ལམ་བཟང་གསལ་མཛད་སྟོན་པ་རིན་པོ་ཆེ། ཞེས་བསྔགས་པ། འབྲོམ་སྟོན་པ་རྒྱལ་བའི་འབྱུང་གནས་ཞེས་མཚན་ཡོངས་སུ་གྲགས་པ་དེ་ནི། སྔོན་བསྐལ་པ་དཔག་ཏུ་མེད་པའི་སྔ་རོལ་ནས་ཐུགས་བསྐྱེད་དེ་རྫོགས་སྨིན་སྦྱང་གསུམ་མཐར་ཕྱིན་ནས་འཕགས་པ་ཐུགས་རྗེ་ཆེན་པོ་ཞེས་སངས་རྒྱས་ཀྱི་ཞིང་ཐམས་ཅད་དུ་གྲགས་ཤིང་སྤྲུལ་པའི་བཀོད་པས་སངས་རྒྱས་ཀྱི་ཞིང་ཐམས་ཅད་དང་མ་དག་པའི་འཇིག་རྟེན་གྱི་ཁམས་ཐམས་ཅད་ཁྱབ་ཅིང༌། བདེ་བ་ཅན་དུ་མགོན་པོ་འོད་དཔག་ཏུ་མེད་པའི་སྲས་ཀྱི་ཐུ་བོའི་ཚུལ་བཟུང་བ་སོགས་ཕྱོགས་བཅུའི་སངས་རྒྱས་ཐམས་ཅད་ཀྱི་དྲུང་ན་སྲས་ཀྱི་ཐུ་བོའི་ཚུལ་འཛིན་པ་དང༌།ཞིང་ཁམས་ལ་ལར་འཚང་རྒྱ་བའི་ཚུལ་སྟོན་པ་དང༌། འཇིག་རྟེན་གྱི་ཁམས་ལ་ལར་འཁོར་ལོས་བསྒྱུར་བའི་རྒྱལ་པོ་དང༌། ལ་ལར་བློན་པོ། ལ་ལར་སྡེ་དཔོན། ལ་ལར་མཁན་པོ། ལ་ལར་ཕ་མ། ལ་ལར་བྱ་དང་རི་དྭགས་ཚུན་ཆད་ཀྱི་ཚུལ་བཟུང་སྟེ་གང་ལ་གང་འདུལ་གྱི་སྐུའི་བཀོད་པས་སེམས་ཅན་གྱི་དོན་མཛད་བཞིན་པ་ལས་མི་མཇེད་འཇིག་རྟེན་གྱི་ཁམས་འདིར་སྐལ་བཟང་གི་སངས་རྒྱས་སྟོང་གང་དུ་འཚང་རྒྱ་བའི་ཚུལ་སྟོན་པའི་གནས་འཛམ་བུའི་གླིང་གི་ལྷོ་ཕྱོགས་ན་པོ་ཏ་ལ་ཞེས་བྱ་བའི་སྤྲུལ་པའི་ཞིང་ཁམས་ཞིག་ན་བཞུགས་པ་ལས། ཕྱོགས་བཅུའི་རྒྱལ་བ་སྲས་དང་བཅས་པ་གདན་འཛོམ་སྟེ་བྱང་ཆུབ་སེམས་དཔའ་སྒྲིབ་པ་རྣམ་སེལ་ཕོ་ཉར་མངགས་ཏེ་བྱང་ཕྱོགས་ཁ་བ་ཅན་གྱི་ལྗོངས་འདིའི་གདུལ་བྱ་རྒྱལ་བ་གཞན་གྱིས་འདུལ་བར་མ་ནུས་པའི་དམུ་རྒོད་ཅན་འདི་རྣམས་ཐུགས་རྗེ་ཆེན་པོ་ཉིད་ཀྱིས་འདུལ་བར་འོས་སོ་ཞེས་བོད་ཁམས་ཀྱི་མགོན་པོར་འབྱོན་པའི་ཐུགས་རྗེ་བསྐུལ།

