དེ་ནས་འབྲོམ་རིན་པོ་ཆེས་གསོལ་བ་བཞེས་ནས་ཇོ་བོའི་གཟིམ་ཁང་དུ་བྱོན་པ་ན་ཇོ་བོ་རྗེས་བུམ་པ་དབུ་ཐོག་ཏུ་བཞག་སྟེ་དབང་བསྐུར་ཡང་ལེགས་པར་གནང༌། དེའི་ཚེ་དགེ་བཤེས་སྟོན་པས་ཇོ་བོ་ལ་དྲིལ་བ་གསུམ་མཛད། རྒྱ་གར་ན་པཎྜི་ཏ་ཇི་ལྟ་བུ་ཡོད་བྱ་བ་དང༌། ངའི་སྔ་མའི་ཆོས་དེ་ལམ་དུ་སོང་ངམ་མ་སོང་བྱ་བ་དང༌། བླ་མ་ཉིད་ཀྱི་སྤྱན་སྔར་བསྡད་ན་ཇི་ལྟར་མཆི་བྱ་བ་དང་གསུམ་ཞུས་པས། ཇོ་བོའི་ཞལ་ནས་རྒྱ་གར་ན་པཎྜི་ཏ་མཁས་པ་མང་པོ་ཡོད། ང་བོད་དུ་འོང་ཙ་ན་ཤར་ཕྱོགས་བྷཾ་ག་ལ་ནའང་ཉིན་རེ་མ་ཆད་པར་གྲུབ་ཐོབ་རེ་འབྱོན་གྱི་ཡོད། ཁྱོད་ཀྱི་སྔ་མའི་ཆོས་དེ་ལམ་དུ་ཡེ་མ་སོང༌། བླ་མའི་ཞབས་ཏོག་ལམ་དུ་སོང༌། ད་ཁྱོད་འདི་རང་དུ་སྡོད། ངའི་ལྷ་མོ་སྒྲོལ་མས་ཁྱོད་ལུང་བསྟན་པ་ཡིན་གྱི་ངའི་བཀའ་བརྒྱུད་འདི་ལ་བྱིན་རླབས་ཡོད་ཀྱི་གསུངས། དེའི་ཉིན་པར་གྱི་ཡོན་བདག་དེས་སྟོན་སྐལ་གྱི་མར་ཚལ་གཅིག་བྱིན་པ་དེ་བཞུ་ནས་དེའི་ནུབ་མོ་མར་མེ་མཚན་ཐུབ་ཅིག་དབུ་སྔས་སུ་བཞག དེ་ནས་ཇོ་བོ་ཞིང་གཤེགས་ཀྱི་བར་དང༌། གཤེགས་ནས་ཀྱང་རྭ་སྒྲེང་དུ་སྐུ་གདུང་ལ་དཀར་མེ་མཚན་ཐུབ་རྒྱུན་མ་ཆད་པར་འབུལ་བར་མཛད།

              དེ་ནས་ཕལ་ཆེན་སྡེ་པའི་ལུགས་ཀྱི་རས་ཡོལ་གྱིས་ནུབ་ལྷག་ཐུབ་པར་འདོད་པས། དེའི་ནུབ་མོ་ནས་དབུ་སྔས་སྦྲེལ་ནས་ཆོས་རྒྱུན་དུ་གསན་པར་མཛད། སང་ནང་པར་དགེ་བཤེས་སྟོན་པ་ལ་ཆེད་དུ་དགོངས་ནས་བྱང་ཆུབ་ལམ་གྱི་སྒྲོན་མ་ལ་ཆོས་ཐུན་གཅིག་མཛད་དེ་ཚར་གཅིག་གསུངས། དེ་ནས་བཟུང་སྟེ་ཆོས་གང་གསན་ཐམས་ཅད་སྐྱེས་བུ་གསུམ་གྱི་ལམ་གྱི་རིམ་པའི་སྟེང་དུ་འབབ་པར་མཛད། འབྲོམ་རིན་པོ་ཆེས་ཇོ་བོ་རྒྱ་གར་དུ་ཞག་གསུམ་ན་ཐེགས་པ་ལ་སླེབས་ནས་བོད་དུ་བཞུགས་པར་ཞུ་བ་ཕུལ་བས། ཇོ་བོའི་ཞལ་ནས། གྲགས་པ་ངན་པ་སྤོང་མི་