལ་བསྐུར་ནས་གསེར་འདི་སློབ་དཔོན་གནས་བརྟན་ལ་ཕུལ་ལ་ད་རེས་ཇོ་བོ་གདན་དྲངས་པ་ཡིན་ཏེ་བལ་པོའི་ལམ་འགགས་ནས་ཕྱིར་ལོག །ད་སྤྱན་དྲོངས་གསུངས་ན་ཡང་སྤྱན་འདྲེན། ཇོ་བོ་ཡང་བོད་ལ་མཉེས་ཤིང་འགྲོ་དོན་ཡང་ཆེན་པོ་འདུག་པས་བཞུགས་ཆོག་གམ་བྱ་བ་དང༌། བསྟན་བཅོས་འདི་བི་ཀ་མ་ལ་ཤཱི་ལའི་པཎྜི་ཏ་རྣམས་ལ་གཟིགས་སུ་ཕུལ་ཅིག་པའི་འཕྲིན་བསྐུར་བཏང་བས་གཉིས་པོས་ཀྱང་ལམ་ལ་ཉེ་ཞོ་མེད་པར་བི་ཀ་མ་ལ་ཤཱི་ལར་སླེབ་སྟེ་གནས་བརྟན་དཀོན་མཆོག་འབྱུང་གནས་ལ་གསེར་རྣམས་ཕུལ། ཇོ་བོའི་ལོ་རྒྱུས་དང་ལོ་ཙཱ་བའི་འཕྲིན་རྒྱས་པར་གསོལ། བསྟན་བཅོས་དེ་པཎྜི་ཏ་རྣམས་ལ་གཟིགས་སུ་ཕུལ་བས་ནན་ཏར་མཉེས་ནས་བསྟན་བཅོས་འདི་ལེགས། ཡི་གེ་ཕྱག་བྲིས་མ་ནོར་བར་འདུག་གསུངས་ཏེ་རྒྱལ་མཚན་གྱི་རྩེ་ལ་བཏགས་ནས་ཞག་ཉི་ཤུ་རྩ་གཅིག་ཏུ་མཆོད་པ་རྒྱ་ཆེན་པོ་མཛད། དེར་གནས་བརྟན་གྱི་ཞལ་ནས་ཇོ་བོ་འབྱོན་དུ་རེ་བ་ཡིན་ཏེ་ཆོས་འདི་ཕེབས་པས་ཇོ་བོ་དང་ཁྱད་མེད། དེ་ཇོ་བོ་བོད་ན་འགྲོ་དོན་ཆེ་བ་དེ་ལྷག་པར་དགའ། ཇོ་བོ་བོད་ལ་དང་པོ་ནས་ཉེས་པ་ང་རང་ལ་རྒྱུས་ཡོད། ད་སྐུ་ན་སོ་བྱོན་པས་བཤུལ་ཐག་རིང་པོ་ལ་ཚུར་སྤྱན་མ་དྲངས་བར་བསྟན་བཅོས་འདི་ལ་འགྲེལ་པ་ཞིག་མཛད་ནས་བསྐུར་བ་ཞུ་གསུངས་ནས་གཉིས་པོ་ཚུར་བཏང༌། ཁོང་གཉིས་པོས་ཀྱང་ཚུར་འཁོར་ནས་ཇོ་བོ་དཔོན་གཡོག་ལ་ཞུ་འཕྲིན་སྙན་དུ་གསོལ་བས་ནན་ཏར་མཉེས་ཤིང༌། ཁྱད་པར་ལོ་ཙཱ་བའི་ཞལ་ནས་སློབ་དཔོན་གནས་བརྟན་གྱིས་རི་བས་ཀྱང་ལྕི་བའི་ཁུར་གཅིག་བསྐུར་བ་དེ་ད་སངས་ཀྱིས་སོང་གསུངས། ཇོ་བོས་ཀྱང་དེ་འཕྲལ་དུ་འགྲེལ་པའི་དབུ་བཙུགས་ནས་དཀའ་འགྲེལ་ཞིག་མཛད་དེ་སླར་ཁོང་གཉིས་པོ་ལ་བསྐུར་བས་པཎྜི་ཏ་རྣམས་ཀྱིས་ཉིན་ལམ་མང་པོ་ནས་བསུ་བ་བྱས། རྒྱལ་མཚན་གྱི་རྩེར་བཏགས་ནས་མཆོད་པ་ཆེན་པོ་མཛད་དོ། །