              དེ་བཞིན་དུ་ཆོས་རྒྱལ་དཀོན་མཆོག་འབངས་ཨྱོན་གྱི་ཡུལ་དུ་བྱོན་པའི་ཚེ་བླ་མ་དྲི་མ་མེད་པ་མཁའ་འགྲོ་བྱེ་བའི་ཚོགས་དང་བཅས་པས་ཀྱང་ཁ་བ་ཅན་དུ་བྱོན་ནས་སེམས་ཅན་གྱི་དོན་མཛད་དགོས་པར་བསྐུལ་བ་ལ་བརྟེན་ནས་འཕགས་པ་ཐུགས་རྗེ་ཆེན་པོས་མི་རྗེའི་ཚུལ་བཟུང་ནས་བོད་དུ་རྒྱལ་ཁྲིམས་བཙན་པོས་ཐམས་ཅད་དབང་དུ་བསྡུས། དགེ་བཅུའི་ཁྲིམས་ཀྱིས་ཆོས་ཀྱི་སྣོད་རུང་དུ་བྱས་སངས་རྒྱས་ཀྱི་བསྟན་པའི་གཞི་ཆགས་པ་ན་བླ་མ་དྲི་མ་མེད་པ་རྒྱ་གར་དུ་གནས་ལྔ་མཁྱེན་པའི་པཎ་ཆེན་དཔལ་མར་མེ་མཛད་ཡེ་ཤེས་ཞེས་བྱ་བར་སྐུ་འཁྲུངས་ནས་གདུལ་བྱ་འདུལ་བའི་དུས་ལ་བབ་པ་ན། ཐུགས་རྗེ་ཆེན་པོ་འབྲོམ་རྗེར་སྐུའི་བཀོད་པ་བསྟན་ཏེ། དེ་ཡང་འབྲོམ་རིན་པོ་ཆེ་གང་དུ་འཁྲུངས་པའི་གནས་ནི།གངས་རིའི་ཕྲེང་བས་ཡོངས་བསྐོར་ས་ཡི་གཞི། །ལྷ་ཆེན་ཟུར་ཕུད་ལྔ་པས་བསྟེན་པའི་འདབས། །རྗེའུའི་རིགས་ལས་འབྲོམ་ཞེས་རབ་གྲགས་པར། །གཙོ་བོའི་རིགས་སུ་འཁྲུངས་ལ་ཕྱག་འཚལ་ལོ། །ཞེས་གསུངས་པ་ལྟར་དབུ་རུའི་བྱང་གི་ཕྱོགས་ལྷ་ཆེན་ཐང་ལྷའི་ཞོལ།སྟོད་ལུང་གི་ཕུ་རྩ་སྐྱེ་མོའི་སའི་ཆར་ཡབ་སྐུ་གཤེན་ཡག་གཞེར་འཕེན་དང༌། ཡུམ་ཁུ་འོད་བཟའ་ལན་ཅིག་མ་གཉིས་ཀྱི་སྲས་སུ་ཤིང་ཕོ་འབྲུག་གི་ལོ་སྐུ་འཁྲུངས། དེ་ཡང་ཡབ་ཀྱིས་མ་ཡར་གཅིག་བཞེས་ཏེ་དེ་དང་འགྲོགས་ནས་ཡོད་པ་ལ། དེ་དང་ཐུགས་མ་མཐུན་པའི་རྐྱེན་གྱི་བསྐུལ་ཏེ་གཞུ་རུ་ཞང་པོའི་སར་ལོ་བཅུ་གསུམ་ཙམ་ལ་བྱོན།

              དགེ་བཤེས་གཡུང་ཆོས་མགོན་བྱ་བ་ལ་ཀློག་ཡིག་བསླབས། དེར་ལོ་བཞི་བཞུགས།དགུང་ལོ་བཅུ་བདུན་ལོན་ཙ་ན་ཇོ་བོ་སེ་བཙུན་གཞོན་ནུ་གྲུམ་གྱི་མཁན་བུ་ཆེན་པོ་དེ་རྒྱ་གར་དུ་བཞུད་པའི་ཐུགས་དགོངས་ཀྱིས་བྱོན་པ་དང་གདན་འཛོམས་པས་ཤིན་ཏུ་དད་པར་གྱུར་ཏེ་བླ་མ་སེ་བཙུན་ལ་ཇོ་བོ་ཐུགས་རྗེ་