བྱེད་བྱ་བ་བྱང་ཆུབ་སེམས་དཔའི་ཉེས་པ་ཡིན་པས་རྒྱ་གར་དུ་འགྲོ་གསུངས་ནས་མ་གནང༌། དེའི་དུས་སུ་རྒྱ་གར་ན་ཇོ་བོ་ཙམ་པ་ཡང་གསེར་ལ་དམིགས་ནས་བོད་དུ་སོང་བྱ་བ་དང༌། བོད་བ་ལང་དང་འདྲ་བའི་གསེབ་ན་ཆོས་ཐམས་ཅད་སྟོང་པ་ཉིད་ཡིན་ཟེར་ཞིང་འདུག་ལོ་བྱ་བ་དང༌། གསང་སྔགས་མ་རྒྱུད་ཀྱིས་འགྲོ་བའི་དོན་མཛད་ཀྱི་འདུག་ལོ་བྱ་བའི་གྲགས་པ་བྱུང་བས་དེ་རྣམས་བསལ་བའི་ཆེད་དུ་ཇོ་བོ་ཉིད་ཀྱང་རྒྱ་གར་དུ་བྱོན་པར་དགོངས་པ་ལྟར་མཛད།

              དེའི་ཚེ་འབྲོམ་རིན་པོ་ཆེས་ཇོ་བོ་བོད་དུ་འབྱོན་པར་བསྐུལ་བའི་ཕྱིར་དུ་ཐབས་མཁས་ཀྱིས་ངེད་ཀྱི་ལྷ་ས་དང་བསམ་ཡས་ལ་སོགས་པའི་གཙུག་ལག་ཁང་ན་སློབ་དཔོན་བོ་དྷི་ས་ཏྭ་དང་ཀ་མ་ལ་ཤཱི་ལ་ལ་སོགས་པས་གདན་དྲངས་པའི་རྒྱ་དཔེ་མང་པོ་དང་ཇོ་བོ་ཤཱཀྱ་མུ་ནེ་སོགས་རྟེན་ཁྱད་པར་ཅན་མང་དུ་བཞུགས་ཤིང་དགེ་འདུན་སྟོང་ཕྲག་འདི་ཙམ་བཞུགས་པ་སོགས་ཀྱི་ལོ་རྒྱུས་མང་པོ་སྙན་དུ་གསོལ། དེ་ཐམས་ཅད་ཀྱང་ཇོ་བོ་བོད་དུ་བྱོན་པ་ལ་དགྱེས་པ་ལགས་ཞུས་པས།ཇོ་བོ་ཤིན་ཏུ་དགྱེས་ནས་སྙིགས་མའི་དུས་སུ་ཚངས་པར་སྤྱོད་པ་གྲངས་མང་བ་དེ་ཙམ་པ་རྒྱ་གར་ནའང་མི་བཞུགས། དེ་ཙམ་བཞུགས་ན་ངེས་པ་ཁོ་ནར་དགྲ་བཅོམ་པ་ཡང་བཞུགས་ཏེ་མཆི་གསུངས། བྱིན་པ་འདར་ཕྲིལ་ཕྲིལ་བོད་ཀྱི་ཕྱོགས་སུ་ཕྱག་མཛད།

              དེ་ཐམས་ཅད་ཀྱང་ཁོ་བོ་འོང་བ་ལ་དགའ་བ་ཡིན་ན་ངས་དགེ་འདུན་གྱི་ཆོས་ལྡན་གྱི་ངག་མི་གཅོག་པར་དམ་བཅས་པ་ཡིན་གསུངས་པས་འབྲོམ་རིན་པོ་ཆེ་སྤོབས་པ་སྐྱེས་ནས་ཇོ་བོ་ལ་བོད་དུ་འབྱོན་པར་ཞུ་བ་ཕུལ། ཇོ་བོས་ཀྱང་ཞལ་གྱིས་བཞེས་པ་ལགས། དགེ་བཤེས་ལོ་ཙཱ་བའི་ཞལ་ནས།ངས་དམྱལ་བར་འགྲོ་མི་ནུས། སློབ་དཔོན་གནས་བརྟན་དང་ཆད་དོན་ཡོད་པ་ཐུགས་ལ་མངའ་མོད་གསུངས་བས་བོད་དུ་བཞུགས་དབང་མ་བྱུང༌། ཇོ་བོའི་ཞལ་ནས། དང་པོ་ཚུར་ལ་སྤྱན་མ་འདྲོངས་དོགས།དེ་ནས་ཕར་ལ་སྤྱན་མ་འདྲོངས་དོགས། ངས་ལོ་ཙཱ་བ་སྦྱོང་བྱ་བའི་ཞལ་ཀྱལ་ཡང་གསུངས༌། དེར་འབྲོམ་རིན་པོ་ཆེའི་ཐུགས་དགོངས་ལ་བོད་ཀྱི་མི་ཆེན་རྣམས་གྲོགས་སུ་སྦྲན་ལ་སྤྱན་དྲངས་དགོས་དགོངས་ནས་བཀའ་འཕྲིན་བརྫངས་པ་ནི།

             ཤིང་རྟའི་དབྱིབས་འདྲ་འཛམ་གླིང་གི །ཕྱེ་བྲག་བརྗིད་ལྡན་གངས་རིའི་བྱང༌། །ལོ་ཧི་ཏ་འགྲམ་རིན་ཆེན་ཁུངས།ཁ་བ་ཅན་ཞེས་མིང་གྲགས་ན། །བློ་ཆེན་སྟོབས་ལྡན་མི་བསྲུན་པ། །བོད་ཅེས་བྱ་བ་གནས་པའི་ཕྱིར། །མི་རྒྱལ་བྱང་ཆུབ་སེམས་དཔའ་ཆེ། །དཔའ་ཆེན་མང་པོ་འཁོར་བཅས་ཀྱིས། །སྨན་གདགས་ཐབས་སུ་དམ་ཆོས་བསྒྱུར། །རྒྱུ་བཟང་བཀོད་ལེགས་གཙུག་ལག་ཁང༌། །བསམ་ཡས་ལ་སོགས་གནས་མཆོག་ན། །སྔོན་རྒྱལ་འཕྲུལ་རྗེའི་དགོངས་བཀང་ཕྱིར། །བསྟན་པ་བདུད་རྩི་རྒྱས་མཛད་ཅིང༌། །རྒྱལ་སྲས་འདྲེན་པ་དཀྱེལ་ཆེ་བ། །མི་ཡི་རྒྱལ་པོ་ཤཱཀྱའི་སྲས །།ལྷ་བཙུན་བོ་དྷི་རཱ་ཛ་དང༌། །དང་པོའི་དགེ་སློང་ལུགས་འབྱིན་དཔོན། །བཙུན་ཆེན་ཡེ་ཤེས་བློ་གྲོས་དང༌། །ཐེག་ཆེན་གདུང་བརྒྱུད་བརྟན་མཛད་པའི། །ཐེག་ཆེན་ཀ་བ་རྣམ་གསུམ་དང༌། །མིག་འབྱེད་དགེ་བཤེས་རྣམ་གཉིས་ཀྱི། །རྗེས་སློབ་དཔལ་ལྡན་བཅུ་གཉིས་དང༌། །ཆོས་འཁོར་ཁྲིམས་བཞིན་སྐྱོང་མཛད་པའི། །རིང་ལུགས་ཆེན་པོ་གཉིས་པོ་དང༌། །ཆོས་གྲྭའི་སློབ་དཔོན་ཐུགས་རྒྱལ་ཅན། །ཀ་བ་གར་མི་མཆེད་གཉིས་དང༌། །དགེ་བཤེས་ཆེ་རྣམས་དགོངས་སྐྱོང་པའི། །ཀུན་ཕན་དབང་ཕྱུག་རྒྱལ་མཚན་དང༌། །གནས་བརྟན་བན་སྐྱའི་རེ་གནས་པ།།ཤཱཀ་གཞོན་རྒྱལ་བའི་སྲས་གཉིས་དང༌། །མཁས་བཙུན་ཆེན་པོར་སྙན་གྲགས་པ། །ལེགས་པའི་ཤེས་རབ་ལ་སོགས་པའི། །འཕགས་པའི་དགེ་སློང་དགེ་འདུན་ཆེ། །སློབ་མ་ཡོན་བདག་འཁོར་བཅས་ལ། །དགེ་བསྙེན་རྒྱལ་བའི་འབྱུང་གནས་ཀྱིས། །གུས་པས་སྔོན་འགྲོའི་མཆེད་གསོལ་པ།ཁྱེད་ཀྱི་བྱང་ཆུབ་སྤྱོད་པ་ལ། །བར་ཆད་མི་བདེ་མི་མངའ་འམ། །མདོར་བསྡུས་གཅེས་པའི་དོན་གསོལ་བ། །རྒྱ་གར་ཡུལ་གྱི་མཁས་བཙུན་མཆོག །ཡོན་ཏན་མཐའ་ཡས་རྒྱས་མངའ་ཞིང༌། །ཡེ་ཤེས་མཐའ་ཅན་མཚན་ལྡན་པའི། །མཁས་པ་ཆེན་པོ་འདིར་བྱོན་པ། །ཁྱེད་ཀྱིས་ལོ་རྒྱུས་མཁྱེན་པ་ལགས། །དེ་ལ་དངོས་ཉིད་དད་འཁྲུངས་ནས། །ལྷ་བཙུན་བཀའ་སྩལ་མཆིས་པ་ཡིས། །སྔར་ནི་དབུས་སུ་གཤེགས་ཞུས་ནས། །ཕར་རིངས་གསུངས་ནས་བཀའ་མ་གནང༌། །སླད་ནས་བལ་ཡུལ་ཤུལ་ཁ་ནས། །དབུས་ཀྱི་དགེ་འདུན་རྒྱུས་གསོལ་བས། །དད་ནས་ཕྱག་འཚལ་དགྱེས་གྱུར་ཏེ། །ཚངས་སྤྱོད་གྲངས་མང་དེ་ལྟ་བུ། །རྒྱ་གར་ཡུལ་ནའང་དཀོན་ཞེས་གསུངས། །དེས་ཀྱང་དངོས་ཉིད་སྤོབས་སྐྱེས་ཏེ།ཁྱེད་ཀྱང་དད་པར་ཁུམས་ལགས་པས། །ཡང་དང་ཡང་དུ་ཞུས་པ་ལས། །ང་ཡི་དགེ་འདུན་དོན་སྒྲུབ་ཅིང༌། །བཀའ་མི་གཅོག་པར་དམ་བཅས་ཕྱིར། །དགེ་འདུན་དག་ལ་གྲོས་ཡོད་ཅིང༌། །སྤྱན་འདྲེན་འོང་ན་འགྲོ་གསུངས་བས། །དགེ་སློང་གཞོན་ནུ་བློ་རྣོན་པོ། །ལོ་ཙཱ་སྨན་ཐོགས་གཅིག་མཆིས་ན། །ཁྱེད་ཅག་དམ་ཆོས་དོན་གཉེར་རྣམས། །མོས་ཤིང་བཀའ་གྲོས་མཐུན་པ་ན། །སྤྱི་སྒོས་གང་བདེའི་སྤྱ་འདྲེན་པ། །དགེ་སློང་རྟ་མང་ཞལ་མཐོང་བཅས། །སྟོན་དུས་ཚུན་ཆད་འདིར་བྱོན་མཛོད། །བྱ་བ་དང༌།

                                                                                                                               རྩོམ་སྒྲིག་པ། མང་ར་བ།
             གསལ་འདེབས། 
                        རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                        དྲ་བའི་སྦྲེལ་ཐགhttp://www.tb1025.cn