              དེ་ཡང༌། དེང་སང་བསྟན་འགྱུར་ནང་ན་ལམ་སྒྲོན་རང་འགྲེལ་ཞེས་གྲགས་པ་འདི་ལ་ཇོ་བོས་མཛད་ངེས་པ་དང༌། ཇོ་བོས་མ་མཛད་པར་གཞན་གྱི་གསར་དུ་བསྣན་པའི་ཆ་གཉིས་ཡོད་དེ་རྒྱ་གར་གྱི་པཎྜི་ཏ་རྣམས་ཀྱིས་བསྐུལ་བ་ལྟར་ཇོ་བོས་ལམ་སྒྲོན་ལ་རང་འགྲེལ་མདོར་བསྡུས་ཤིག་མཛད་ནས་རྒྱ་གར་དུ་བརྫངས། དེ་ལ་ཇོ་བོའི་སློབ་མ་བོད་སྟོན་མཁས་པ་འགའ་ཞིག་གིས་ཇོ་བོའི་གསུང་སྒྲོས་ལ་གཞི་བླངས་པའི་བཤད་པ་རེ་མང་ཞིག་བསྣན་པར་སྣང་སྟེ།དེ་ལ་ལེགས་པར་བཤད་པའང་མང་དུ་བྱུང་མོད་ཀྱི་ནོར་བར་མངོན་པ་འགའ་ཞིག་ཀྱང་བྱུང་ངོ་ཞེས་རྗེ་བདག་ཉིད་ཆེན་པོས་གསུངས་སོ། །དེ་ལྟར་བླ་མ་རྗེ་བཙུན་ཆེན་པོ་འདིས་རྒྱ་གར་དུ་བཞུད་པ་བཞིན་དུ་མཛད། ལོ་ཙཱ་བས་སྐྱེལ་བ་བཞིན་མཛད་ཀྱང་བོད་རང་དུ་བཞུགས་པའི་རྒྱུ་མཚན་ནི་དང་པོ་ནས་ངེས་པ་ཡིན་ཏེ།ཁྱོད་སྔོན་སོ་མ་པུ་རི་ན། །རྟོག་གེ་འབར་བ་གསུངས་པའི་ཚེ། །ད་ནི་ལོ་ནི་ཉི་ཤུ་ན། །ཚེ་ཡི་འདུ་བྱེད་གཏོང་ཞེས་གསུངས། །དེ་ནས་ལོ་གཉིས་ལོན་པ་ན། །བོད་དུ་འབྱོན་ཁའི་དུས་སུ་ནི། །བི་ཀ་མ་ལ་ཤཱི་ལར་ནི། །ད་ནི་ལོ་ནི་བཅོ་བརྒྱད་ན། །ཚེ་ཡི་འདུ་བྱེད་བཏང་ནས་སུ། །ལུས་འདི་བོད་དུ་འཇོག་གོ་གསུངས། །ཇི་སྐད་གསུང་བཞིན་མ་འཁྲུལ་པར། །བྱུང་བ་དེ་ནི་ངོ་མཚར་ཆེ། །ཞེས་གསུངས་པ་ལྟར་རོ། །དགེ་བའི་བཤེས་གཉེན་ཤ་ར་བའི་ཞལ་ནས། ཇོ་བོ་བོད་དུ་བཞུགས་པར་རྒྱ་གར་རང་ནས་ངེས་པ་དཔེ་ཆ་དང་ཐུགས་དམ་གྱི་ལྷ་མ་ལུས་པ་སྤྱན་འདྲེན་ལུགས་དེས་ཀྱང་ཤེས་གསུངས་སོ། །འབྲོམ་རིན་པོ་ཆེ་ཐུགས་དགོངས་བཟང་བ་དང༌། དེ་དུས་ཀྱི་མི་རྣམས་ཀྱང་བསམ་པ་བཟང་བས་བོད་ཀྱི་མི་ཆེན་རྣམས་ཀྱིས་ཀྱང་སོ་སོ་ནས་གསེར་དང་རྟ་ལ་སོགས་པའི་ཁྲལ་བཀྲལ་ནས་བོད་ཀྱི་དབུས་གཙང་གི་མི་ཆེན་ཐམས་ཅད་ཀྱིས་ཇོ་བོ་རྗེ་བསུ་བ་ལ་བྱོན།

              དེའི་ཚེ་བོད་སྟོན་རྣམས་འབྱོན་པ་ལ་ཇོ་བོས་ཉིན་རེ་བཞིན་བྱ་ར་མཛད་ཙ་ན་བོད་སྟོན་རྣམས་ཀྱིས་ཚག་ཞུ་དག་བེར་གྱོན། རྟ་ལ་ཆིབས་བྱོན་པས་ཇོ་བོས་གཟིགས་མ་ཐག ཨུ་པ་སི་ཀ མི་མ་ཡིན་མང་པོ་བྱུང་ངོ་གསུངས་ནས་དབུ་རིལ་གྱི་གཏུམས།དེ་ནས་བོད་ཀྱི་མི་ཆེན་རྣམས་ཀྱིས་ཆོས་གོས་གྱོན་སེར་སྦྲེང་མཛད་ནས་ཕྱག་རྟེན་ཕུལ་བས་ཇོ་བོ་ཡང་དགྱེས་ནས་ཕྱག་ལན་མང་པོ་མཛད། དེ་ནས་ཇོ་བོ་རྗེ་དཔོན་གཡོག་ལ་བོད་སྟོན་རྣམས་ཀྱིས་སྣ་ལེན་དུ་བསྙེན་བཀུར་བཟང་པོ་ཞིག་མཛད་པས་རྒྱ་གར་གྱི་རབ་ཏུ་བྱུང་བ་བས་བོད་ཀྱི་རབ་བྱུང་འཚོ་བ་བཟང་བར་འདུག་གསུངས།

                                                                                                                                     རྩོམ་སྒྲིག་པ། མང་ར་བ།
             གསལ་འདེབས། 
                      རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                      དྲ་བའི་སྦྲེལ་ཐགhttp://www.tb1025.cn