ན་པོ་ཡི་གེ་དྲུག་པའི་གདམས་པ་ཞུས། དེ་ནས་སེ་བཙུན་ཡར་བཞུད་བལ་ཡུལ་དུ་བྱོན་ནས་ཕྱི་རོལ་པའི་པཎྜི་ཏ་ཞིག་དང་ཆོས་གཏམ་བྱས་པས་སེ་བཙུན་རྒྱལ། ཕྱི་རོལ་བའི་མངོན་ཤེས་དང་ཁོང་གི་དཔྱད་འགྲན་པས་སེ་བཙུན་མ་ཐུབ་ནས་དེར་སེ་བཙུན་གྱི་ཐུགས་དགོངས་ལ་ཕྱི་རོལ་བས་ངན་བྱས་དོགས་པ་དང༌། རྒྱ་གར་ནའང་ང་རང་བས་མཁས་པ་མེད་དམ་སྙམ་ནས་ཕྱིར་ལོག་བྱོན་པ་དང་གདན་འཛོམས་པས་འབྲོམ་རིན་པོ་ཆེས་བླ་མ་སེ་བཙུན་ལ་ཕྱག་ཕྱིར་འཁྲིད་པར་ཞུས་པས་སང་ཕོད་ཚོང་པ་དང་འགྲོགས་ལ་ཤོག ད་རེས་ཁྲིད་ན་བྱིས་པ་བརྐུས་ནས་ཁྲིད་ཟེར་དུ་འོང་གསུངས། དེ་ནས་འབྲོམ་རིན་པོ་ཆེས་རྒྱལ་གྱི་ཞང་སྣ་ནམ་རྡོ་རྗེ་དབང་ཕྱུག་ལ་དགེ་བསྙེན་གྱི་སྡོམ་པ་མནོས་ཏེ་མཚན་རྒྱལ་བའི་འབྱུང་གནས་སུ་གསོལ། །

              དགུང་ལོ་བཅུ་དགུ་པ་ལ་བབ་པ་ན་མདོ་ཁམས་ཕྱོགས་སུ་འགྲོ་བའི་ཚོང་པ་དང་འགྲོགས་ཏེ་མདོ་ཁམས་ལྡན་མའི་ཡུལ་དུ་བྱོན་ནས་བླ་མ་སེ་བཙུན་བསམ་སྦྱོར་གཉིས་ཀྱི་སྒོ་ནས་ཚུལ་བཞིན་དུ་བསྟེན་ཏེ།སངས་རྒྱས་ཐམས་ཅད་མཆོད་པ་བས་བླ་མ་མཆོད་པ་ཕན་ཡོན་ཆེའོ་ཞེས་གདུལ་བྱ་རྣམས་ལ་འདོམ་པའི་ཕྱིར་བླ་མ་སེ་བཙུན་གྱི་ནང་གི་ཞབས་ཏོག་ཕྱེ་འཐག་པ་ཡན་ཆོད་དང༌། ཕྱི་རོལ་ཏུ་རྟ་ཕྱུགས་མང་པོ་ཡོད་པས་ཉིན་པར་དེ་རྣམས་ཀྱི་རྫི་བོ་མཛད། ནུབ་མོ་རྟ་བཟང་ལ་ཞོན་འཁོར་གསུམ་ཚེར་མ་འདྲ་བ་བྱས་ཏེ་མེལ་ཚེ་མཛད། ཕྱེ་འཐག་པ་ན་དཔེ་ཆ་རང་ཐག་གི་སྟེང་དུ་བཞག་སྟེ་གཟིགས་པ་ལ་སོགས་པའི་སློབ་གཉེར་ལ་བརྩོན་པར་མཛད། ཕྱེ་བཏགས་པས་ཕྱག་མཐིལ་གླང་རྒན་གྱི་མཇིང་པ་ལྟར་སོང༌། ཇོ་བོ་སེ་བཙུན་དེ་ཡོ་བྱད་ལ་ཆགས་པ་མི་མངའ། གཏོང་བར་ཡང་མི་མཛད་ཀྱང་མ་དད་པ་མ་བྱུང༌། སེ་བཙུན་གྱི་བྱ་བྱེད་ལ་ཡང་དཀའ་བ་མ་བྱུང་གསུངས། འབྲོམ་རིན་པོ་ཆེ་འདི་ནི་ལམ་གྱི་རྩ་བ་བཤེས་གཉེན་བསྟེན་པའི་ཚུལ་ལ་རྒྱལ་བ་སྲས་བཅས་ཀུན་གྱིས་བསྔགས་པར་འོས་པ་ཞིག་བྱུང་སྟེ། ཤེར་ཕྱིན་གྱི་མདོ་སྡེ་རིན་པོ་ཆེར་བཤེས་གཉེན་བསྟེན་པའི་ཚུལ་ལ་བྱང་ཆུབ་སེམས་དཔའ་རྟག་ཏུ་ངུ་བསྔགས་འོས་སུ་མཛད་པ་ལྟར་འབྲོམ་རིན་པོ་ཆེ་འདི་ཡང་བྱང་ཆུབ་སེམས་དཔའ་རྟག་ཏུ་ངུ་དང་ལུས་ཀྱི་རྐང་བཏང་མ་བཏང་གི་ཁྱད་ལས་མེད་པ་ཞིག་བྱུང༌། དེའི་ཚེ་བླ་མ་སེ་བཙུན་གྱི་སྤྱན་སྔར་མདོ་སྔགས་ཀྱི་གཞུང་མཐའ་ཡས་པ་ལ་སྦྱངས་ཤིང༌། ཁྱད་པར་བདག་ཉིད་ཆེན་པོ་འཕགས་པ་ཀླུ་སྒྲུབ་ཡབ་སྲས་ཀྱི་གཞུང་དབུ་མའི་སྐོར་དང༌། བྱམས་ཆོས་སྡེ་ལྔ་དང༌། ཐོགས་མེད་སྐུ་མཆེད་ཀྱི་གཞུང་རྣམས་སོགས་སྤྱོད་ཕྱོགས་རྣམས་ལ་རྩལ་དུ་ཐོན་པར་སྦྱངས་ཏེ་ཆོས་གྲྭར་དགེ་འདུན་བྱིངས་དང་བགྲོ་གླིང་མཛད་པ་ན་བདག་ཉིད་ཆེན་པོ་འདི་ལ་སུས་ཀྱང་ལན་འདོན་སྤོབས་པར་མ་ནུས་ནས་མཁས་པའི་ཕུལ་དུ་ཕྱིན་པར་གྲགས། དེའི་ལོ་དགེ་འདུན་རྣམས་ཀྱིས་མཁས་པ་ཆེན་པོ་འདི་ལྟ་བུ་རྟ་བོང་གི་རྫི་བོ་དང་ཡོས་འཐག་པ་སོགས་ངན་ལས་ལ་བཀོལ་དུ་ཕངས་པས་ད་ཕྱིན་ཆད་ངན་ལས་བགྱི་མི་དགོས་པར་ཆོས་གྲྭར་ཕེབས་ཆོག་པ་དགོས་ཞེས་བླ་མ་སེ་བཙུན་ལ་ཞུས་ནས་དེ་བཞིན་དུ་གནང༌། དུས་དེའི་ཚེ་ཁུ་སྟོན་བརྩོན་འགྲུས་གཡུང་དྲུང་དང་རྔོག་ལེགས་པའི་ཤེས་རབ་གཉིས་ཀྱང་ཆོས་གྲྭ་དེར་བཞུགས་པས་ཁུ་རྔོག་འབྲོམ་གསུམ་ཞེས་པའང་ཁམས་སུ་གྲགས་པ་ཡིན། དེ་ནས་འབྲོམ་རིན་པོ་ཆེའི་ཐུགས་དགོངས་ལ། དལ་འབྱོར་གྱི་མི་ལུས་ཐོབ་པར་དཀའ་བ་རྙེད་དུས་འདིར་ཆོས་རྣལ་མ་ཞིག་བྱེད་ན་འདི་ཙམ་གྱི་ཆོག་གམ་མི་ཆོག