ཡོལ་སྐུ་མཆེད་གསུམ། ཡོལ་སྐུ་མཆེད་གསུམ་ནི། ཡོལ་ཆོས་དབང་། ཡོལ་དྲང་སྲོང༌། ཡོལ་ཐོགས་འབེབས་ཏེ། གསུམ་ག་ཇོ་བོའི་དངོས་སློབ་ཡིན་ཡང༌། དང་པོ་ཇོ་བོ་ཉན་ཚོར་ཕེབས་དུས་ཇོ་བོའི་ཞལ་ནས། ད་ནང་ཐོ་རངས་ནམ་མཁའ་ལ་ཧྲཱིཿདཀར་པོ་སྒྲ་དང་བཅས་པ་ཞིག་བྱུང༌། དེ་བཅུ་གཅིག་ཞལ་གྱི་སྐུ་ལི་མ་འདི་ལ་ཕོག དེ་ལས་འོད་འཕྲོས་བོད་ཐམས་ཅད་འོད་ཀྱིས་ཁྱབ་ནས་འོད་དེ་བན་ཆུང་གཞོན་ནུ་གཅིག་ལ་ཕོག་པས་དེའི་སྒྱུ་ལུས་འོད་གསལ་དུ་ཤར་བ་རྨིས་གསུངས། ཉི་མ་རྩེ་ཤར་ལ་ཡོལ་ཆོས་དབང་བཙུན་ཆུང་ལོ་བཅུ་དྲུག་ལོན་པ་གཅིག་གིས་དར་སེར་པོ་ཞིག་ཕུལ། བདག་ལ་ཐུགས་རྗེ་ཆེན་པོའི་གདམས་ངག་ཅིག་ཞུ་ཟེར་བས་ཇོ་བོ་དགྱེས་ནས་བཅུ་གཅིག་ཞལ་གྱི་སྐུ་དེ་ཡང་གནང༌། སྤྱན་རས་གཟིགས་ཀྱི་ཆོས་སྐོར་རྣམས་རྫོགས་པར་གནང༌། དེ་ནས་རང་གི་གནས་སུ་ཇོ་བོ་སྤྱན་དྲངས་ཏེ་ཟླ་བ་གསུམ་དུ་ཞབས་ཏོག་མཛད།

              དེའི་ཚེ་ཚོགས་ཆོས་སུ་ཕ་རོལ་ཏུ་ཕྱིན་པ་གསུངས། ལྐོག་ཆོས་སུ་ཡོལ་མཆེད་གསུམ་ལ་ཀྲི་ཡའི་སྒྲུབ་ཐབས་རྣམས་གསུངས། ཡོལ་གྱིས་ཇོ་བོ་ལ་སྲུང་བ་ཟབ་མོ་ཞིག་ཞུ་ཞུས་པས་མ་ཎི་གསུངས། དེས་མི་འོང་ཞུས་པས་མི་གཡོ་བ་གསུངས། སྟོན་པས་བྱིན་རླབས་ཆེ་བ་ཞིག་ཞུ་བྱས་པས། ཡི་གེ་དྲུག་པ་དང་ཞལ་བཅུ་གཅིག་པ་གསུངས། ལོ་ཙཱ་བས་མཐུ་ཆེ་བ་ཞིག་ཞུ་ཞུས་པས་གཤིན་རྗེ་གཤེད་གསུངས། སྒྲུབ་ཐག་ཉེ་བ་ཞིག་ཞུས་པས་སྒྲོལ་མ་གསུངས། ཡོལ་གྱིས་ཐུགས་རྗེ་ཆེན་པོ་ཞི་ཁྲོའི་སྐོར་ཞུས་ནས་སྒྲུབ་པ་མཛད་པས་ཟླ་བ་དྲུག་ནས་ཞི་བའི་ལྷའི་ཞལ་གཟིགས། དེ་ནས་ཁྲོ་བོའི་ཞལ་གཟིགས། ཐུགས་རྗེ་ཆེན་པོའི་ཆོས་སྐོར་ལ་ཡོལ་ལས་མཁས་པ་མེད་གསུངས། ཕྱིས་དབུས་སུ་ཡང་བྱོན་ཏེ་ཆོས་མང་དུ་གསན།ཁྱད་པར་རྟ་མགྲིན་ཤྭ་ན་བཞི་སྐོར་གྱི་སྒྲུབ་ཐབས་དེ་ལོ་ཙཱ་བ་དང་ལྷ་བཙུན་པ་སོགས་ཀྱིས་ཞུས་ཀྱང་མ་གནང་བར་ཡོལ་ལ་འདི་སྙིང་རྗེའི་ལྷ་ཡིན་ཁྱོད་སྙིང་རྗེ་ཆེ་བས་སྟེར་བ་ཡིན་གསུངས་ནས་གནང༌། ཡོལ་ལ་བརྟེན་ནས་ཇོ་བོ་ལུགས་ཀྱི་ཐུགས་རྗེ་ཆེན་པོ་གཙོ་འཁོར་གསུམ་གྱི་གདམས་པ་གྲུབ་མཐའ་རིས་སུ་མ་ཆད་པ་དག་ལ་རྒྱ་ཆེར་འཕེལ་ལོ། །

              རོང་པ་འགར་དགེ་ནི། རྟེན་དགེ་བསྙེན་ཡིན། ཇོ་བོ་སྤྱན་འདྲེན་ཏུ་མང་ཡུལ་དུ་བྱོན། བསམ་ཡས་སུ་ཡང་བྱོན་ཏེ། གསང་སྔགས་ཀྱི་གདམས་པ་མང་དུ་གསན་ཞིང་ཕྱིས་ཇོ་བོ་རྗེ་སྙེ་ཐང་དུ་བཞུགས་པའི་དུས་ཉང་རོའི་སྟོན་པ་བསོད་ནམས་ཡེ་ཤེས་དང་ལྷན་དུ་ཕེབས། དེ་ནས་དགེ་བཤེས་སྟོན་པས་མཆིམས་ཕུ་ནས་ལོ་ཙཱ་བ་སྤྱན་དྲངས། སྟོན་པ་དགེ་བས་ཞུས་ནས་དཔལ་དགྱེས་པ་རྡོ་རྗེ་སློབ་དཔོན་ཤནྟི་པས་མཛད་པའི་ལྷན་ཅིག་སྐྱེས་པའི་རྣལ་འབྱོར་དང༌། ཇོ་བོ་རྗེ་ཉིད་ཀྱིས་མཛད་པའི་ཌོམྦི་ཧེ་རུ་ཀའི་བདུད་རྩིའི་འོད་ཀྱི་འགྲེལ་པ་དང༌། དཔལ་འཁོར་ལོ་སྡོམ་པའི་གཞུང་མང་པོ་དང༌། དཔལ་མཧཱ་མ་ཡའི་སྒྲུབ་ཐབས་སློབ་དཔོན་ཀུ་ཀུ་རི་པ་དང་ཤནྟི་པས་མཛད་པ་ལ་སོགས་པ་གསན། སྤྱིར་ན་འགར་འགོས་གཉིས་ལ་གསང་སྔགས་མཐའ་དག་གི་གདམས་པ་མ་ལུས་པར་གནང༌། ཁྱད་པར་དུ་གསང་སྔགས་འཕགས་སྐོར་ལ་རྩལ་ཐོན། ལཱུ་ཧི་པའི་དབང་བཀའ། ལྷ་སྲས་ཀྱི་འགྲེལ་པའི་བཤད་བཀའ། ཆོས་ཚན་དགུ་ལ་སོགས་པའི་རྫོགས་རིམ་ཡོངས་སུ་རྫོགས་པ་གསན་པ་ངང་གི་ཐུགས་ཉམས་སུ་བཞེས་ཤིང་སྐལ་བ་དང་ལྡན་པ་གཞན་དག་ལའང་རྒྱ་ཆེར་སྤེལ་ལོ། །

                                                                                                                                       རྩོམ་སྒྲིག་པ། མང་ར་བ།
             གསལ་འདེབས།
                    རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                   དྲ་བའི་སྦྲེལ་ཐགhttp://www.tb1025.cn