རྒྱ་གར་མཁས་པ་ཞིག་ལ་འདྲི་བ་ལ་བར་དུ་ལོ་ཙཱ་མི་དགོས་པ་ཞིག་བྱ་དགོངས་ཏེ་པཎྜི་ཏ་སྒྲའི་ཚེར་མ་ཞེས་བྱ་བ་སྨྲི་ཏི་ཛྙཱ་ན་ཀིརྟི་ཕྱོགས་དེར་བྱོན་པ་ལ་སཾ་སྐྲ་ཏའི་སྐད་དང་རྒྱ་ཡིག་ཀྱང་བསླབས་པས་ལེགས་པར་མཁྱེན། དེ་དུས་འབྲོམ་རིན་པོ་ཆེས་པཎྜི་ཏ་སྨྲི་ཏི་ལ་རྒྱ་གར་ན་ད་ལྟ་པཎྜི་ཏ་ཆེ་བ་ཇི་སྐད་བྱ་བ་ཡོད་དྲིས་པས། ཆེ་བགྲེས་ནཱ་རོ་པ་དང་ཤཱནྟི་པ་བྱ་བ་ཡོད། དེ་གཉིས་ད་ཙམ་འདས་སམ། ད་ལྟ་པཎྜི་ཏ་དཱི་པཾ་ཀ་ར་བྱ་བ་རྒྱལ་རིགས་ལས་རབ་ཏུ་བྱུང་བ་ཞིག་ཡོད་དེ། དེ་རང་ཆེ་བར་འོང་ཟེར་བས་འབྲོམ་རིན་པོ་ཆེའི་ཐུགས་ལ་དེ་དང་མཇལ་ན་དགའ་བ་ལ། དེ་དང་ཅི་མཇལ་བྱ་དགོས་སྙམ་པ་བྱུང༌།

              དེ་ལྟར་འབྲོམ་རིན་པོ་ཆེས་མདོ་ཁམས་སུ་བླ་མ་སེ་བཙུན་གྱི་སྤྱན་སྔར་ལོ་ཉི་ཤུའི་བར་དུ་བཞུགས་ཏེ་མདོ་སྔགས་ཀྱི་ཆོས་མང་དུ་གསན་པས་མཁས་པའི་ཕུལ་དུ་ཕྱིན། དགེ་བསྙེན་ཆོས་འཕེལ་དུའང་གྲགས་པ་བྱུང་སྟེ། དེ་ལྟར་འབྱུང་བར་རྒྱལ་བ་ཉིད་ཀྱིས་མདོ་ལས་ལུང་བསྟན་པ་ནི། སྙིང་རྗེ་པད་དཀར་དུ།བྱང་ཕྱོགས་སུ་བསྟན་པ་ལ་དད་པ་ལྷར་སྐྱེ་ཞིང༌། རབ་བྱུང་ཆོས་བཞིན་མི་སྤྱོད་པ་ལོག་པར་ལྷུང༌། དེར་དགེ་བསྙེན་ཆོས་འཕེལ་ཞེས་པ་རྫུ་འཕྲུལ་དང་ལྡན་པ་འབྱུང༌། ཞེས་པ་དང༌། སངས་རྒྱས་ཕལ་པོ་ཆེར། བྱང་ཕྱོགས་སུ་དགེ་བསྙེན་ཆོས་འཕེལ་བྱ་བ་འབྱུང་ཞེས་ལུང་བསྟན་པ་དང་མཐུན་ནོ། །

                                                                                                                                  རྩོམ་སྒྲིག་པ། མང་ར་བ།
             གསལ་འདེབས། 
                        རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                       དྲ་བའི་སྦྲེལ་ཐགhttp://www.tb1025.cn